Read Yambeta Pigólí 27 Bible Online

Pigólí 27 - Yambeta bible

Pigólí 27

¹Ná kɛ́yɛ́ɛ kɛáʼkaáyóbanan lɛ́ tiəsiəd siʼtíməʼ agɛɛn a Ɛʼtálɛa, Fɛ́stus yiísiə́d Póol na pɔsɔ́g tɛn pə́mmú pá páyɛ́ɛ a yoog yɛ njaan, əmə́buúcúm a ɔmbɔg á Yulíus, nkúm ɛ kiʼtúú kɛ́ pasɔ́njaa kímmú kɛ́ páyɛ́ɛ agodɔ́ŋɔn lɛ́: «Kiʼtúú kɛ́ pasɔ́njaa pá nkúm yɛ́ nkóʼkóón yɛ́ a Ɔlɔ́ma.»

²Tiísiə́d siʼtíməʼ yɛ́ ɛyɛ́ɛ agɛɛn a Əsíi. Siʼtíməʼ yɛ́ɛy ɛyɛ́ɛ yɛ́ a Adalamíid. A ondáŋ wə́ə́s, mɔɔd nyummú ayɛ́ɛ kɔ niiŋ lɛ́ Alɛstáag. Ayɛ́ɛ mɔɔd o pálɛ́ɛg ɛ Təsaloníig, a kɛsom kɛ́ nsí kɛ́ Masɛdowáan.

³A koany kaáyɛnɛ, siʼtíməʼ yəəs yɛɛ́dɛ́lɛm a Sɛdɔ́ɔŋ. Wɔnɔ́ ná Yulíus ayɛ́ɛ kɔŋɛʼ na Póol, əyímuudí lɛ́ yɛ́ɛn adála pɔsɔ́sɔ́g pə́ə́ŋ kɔ áay agɛɛlɛ lɛ́ pámoyɛ́ʼkɛn nkə kɛ́ kɛ́yɛ́ɛ kɛ́ komosógɛn.

⁴Ná tɛɛ́dɛ́ɛ́mɛn áay agɛɛn, tiíyə́njən ɛbá ɛ́ noom na ɛbá ɛ́ noom yɛ́ a oloʼ ó Síiʼpələ lɛ́ kigud kɛ́yɛ́ɛ əgufiŋ a udi wə́ə́s na toɛn.

⁵Tɛyɛ́ɛ́n, tɛmɛ́ɛn ayaag noom nó ɛbá fiɛ́d nó nóyɛ́ɛ agosan a ɛbá yɛ́ əʼkúu á Silisíi na Pənfilíi, tɛáság kɛɛn alon a Míilə, pálɛ́ɛg yimmú yɛ́ a nigúu nɛ́ Lisíi.

⁶Wɔnɔ́ ná nkúm ɛ kiʼtúú kɛ́ pasɔ́njaa yɛ́ɛy yɛɛ́dála siʼtíməʼ yimmú yɛ́ ɛyɛ́ɛ əgiim a Alɛgɛsəndilíi yaágɛɛn a Ɛʼtálɛa, əyíbisúúli a yɛ́ɛy káag, aáság kɛbɛbágɛ a yɛ́lɛ́.

⁷Siʼtíməʼ ɛgo ɛyɛ́ɛ əgəə́nud wɔnɔ́ nkún, tɛmɛ́ɛ́lɛ ɛ́fɔlɛ́ ɛ́ mədúg. Tɛyánɛ́ɛ́ kɛ́fɔlɛ́ agɛɛlɛ lɛ́ tíɛn alon a pálɛ́ɛg ɛ Kníid. Wɔnɔ́ ná tɛdɛʼkɛ́lɛɛ́ na ngə́ iguyə́ən ngə́ yəəs sásaad lɛ́ kigud kɛ́yɛ́ɛ əgibiyə́bi, tiɛ́sán yɛ́ a Sələmonə́ə, əguyə́njən ɛbá yɛ́ a oloʼ na ɛbá yɛ́ oloʼ ó Kɛlɛ́ɛʼtɛ lɛ́ ná úbiigub kigud.

⁸Tiɛ́nɛ́ ntɔ́b kɛ́fɔlɛ́ əguyə́njən ɛbá yɛ́ oloʼ náan agɛɛlɛ lɛ́ tíɛn alon a kɛnɔ kɛ́ pɔ́ɔdɔ́ŋɔn lɛ́: «Pisig pɛ́ Mbámbáán ɛ noom», ndúmiʼ na pálɛ́ɛg ɛ Lasáyɛa.

⁹Tɛyɛ́ɛ tɛáʼkosánɛ ɛ́fɔlɛ́ ɛ́ kɛnɛŋ, wɔɔ́s wó Yúdɛn ɛyɛ́ɛ iguminilə ə́simə́ a oʼto ó mabɛ́ mɔ́ɔ́bɔn, óyɛ́ɛ wáʼkosan. A kɛnɛŋ kɛ́ɛg noom nóyɛ́ɛlanɛ nobɛ́, ongɛn a siʼtíməʼ kɛʼtáŋ. Kólɛ́ aa Póol ayɛ́bodɛánɛ ɔnɔ́ na pɔ́lɛ́:

¹⁰«Pɔsɔ́sɔ́g páam, a mɛ mbádála lɛ́ ongɛn a noom nɛ́gɔŋ wándɛ kɛʼtáŋ, adɛ́njaŋ əgín lɛ́ siʼtíməʼ yalɛ́aŋ, oó lɛ́ moom mó ɛnyáŋɛ́nɛ́nɛ́ɛ́ múolíoŋ, ndóo. Ɔmbɔ́ pəsibáamɔɛ́d tɛn tɛlɛ a kɛʼtáŋ a mɔɛn.»

¹¹Náa, nkúm ɛ kiʼtúú kɛ́ pasɔ́njaa əʼtin áʼtáan idiʼkə́əsiəd kɛnɛŋ kɔ na nkə kɛ́ Póol yiísə́ə́. Yiíyə́ən agá nkə kɛ́ uʼtuləʼ siʼtíməʼ na mɔɔd o siʼtíməʼ páyɛ́ɛ əgusəə.

¹²Ɛbá ɛ́ noom yɛ́ɛy yɛ́ páyɛ́ɛ a yɛ́lɛ́ ɛ́dɛʼkɛ́ɛ ɛŋɛʼ a kɛnɛŋ kɛ́ umbuməʼ wó oʼkóʼkóón. Kólɛ́ aa ɛ́fɔlɛ́ yɛ́ ɛ́yɛ́ɛ kɔ a siʼtíməʼ íyə́líʼtíníí lɛ́ pádɛ́ɛmɛn áay agɛɛn. Páyɛ́ɛ anyɔ́ŋɛn lɛ́ ngə́ ɛmaʼkɛɛn kɔ, pɛ́ɛn əgiig a Fəníigsə, a ɛbá ɛ́ noom yímmú yɛ́ a Kɛlɛ́ɛʼtɛ yɛ́ ɛ́yɛ́ɛ a ɛbá yɛ́ wɔɔ́s ólɛɛ́ agɛɛn agɛ́mmɛŋɛn. Páyɛ́ɛ anyɔ́ŋɛn kɛɛn ələndin kɔ́gɔ́ɔg súʼtə́ə́ a kɛnɛŋ kɛ́ umbuməʼ wáaman.

¹³Ɛyaa ɛ́ kigud yɛ́ íyíím ɛ́dɛ́ɛmɛn a ɛbá ɛ́ kusuu yááság kəə́bə́ə́ kiim ɛ́fɛm sɔɔŋ. Pə́ə́bə́ə́ kofɛga lɛ́ páagɛɛn alon kɔŋɛʼ kɛnɔ kɛ́ páyɛ́ɛ anyɔ́ŋɛn kɛɛn. Pááság kobágɛ kisúg kɛ́ kɛ́lɛɛ́ əgumən siʼtíməʼ kɛnɔ kímuʼ idiə́nyígídíí, pə́ə́bə́ə́ kɛɛn. Páyɛ́ɛ agɛɛn na ɛbá na ɛbá ɛ́ Kɛlɛ́ɛʼtɛ.

¹⁴Kɛnɛŋ sɔɔŋ ɔ, kigud kɛ́ kɛgóón kɛáság kiim kɛ́dɛ́ɛmɛn na nɛŋo a unuʼ. Kɛ́yɛ́ɛ əgiim yɛ́ a nkon yɛ́ a oloʼ. Pálɛ agodɔ́ŋɔn kigud kɛ́go kɛ́ɛg lɛ́: «Kigud kɛ́ ɛlaʼkɛlɔ́ɔŋ.»

¹⁵Siʼtíməʼ yəə́ndəsuu na pəsi, ngə́ ɛgɛɛn yuudi fiɛ́d lɛ́ kigud kɛ́yɛ́ɛ əgufiŋ a udi. Tɛáság kəə́di, tɛándagɛɛd noom.

¹⁶Tɛyɛ́ɛ agosan a nsun yɛ oloʼ wúmmú wó páyɛ́ɛ agodɔ́ŋɔn lɛ́ Kóda. Oloʼ wóow úyíbigúb kigud, tɛáság kusiəd ɛyaa ɛ́ kɛʼkɔ́m ɛ́gɔɔ́yɔ́ɔyɛ, tɛmábáámɛ́ɛ́ na kɛ́lɛ́. Tiyə́dúmíníí súʼtə́ə́ tɛálón.

¹⁷Pɔɔd pá páyɛ́ɛ əgugud a siʼtíməʼ pááság kobágɛ ɛyaa ɛ́ kɛʼkɔ́m yɛ́ɛy a siʼtíməʼ a kaadɛ, páálɛŋ kogóda siʼtíməʼ ngim na tuwoo. Wɔnɔ́ ná páyɛ́ɛ agodammana lɛ́ siʼtíməʼ yaagɛɛn agaab na pɔ́lɛ́ a ɔsáyɛ́n wó a ɛbá yɛ́ a Libíi, písúúli kɛa kɛ́ kɛ́dɛɔ́gɔ agolaŋ konóó, tɛáság kəə́di lɛ́ kigud kíɛn na pəsi.

¹⁸Wɔnɔ́ ná kigud kɛ́yɛ́ɛ əgín agɛbɛfɔ́fɔganɛ na toɛn, ná koany kóyááyɛ́nɛ, moom mó páyáaŋɛnɛn a siʼtíməʼ, pə́ə́bə́ə́ kodagɛdanɛ a məní.

¹⁹A koany kaáyɛnɛ tɛn kó kuíyə́ən wɔɔ́s wóow, pəgud a siʼtíməʼ pááság konyáŋɛna tɛn moom moɔ́bɔn mó pigólí, páádagɛ́dánɛ pɔ́lɛ́báamɔɛ́d a məní.

²⁰Mɔɔ́s mɛ́ɛ́sán miíŋ wɔɔ́s wóndón, ɔmbɔ́ tɛn muə́dədəʼ tɛʼtála lɛ́ kigud kɛ́yɛ́ɛ əgín agɛɛnanan yuudi na kufiŋ. Tɛdɛʼkɛ́ɛ agomɛna pɛda kə́mmú lɛ́ tɛlɛ pɔ́gɔɔy.

²¹Tɛyɛ́ɛ tɛáʼkosánɛ mədúg miíŋ tɛdɛábágɛ́ɛ́ ombɔg a unuʼ. Náa Póol aádɛ́ɛmɛn kidə́níʼtən a udi wɔ́ɔ́bɔn, ɔnɔ́: «Poádála ə́, pɔsɔ́sɔ́g páam! Kɛ́ɛ́sɛʼtanɛn lɛ́ puób ndə́b yaam. Poyóbɛn yɛ́lɛ́, tɛdɛʼkɛ́ɛ adɛ́ɛmɛn a Kɛlɛ́ɛʼtɛ. Ná nkə kiim kɛ́ɛnɛ kɛ́ tɛáʼkolɔ́sɛ́ɛ́, kɛ́ndɔ́sɛn.

²²Náa, nkə kɛ́ ndə́əbuŋíən nɛ́gɔŋ kɛ́lɛ lɛ́ pónóm ɔʼtɛ́m lɛ́ ɔmbɔ́ úmmuʼ a ondáŋ wə́ə́s ədiə́gu. Əgín siʼtíməʼ yɛ́lɛ́ na yɛ́lɛ́ aa ɛlɛɛ́ ndɔ́sɔ́ɔ́n.

²³Kɛ́lɛ lɛ́, udúg ó naánɛ́, uŋun ó maʼtom ó Táán nyɔ́ ndɛɛ́ agoob na nyɔ́lɛ́, Táán nyɔ́ ndɛɛ́ əgugudin, ómɛ́ndónɛn.

²⁴Ómɛ́ʼtɛánɛ wɔnɔ́: “Póol, odɛʼtámmána aa! Kíəguunə lɛ́ ódɛ́lɛm a pɛyɔm a udi wó nkúm yɛ́ nkóʼkóón yɛ́ a Ɔlɔ́ma. Táán, a ɔʼtɛ́m ólaŋ wó alɛɛ́ na wólɛ́ na wɛ, amáboyɛ́ʼkɛn ɔlaa lɛ́ na wɛ na ungim nyɔ́ alɛɛ́ na wɛ a siʼtíməʼ!”

²⁵Kólɛ́ aa nyɔʼkɔ́ na pəŋi pɔsɔ́sɔ́g páam, pónóm ɔʼtɛ́m lɛ́ nyaágɛn oʼto wáam ungim na Táán, isuŋ fiɛ́d. Mbálɛŋ lɛ́ nkə kɛ́ amɛ́ʼtɛánɛ, kɛ́agaáyɛ́ɛlɛ,

²⁶ɔmbɔ́ ná kɛ́lɛɛ́ lɛ́ tɛagɛɛn agaab kɔbɛ́ a oloʼ wɛ́ndɛ́ŋ.»

²⁷Tɛyɛ́ɛ tɛáʼkɛɛlɛ náan mədúg mówád na mə́niʼ wɔnɔ́ ná kigud kɛ́yɛ́ɛ agɛɛn əgín yuudi agɛbɛfɔ́fɔganɛ a noom nó Mədiʼtələnə́ə. Ná tóɛf yɛ udúg ɛyɛ́ɛ yəə́ndəwísən, pɔɔd pá pə́əgud a siʼtíməʼ pə́ə́bə́ə́ kaana lɛ́ tɛándɛ ndúmiʼ na nsí.

²⁸Píísúŋ nɛdáán a nuwoo, pə́ə́suuli a məní lɛ́ ná níɛn ɔdɔ́bɔ nsí, pálɛŋ mɛ́ʼtaʼ ɛ́sɛ́g áa məní mə́ə́lím a kɛnɔ kɛ́ɛg. Pɔ́yɔ́ɔ́ŋ mɛ́ʼtaʼ niʼtin na puuniʼ na ɛ́baan. Tɛáság kaáyɛʼtɛnɛ kə́mmú yuudi sɔɔŋ, pə́míʼkíni kusuuli nuwoo. Pɔ́yɔ́ɔ́ŋ kɔ mɛ́ʼtaʼ niʼtin na ɛ́ʼtáan na ɛ́dáád.

²⁹Páyɛ́ɛ agodammana lɛ́ siʼtíməʼ ɛlɛ igəə́dum a kiʼtóg kɛ́ nɛdáán. Páyɛ́ɛ́n a nsun ɛ siʼtíməʼ, pə́ə́suuli pisúg píniʼ pɛ́ ándɛ píəgumin siʼtíməʼ kɛnɔ kímuʼ, idiə́nyígídíí. Pə́ə́bə́ə́ kobóŋan anɛ́ɛ́n lɛ́ koany kuə́bisig kaáyɛnɛ.

³⁰Náa, pɔɔd pá páyɛ́ɛ əgugud a siʼtíməʼ páyɛ́ɛ əguunə kodɛ́da. Píídíŋin ɛyaa ɛ́ kɛʼkɔ́m ɛ́ kɔɔy, pə́ə́suuli a məní. Pááság kusəə lɛ́ pɔ́lɛ́ páanyɔ́ŋɛn kɛɛn a udi, agɛɛn agaag pisúg pɛ́ píəgumən siʼtíməʼ kɛnɔ kímuʼ idiə́nyígídíí, kɔmɔɛ́d lɛ́ pɛfaa, ɔdɛɔ́gɔ náan.

³¹Náa, Póol yɛɛ́dɛánɛ na nkúm ɛ kiʼtúú kɛ́ pasɔ́njaa na pasɔ́njaa tɛn kɛ́, ɔnɔ́: «Nkúm ɛ pasɔ́njaa! Pɔɔd póonɛ pɔ́ndɔbɛn a siʼtíməʼ na pəsi, pəŋi podɛɔ́gɔ pɔ́gɔɔy.»

³²Pasɔ́njaa pááság kosóma tuwoo tó tuíguminin ɛyaa ɛ́ kɛʼkɔ́m ɛ́ kɔɔy yɛ́ɛy, pə́ə́dí lɛ́ ísuu.

³³Pálɛ anɛ́ɛ́n agobóŋan lɛ́ koany koáyɛnɛ a, Póol aáság kodɛ́anɛ na ungim lɛ́ ánɛ́ɛnɛ. Yiísə́ə́ ɔnɔ́ na pɔ́lɛ́: «Táá mədúg mówád na mə́niʼ aa móonɛ tɛlɛɛ́ wɛɛ́y na wɛɛ́y agobóŋan, yoom na yoom tɛnnɛ́.

³⁴Mbáboyɛ́ʼkɛn anɛ́ɛ́n toɛn nɛ́gɔŋ, pónɛ́ɛnɛ. Agɛɛlɛ lɛ́ pólaa, kíəguunə lɛ́ pónɛ́ɛnɛ. Mbííʼkíni kobodɛ́anɛ lɛ́ ɔmbɔ́ yoom na yoom ɛ́dɛ́agɛɛlɛ úmmuʼ a ondáŋ wááŋan.»

³⁵Ná ayɛ́ɛ aáʼkosɔyɔ náan, yiísiə́d pɛlɛ́ɛd, amɛ́ʼkɛn pisoyidiʼ na Táán a udi ó mɔɔd ungim, aábɛ́ŋa, aánɛ́.

³⁶Pɔ́lɛ́ piim pááság kɔɔŋ anɛ́ɛ́n toɛn, páánɛ́.

³⁷Kɔ a siʼtíməʼ yɛ́ɛy, tɛyɛ́ɛ ɔ́ndɛd ɛ́baan na pɔɔd əʼtin ádáád na puuniʼ na úmmuʼ[103]

³⁸Ná mɔɔd ungim ayɛ́ɛ aáʼkonɛ́ɛnɛ, əə́ʼkuyíid, pɛ́ɛ́nyáŋɛ́na mugudəʼ muim mó moom mó muíligi a siʼtíməʼ, páádagɛ́dánɛ a məní agɛɛlɛ lɛ́ siʼtíməʼ ɛ́fɛ́nɛ.

³⁹Ná koany kóyááyɛ́nɛ, pɔɔd pá páyɛ́ɛ əgugud a siʼtíməʼ pádɛʼkɛ́ɛ agaálɛŋ ə́lə́ə́ áa tɛlɛɛ́. Náa, pɛ́ɛ́dála ombáán wó nsí kága laálá, ombɔg ó noom wɔ́ɔsɔd kɔ. Pááság kusəə lɛ́ páagaáfɛg kosɔd kɔ na siʼtíməʼ, pɛ́ɛn agaab.

⁴⁰Pááság kondinə pisúg pɛ́ píəgumən siʼtíməʼ kɛnɔ kímuʼ idiə́nyígídíí, pə́ə́dí pə́mə́dí kɔ a məní yisí. Əgín tɛn a kɛnɛŋ kɛ́go kɛ́ɛg kímuʼ, póyóndínə tuwoo tó mufiʼ mó siʼtíməʼ, páásandɛ́na tɛn kilúlúdə́ kɛ́ sanjaʼ a udi ó siʼtíməʼ agɛɛlɛ lɛ́ kigud kíbiínud. Tɛáság kuyə́ən ombɔg ó noom wóow lɛ́ ná tíɛn agaab a ɛbá.

⁴¹Náa, agɛɛn əgiig a kɛnɔ kímmú, tɛɛ́dám tɛ́fag a kɛdɔɔ kɛ́ ɔsáyɛ́n, udi ó siʼtíməʼ wááság kosɔd kɔ, tɛdɛáʼkɛ kɛɛn yuudi kə́mmú. Piʼtús pɛ́ məní pɛ́yɛ́ɛ əgiim agaádóɛdan kɔ na toɛn pɛáság koman kogada nsun ɛ siʼtíməʼ.

⁴²Náa pasɔ́njaa pɔ́nɔ́ pɔ́lɛ́ koɔ́bɔn koóna pɔɔd pá yoog yɛ njaan pá páyɛ́ɛ kɔ piim, agɛɛlɛ lɛ́ a kɛnɛŋ kɛ́ koyaag na məʼtum, ɔmbɔ́ úmmuʼ adɛʼtɛ́da.

⁴³Wɔnɔ́ ná nkúm ɛ kiʼtúú kɛ́ pasɔ́njaa adɛʼkɛ́lɛɛ́ anyɔ́ŋɛn lɛ́ ná póon Póol, yɛɛ́dɛánɛ na pasɔ́njaa pə́ə́ŋ lɛ́ pádɛnyɛ́ɛ́lɛ nkə kɛ́ɛg kɛ́ pálɛɛ́ anyɔ́ŋɛn kɛɛlɛ. Aáság kusəə lɛ́ pɔsɔ́g pá páálɛŋ məʼtum páyaŋ agaádagɛdɛ a məní, pálón a kɛdɛ́ɛ́,

⁴⁴ná pɔsɔ́g póʼkáanɛ pə́mmú pə́ədíin píim pə́buyə́ən a pɛláaŋ, ɔmbɔ́ lɛ́ a pɛbɛs pɛ́ siʼtíməʼ pɛ́ pɛ́lɛɛ́ agonɛŋ a məní a mɔɛn. Taa, náan aa ungim ayɛ́ɛ́n əgiig a kɛdɛ́ɛ́ yoom ɛ́dɛmoyɛ́ɛ́lɛ.