Read Yambeta Pigólí 3 Bible Online

Pigólí 3 - Yambeta bible

Pigólí 3

¹Wɔɔ́s wúmmú, pa Píɛ pɔ́lɛ́ na Sɛ́aŋ pɛ́ɛ́bág a Tɛ́mpɛl agɛɛn agɛɛlɛ pɛɔ́sɔ́gɔ́lɔ́n pɛ́ njə́ŋí ɛ́dáád ɛ wɔɔ́s.

²Kɛgɔd kímmú kɛ́yɛ́ɛ kɔ kiləndínə́ə́n a ɛbá yɛ́ udíyoog wó a nɛsɔd nɛ́ a Tɛ́mpɛl. Páyɛ́ɛ agodɔ́ŋɔn udíyoog ogo wóow pɔ́nɔ́: «Udíyoog ó kɔdɛ́ɛ.» Mɔɔd ogo yɛɛ́lɔ́b kɛgɔd əgín kɔ a niə́bíən niə́ŋ. Ɛ́nɛ́ wɔɔ́s, páyɛ́ɛ piim pámonyáŋɛn, pə́yiim əmuúligigi kɔ áay agolɛ́ba moom na pɔɔd pá páyɛ́ɛ agosɔ́dɔn a Tɛ́mpɛl.

³Ná yɛɛ́dála pa Píɛ pɔ́lɛ́ ná Sɛ́aŋ pɔ́ɔsɔd a Tɛ́mpɛl, aáság kobodɛ́gɛn ombɔg lɛ́ pámɔyɛ́ʼkɛn yoom.

⁴Pɔ́lɛ́ piim pə́yímubísin əngis, náa Píɛ ɔnɔ́ na nyɔ́lɛ́: «Ɛ́bɛdɛ́ʼtɛg!»

⁵Mɔɔd aáság kolɛŋ kobodɛ́ʼtɛg lɛ́ ayɛ́ɛ agofɛg lɛ́ pándamoyɛ́ʼkɛn yoom.

⁶Náa, Píɛ yiísə́ə́ ɔnɔ́ na nyɔ́lɛ́: «Mɛ ntɛɔ́gɔ na kóol, ntiɛn na mɔɔnɛ́. Kɛbán kímuʼ, nkə kɛ́ nkódíí, ndagoyɛ́ʼkɛn kɛ́lɛ́. Taa: A niiŋ nɛ́ Yə́sus Kilíʼtus mɔɔ́n ó Násalɛd, tɛ́ɛ́mɛn, ódáŋana!»

⁷Píɛ aáság kumuúgumin a ombɔg ó nɛnom, əmə́mudə́ə́míni. Ambaan á kɛgɔd yándɛ tə́ŋ, annasáŋ, na tulə́ŋ tuə́ŋ kɛ́.

⁸Aáság kucilib, aádɛ́lɛm kidə́níʼtən, əə́bə́ə́ kodáŋana. Yɛɛ́sɔ́d a Tɛ́mpɛl ondáŋ na pa Píɛ, aádáŋana, oósiodo, aányáadɛ Táán.

⁹Kiʼtúú kɛ́ pɔɔd kiim kɛ́ kɛ́yɛ́ɛ kɔ, kɛ́yɛ́moodála aádáŋana, aányáadɛ Táán.

¹⁰Pááság kolɛŋ lɛ́ mɔɔd nyɔ́ ayɛ́ɛ əguləndən a udíyoog ó Tɛ́mpɛl agolɛ́ba moom aa alɛɛ́nɔ. Udíyoog wóow páyɛ́ɛ agodɔ́ŋɔn lɛ́ «Udíyoog ó Kɔdɛ́ɛ». Nkó ɛ pɔɔd yɛɛ́bág, páyɛ́ɛ əgəə́wúunəni a nkə kɛ́ kɛ́másánɛ́ɛ́.

¹¹Wɔnɔ́ ná mɔɔd nyóon ayɛ́ɛ ədiiʼkíni kuliog a ɛbá ɛ́ pa Píɛ pɔ́lɛ́ na Sɛ́aŋ, ungim yɛɛ́nyá, páagɛɛnan na ɔʼtɛ́d kɔ́gɔ́ɔg kɛnɔ kɛ́ páyɛ́ɛ, a mogon mó noádɛʼ mó páyɛ́ɛ pɔdɔ́ŋɔn lɛ́ «Mogon mó a nɛsɔd nɛ́ Salomɔ́ɔŋ»

¹²Ná Píɛ yɛɛ́dála náan, yɛɛ́dɛ́lɛm agosɔyɔ na pɔɔd ɔnɔ́: «Pəŋi pɔɔd pá a Ɛ́sɛlayɛl, tuə́ áa polɛ əgəə́wúunəni náan lɛ́ wɔnɔ́ ná mɔɔd nyóonɛ amóóm ə́? Tuə́ aa poábɛdɛ́ʼtɛg náan wɔnɔ́ a toɛn tuə́s tó pəsibáamɔɛ́d agá aa tɛmámoyɛ́ɛ́lɛ lɛ́ ádáŋana, ɔmbɔ́ lɛ́ wɔnɔ́ ná tɛlɛɛ́ pɔɔd pá pə́ə́yísíníí a kəə́liʼtiniʼ ə? Ndóo.

¹³«Táán yɛ Ábɛlaam, Táán yɛ Ɛ́sag, Táán ɛ Yáʼkɔb, Táán ɛ pasɛʼkóón pə́ə́s[12] yoóloodi nugəm nó yɛɛ́ʼkɛ́nɛ́nɛ́ɛ́ na uʼkudin wəəŋ Yə́sus. Pəŋibáamɔɛ́d poyɛ́moólɛ́g na palaamɛʼ pá nigúu lɛ́ pámoyóon, pumə́əmuúʼtəm a udi ó Pɛláad ná ayɛ́ɛ əə́ʼkusəə lɛ́ nyɔ́lɛ́ əə́ndəmuúlis.

¹⁴Puíʼtə́m nyɔ́ ayɛ́ɛ ufúlúʼtú, nyɔ́lɛ́nyɔ́amɔɛ́d tɛn sáád, pumə́əŋíən agá na Pɛláad lɛ́ ə́buúlisin mɔɔd nyɔ́ alɛɛ́ ongoónanan.

¹⁵Náan aa poyóón nyɔ́ alɛɛ́ lɛ́ nyɔ́lɛ́ aa aágɛɛ́ʼkɛnanan ɔlaa. Náa, Táán ayɛ́moyóndɛ́gɛ, tɛlɛ pawɛ́sɛnɛg.

¹⁶Mɔɔd nyóonɛ nyɔ́ polɛɛ́ agodɛ́ʼtɛg, nyóonɛ nyɔ́ poálɛ́ŋ kɔŋɛʼ kɔŋɛʼ, a toɛn tó a niiŋ nɛ́ Yə́sus, niiŋ nɛ́ tɛágɛ́nɛ́ɛ́ oʼto a nɛ́lɛ́ aa amóóm náan wɔnɔ́ ná aáʼkoómɛ́ɛ́ a əngis yááŋan á pəŋi piim.

¹⁷«Pomóŋŋí, mbálɛŋ! Kɛ́lɛ lɛ́ a fiɛ́d kolɛŋ aa pəŋi na puʼkúm poáŋan póyɛ́ɛ́lɛ Yə́sus náan.

¹⁸Náa, nkə kɛ́ Táán yɛɛ́fɛ́g kɔ́gɔ́ɔg kalaʼ, kɛ́lɛ́ kɛ́go aa kɛ́yáás. Kɛ́lɛ nkə kɛ́ yiísə́ə́ a unuʼ ó palɔɛgɛʼ pɛbán pə́ə́ŋ lɛ́ Məsíi yəəŋ ɛlɛ́ɛ́ konɛ ntɔ́b.

¹⁹Ə́súʼkíən anɛ́ɛ́n, púliogi ongoo a mabɛ́, púimbuúlini ná Táán alɛɛ́ agɛɛlɛ lɛ́ ə́buúlisin mabɛ́ mááŋan.

²⁰Áay, Sə́dúk alɛ́ɛ́ koboyɛ́ʼkɛn kɛnɛŋ kɛ́ kooyig, áabodómɛn Yə́sus, Məsíi yɛ́ əyíbuyííyídin kɔ́gɔ́ɔg kalaʼ.

²¹A kó nɛ́gɔŋ, Yə́sus yiígóodi lɛ́ áyag kɛɛn ələndin a mɔɛn, súʼtə́ə́ agɛɛn əgiig a wɔɔ́s wó Táán alɛ́ɛ́ kɛɛlɛɛ́ lɛ́ pɛbán piim pɛán pɛwa. Nkə kɛ́ yiísə́ə́ əgín kɔ́gɔ́ɔg kalaʼ a unuʼ ó palɔɛgɛʼ pɛbán pə́ə́ŋ áa kɛ́ɛg.

²²Moyíis yiísə́ə́ kɔmɔɛ́d ɔnɔ́: “Sə́dúk Táán waaŋan alɛ́ɛ́ kɛɛlɛ lɛ́ ɔndɔɛgɛʼ pɛbán wəəŋ wɔnɔ́ mɛ álon a kibúúm kɛáŋan. Polɛ́ɛ́ koob nkə kɛ́ alɛ́ɛ́ kobodɛ́anɛɛ́.

²³Ungim nyɔ́ alɛ́ɛ́ kosáŋɛnɛɛ́ koob tɔgɛ́ɛ́ tó ɔndɔɛgɛʼ pɛbán o Táán, pálɛ́ɛ́ kumuúliogi a ondáŋ wó ndɛg ɛ Táán, ə́əgu[13]”

²⁴Palɔɛgɛʼ pɛbán pá Táán piim, Əgəə́bə́ə na Samowɛ́ɛl, na pɔsɔ́g pá pə́yíím a ngim, pɛ́ɛ́sɔ́yɔ tɛn nkə kɛ́ɛnɛ kɛ́ kɛ́lɛɛ́ agaásan a mədúg móonɛ má tigódíí.

²⁵Pəŋi aa polɛɛ́ pɔɔ́n pá palɔɛgɛʼ pɛbán pá Táán, pɔɔ́n pá a nɛálad nɛ́ Táán ayáágánan na pasɛ pááŋan a kɛnɛŋ kɛ́ yɛɛ́dɛánɛ na Ábɛlaam ɔnɔ́: “Ndɛ́ɛ́ kɛɛlɛnɛ puog pó pɔɔd puim pó a nsí kɔŋɛʼ a ngim yɛ ndɛg yaaŋ[14]”

²⁶A kidíídí kɛáŋan aa Táán yɛɛ́yáŋ agɛɛlɛ lɛ́ uʼkudin wəəŋ yíim álon. Ayɛ́moodóm lɛ́ ná áboyɛ́ɛlɛ kɔŋɛʼ, ɛ́nɛ́ mɔɔd a ondáŋ wááŋan ədúm ngim na pɛbán piə́ŋ pɛ́ pɛbɛ́.»