Read Yambeta Pigólí 5 Bible Online

Pigólí 5 - Yambeta bible

Pigólí 5

¹Mɔɔd nyummú niiŋ lɛ́ Ananɛ́as anyóon yɛɛ́lɛ́g kɛsom kiə́ŋ kɛ́ pɔlɛ́m kímmú a unuʼ wɔ́ɔ́bɔn úmmuʼ na oʼkán Səfílə.

²Páyáyóóbánánɛ́ɛ́ pááság kɔɔsɛg ngab ɛ mɔɔnɛ́ yimmú, pámɛ́ɛn agɛɛ́ʼkɛn ngab na pɔɔ́n pá maʼtom.

³Náa Píɛ əə́muŋíən ɔnɔ́ na nyɔ́lɛ́ əə: «Ananɛ́as, tuə́ áa wəə́dí Sáʼtan náan lɛ́ ɛ́sɔd a ɔʼtɛ́m wááŋ súʼtə́ə́ waábod umíim əlígə Uŋun wó Ufúlúʼtú, waáság kɔɔsɛg ngab ɛ mɔɔnɛ́ má waálɛg kɛsom kɛ́ pɔlɛ́m ə́!

⁴Pɔlɛ́m póob, adɛ́ poáŋ áa pómɛ́ɛnɔ ɔ? Oyɛ́ɛ ogosáŋɛnɛ lɛ́ odɛálɛg pólɛ́, óolɔb ondɛg. Ɔmbɔ́ tɛn ná waálɛg óo, mɔɔnɛ́ adɛ́ mááŋ áa mámɛ́ɛnɔ ɔ! Tuə́ áa nsiŋ ɛgɛɛlɛ yoom wɔnɔ́ yɛ́ɛy imə́guyíímin a oʼto ə́? Adɛ́njaŋ pɔɔd aa wəə́lígə, Táán áa wəə́lígə.»

⁵Ná Ananɛ́as ayóób tɔgɛ́ɛ́ tóod, aáság kaányáŋɛn a nsí kuŋ, əə́gú. Ungim nyɔ́ ayóób kɛbán kɛ́ɛg, ɔyɔ́ɔ́ŋ wɛɛ́y.

⁶Poómbaa pá panyɔmmɔ́n pááság kiim, páágóda kɛlóŋ na mbɔ́m, pámɛ́ɛn əni.

⁷Áwaʼ ɛ́dáád a ngim yɛ́ɛy, oʼkán aáság kiim, ɔɔ́sɔ́d, andɛŋ nkə kɛ́ kɛ́másánɛ́ɛ́ na onom.

⁸Náa Píɛ əə́muŋíən ɔnɔ́ na nyɔ́lɛ́ əə: «Ɛ́ya, mayɛ́ʼtɛánɛ áŋ! A undunə́ wóonɛ fɔ́lɔ́b áa poálɛg pɔlɛ́m poáŋan a?» Səfílə aáság kəə́liʼtini, ɔnɔ́: «Ɛɛ́ɛ, náan aa tɛálɛg!»

⁹Náa Píɛ ɔnɔ́ na nyɔ́lɛ́: «Tuə́ aa pəŋi ná waaŋ onom polɛɛ́ págaáyóbanan náan əgulígə Uŋun ó Sə́dúk ə́? Ádámɛ́gɛ́ɛ́ anɛ́ɛ́n, Óób nkid yɛ ambaan á pɔɔd pá pámɛ́ɛn əni onom waaŋ. Taa, pɔ́lɛ́ págo aa póonɛ pándɛɛ́ a udíyoog. Pə́əguúsiəd tɛn agɛɛn na wɛ.»

¹⁰Əgín tɛn Píɛ aáman kusəə náan, ɔʼkɛ́ɛd kuŋ a nsí kɔ áay a ambaan yə́ə́ŋ, aáság kugu. Ná panyɔmmɔ́n póob pɛ́ɛ́sɔ́d, pɛ́ɛ́bóan lɛ́ əə́ʼkugu, pááság komonyáŋɛn, pámɛ́ɛn əmuúni a ɛbá yɛ́ onom.

¹¹Ungim nyɔ́ a ɛgɔny ɛ́ pəə́liʼtiniʼ, na pɔɔd piim pá páyóób nkə kɛ́ɛg kɛ́ kɛ́yásánɛ́ɛ́, pɔ́yɔ́ɔ́ŋ wɛɛ́y kɛ́fɔlɛ́.

¹²Pɔɔ́n pá maʼtom páyɛ́ɛ agɛɛlanɛ ɛ́fɔlɛ́ ɛ́ mangán, na piə́wúunəniʼ pɛ́ pɛbán tɛn piíŋ. Pəə́liʼtiniʼ piim páyɛ́ɛ paágɔnyɛla a Tɛ́mpɛl, a kɛnɔ kɛ́ páyɛ́ɛ pɔdɔ́ŋɔnɔ lɛ́: «Mogon mó Salomɔ́ɔŋ.»

¹³Nyɔ́ adɛʼkɛ́lɛɛ́ ungəə́liʼtiniʼ adɛʼkɛ́ɛ agowɛ́ɛsɛ kəə́bulid na pɔ́lɛ́. Kɔmɔɛ́d lɛ́ pɔɔd páyɛ́ɛ agoboógany lɛ́ pálɛ əgəə́siəd kɔŋɛʼ.

¹⁴Pɔɔd piíŋ, panɔ́mɛɛd na pagɛ́ɛd, páyɛ́ɛ agaag oʼto na Sə́dúk, pááság kiim ɔsɔd a ondáŋ wɔ́ɔ́bɔn.

¹⁵Páyɛ́ɛ piim pálónanɛ pabámbany a ɛbá yɛ́ ngə́, pə́əbuyíngigəni a pɛʼkwág na a pɛgaan lɛ́ ná a nɛsan nɛ́ Píɛ, ɔmbɔ́ əgín kílíndiʼ kiə́ŋ kɛ́dɔ́bɛd sɔ́g nyummú.

¹⁶Ɛ́fɔlɛ́ ɛ́ pɔɔd ɛ́yɛ́ɛ yiim ɛ́dɛ́ɛman tɛn a moyaa mó əʼkúu, ndúmiʼ na Yolósalɛm, na pabámbany pɔ́ɔ́bɔn, na pɔsɔ́g pá məŋun má mabɛ́ máyɛ́ɛ əguyə́bi, əgiim kɔ na pɔ́lɛ́. Pabámbany piim páyɛ́ɛ pɔɔ́ŋ kɔŋɛʼ.

¹⁷Náan aa Ɔnjaaganɛʼ pɛfɔny nyɔ́ oʼkóʼkóón na ungim kɛ́ nyɔ́ a ondáŋ wə́ə́ŋ, (pɔsɔ́g pá a ɛgɔny ɛ́ Pasadosɛyɛ́ɛŋ) píídə́əŋ yaág yɛ́ əngis na pɔɔ́n pá maʼtom, pááság kusəə lɛ́ pə́əbuúgumən.

¹⁸Páyɛ́ɛ́lɛ, pə́mə́bugúmən, pámáboyáág a yoog yɛ njaan.

¹⁹Náa, na udúg, uŋun ó maʼtom ó Sə́dúk wúmmú wááság kiim əbuənə mədíyoog má yoog yɛ njaan, ómáboolónɛ, wɔnɔ́ na pɔ́lɛ́:

²⁰«Todáan a Tɛ́mpɛl, pólɔɛgɛnɛ ungim kɛbán kɛ́ɛnɛ kɛ́ ɔlaa wó ongwa!»

²¹Pɔɔ́n pá maʼtom páyɛ́ɛ́lɛ nkə kɛ́ uŋun ó maʼtom óyɛ́bodɛánɛ. Pɛ́ʼpɛ́b a koany kaáyɛnɛ, pááság kɛɛn ɔsɔd a Tɛ́mpɛl, pə́ə́ləndin agaaʼkananɛ pɔɔd. Ɔnjaaganɛʼ pɛfɔny nyɔ́ oʼkóʼkóón na ungim nyɔ́ ayɛ́ɛ a ngim yəəŋ, pɛ́ɛ́dɔ́ŋɔ́nɔ ponnom pó nigúu nɛ́ Ɛ́sɛlayɛl puim a ɛgɔny yɔ́ɔ́bɔn ɛ́ pɛyɔm yɛ́ ɛgóón, páádóm pɔɔd lɛ́ pɛ́ɛn əsiəd pɔɔ́n pá maʼtom a yoog yɛ njaan.

²²Náa, ná pəʼpulúus pá pɛ́ɛ́dóm páyɛ́ɛ́n əgiig a yoog yɛ́ njaan, pɛ́ɛ́bóan lɛ́ ɛlɛ iyó, mɔɔd əndigi kɔ. Pááság kuúlini ngim agɛɛn agaáloaŋanan na pɔɔd pá páyɛ́boodóm. Píísə́ə́ pɔ́nɔ́:

²³«Ná tɛmɛ́ɛn əgiig, tɛáboan yoog yɛ njaan ɛlɛ əgín nfaáfányá kɔŋɛʼ kɔŋɛʼ, pasɔ́njaa pálɛ tɛn padɛ́lɛ́máán kɔ a kinuŋ a mədíyoog. Náa, ná tiə́buənə́ puog, tɛmboanɛn mɔɔd kɔ a kaadɛ.»

²⁴Ná nkúm ɛ pəʼpulúus pá pálɛanɛɛ́ a kinuŋ kɛ́ Tɛ́mpɛl, na puʼkúm pó payaaganɛʼ pɛfɔny páyóób náan, nsiŋ iyíbulióŋin a oʼto. Páyɛ́ɛ əgəə́ŋíənə nkə kɛ́ kɛ́másánɛ́ɛ́ na pɔɔ́n pá maʼtom!

²⁵Náa mɔɔd əə́giim alon, ɔnɔ́ na pɔ́lɛ́: «Taa, pɔɔd pá poyáág a yoog yɛ njaan pálɛ kága a Tɛ́mpɛl, pálɛ agaaʼkananɛ pɔɔd.»

²⁶Nkúm ɛ pəʼpulúus yɛ́ɛy yaáság kɛɛn kɔ a Tɛ́mpɛl na pɔɔd pə́ə́ŋ agɛɛn əgumin pɔɔ́n pá maʼtom. Pə́yíbusiə́d a tɛmbɛlɛɛŋ, pə́dibudúʼtúgə́ni. Páyɛ́ɛ agodammana lɛ́ pɔɔd páabodóan na aʼtáán.

²⁷Ná pə́yúúlíni anɛ́ɛ́n na pɔ́lɛ́, páyɛ́ɛ́n əbudə́nigi a udi wó ɛgɔny yɔ́ɔ́bɔn ɛ́ pɛyɔm yɛ́ ɛgóón. Ɔnjaaganɛʼ pɛfɔny nyɔ́ oʼkóʼkóón əə́bə́ə́ kobolóoya,

²⁸ɔnɔ́ na pɔ́lɛ́: «Adɛ́ tiyíbusiə́gi lɛ́ tidiyíʼkíni koob wɔɔ́s lɛ́ pomáʼkánánɛ pɔɔd a niiŋ nɛ́ mɔɔd nyóon kə́mmú ə́? Poádála nkə kɛ́ pomɛ́ɛ́lɛ ə́? Nkə kɛ́ polɛɛ́ agaaʼkananɛ kɛáʼkaálam pálɛ́ɛg ɛ Yolósalɛm ngim. Polɛ anyɔ́ŋɛn kɛɛlɛ lɛ́ pɛ́ɛ́yɛg kugu kó mɔɔd nyóon a nto yəəs ə́!»

²⁹Náa pa Píɛ na pɔsɔ́g pɔɔ́n pá maʼtom pə́əbuyúúlisini pɔ́nɔ́: «Nyɔ́ tigódíí lɛ́ tɛóbɛn alɛ Táán, adɛ́njaŋ pɔɔd.

³⁰Yə́sus nyɔ́ poɛ́báŋan a ɔmbásá, əə́gú, Táán o pɛmbáa pə́ə́s ayɛ́moyóndɛ́gɛ.

³¹Əmə́əmuúligigi a ombɔg wə́ə́ŋ ó nɛnom, amáamobágɛ nkúm na Ongɔɔyɛʼ, ná pɔɔ́n pá Ɛ́sɛlayɛl pə́ə́suʼki pɛbán pɛɔ́bɔn pɛ́ pɛbɛ́ pɛ́ páyɛ́ɛ́lánɛ, nyɔ́lɛ́ ə́əbuúlisin mabɛ́ mɔ́ɔ́bɔn.

³²Tɛlɛ wɛ́sɛnɛg a pɛbán pɛ́ɛb. Tɛlɛ kɔ wɛ́sɛnɛg lɛ́ na pəsi, na Uŋun wó Ufúlúʼtú wó Táán amɛ́ʼkɛn na pá pálɛɛ́ amooyóóbɛn.»

³³Ná pɔɔd pá páyɛ́ɛ agoboóyɔmɛ páyóób náan, ilúún ɛ́yɛ́boobány, pə́ə́bə́ə́ kofɛga koboyóon.

³⁴Náa, mɔɔd wo ɛgɔny ɛ́ Pafalɛsɛyɛ́ɛŋ nyummú niiŋ lɛ́ Kamalayɛ́ɛl, ayɛ́ɛ kɔ áay a ɛgɔny yɔ́ɔ́bɔn ɛ́ pɛyɔm yɛ́ ɛgóón yɛ́ɛy. Ayɛ́ɛ ɔndɛŋ pɛcɛm. Pɔɔd piim páyɛ́ɛ na nnyáádɛ́ na nyɔ́lɛ́. Yɛɛ́dɛ́ɛ́mɛn agosɔyɔ. Náa ɔnɔ́ páyaŋ kolónɛ pɔɔ́n pá maʼtom a táán.

³⁵Pááság koboolónɛ. Əə́bə́ə́ anɛ́ɛ́n kosɔyɔ, ɔnɔ́: «Pəŋi pɔɔ́n pá Ɛ́sɛlayɛl, siə́dəən kɛnɛŋ na nkə kɛ́ polɛɛ́ anyɔ́ŋɛn kɛɛlɛ na pɔɔd póonɛ.

³⁶Kídíʼtə́ə wɔnɔ́ ná mɔɔd nyummú, niiŋ lɛ́ Tɛdáas, əyíím álon. Ayɛ́ɛ əgəə́gidən a igog ɔnɔ́ nyɔ́lɛ́ alɛ mɔɔd! Ɔyɔ́ɔ́ŋ a ngim yəəŋ, yoom ɛ́ pɔɔd wɔnɔ́ ɔ́ndɛd íniʼ. Náa, ná páyɛ́moyóón, ungim nyɔ́ ayɛ́ɛ a ngim yəəŋ yɛɛ́fám. Kiə́ŋ tɛn kɛáság koman.

³⁷A ngim yəəŋ, mɔɔd nyummú tɛn, niiŋ lɛ́ Siudáa, kibíəniʼ kɛ́ Kalilə́ə, aáság kiim alon. Kɛ́yɛ́ɛ a kɛnɛŋ kɛ́ ɔmban ó nigúu óyɛ́ɛ agaásan. Nyɔ́lɛ́ tɛn yiísúid pɔɔd piíŋ a ngim yəəŋ. Ná nyɔ́lɛ́ tɛn páyɛ́moyóón, ungim nyɔ́ ayɛ́ɛ a ngim yəəŋ yɛɛ́fám tɛn.

³⁸Náa nɛ́gɔŋ anɛ́ɛ́n, ndabodɛ́anɛ lɛ́: Pudisiə́d kə́mmú kɛnɛŋ na pɔɔd póonɛ. Íbudíən, pɛ́ɛn. Kɛ́maʼkɛɛn lɛ́ mafɛgaʼ mɔ́ɔ́bɔn na pigólí pɛɔ́bɔn pɛ́ pálɛɛ́ agɛɛlɛ, pɛ́lɛ a toɛn tó pɔɔd, piim pɛ́ɛb piə́wu.

³⁹Náa, kɛ́maʼkɛɛn lɛ́ nkə kɛ́ pálɛɛ́ agɛɛlɛ kɛ́lɛ a toɛn tó Táán, podɛágaáʼkɛ kuwíiyi. Pólóʼkɔd lɛ́ a niɛlɛ nɛ́ɛn, polɛŋ kɛɛn lɛ́ polɛ agonɔɛyɛ Táán!» Pɔɔd pá páyɛ́ɛ agoyɔmɛ pɔɔ́n pá maʼtom pááság kəə́liʼtini nkə kɛ́ Kamalayɛ́ɛl ayɛ́bodɛánɛ.

⁴⁰Pááság kiiʼkini kodɔ́ŋɔn pɔɔ́n pá maʼtom a yoog, pámɛ́ɛ́lɛ lɛ́ pábobáam na nsuə́, pámábosɔ́yɔn na toɛn, pɔ́nɔ́ na pɔ́lɛ́, pə́diyíʼkíni kubuŋ niiŋ nɛ́ Yə́sus kə́mmú. Pááság kubuúlis lɛ́ pɛ́ɛn.

⁴¹Pɔɔ́n pá maʼtom pááság kiim pálón a yoog ɛ pɛyɔm. Páyɛ́ɛ agɛɛn ntɛ́m yɔɔbɔn síɛ́ɛ́d na tɔnyɔ́g lɛ́ Táán ayɛ́boodála lɛ́ pə́míig póonɛ lɛ́ pánɛ ntɔ́b a niiŋ nɛ́ Yə́sus.

⁴²Mɔɔ́s miim, a Tɛ́mpɛl, na a toádɛʼ, páyɛ́ɛ əgín agɛɛn yuudi na kaaʼkananɛ pɔɔd, páalɔɛgɛ Tɔsɔm Tólaŋ tó Yə́sus, Məsíi.