Read Yambeta Pigólí 6 Bible Online

Pigólí 6 - Yambeta bible

Pigólí 6

¹A kɛnɛŋ kɛ́go kɛ́ɛg, wɔnɔ́ ná ɔmban ó paaʼkan óyɛ́ɛ əgín agoyam, pɔsɔ́g pá páyɛ́ɛ agosɔyɔ Kɛlɛ́ɛg pə́ə́bə́ə́ kɔɔ́gɔ́dɔ pá páyɛ́ɛ agosɔyɔ Əbələ́ə. Páyɛ́ɛ agoboyɔ́gɔ́dɔ lɛ́ ɛ́nɛ́ wɔɔ́s, pɔ́dɛɔ́gɔ agaáyɔ́ɔ́ŋɛ pidí pɛɔ́bɔn pɛ́ pagɛ́ɛd a kɛnɛŋ kɛ́ ɔngab ó moom mó konɛ.[18]

²Pɔɔ́n pá maʼtom pá pówád na pábaan pááság kodɔ́ŋɔn paaʼkan piim a ɛgɔny, pɔ́nɔ́ na pɔ́lɛ́: «Kɛ́dɛɔ́gɔ kɔŋɛʼ lɛ́ pəsi tídi kolɔɛgɛ kó Tɔsɔm tó Táán agaaba moom mó konɛ.

³Pomóŋŋí, kólɛ́ aa kíəguunə lɛ́ pəŋi púiyid nto ɛ pɔɔd ɛ́ʼtáan na ɛ́baan a ondáŋ wááŋan yɛ́ ɛlɛɛ́ əgəə́siəd kɔŋɛʼ, pɔɔd pá Uŋun wó Ufúlúʼtú ólɛɛ́ na pɔ́lɛ́, pɔɔd pá pálɛɛ́ na nsiŋ, ná tɛ́boyɛ́ʼkɛn oʼtom wóow na pɔ́lɛ́

⁴agɛɛlɛ lɛ́ pəsi tɛ́ag oʼto wə́ə́s ungim əgín a pɛɔ́sɔ́gɔ́lɔ́n na a Tɔsɔm tó Táán kolɔɛgɛ.»

⁵Ungim yɛɛ́nyɔ́ga na tɔgɛ́ɛ́ tóod, pááság kiiyid Ɛ́ʼtiɛn, mɔɔd nyɔ́ ayáágɛn oʼto kɛ́fɔlɛ́ na Yə́sus, Uŋun wó Ufúlúʼtú na nyɔ́lɛ́ tɛn síɛ́ɛ́d. Pə́yííyid tɛn Filíib, na Poloʼkɔ́ɔl, na Nɛʼkanɔ́ɔl, na Tímɔŋ, na Palɛmɛnáas, na Nɛʼkoláa mɔɔd wo Əntiyóos nyɔ́ ayɛ́ɛ aándɛ a kəə́liʼtiniʼ kó Yúdɛn.

⁶Pááság kɛɛn na pɔ́lɛ́ a udi ó pɔɔ́n pá maʼtom. Pɔɔ́n pá maʼtom pɔ́yɔ́sɔ́gɔ́lɔ́nɛ́ɛ́ Táán, pámáboyábɛ́gan ɔmbɔg a oʼto.

⁷Tɔsɔm tó Táán tóyɛ́ɛ agɛɛn əgín yuudi túəgiim tósambɛd. A Yolósalɛm ɔmban ó pəə́liʼtiniʼ óyɛ́ɛ əgín kubu na toɛn. Payaaganɛʼ pɛfɔny kɛ́fɔlɛ́ páyáág oʼto na Kilíʼtus.

⁸Táán ayɛ́ɛ́lɛ Ɛ́ʼtiɛn kɔŋɛʼ, amáamoyɛ́ʼkɛn toɛn kɛ́fɔlɛ́. Náan aa Ɛ́ʼtiɛn ayɛ́ɛ agɛɛlanɛ mangán na piə́wúunəniʼ pɛ́ pɛbán a əngis á pɔɔd.

⁹Pɔɔd pə́mmú pɛ́ɛ́sáŋa na nyɔ́lɛ́ a oʼto wóow. Páyɛ́ɛ pɔɔd pá a yoog ɛ pɛɔ́sɔ́gɔ́lɔ́n yɛ́ páyɛ́ɛ agodɔ́ŋɔn lɛ́ «Yoog ɛ pɛɔ́sɔ́gɔ́lɔ́n ɛ pá pə́ndigií pɛɔ́lɛ́[19]» A ondáŋ wɔ́ɔ́bɔn, pɔɔ́n pá Yúdɛn pá a pálɛ́ɛg ɛ Silɛ́ɛn páyɛ́ɛ kɔ. Ɔmbɔ́ tɛn pɔsɔ́g pá a Alɛgɛsəndilíi, na pá a Silisíi, na pá a nigúu nɛ́ Əsíi.

¹⁰Kɛbán kímuʼ, pádɛʼkáagaáʼkɛ komoónyɔŋ na tɔgɛ́ɛ́ lɛ́ ayɛ́ɛ agosɔyɔ na nsiŋ yɛ́ Uŋun wó Ufúlúʼtú óyɛ́ɛ agomoyɛ́ʼkɛnan.

¹¹Páyáwɛ́nɛ́ɛ́ pɔɔd lɛ́ píim əsəə pɔ́nɔ́: «Tɛyóób mɔɔd nyóonɛ aádóga Moyíis. Ɔmbɔ́ tɛn Táán, ayɛ́ɛ agodóga.»

¹²Tɔgɛ́ɛ́ tóod toɛ́báyɛ́d pɔɔd ilúún, na ponnom pó nigúu, na palɛŋ pɛcɛm. Pááság kɛɛn əbúbi Ɛ́ʼtiɛn, pə́mə́mugúmin, pámɛ́ɛn na nyɔ́lɛ́ a yoog ɛ pɛyɔm yɛ́ nkóʼkóón.

¹³Páyɛ́ɛ́nan kɔ na pɔɔd lɛ́ pɛ́ɛn adɛ́lɛm mbaasɔ́ ɛ pɛfaa, pə́səə pɔ́nɔ́: «Taa, mɔɔd nyóonɛ ɔdɛɔ́gɔ agosom unuʼ, alɛ əgín agɛɛn yuudi agosɔyɔn Tɛ́mpɛl yəəs yɛ́ ɛlɛɛ́ pulúʼkə́n. Alɛ agosɔyɔ kɔbɛ́ tɛn a pɛcɛm pɛ́ Moyíis.

¹⁴Tɛyóób əə́səə tɛn lɛ́ Yə́sus, mɔɔ́n o Násalɛd nyóon alɛ́ɛ́ kubugə Tɛ́mpɛl yɛ́ɛnɛ, áagasanɛ tɛn pisiə́g pɛ́ Moyíis əyíbidíín.»

¹⁵Pɔyɔm pɛyɔm piim pá páyɛ́ɛ a yoog ɛ pɛyɔm pááság kubisin Ɛ́ʼtiɛn əngis a nkó. Pɛ́ɛ́dála udi wə́ə́ŋ wándɛ wɔnɔ́ wó uŋun ó maʼtom má Táán.