Read Yambeta Pigólí 28 Bible Online

Pigólí 28 - Yambeta bible

Pigólí 28

¹Ná tɛyɛ́ɛ tɛɔ́ʼkɔɔy lɛ́ tɛándɛ a kɛdɛ́ɛ́, tɛáság koob anɛ́ɛ́n lɛ́ oloʼ wóow wó tɛlɛɛ́ a wólɛ́, ólɛ niiŋ lɛ́ Máaltɛ.

²Pɔɔd pá páyɛ́ɛ alaa kɔ pə́yíbisiə́d kɔŋɛʼ kɛ́fɔlɛ́. Pɛ́ɛ́góny yug pááság kɛbɛdɔ́ŋɔn lɛ́ tíim agoósa lɛ́ niŋiʼ níyíbigóodi, noó nóyɛ́ɛ agona.

³Póol yiísiə́d ɔfáŋ wó nkón agaag a yug. Kiŋun kɛ́ yug kɛ́ɛg kɛ́yɛ́ɛ́lɛ, ɔfɛn wááság kolon kɔ a ɔfáŋ wó nkón, waánóm Póol a ombɔg, wááság kusəngilid.

⁴Ná pɔɔd pá páyɛ́ɛ alaa a oloʼ wóow pɛ́ɛ́dála uʼkud wə́əsəngilə a ombɔg ó Póol, pə́ə́bə́ə́ kosɔyɔ pɔ́nɔ́: «Mɔɔd nyóonɛ isuŋ ɛ́dɛɔ́gɔ, alɛ agoóna pɔɔd. Ɔmbɔ́ ná əʼkuínií a noom, táán yəəs nyɔ́ tɛlɛɛ́ agodɔ́ŋɔn lɛ́: O sáád, aábaasɛ lɛ́ ɔdɛɔ́gɔ nyóonɛ lɛ́ álaa.»

⁵Náa, Póol aáság kaámasɛd uʼkud a yug, wə́də́əŋ, adɛób kogany a ombɔg wə́ə́ŋ.

⁶Pɔ́lɛ́ páyɛ́ɛ agaáboŋ lɛ́ páamoodála əə́ndəgiímə, ɔmbɔ́ lɛ́ aándɛ sondóóŋ a nsí. Náa, ná páyɛ́ɛ páʼkobóŋan súʼtə́ə́, páadála lɛ́ yoom ɛ́dɛɔ́gɔ aa amoyɛ́ɛlɛ, pááság kudi mafɛgaʼ móom má páyɛ́ɛ na mɔ́lɛ́, pə́ə́bə́ə́ kusəə agá pɔ́nɔ́: «Ndóo, nyóonɛ táán yimmú aa ɛlɛɛ́nɔ!»

⁷Pusí púmmú póyɛ́ɛ kɔ áay ndúmiʼ na kɛnɔ kɛ́go kɛ́ɛg. Pusí póob póyɛ́ɛ agoob na mɔɔd nyummú. Ayɛ́ɛ mɔɔd nyɔ́ oʼkóʼkóón a oloʼ wóow. Niiŋ niə́ŋ nɛ́yɛ́ɛ lɛ́ Pubilíyus. Əyíbisiə́d a noádɛʼ nuə́ŋ na tɔnyɔ́g, amábɛyɛ́ngɛg náan mədúg mádáád.

⁸Sɛ o mɔɔd ogo nyóon ayɛ́ɛ ungiíngi lɛ́ fɛ́baʼ iyímugóodi, aáfoada tɛn maŋɔ́. Póol aáság kɛɛn amoóboan kɔ kɛnɔ kɛ́ əyíngi, ɔmɔ́sɔ́gɔ́lɔ́nɛ́ɛ́ Táán, amámoyábɛ́g ɔmbɔg a nkó, mɔɔd cacalaʼ.

⁹A ngim yɛ́ɛy, pabámbany pə́mmú pá páyɛ́ɛ kɔ áay a oloʼ pááság kiimən adála tɛn Póol, amáboyóómánɛ tɛn pɔ́lɛ́.

¹⁰Páyɛ́bɛyɛ́ʼkɛn nnyáádɛ́ kɔ mbod ngim. Ná kɛnɛŋ kiə́s kɛ́ɛnɛ lɛ́ tɛ́dɛ́ɛmɛn kɔ agɛɛn kɛ́yɛ́ɛ kiə́ʼkiim əgiig, páyɛ́bɛyɛ́ʼkɛn yiim yɛ́ ɛ́yɛ́ɛ əgibiyúunən.

¹¹Tɛyɛ́ɛ́lɛ məə́ mádáád áay a Máaltɛ. A ngim yɛ́ɛy anɛ́ɛ́n áa tiɛ́bág a siʼtíməʼ yimmú yɛ́ yɛɛ́sánɛ umbuməʼ a oloʼ ogo wóow. Ɛyɛ́ɛ siʼtíməʼ yɛ́ a Alɛgɛsəndilíi, niiŋ niə́ŋ nɛ́yɛ́ɛ lɛ́ «Padáán pá pálɛɛ́ nɛas.»

¹²Tɛyɛ́ɛ́n tɛáság kɛɛn alon a pálɛ́ɛg yimmú, niiŋ lɛ́ Siləʼkúus. Tɛyɛ́ɛ́lɛ kɔ mədúg mádáád.

¹³Tɛáság kodɛ́ɛmɛn tɛn áay, tiə́yə́njə́n ɛbá ɛ́ noom na ɛbá ɛ́ noom, tɛmɛ́ɛn alon a pálɛ́ɛg yimmú, pɔ́ɔdɔ́ŋɔn lɛ́ Ələ́sio. A koany kaáyɛnɛ, kigud kiə́bə́ə́ kiim kɛ́fɛm a ngim yəəs. Kɛ́yɛ́ɛ əgiim kɛ́dɛ́ɛmɛn a noá nó kusuu. Tɛáság kɛɛn, tɛmɛ́ɛn alon a Pusɔ́ɔl. Tɛyɛ́ɛ́lɛ mədúg mábaan súg agɛɛn əgiig kɔ.

¹⁴Tiɛ́bóan pomóŋŋí pə́ə́s pə́mmú, pəə́liʼtiniʼ kɔ áay a pálɛ́ɛg ɛ Pusɔ́ɔl. Páyɛ́bɛyɔ́sɔ́gɔ́lɔ́nɛ́ɛ́ lɛ́ tíɛlɛ na pɔ́lɛ́ sɔ́ndɛʼ mmuʼ. Táá náan aa tɛɛ́dáŋána agɛɛlɛ lɛ́ tíɛn alon a Ɔlɔ́ma.

¹⁵Pomóŋŋí pə́ə́s pəə́liʼtiniʼ pá a Ɔlɔ́ma páyóób lɛ́ tɛlɛ a ngə́, pááság kiim pádɛ́ɛmɛn əgiim abɛɛboŋ. Pɔsɔ́g pə́mmú pə́yíím súʼtə́ə́ a kɛnɔ kɛ́ pɔ́ɔdɔ́ŋɔn lɛ́ «Nion nɛ́ Əʼpíus», pə́mmú a kɛ́ pɔ́ɔdɔ́ŋɔn lɛ́ «Puog pó Pəən pódáád.» Ná Póol ayɛ́boodála, ayɛ́ʼkɛn pisoyidiʼ na Táán. Ayɛ́ɛ aándɛ na pɛsány a nkó.

¹⁶Ná tɛyɛ́ɛ́n əgiig kɔ a Ɔlɔ́ma, píídí Póol lɛ́ ə́siəd noádɛʼ a oʼto wə́ə́ŋ, pááság kaag sɔ́njaa kɔ mmuʼ lɛ́ ímuúnuŋ.

¹⁷Mədúg mádáád a ngim yɛ́ɛy, Póol yɛɛ́dɔ́ŋɔn palaamɛʼ pá Yúdɛn pá a Ɔlɔ́ma lɛ́ píim a noádɛʼ nuə́ŋ. Ná páyɛ́ɛ pə́ʼkiim agaágɔnyɛd, yiísiə́d tɔgɛ́ɛ́, ɔnɔ́ na pɔ́lɛ́: «Pomóŋŋí, ɔmbɔ́ ná ntɛʼkáagɛɛlɛɛ́ kɔbɛ́ na pɔɔ́n pá nigúu nɛ́am, ɔmbɔ́ ná ntiʼkə́də́ŋií kisiə́g kɛ́ pɛmbáa, Yúdɛn yɛ́ a Yolósalɛm iyíʼkumin, yaáság kɛɛn agɛsɔ́mɛn na palaamɛʼ pá Ɔlɔ́ma.

¹⁸Ná palaamɛʼ pá Ɔlɔ́ma páyɛ́ndóóya, píísə́ə́ lɛ́ píindis lɛ́ pádɛʼkɔ́ɔgɔɔŋ kɔbɛ́ kó mbɛ́ɛ́lɛ náa pɔ́nɔ́ pɛ́ɛnjoon.

¹⁹Náa, Yúdɛn yɛɛ́sáŋɛ́nɛ lɛ́ píindis. Kɛ́yɛ́nyɛɛlɛ mbáság kusəə lɛ́ ndɛ anyɔ́ŋɛn lɛ́ nkúm yɛ́ nkóʼkóón yɛ́ a Ɔlɔ́ma aa yɛ́njɔmɛɛ́. Náa, mɛ ntigóodi məliŋ na nigúu nɛ́am.

²⁰Taa, kólɛ́ aa mbábodómɛn pɔɔd lɛ́ ndɛ anyɔ́ŋɛn koboodála, tɛ́sɔyɔ. A fɔ́lɔ́b kɛ́lɛ lɛ́, a oʼto ó nyɔ́ pɔɔ́n pá Ɛ́sɛlayɛl pálɛɛ́ agomɛna pɛda na nyɔ́lɛ́ aa ndɛɛ́ náanɛ oʼkódágódá na pasɛŋ.»

²¹Pə́yímuyúlísíni pɔ́nɔ́ na nyɔ́lɛ́: «Pəsi tɛdɛɔ́ŋɛn nufuuʼ nó pə́míim pábɛdómɛn a Siudə́ə agɛbɛdɛ́anɛ kɛbán kɛáŋ. Tɛʼtálan tɛn ɔmbɔ́ mɔɔd nyɔ́ əmíim ádɛ́ɛmɛn kɔ́gɔ́ɔg amáabɛdɛ́anɛ kɛbán wɔnɔ́ kɛ́ɛg, oó lɛ́ ɔmɔ́ɔsɔyɔ niiŋ nɛáŋ kɔbɛ́.

²²Náa, tiə́guŋíən anɛ́ɛ́n na wɛ lɛ́ ólɛŋ kɛbɛdɛ́ananɛ wɛɛ́nyɔ́amɔɛ́d nkə kɛ́ olɛɛ́ agofɛg, lɛ́ pəsi tɛálɛŋ lɛ́ kɛnɔ kiim, ngə́ igəə́liʼtini yɛ́ɛy yɛ́ olɛɛ́ a yɛ́lɛ́, pɔɔd pálɛ agosáŋɛnɛ yɛ́lɛ́.»

²³Pááság kaáyóbanan na Póol, pə́ə́gumin oʼkag a wɔɔ́s wɛ́ndɛ́ŋ wó pə́əgiiʼkini kiim əgəə́bun. Ná wɔɔ́s wóow úyíím əgiig, pə́yíímən kɔ áay ɛ́fɔlɛ́ a nó Póol agaáyɛn kó na oʼto na oʼto. Póol ayɛ́boyásɛ́nán pɛbán, amábolɔɛ́gɛ́nɛ Nɛlaamɛʼ nɛ́ Táán. Kəə́bə́ə́ əgín kɔ na koany agɛɛn əgiig na niób, əyúúnə pungə́ puim lɛ́ ábodɛ́anɛ kɛbán kɛ́ Yə́sus ná páág oʼto na nyɔ́lɛ́. Əyə́ʼtúmíí a nkə kɛ́ pɛcɛm pɛ́ Moyíis pɛ́lɛɛ́ əgusəə, súʼtə́ə́ a nkə kɛ́ palɔɛgɛʼ pɛbán pá Táán píídílə.

²⁴Ngab yimmú iyə́líʼtíníí nkə kɛ́ ayɛ́ɛ əgusəə. Náa, pɔsɔ́g pə́mmú pɛ́ɛ́sáŋɛ́nɛ kəə́liʼtini.

²⁵Wɔnɔ́ ná páyɛ́ɛ pándagɛɛnan pádɛáyóóbánánɛ́ɛ́, Póol yiísə́ə́ ɔnɔ́ na pɔ́lɛ́: «Nkə kɛ́ɛnɛ kɛ́ Uŋun wó Ufúlúʼtú wísə́ə́ na pɛmbáa pááŋan a unuʼ wó Ɛsayíi, ɔndɔɛgɛʼ pɛbán o Táán, kɛ́lɛ sáád lɛ́ wísə́ə́ wɔ́nɔ́:

²⁶“Tod aboan ndɛg yɛ́ɛy, óbodɛ́anɛ wɔʼkɔ́: Pəŋi ndɛg yɛ́ɛnɛ! Polɛ́ɛ́ kɛɛn lɛ́ ɔmbɔ́ poádám ntóɛŋ agoob, podɛágoob yoom. Ɔmbɔ́ poásɛn əngis agodála, podɛádála yoom.

²⁷Kɛ́lɛ lɛ́ ndɛg yɛ́ɛnɛ ɛlɛ na ntɛ́m yɛ́ nnasáŋ, ntóɛŋ yɔɔbɔn ndɔ́ɔ́lɔ́gɔ́, əngis yɔ́ɔ́bɔn na woog. Kɛ́lɛ náan lɛ́ ná pádɛʼtɛ́ʼtɛ́gánan, pádɛnjóóbánan, pádɛʼkásɛ ɔlaa wɔ́ɔ́bɔn əgimbuúlini ná mɛ Táán ndɛɛ́ lɛ́ ndɛŋ koboyɔ́ɔyɛ[104]” »

²⁸Póol ayɛ́ɛ́n na tɔgɛ́ɛ́ yuudi, ɔnɔ́: «Lɛŋáan anɛ́ɛ́n kɔŋɛʼ kɔŋɛʼ lɛ́ Táán yɛɛ́dómɛn pɛnɔɔŋɛʼ tɔsɔm tó tóaboyɔ́ɔyɛ[105] Pɔ́lɛ́ pálɛ́ɛ́ koob tólɛ́.» [

³⁰Póol ayɛ́ɛ́lɛ kɔ pɛag pɛ́baan a oʼto wə́ə́ŋ, a noádɛʼ nó yɛɛ́lɛ́nta. Ayɛ́ɛ əgusiəd ungim nyɔ́ ayɛ́ɛ əgiimən a noádɛʼ nuə́ŋ kɔŋɛʼ.

³¹Ayɛ́ɛ alɔɛgɛ Nɛlaamɛʼ nɛ́ Táán, aʼtammána kaaʼkananɛ pɔɔd nkə kɛ́ kɛ́adɛ́ʼtɛg Sə́dúk Yə́sus Kilíʼtus. Ayɛ́ɛ filí, pádɛmosáŋɛ́nɛ́nɛ lɛ́ ɔ́sɔyɔ.