Read Yambeta Pigólí 4 Bible Online

Pigólí 4 - Yambeta bible

Pigólí 4

¹Pa Píɛ pɔ́lɛ́ na Sɛ́aŋ pə́gə́ligi kɔ agaaʼkananɛ pɔɔd ɔ, payaaganɛʼ pɛfɔny, na nkúm ɛ pasɔ́njaa pá a Tɛ́mpɛl, na Pasadosɛyɛ́ɛŋ pááság kiim alon.

²Páyɛ́ɛ pəliŋə́ə́n lɛ́ a igə aa pɔɔ́n pá maʼtom póob pábaan pálɛɛ́ agaaʼkananɛ pɔɔd, páalɔɛgɛ pɔ́nɔ́: Wɔnɔ́ ná Yə́sus amóndɛg, kióloodi anyóon lɛ́ pɛlóŋ tɛn pɛ́lɛ pɛ́goóndɛg əə́!

³A kólɛ́ aa pə́yíbugúmin, pámáboyáág a yoog yɛ njaan agoboŋ koany kaáyɛnɛ, lɛ́ niób nɛ́yɛ́ɛ nɛándɛ kɔ.

⁴Náa, piíŋ pá páyóób tɔgɛ́ɛ́ tó pa Píɛ, páyáág oʼto na Yə́sus. Náan aa ondáŋ ó pəə́liʼtiniʼ óyáyáábɛ́gɛ́ɛ́ əgiig yoom wɔnɔ́ tɔ́ɔ́sɛn ɛ pɔɔd ɛ́ʼtáan.

⁵A koany kaáyɛnɛ, puʼkúm pó Yúdɛn, na ponnom pó nigúu, na palɛŋ pɛcɛm pá páyɛ́ɛ a Yolósalɛm pááság kɛɛn agaágɔnyɛd.

⁶Páyɛ́ɛ kɔ lɛ́ na Ánaʼ, Nkúm yɛ́ nkóʼkóón ɛ payaaganɛʼ pɛfɔny, na Kayíif, na Sɛ́aŋ, na Alɛsándɛlɛ, na ungim tɛn nyɔ́ a yoog ɛ pɔɔd ɛ puʼkúm pó payaaganɛʼ pɛfɔny.

⁷Pááság kusəə lɛ́ pə́buyíimin na pa Píɛ pɔ́lɛ́ ná Sɛ́aŋ. Pə́ə́bə́ə́ anɛ́ɛ́n kobolóoya, pɔ́nɔ́: «A toɛn tó ánɛ, oó lɛ́ a niiŋ nɛ́ ánɛ aa pomɔ́ɔ́ŋ toɛn tó koómɛ mɔɔd nyóon əə́?»

⁸Uŋun wó Ufúlúʼtú wíyə́ə́g Píɛ a ɔʼtɛ́m síɛ́ɛ́d, náa ɔnɔ́ na pɔ́lɛ́:

⁹«Pəŋi puʼkúm pó nigúu na pəŋi ponnom pó Ɛ́sɛlayɛl, polɛ agɛbɛlóoya naánɛ́ yɛ́ɛnɛ lɛ́ tɛmɛ́ɛ́lɛ́nɛ kɛgɔd kɛ́ mɔɔd kɛ́ɛnɛ kɔŋɛʼ, poɔʼkɔ́ tɛ́bodɛ́anɛ tuə́ áa kɛ́másánɛ́ɛ́ wɔnɔ́ ná aáʼkoómɛ́ɛ́ á!

¹⁰Pəŋi piim, na ungim kɛ́ nyɔ́ alɛɛ́ a Ɛ́sɛlayɛl, lɛŋáan anɛ́ɛ́n lɛ́ mɔɔd nyóonɛ nyɔ́ adɛ́lɛ́mɛ́nɛ́ɛ́ a udi wááŋan, a toɛn tó a niiŋ nɛ́ Yə́sus Kilíʼtus aa amóóm. Yə́sus Mɔɔ́n ó Násalɛd ogo nyóon nyɔ́ poɛ́báŋan a ɔmbásá, əə́gú, Táán amáamoyóndɛgɛ.

¹¹Kɛbán kɛ́ Yə́sus ogo nyóon aa kɛ́lɛɛ́ kidiídílə́ a Kálaʼtaʼ ɛ Táán lɛ́: “Nɛdáán nɛ́ pawáagaʼ toádɛʼ pɛ́ɛ́dó, nɛ́lɛ́ nɛ́go aa nɛ́yáán nɛdáán nɛ́ nígumíníníí noádɛʼ[15]”

¹²Nyɔ́lɛ́nyɔ́əsíŋ áa alɛɛ́ ogɛbɛyɔ́ɔyɛ. Wɛndɛ́ŋ nyɔ́ a nsí yɛ́ɛnɛ nyɔ́ Táán amábɛyɛ́ʼkɛn lɛ́ ábɛyɔ́ɔyɛ pəsi pɔɔd, ɔdɛɔ́gɔ.»

¹³Ungim nyɔ́ ayɛ́ɛ a pɛyɔm pɛ́ɛb əyə́wúnə́níí kɛ́fɔlɛ́ na niúlisi nɛ́ pa Píɛ pɔ́lɛ́ ná Sɛ́aŋ pə́yúlísə́ni tɔgɛ́ɛ́ páʼtammána, na wɔnɔ́ ná pɔ́lɛ́báamɔɛ́d tɛn páyɛ́ɛ pɔɔd pá pádɛʼkáagɛɛlɛɛ́ sugúluʼ. Ungim əyə́líʼtíníí lɛ́ pa Píɛ píílə́ndin a ɛbá ɛ́ Yə́sus.

¹⁴Náa, wɔnɔ́ ná mɔɔd nyɔ́ páyóómɛ ayɛ́ɛ kɔ áay oʼtɛ́lɛ́máán na pɔ́lɛ́, pádɛʼkɛ́ɛ na nɔgɛ́ɛ́ nó pə́əguúlisini pa Píɛ.

¹⁵Páyɛ́bodɛánɛ lɛ́ pálon a táán, pɔ́lɛ́ pɔ́mɔ́ɔlɔb agaaʼkan kɛbán.

¹⁶Páyɛ́ɛ əgəə́ŋíənə kɔ pɔ́lɛ́ na pɔ́lɛ́ pɔ́nɔ́ əə: «Tuə́ áa tɛágɛɛlɛ na pɔɔd póonɛ aáŋ? Kɛ́lɛ lɛ́, ungim a Yolósalɛm aálɛŋ lɛ́ pámɛ́ɛ́lɛ kɛa kɛ́ kiə́wúunəniʼ kɛ́ kɛbán. Pəsi tɛdɛɔ́gɔ págosáŋɛnɛ lɛ́ adɛ́njaŋ pɔ́lɛ́ aa pámɛ́ɛ́lɛ.

¹⁷Náa, agɛɛlɛ lɛ́ kɛbán kɛ́ɛg kɛ́dɛnjɛ́nánan yuudi əgiim kiə́səə, tɛ́bosásan lɛ́ pɔ́lɔg nnuʼ, pə́diyíʼkíni kubuŋ niiŋ nɛ́ Yə́sus kə́mmú a udi ó mɔɔd.»

¹⁸Pááság kiiʼkini kobodɔ́ŋɔn lɛ́ pɔ́sɔd. Páyɛ́bosɔ́yɔn na toɛn, pɔ́nɔ́: «Las aa yɛ́ɛy wɔnɔ́ naánɛ́! Tɛdɛnjóób kə́mmú lɛ́ puə́buŋ niiŋ nɛ́ Yə́sus, oó lɛ́ pomáʼkánánɛ pɔɔd kə́mmú a toɛn tuə́ŋ!»

¹⁹Náa, pa Píɛ pɔ́lɛ́ ná Sɛ́aŋ pə́yíbuyúlísíni pɔ́nɔ́: «Ɛ́bɛdɛánɛ́an pəŋibáamɔɛ́d áŋ: Táán áa tɛóbɛnɛɛ́ óm, pəŋi ə́?

²⁰Pəsi tɛdɛɔ́gɔ anɛ́ɛ́n págolɔ́g nnuʼ yəəs, fiɛ́d kusəə nkə kɛ́ tɛádála, na nkə kɛ́ tɛmóób.»

²¹Pɔɔd pá ɛgɔny yɛ́ ɛgóón yɛ́ɛy pááság kobosásan kə́mmú, pɔ́nɔ́ na pɔ́lɛ́: «Fɛgáan kə́mmú yi!» Pááság kubuudi lɛ́ pɛ́ɛn lɛ́ pádɛʼkɔ́ɔgɔɔŋ ɛgom yɛ́ páboyɛ́ʼkɛnɛɛ́ nsɔ́ɔ́ a yɛ́lɛ́ lɛ́ ungim ayɛ́ɛ agonyáadɛ Táán a nkə kɛ́ɛg kɛ́ kɛ́yáyɛ́lɛ́ɛ́.

²²Mɔɔd ogo nyóon nyɔ́ kobany kuə́ŋ koɛ́man a ongán ayɛ́ɛ aáʼkaáyɛn pɛag əʼtin ábaan.

²³Ná píídí pa Píɛ pɔ́lɛ́ ná Sɛ́aŋ, páyɛ́ɛ́n aboan pɔsɔ́sɔ́g pɔ́ɔ́bɔn, pámábodɛánánɛ nkə kiim kɛ́ puʼkúm pó payaaganɛʼ pɛfɔny, na ponnom pó nigúu páyɛ́bodɛánɛ.

²⁴Ná pəə́liʼtiniʼ pɛ́ɛ́mán koob nkə kɛ́ɛg kiim, pɔ́yɔ́sɔ́gɔ́lɔ́nɛ́ɛ́ Táán, unuʼ wɔ́ɔ́bɔn úmmuʼ, pɔ́nɔ́: «Paabá, wɛ áa oyɛ́ɛ́lɛ nsí na mɔɛn na noom nó ɛbá fiɛ́d, na nkə kiim kɛ́ kɛ́lɛɛ́ kɔ[16]

²⁵Wɛ nyɔ́ a toɛn tó Uŋun wó Ufúlúʼtú, oyɛ́ɛ́lɛ lɛ́ uʼkudin waaŋ Tə́fid ə́səə ɔnɔ́ əə: “A igə aa pandɛŋ Táán pə́əgəə́nyug náan əə́? A igə aa pɔɔd páágɛ́nɛ́ɛ́ oʼto náan a pɛbán pɛ́ iyó ə́!

²⁶Puʼkúm pó a nsí poándɛ pidə́níʼtən agonɔɛyɛ pɛdá, poáʼkaálad agonɔɛyɛ Sə́dúk, póanɔɛyɛ tɛn nyɔ́ əyííyid[17]”

²⁷«Ɛɛ́ɛ, kɛ́lɛ náan fɔ́lɔ́b lɛ́ kɔ áay a pálɛ́ɛg yɛ́ɛy, pa Ɛlóod pɔ́lɛ́ na Pɔ́nsɛ́ Pɛláad páyáládɛ́ɛ́ na mɔnɔŋ mɛ́ndɛ́ŋ, na ndɛg yɛ́ Ɛ́sɛlayɛl. Páyáládɛ́ɛ́ náan agɛɛlɛ lɛ́ pánɔɛyɛ Sálábádábádá yɛ uʼkudin waaŋ Yə́sus, nyɔ́lɛ́ nyɔ́ uyííyid.

²⁸Pámɛ́ɛ́lɛ əgín nkə kɛ́ wiísə́ə́ kɔ kalaʼ, a toɛn toáŋ na a nɛnyɔ́ŋɛn nɛáŋ lɛ́ kɛ́lɛ́ɛ́ kaáyɛ́ɛlɛ.

²⁹Sə́dúk, tála nɛ́gɔŋ yɛ́ɛnɛ wɔnɔ́ ná pálɛɛ́ agɛbɛɛ́nɔɛyɛ. Ɛ́bɛyɛ́ʼkɛn pəsi pəgudin pááŋ, toɛn tó kolɔɛgɛ Tɔsɔm toáŋ fiɛ́d na wɛɛ́y a ɔʼtɛ́m.

³⁰Óobɛyɛ́ʼkɛn tɛn tóonɛ lɛ́ mɔɔd alɛ abany tɛ́ɛmoyóómɛ, tɛágɛɛlɛ mangán, na piə́wúunəniʼ pɛ́ pɛbán a toɛn tó Yə́sus, Sálábádábádá yɛ uʼkudin waaŋ.»

³¹Ná pɛ́ɛ́mán kɔɔ́sɔ́gɔlɔn, yoog yɛ́ páyɛ́ɛ a yɛ́lɛ́ yaáság kəə́nyigid na toɛn. Uŋun wó Ufúlúʼtú úmə́buyə́ə́g pɔ́lɛ́ piim a ɔʼtɛ́m síɛ́ɛ́d, pə́ə́bə́ə́ kiim pálɔɛgɛ Tɔsɔm tó Táán, fiɛ́d na wɛɛ́y a ɔʼtɛ́m.

³²Pɔ́lɛ́ piim pá páyɛ́ɛ pándɛ pəə́liʼtiniʼ páyɛ́ɛ agoóbanan, ɔʼtɛ́m wɔ́ɔ́bɔn úmmuʼ, mafɛgaʼ mɔ́ɔ́bɔn mə́muʼ. Sɔ́g nyummú a ondáŋ wɔ́ɔ́bɔn ayɛ́ɛ əsəə lɛ́ yə́ə́ŋ ɛ́lɛ əgín yə́ə́ŋ ɛ nyɔ́lɛ́nyɔ́əsíŋ, ndóo. Nkə kiim kɛ́ mɔɔd ayɛ́ɛ na kɛ́lɛ́, kɛ́yɛ́ɛ kɛɔ́bɔn kɛ́ pɔ́lɛ́ piim.

³³Pɔɔ́n pá maʼtom pɛ́ɛ́dɛ́lɛm mbaasɔ́, páalɔɛgɛ na toɛn lɛ́ Sə́dúk Yə́sus aálón a kəəniʼ. Náan aa pɔ́lɛ́ piim, Táán ayɛ́ɛ agoboyɛ́ʼkɛnan ɛ́fɔlɛ́ ɛ́ mawɔʼ.

³⁴Úmmuʼ na úmmuʼ a ondáŋ wɔ́ɔ́bɔn ayɛ́ɛ aʼtaŋ yoom lɛ́ wɛ nyɔ́ olɛɛ́ na moom wɔnɔ́ malɛ́m, toádɛʼ, waalɛg ná wíim na mɔɔnɛ́ móom,

³⁵wɛ́ʼkɛn na pɔɔ́n pá maʼtom, páaban ungim, na wɛ ogo páagoyɛ́ʼkɛn nkə kɛ́ kɛásɛʼtan na wɛ agɛɛlɛ lɛ́ wɔ́ɔŋ nkə kɛ́ kɛ́lɛɛ́ agoosógɛn.

³⁶Náanɛ wɔnɔ́ nkə kɛ́ mɔɔd nyummú ayɛ́ɛ́lɛ na pɔlɛ́m puə́ŋ. Niiŋ nɛ́ mɔɔd nyóon nɛ́yɛ́ɛ lɛ́ Yósɛb. Pɔɔ́n pá maʼtom pámáamoólog lɛ́ Panábas. (Áay lɛ́: «Onnasanɛ pɔsɔ́g nkó.») Ayɛ́ɛ mɔɔd nyɔ́ a kibúúm kɛ́ Lə́fi, kəə́bíən kɛ́ a pálɛ́ɛg Síiʼpələ.

³⁷Mɔɔd nyóon yɛɛ́lɛ́g pɔlɛ́m puə́ŋ, əmə́yiim əsuuli mɔɔnɛ́ na pɔɔ́n pá maʼtom.