Read Yambeta Pigólí 26 Bible Online

Pigólí 26 - Yambeta bible

Pigólí 26

¹Agɛlɛ́ʼpa yɛɛ́dɛánɛ na Póol ɔnɔ́: «Olɛ filí lɛ́ úsiəd tɔgɛ́ɛ́, wáánɔna.» Póol aáság kudə́əmini ombɔg a mɔɛn agaánɔna. Yiísə́ə́ ɔnɔ́:

²«Nkúm Agɛlɛ́ʼpa, a nkə kiim kɛ́ Yúdɛn ɛmɛ́sɔ́mɛn, ndɛ na tɔnyɔ́g kɛ́fɔlɛ́ wɔnɔ́ ná a wɔɔ́s ó naánɛ́, mbádɛ́lɛm a udi wááŋ lɛ́ nyáánɔna.

³Mbííʼkíni kolaŋ kɛɛn na tɔnyɔ́g lɛ́ wɛ waálɛŋ mandoŋá má Yúdɛn miim kɔŋɛʼ. Waálɛŋ tɛn pɛbán pɛɔ́bɔn pɛ́ pálɛanɛɛ́ na musuŋ a pɛ́lɛ́. Mbágoyɔ́sɔ́gɔ́lɔ́nɛ́ɛ́ anɛ́ɛ́n, sɛ́gɔɔ kumin ɔʼtɛ́m wááŋ a kaadɛ, wɛ́njoob.

⁴«Pɔɔ́n pá Yúdɛn piim páálɛŋ ɔlaa wáam əgəə́siəd əgín kɔ a nɛnyɔmmɔ́n nɛ́am. Páálɛŋ wɔnɔ́ ná əgín kɔ́gɔ́ɔg kalaʼ njɛ́ɛ əgəə́siəd a kɛgaágadɛ kɛ́ pɔɔd pá a nigúu nɛ́am na a pálɛ́ɛg ɛ Yolósalɛm.

⁵Pámɛ́ndɛŋ əgín kɔ́gɔ́ɔg kalaʼ. Pámaʼkɔnyɔ́ŋɛn, pálɛ págɛʼtɛ́lɛmɛn mbaasɔ́ lɛ́ njɛ́ɛ a ondáŋ wó ɛgɔny ɛ́ Pafalɛsɛyɛ́ɛŋ. Ɛgɔny yɛ́ ɛ́dɛʼkɛ́ɛ əgudiŋií əngiŋ a pɛbán pɛ́ pɛ́adɛ́ʼtɛg kəə́liʼtiniʼ kuə́s.

⁶Nɛ́gɔŋ yɛ́ɛnɛ oʼ, ndɛ oʼtɛ́lɛ́máán a udi wááŋan a pɛyɔm lɛ́ ndɛ agomɛna pɛda na Táán a nkə kɛ́ yɛɛ́gágɛn pɛmbáa pə́ə́s.

⁷Pibúúm pɛ́ Ɛ́sɛlayɛl piim pɛówád na pɛ́baan pɛ́lɛ ɔgɔɔ́sɔ́gɔlɔn Táán na toɛn, na udúg na wɔɔ́s, páamɛna pɛda lɛ́ Táán alɛ́ɛ́ kɛɛlɛ nkə kɛ́ yɛɛ́gág. Taa nkúm, a oʼto wóow lɛ́ ndɛ agomɛna pɛda na Táán áa Yúdɛn ɛmɛ́sɔ́mɛn o!

⁸Ɛɛ́ɛ, Táán alɛ́ɛ́ koóndɛgɛ pɛlóŋ. Pəŋi Yúdɛn, nkə anɛ́ɛ́n áa poɔʼkɔ́ nyóon adɛágoóndɛgɛ pɛlóŋ ə́?

⁹«Mɛɛ́nyɔ́amɔɛ́d njáfɛ́gɛ́ɛ́ kɔnɔɛyɛ niiŋ nɛ́ Yə́sus mɔɔ́n ó Násalɛd.

¹⁰Kɛ́lɛ́ kɛ́go aa njɛ́ɛ nyɛɛlɛ a Yolósalɛm. Puʼkúm pó payaaganɛʼ pɛfɔny páyɛ́nyɛɛ́ʼkɛn toɛn, mbə́gumən ɛ́fɔlɛ́ ɛ́ pəə́liʼtiniʼ, mbáboyáág a yoog yɛ́ njaan. Kɛnɛŋ kɛ́ páásóm kɛbán kɛɔ́bɔn lɛ́ pógóódi lɛ́ páboyóóna, mɛ tɛn njɛ́ɛ mbaasɛ nyɔʼkɔ́ kɛ́lɛ sáád náan.

¹¹Pɛnɛŋ pímmú, njɛ́ɛ nyiim nsɔ́dɔn a puog poɔ́bɔn pó pɛɔ́sɔ́gɔ́lɔ́n puim, ndáagɛɛlɛ lɛ́ pə́buúyəʼkəni. Njɛ́ɛ nyuunə lɛ́ pə́di kəə́liʼtiniʼ koɔ́bɔn kó pálɛɛ́ a kólɛ́. Nyɛɛ́nyɛ́nɛn na pɔ́lɛ́ a ombod wó óyɛ́nyɛɛlɛ ndə́əbuyə́njən súʼtə́ə́ a mɔnɔŋ má a laálá lɛ́ nyɛ́ɛn aboócoʼkonɛ kɔ.»

¹²Póol yɛɛ́dɛánɛ kə́mmú na nkúm Agɛlɛ́ʼpa ɔnɔ́: «Náan aa nyiísiə́d ngə́ wɔɔ́s wúmmú agɛɛn a Tamáas. Puʼkúm pó payaaganɛʼ pɛfɔny áa póyɛ́ʼtóm, pómáyɛnyɛɛ́ʼkɛn toɛn lɛ́ nyɛ́ɛn kɔ́gɔ́ɔg.

¹³Taa, nkúm, ndɛ anɛ́ɛ́n kɔ a ngə́ ná tóɛf yəə́ndəgiim íwísən. Tiídíin tɛdála agá kɛnɔ məny! Kisəə kɛ́go kɛ́yɛ́ɛ əgiim kísuu a mɔɛn, kɛ́anom agaáyɛn wɔɔ́s. Kɛnɔ kɛ́ tɛyɛ́ɛ lɛ́ na mɛ na pɔsɔ́sɔ́g páam pá ongɛn kɛ́yɛ́ɛ kɛándɛ səə́səə.

¹⁴Pəsi piim a nsí kuŋ. Mbáság koob a tɔgɛ́ɛ́ tó Alamɛyɛ́ɛŋ, nɛŋo nɛɔ́nɔ́ na mɛ: “Sóol oó, Sóol wɛ! Nkə aa wəə́ginjəʼkəni ə́? Olɛ agaábáam wɔnɔ́ ɛyɛ́g yɛ́ osɔŋ náan iyó.”

¹⁵Njímuŋíən nyɔʼkɔ́ əə: Wɛ ánɛ aa olɛɛ́nɔ ə́, Sə́dúk? Əyínjuúlísíni ɔnɔ́ na mɛ: “Mɛ áa ndɛɛ́ Yə́sus nyɔ́ olɛɛ́ əguyəʼkəni.

¹⁶Náa, tɛ́ɛ́mɛn, tɛ́lɛm kidə́níʼtən. Mbólódíí na wɛ lɛ́ ná nkoyɛ́ɛlɛ wáán uʼkudin waam. Olɛ́ɛ́ kɛʼtɛ́lɛmɛn mbaasɔ́ agodɛ́anɛ na pɔsɔ́g wɔnɔ́ ná omɛ́ʼtála naánɛ́, óobodɛ́anɛ tɛn pɛbán pímmú pɛ́ ndɛ́ɛ́ kogoyɛ́ɛlɛɛ́ lɛ́ ódála.

¹⁷Ndɛ́ɛ́ kogoyááŋɛn a ɔmbɔg yɛ́ ndɛg ɛ Yúdɛn na a mɔnɔŋ mə́mmú má ndɛ́ɛ́ kogodómɛ́ɛ́ a mɔ́lɛ́.

¹⁸Ndagoodom kɔ lɛ́ wɛ́ɛn əbuúbuən əngis, óboolónɛ a mbin, pɛ́ɛn a kɛmoámoáŋ. Pálɛ́ɛ́ kuliog a toɛn tó Sáʼtan əgiim ná Táán ndɛɛ́. Pámaʼkaag oʼto na mɛ, Táán alɛ́ɛ́ kubuúlisin mabɛ́ mɔ́ɔ́bɔn, pə́yiim agɛɛn na oʼkɔɔ a ondáŋ ó pɔɔd pá páagoob na Táán”.»

¹⁹Póol ayɛ́ɛ́n əgín na tɔgɛ́ɛ́ yuudi, ɔnɔ́: «Nkúm Agɛlɛ́ʼpa! Ntɛʼkáasáŋɛnɛ koóbɛn nkə kɛ́ɛg kɛ́ kɛ́yɛ́ndónɛn, kɛ́ kíyíím a mɔɛn.

²⁰Náa, nyɛɛ́yáŋ alɔɛgɛ Tɔsɔm Tólaŋ a Tamáas na a Yolósalɛm. A ngim yɛ́ɛy, njɛ́ɛ́n alɔɛgɛ a nigúu nɛ́ Siudə́ə niim, na a mɔnɔŋ mɛ́ndɛ́ŋ. Njɛ́ɛ agobodɛ́ananɛ lɛ́ pə́ə́suʼki mabɛ́ mɔ́ɔ́bɔn, páágasɛ ná Táán alɛɛ́, páagɛɛlɛ pɛbán pɛ́laŋ əguloodi lɛ́ páʼkogasɛ fɔ́lɔ́b fɔ́lɔ́b ɔlaa wɔ́ɔ́bɔn.

²¹Taa, a oʼto wóow aa Yúdɛn iyíʼkumin a Tɛ́mpɛl, pɔ́nɔ́ pándagɛnjoon.

²²Náa, Táán əmínnuŋ əgiim əgiig nɛ́gɔŋ wɔnɔ́ ná ndɛɛ́ əgín agɛɛ́ʼkɛn mbaasɔ́ a udi ó mɔɔd ungim lɛ́ na pɔɔd pá pagóʼkóón kɛ́, na muyənjə́g kɛ́. Ntɛɔ́gɔ əgusəə kɛbán kímmú kɛ́ kɛ́lɛɛ́ ndɛ́ŋ na nkə kɛ́ Moyíis yiísə́ə́, ɔmbɔ́ lɛ́ nkə palɔɛgɛʼ pɛbán pá Táán pɛ́ɛ́lɔɛ́gɛ lɛ́ kɛ́lɛ́ɛ́ kaáyɛ́ɛlɛ.

²³Pɛ́ɛ́lɔɛ́gɛ pɔ́nɔ́: Məsíi alɛ́ɛ́ konɛ ntɔ́b, alɛ́ɛ́ tɛn kɛɛn o na oʼto na oʼto ogoóndɛg a pɛlóŋ. Alɛ́ɛ́ tɛn kuloodi na Yúdɛn na mɔnɔŋ mɛ́ndɛ́ŋ kisəə kɛ́ kɛ́ɔgɔɔyɛ pɔɔd[102]»

²⁴Ayɛ́ɛ Póol aágaánɔna, Fɛ́stus aámoyáfɛ́ma nɛŋo a mɔɛn, ɔnɔ́: «Əə́əy Póol, olɛ kiyəg! Pəsugúluʼ pá pagóʼkóón pá oyɛ́ɛ́lánɛ aa páʼkogoyánɛɛ́ kiyəg!»

²⁵Póol əyímuyúlísíni ɔnɔ́ na nyɔ́lɛ́: «Oʼkóʼkóón Fɛ́stus, ntɛɔ́gɔ kiyəg! Tɔgɛ́ɛ́ tó ndɛɛ́ agosɔyɔ tólɛ fɔ́lɔ́b, tólɛ sáád.

²⁶Nkúm Agɛlɛ́ʼpa ənnímin kɛbán kɔ áay ɔmbɔ́ kímuʼ. Kólɛ́ aa ɔʼtɛ́m wáam ólɛɛ́ yəə́b a kaadɛ, ndɛɛ́ agosɔyɔ na nyɔ́lɛ́. Mbálɛŋ lɛ́ aáʼkoob pɛ́lɛ́ piim lɛ́ pɛ́dɛɔ́gɔ pɛbán pɛ́ pɛ́yáyɛ́lɛ́ɛ́ a pɛɔsɛ́g.

²⁷Wɛ nkúm Agɛlɛ́ʼpa! Umə́líʼtíníí nkə kɛ́ palɔɛgɛʼ pɛbán pá Táán Píísə́ə́ ə́? Mɛ mbálɛŋ lɛ́ umə́líʼtíníí pɛ́lɛ́.»

²⁸Náa Agɛlɛ́ʼpa ɔnɔ́ na Póol: «Olɛ anyɔ́ŋɛn kɛnyaánɛ kilíʼtɛn əgín kɔ áanɛ nɛ́gɔŋ əə́!»

²⁹Póol əyímuyúlísíni ɔnɔ́ na nyɔ́lɛ́: «Kɛ́yɛɛn nɛ́gɔŋ oo, oó lɛ́ a ngim óo, pɛɔ́sɔ́gɔ́lɔ́n pɛ́am na Táán pɛ́lɛ lɛ́ wɛ́ɛn wɔnɔ́ mɛ. Adɛ́njaŋ əgín a wɛɛ́nyɔ́əsíŋ áa ndɛɛ́ amoyɔ́sɔ́gɔlɔn, ndóo. Ndɛ ɔgɔɔ́sɔ́gɔlɔn tɛn a ungim nyɔ́ a wɔɔ́s ó naánɛ́, alɛɛ́ agoob tɔgɛ́ɛ́ tóam. Pəŋi piim póɛn wɔnɔ́ ná mɛ ndɛɛ́, náa fiɛ́d na pasɛŋ wɔnɔ́ ná mɛ nkódíí!»

³⁰Nkúm yaáság kodɛ́ɛmɛn, ngɔ́mɛnaʼ yɛ́ nkóʼkóón imə́muyə́ən, Pələníis tɛn əə́yə́ən, ungim nyɔ́ ayɛ́ɛ kɔ na pɔ́lɛ́ aáság kodɛ́ɛmɛn tɛn əgubuyə́ən.

³¹Ná pɛ́ɛ́lón, Pɔ́yɔ́dɔ́ɔ́gɛ́ɛ́ pɔ́lɛ́ na pɔ́lɛ́, pɔ́nɔ́: «Mɔɔd nyóonɛ adiɛlɛnɛ kɛbán na kɛbán kɛ́ kɛbɛ́ kɛ́ kíəguunə lɛ́ pámoyóon, oó lɛ́ pámoyáág a yoog yɛ njaan.»

³²Agɛlɛ́ʼpa yɛɛ́dɛánɛ ɔnɔ́ na Fɛ́stus: «Pɔ́nɔ́ mɔɔd nyóonɛ adɛʼkɛ́ɛ əŋíən lɛ́ nkúm yɛ́ nkóʼkóón yɛ́ a Ɔlɔ́ma aa yɛ́ɛnɛɛ́ asom kɛbán kiə́ŋ, ná mbə́səə lɛ́ tímuúlis.»