Read Yambeta Pigólí 7 Bible Online

Pigólí 7 - Yambeta bible

Pigólí 7

¹Ɔnjaaganɛʼ pɛfɔny nyɔ́ oʼkóʼkóón yiíŋíən na Ɛ́ʼtiɛn ɔnɔ́ əə: «Nkə kɛ́ɛg kɛ́ pálɛɛ́ əgusəə, náan aa kɛ́lɛɛ́ fɔ́lɔ́b ə́?»

²Ɛ́ʼtiɛn əyúlísíni ɔnɔ́: «Pomóŋŋí páam na pasɛ páam! Lɛŋáan kɛnjoob kɔŋɛʼ kɔŋɛʼ. Táán nyɔ́ alɛɛ́ na nugəm yɛɛ́lónɛn sɛʼkóón wəəs Ábɛlaam a Məsoʼpoʼtəmíi. Ábɛlaam ayɛ́ɛ adɛ́njɛ́ɛn ələndin a Aláan a kɛnɛŋ kɛ́go kɛ́ɛg.

³Táán yiísə́ə́ ɔnɔ́ na nyɔ́lɛ́: Tɛ́ɛ́mɛn, tí nigúu nɛáŋ na yoog yaaŋ ɛ pɔɔd, wɛ́ɛn ələndin a nigúu nɛ́ ndə́guúloodi.

⁴Ábɛlaam yɛɛ́dɛ́ɛ́mɛn a Kaldə́ə, amɛ́ɛn ələndin a Aláan. Kɔ́gɔ́ɔg aa Táán əyíím ámoolónɛ ná sɛ ayɛ́ɛ əə́ʼkugu, əgiim na nyɔ́lɛ́ áanɛ a nigúu nɛ́ɛnɛ nɛ́ polɛɛ́ a nɛ́lɛ́ nɛ́gɔŋ.

⁵Kɔ a nigúu nɛ́ɛn, Táán adɛʼkáamoyɛ́ʼkɛn kɛsom kɛ́ nsí ɔmbɔ́ sɔɔŋ kígiig lɛ́ mɔɔd yáag ongoo kɔ. Ayɛ́mogágɛn agá lɛ́ nyɔ́lɛ́ alɛ́ɛ́ komoyɛ́ʼkɛn nigúu nɛ́ɛn niim. Nɛ́lɛ́ɛ́ koob tɛn ɔmbɔ́ na pɔɔ́n pə́ə́ŋ ná nyɔ́lɛ́ əə́ʼkugu. A kɛnɛŋ kɛ́go kɛ́ɛg, Ábɛlaam ayɛ́ɛ adɛ́njɛ́ɛ na mɔɔ́n.

⁶Taa, nkə kɛ́ Táán ayɛ́modɛánɛ aa kɛ́ɛnɛ, ɔnɔ́: “Ndɛg yaaŋ ɛlɛ́ɛ́ kuləndin a nigúu nɛ́ nɛ́dɛɔ́gɔ nɛɔ́bɔn. Pálɛ́ɛ́ kɛɛlɛ ɔ́ndɛd ɛ pɛag íniʼ kɔ, pɔ́lɛ́ pɛɔ́lɛ́, páaboócɔʼkɔnɛ.

⁷Náa, mɛ Táán ndɛ́ɛ́ koyɔmɛ nigúu nɛ́ɛn nɛ́ nɛ́lɛ́ɛ́ koboyánɛɛ́ pɛɔ́lɛ́. A ngim yɛ́ɛy, ndɛg yaaŋ ɛlɛ́ɛ́ kiim ɛ́lon a nigúu nɛ́ɛn əgiim agɛnyɛɛ́ʼkɛn nnyáádɛ́ a pɛɔ́sɔ́gɔ́lɔ́n áanɛ a nigúu nɛ́ɛnɛ[20]”

⁸Táán aáság kaáganan na Ábɛlaam unuʼ úmmuʼ. Páyáág waany wɔnɔ́ kɛálɛ́ʼkán kɛ́ a ngóbánán yɔɔbɔn. Náan aa, ná Ábɛlaam yiíbíən Ɛ́sag, ayɛ́moyáányɛ a mədúg máʼtáan na mádáád. Ɛ́sag amáyɛɛlɛ tɛn náan yoom ímuʼ na mɔɔ́n Yáʼkɔb. Yáʼkɔb amɛ́ɛ́lɛ tɛn náan na pɔɔ́n pə́ə́ŋ pówád na pábaan pá pálɛɛ́ pasɛʼkóón pə́ə́s[21]

⁹«Pasɛʼkóón pə́ə́s póob páyɛ́ɛ́lɛ́nɛ mɔɔ́n o sɛ wɔɔbɔn Yósɛb yaág yɛ́ əngis, pámámoólɛ́g lɛ́ yɛ́ɛn əgud pɛʼtɛ́ɛŋ a Əsíibtə. Náa, Táán ayɛ́ɛ na nyɔ́lɛ́,

¹⁰aáság komoyɔ́ɔyɛ a ntɔ́b yəəŋ ngim. Ayɛ́moyɛ́ʼkɛn nsiŋ, amáyɛɛlɛ lɛ́ Falawɔ́ɔŋ (nkúm yɛ́ nkóʼkóón yɛ́ a Əsíibtə) ímuúsiəd kɔŋɛʼ. Nkúm yɛ́ nkóʼkóón yɛ́ɛy ɛyɛ́mobágɛ ngɔ́mɛnaʼ yɛ́ nkóʼkóón a Əsíibtə kilúd, na a noádɛʼ nuə́ŋ kɛ́.

¹¹Məyíi mááság kudə́əŋ a Əsíibtə ngim, na a Kanaáŋ kɛ́. Pɔɔd páyánɛ́ɛ́ a kɛnɛŋ kɛ́ɛg kɛ́fɔlɛ́, pasɛʼkóón pə́ə́s pɔ́dɛɔ́ŋ yoom ɛ́ konɛ.

¹²Ná Yáʼkɔb ayóób lɛ́ moom mó konɛ mólɛ a Əsíibtə, yɛɛ́dóm pasɛʼkóón pə́ə́s kɔ́gɔ́ɔg a kó na oʼto na oʼto.

¹³Ná ayɛ́boodóm kə́mmú a annam ábaan, Yósɛb aáság kɛɛlɛ lɛ́ pɔɔ́npásɛ pámoólɛŋ. Áay tɛn aa Falawɔ́ɔŋ yɛɛ́lɛ́ŋ a ndɛg ɛyaán áa Yósɛb alɛɛ́ əgiim álon.

¹⁴Yósɛb aáság kodom anɛ́ɛ́n pɔɔd lɛ́ pɛ́ɛn əmuúsiədin sɛ Yáʼkɔb, na yoog yəəŋ ɛ pɔɔd ngim. Páyɛ́ɛ əʼtin á pɔɔd ádáád na pɔɔd puuniʼ.

¹⁵Náan aa Yáʼkɔb yiísúú a Əsíibtə. Yiígú kɔ, ɔmbɔ́ tɛn pasɛʼkóón pə́ə́s kɔ́gɔ́ɔg aa pííguə́ʼkən.

¹⁶Pɛ́ɛ́nyáŋɛ́na pɛlóŋ pɛɔ́bɔn agɛɛn əniəŋən a Sɛsɛ́ɛm, a kəəniʼ ká Ábɛlaam yɛɛ́wɛ́ɛ́n na mɔɔnɛ́. Yɛɛ́wɛ́ɛ́n kəəniʼ kágo na pɔɔ́n pá Ɛmɔ́ɔl nyɔ́ yɛɛ́sáŋ kɛnɔ kɛ́ɛg[22]

¹⁷«Ná kɛnɛŋ kɛ́ Táán kɛɛlɛ nkə kɛ́ yɛɛ́gágɛn na Ábɛlaam kɛ́yɛ́ɛ kɛándɛ ndúmiʼ, ndɛg yəəs ɛyɛ́ɛ agɛɛn əgín yuudi na kudəg a Əsíibtə.

¹⁸Nkúm yimmú yɛ́ ngwa yaáság kusiəd oʼkɔɔ a Əsíibtə. Nkúm yɛ́ɛy ɛdɛ́ʼkóolɛŋɛn Yósɛb.

¹⁹Yɛ́lɛ́ ɛyɛ́ɛ agobɛnɛn pasɛʼkóón pə́ə́s, yaáboócɔʼkɔnɛ, yaáboogóda ambaan lɛ́ pə́disiə́d kɛnɛŋ na pɔɔ́n pɔ́ɔ́bɔn agɛɛlɛ lɛ́ pə́guə́ʼkən[23]

²⁰A kɛnɛŋ kɛ́go kɛ́ɛg aa Moyíis əyə́biə́níí. Moyíis ayɛ́ɛ isisíg ɛ́ mɔɔ́n nyɔ́ uʼtom, əə́gə́mmi Táán. Páyɛ́moŋánɛ́gɛ kɔ a noádɛʼ nó sɛ, məə́ mádáád[24]

²¹Ná páyɛ́moodó a táán, mɔɔ́n nyɔ́ ɔʼkɛ́ɛd o Falawɔ́ɔŋ aáság kumuúsiəd, amámoyámánɛ wɔnɔ́ mɔɔ́n wəəŋ o nyɔ́lɛ́nyɔ́amɔɛ́d[25]

²²Náan aa Moyíis yɛɛ́yám a mandoŋá má Əsíibtə, amáán mɔɔd o fɔ́lɔ́b, tɔgɛ́ɛ́ tuə́ŋ a nɛ́ mɔɔd nyɔ́ aálɛŋ. Nkə kɛ́ aágɛɛlɛ, agɛɛlɛ kɛ́lɛ́ a nɛ́ mɔɔd wo nsiŋ.

²³«Ná Moyíis əyííg pɛag əʼtin ábaan, aáság kusəə lɛ́ nyɔ́lɛ́ kuə́ŋ kɛɛn adála pomóŋŋí, pɔɔ́n pá Ɛ́sɛlayɛl.

²⁴Alɛ kɔ́gɔ́ɔg ɔ, aáság kodála mɔɔ́n wo Əsíibtə nyummú əə́yəʼkəni mɔɔ́n wo Ɛ́sɛlayɛl. Aáság kəə́suuli agɔnɔna nyɔ́ páyɛ́ɛ əguyəʼkəni. Kɔ a kiʼtuuliʼ, aáság koon mɔɔ́n wo Əsíibtə nyóon.

²⁵Ayɛ́ɛ agofɛg lɛ́ pomóŋŋí, pɔɔ́n pá Ɛ́sɛlayɛl páagoob áay lɛ́ nyɔ́lɛ́ aa Táán əmə́muyííyid əgiim aboyááŋɛn. Náa, pádɛʼkáagoob.

²⁶A koany kaáyɛnɛ, Moyíis aáság koboan pɔɔ́n pá Ɛ́sɛlayɛl pábaan pálɛ a kiʼtuuliʼ. Aáság kɛɛn lɛ́ yáag kiwiiyiʼ a kɛgaágadɛ kɛɔ́bɔn. Yiísə́ə́ ɔnɔ́ na pɔ́lɛ́: “Pɔɔ́n pá sɛ! Tuə́ ə́ən? Niŋŋí pəŋi na pəŋi polɛ a kiʼtuuliʼ ə?”

²⁷Náa, sɔ́g nyɔ́ yɛɛ́nyɔ́ŋ móŋŋí əə́bə́ə́ agá kofánan Moyíis, ɔnɔ́ na nyɔ́lɛ́ əə: “Ánɛ aa amágobágɛ nkúm yəəs ə́? Ánɛ aa amágoyáág lɛ́ óbɛɛ́yɔmɛ ə́?

²⁸Waanyɔ́ŋɛn kɛnjoon tɛn wɔnɔ́ ná oyóón mɔɔ́n wo Əsíibtə nyóon puə́y ə́?”

²⁹Ná Moyíis ayóób náan, aáság kodɛ́da, amɛ́ɛn ɔgɔɔsɛm a nigúu nɛ́ndɛ́ŋ, a Madɛ́an. Yiíbíən pɔɔ́n pábaan kɔ́gɔ́ɔg a Madɛ́an[26]

³⁰«Əʼtin á pɛag ábaan a ngim yɛ́ɛy, uŋun ó maʼtom ó Táán wááság kolónɛn Moyíis a kɛnɔ kɛ́ kifələ́ə́n, ndúmiʼ na oʼkon ó Sinayíi. Óyɛ́ɛ a ondɔɔ ó yug yɛ́ idúʼtún yɛ́ ɛ́yɛ́ɛ alola.

³¹Moyíis ayáyáágɛ́ɛ́ ɔmbɔg a oʼto a nkə kɛ́ɛg kɛ́ kɛ́yɛ́molónɛn, yɛɛ́dála. Náa, ná ayaʼkanyɔ́ŋɛn kaáyɛʼtɛnɛ kɔ ndúmiʼ agodɛ́ʼtɛg, ayóób nɛŋo nɛ́ɔsɔyɔ na nyɔ́lɛ́. Nɛ́yɛ́ɛ nɛŋo nɛ́ Sə́dúk, nɛɔ́nɔ́:

³²“Ndɛ Táán ɛ pasɛʼkóón pááŋ, Táán yɛ Ábɛlaam, Táán yɛ Ɛ́sag, Táán ɛ Yáʼkɔb.” Moyíis əə́bə́ə́ kuliminə kwag kwag kwag. Adɛʼkɛ́ɛ agowɛ́ɛsɛ kudə́əmini oʼto agodɛ́ʼtɛg.

³³Náa Sə́dúk ɔnɔ́ na nyɔ́lɛ́: Óliógíí palábá a ambaan lɛ́ nsí yɛ́ɛy, kɛnɔ kɛ́ udə́níí, ɛlɛ nsí yɛ́ ɛlɛɛ́ pulúʼkə́n.

³⁴Ɛɛ́ɛ, mbádála ndɛg yaam wɔnɔ́ ná ɛlɛɛ́ agaánɛ a Əsíibtə. Mbóób wɔnɔ́ ná pálɛɛ́ agaányam, mbíim lɛ́ nyíim aboyááŋɛn. Nɛ́gɔŋ yɛ́ɛnɛ, mɛ́ɛn nkoodom a Əsíibtə[27]»

³⁵«Moyíis nyóon nyɔ́ pɔɔ́n pá Ɛ́sɛlayɛl pííʼtə́m pámáamodɛ́anɛ pɔ́nɔ́ na nyɔ́lɛ́ əə: “Ánɛ aa amágobágɛ nkúm yəəs ə́? Ánɛ aa amágoyáág lɛ́ óbɛɛ́yɔmɛ ə́?” Nyɔ́lɛ́ ogo aa Táán ayɛ́modómɛn uŋun wə́ə́ŋ ó maʼtom agomodɛ́anɛ lɛ́ aamoodom lɛ́ ábág nkúm yɔɔbɔn na ongaáŋɛn wɔɔbɔn. Uŋun ó maʼtom wóow wɛ́ɛ́lón a idúʼtún a kaadɛ, yáalola.

³⁶Moyíis aa yɛɛ́lónɛ pɔɔ́n pá Ɛ́sɛlayɛl a Əsíibtə na mangán, na piə́wúunəniʼ pɛ́ pɛbán pɛ́ ayɛ́ɛ́lánɛ a Əsíibtə na a noom nó nubógógó, na a kɛnɔ kɛ́ kifələ́ə́n əʼtin á pɛag ábaan[28]

³⁷Əgín tɛn Moyíis aa yɛɛ́dɛánɛ na pɔɔ́n pá Ɛ́sɛlayɛl ɔnɔ́: “Táán alɛ́ɛ́ kɛɛlɛ lɛ́ ɔndɔɛgɛʼ pɛbán wəəŋ wɔnɔ́ mɛ álon a kibúúm kɛáŋan[29]”

³⁸Ná pɔɔ́n pá Ɛ́sɛlayɛl páyágɔnyɛdɛn a kɛnɔ kɛ́ kifələ́ə́n, Moyíis aa yɛɛ́dɛ́lɛmɛn a kɛgaágadɛ kɛ́ɛg lɛ́ pasɛʼkóón pə́ə́s ɛbá, uŋun ó maʼtom ó Táán wó óyɛ́ɛ agosɔyɔ na nyɔ́lɛ́ a oʼkon ó Sinayíi ɛbá. Na nyɔ́lɛ́ aa Táán yɛɛ́sɔ́yɔ tɔgɛ́ɛ́ tó tóabɛyɛ́ʼkɛn ɔlaa lɛ́ ná ábɛsánɛnɛ tólɛ́[30]

³⁹Náa, pasɛʼkóón pə́ə́s pádɛʼkáanyɔ́ŋɛn komoyóbɛn. Páyɛ́moodó, mafɛgaʼ mɔ́ɔ́bɔn máyɛ́ɛ agá a Əsíibtə lɛ́ púúlini kɔ.

⁴⁰Kɛ́lɛ lɛ́, pɛ́ɛ́dɛánɛ na Álɔn pɔ́nɔ́: “Álɔn, ɛ́bɛyɛ́ɛ́lɛ́nɛ padáán pá pə́əbisúid ngə́ lɛ́ Moyíis nyóon nyɔ́ əyíím ábɛɛlónɛ a Əsíibtə; tɛdɛálɛŋ nkə aa kɛáʼkaánɛ́ɛ́ kɔ na nyɔ́lɛ́.”

⁴¹Náan aa a mədúg móom, pɛ́ɛ́mááŋan yoom a kɛŋwáŋánán kɛ́ mɔɔ́n ó káwoʼ, pɔ́nɔ́ Táán yɔɔbɔn a yɛ́ɛy. Páyɛ́ɛ́lɛ́nɛ táán yɔɔbɔn ɛgo yɛ́ɛy kɛfɔny, pámɛ́ɛ́lɛ kɛa kɛ́ wɔɔ́n a oʼto ó yoom yɛ́ pámɛ́ɛ́lɛ na ɔmbɔg yɔ́ɔ́bɔn[31]

⁴²Náa, Táán əyíbudúmin ngim, əmə́buudí lɛ́ pə́dúmin wɔɔ́s na wəə́ na muə́dədəʼ əndu ɔgɔɔ́sɔ́gɔlɔn, əgín wɔnɔ́ ná kíyə́dílə́ə́ a kálaʼtaʼ ɛ palɔɛgɛʼ pɛbán pá Táán. Kíyə́dílə́ə́ kɔ lɛ́: “Pəŋi pɔɔ́n pá Ɛ́sɛlayɛl, a pɛag əʼtin ábaan pɛ́ poyɛ́ɛ́lɛ a kɛnɔ kɛ́ kifələ́ə́n ə́ə, mɛ áa poyɛ́njoónan ponyam agɛnyɛɛlɛnɛ pɛfɔny ə́?

⁴³Ndóo, kiób kɛ́ táán yaaŋan Mɔlɔ́ɔg aa poɛ́nyáŋɛn, na kílíngə́lingə kɛ́ yəə́dədəʼ ɛ́ Lɛfáan nyɔ́ alɛɛ́ tɛn táán yaaŋan. Pílíngə́lingə pɛ́ poyɛ́ɛ́lánɛ na ɔmbɔg yááŋan, puə́dúmə əndu a udi wɔ́ɔ́bɔn agoboyɔ́sɔ́gɔlɔn lɛ́ pɛándɛ padáán pááŋan. Kólɛ́ aa ndɛ́ɛ́ kɛɛlɛɛ́ lɛ́ pósaa, póɛn laálá, kosan Pabɛlɔ́ɔn[32]”

⁴⁴«Ná pasɛʼkóón pə́ə́s páyɛ́ɛ a kɛnɔ kɛ́ kifələ́ə́n, páyɛ́ɛ kɔ na kiób kɛ́ kɛ́yɛ́ɛ əgubuúloodi lɛ́ Táán alɛ na pɔ́lɛ́. Pɛ́ɛ́wáag kiób kɛ́go kɛ́ɛg əgín wɔnɔ́ ná Táán yɛɛ́dɛánɛ na Moyíis lɛ́ kɛáwáag. Kɛ́lɛ lɛ́, yɛɛ́dɛánɛ na Moyíis lɛ́ kɛáwáag yoom ímuʼ náan wɔnɔ́ kɛ́ɛg kɛ́ nyɔ́lɛ́ əmə́mulóódi, amɛ́ɛ adála.

⁴⁵Pasɛʼkóón pə́ə́s pá a ngim ɛ pɔsɔ́g póob aa píísiə́d kiób kɛ́ɛg. Ná Yosuwə́ə ayɛ́ɛ aándɛ nkúm yɔɔbɔn, páyɛ́ɛ́n na kɛ́lɛ́ a nigúu nɛ́ Táán yɛɛ́ŋɛ́ŋ pɔɔd kɔ pá pádɛʼkɛ́ɛ agomoólɛŋɛɛ́. Pɛ́ɛ́láá a nigúu nɛ́ɛn kɔ na kiób kɛ́ɛg súʼtə́ə́ a kɛnɛŋ kɛ́ Tə́fid[33]

⁴⁶Tə́fid nyóon, Táán ayɛ́moyɛ́ɛ́lɛ kɔŋɛʼ. Náan aa ɔyɔ́sɔ́gɔ́lɔ́nɛ́ɛ́ Táán lɛ́ ámoyɛ́ʼkɛn toɛn nyɔ́lɛ́ áwáagɛn Táán ɛ Yáʼkɔb noádɛʼ.

⁴⁷Kɛbán kímuʼ, Salomɔ́ɔŋ agá aa yɛɛ́wáágɛn Táán noádɛʼ[34]

⁴⁸Náa, Táán nyɔ́ a mɔɛmɔɛ́n adɛálaa a noádɛʼ nó pɔɔd pááwáág na ɔmbɔg yɔ́ɔ́bɔn. Kɛ́lɛ əgín wɔnɔ́ ná ɔndɔɛgɛʼ pɛbán o Táán yiísə́ə́,

⁴⁹ɔnɔ́, Sə́dúk ɔnɔ́: Mbálámɔɛn ɛlɛ noʼkóm nóam nó nɛlaamɛʼ, nsí kɛgaan a ambaan yáam. Noádɛʼ, ombod óyaán áa polɛɛ́ págɛngwáagɛn əə́? Kɛnɔ kɛ́ mɛ kooyig a kɛ́ɛg ə́lə́ə́ ə́?

⁵⁰Moom móom muim əə, ɔdɛɔ́gɔ mɛ áa mbɛ́ɛ́lɛ mólɛ́ na ɔmbɔg yáam əə́[35]?»

⁵¹Ɛ́ʼtiɛn yiíyíbə́nə́n tɔgɛ́ɛ́ tuə́ŋ, ɔnɔ́: «Pəŋi póonɛ, pugóódi nto yɛ́ nnasáŋ ə́y! Ntɛ́m yaaŋan nnasáŋ, ntóɛŋ ndɔ́ɔ́lɔ́gɔ́! Polɛ əgín agosáŋɛnɛ koóbɛn Uŋun wó Ufúlúʼtú! Polɛ wɔnɔ́ pasɛ pááŋan!

⁵²Ɔndɔɛgɛʼ pɛbán o Táán oyaán úmmuʼ aa pasɛʼkóón pááŋan pə́diʼkə́əyəʼkənií ə́? Páyóóna ɔmbɔ́ tɛn pá pə́yíím alɔɛgɛ niim nɛ́ nyɔ́ alɛɛ́ nyɔ́lɛ́nyɔ́əsíŋ Sáád. Nyɔ́lɛ́ ogo nyɔ́ poáʼkomoólɛgɛɛ́ nɛ́gɔŋ, poáʼkomoyónɛ́ɛ́[36]

⁵³Pəŋi págo pá məŋun má maʼtom[37] mə́yíím aboyɛ́ʼkɛn pɛcɛm pɛ́ Táán, podɛɔ́gɔ anɛ́ɛ́n agɛɛlɛ nkə kɛ́ pɛcɛm pɛ́go pɛ́lɛɛ́ əgusəə.»

⁵⁴Ná pɔɔd pá a yoog ɛ pɛyɔm yɛ́ nkóʼkóón yɛ́ɛy páyóób tɔgɛ́ɛ́ tóod, páyóób ilúún kɛ́fɔlɛ́ na Ɛ́ʼtiɛn. Páyɛ́ɛ agaágáma pɛgɛg na ilúún yɛ́ɛy.

⁵⁵Náa, Ɛ́ʼtiɛn nyɔ́lɛ́, wɔnɔ́ ná Uŋun wó Ufúlúʼtú úyímuyə́əgin a ɔʼtɛ́m síɛ́ɛ́d, yɛɛ́bágɛ əngis a mɔɛn aáság kodála kisəə kɛ́ Táán, Yə́sus oʼtɛ́lɛ́máán kɔ a ombɔg ó nɛnom ó Táán.

⁵⁶Ɛ́ʼtiɛn ayɛ́ɛ agosɔyɔ, ɔnɔ́: «Táá mbálámɔɛn áa yɛ́ɛy ndɛɛ́ agodɛ́ʼtɛg. Ɛlɛ mbuənə́ə́n, Mɔɔ́n o mɔɔd kɔ oʼtɛ́lɛ́máán a ombɔg ó nɛnom ó Táán.»

⁵⁷Ná palóoyaʼ páyóób náan, páyáfɛ́mɛ́ɛ́ nɛŋo a mɔɛn, pɔ́mɔ́lɔ́gɔ́ɔ́ ntóɛŋ. Pɔ́lɛ́ piim pááság kugumin Ɛ́ʼtiɛn,

⁵⁸páálón pálɛ́ɛg na nyɔ́lɛ́, páábáda aʼtáán agomodóan lɛ́ ə́gu. Pawɛ́sɛnɛg pə́yə́díŋínə́ə́ pilə́ə́ pɛɔ́bɔn pɛ́ kobag, pámɛ́ɛn əyiilə a udi wó ɔnyɔmmɔ́n nyummú niiŋ lɛ́ Sóol lɛ́ ə́buúnuŋin pɛ́lɛ́.

⁵⁹Ayɛ́ɛ páadóan Ɛ́ʼtiɛn aʼtáán, nyɔ́lɛ́ ɔɔ́gɔɔ́sɔ́gɔlɔn Táán, ɔnɔ́: «Sɛ́gɔɔ o, Sə́dúk Yə́sus! Siəd uŋun wáam.»

⁶⁰Aáság kudum əndu a nsí, oódóʼtin kiʼkíŋ, ɔnɔ́: «Sə́dúk, íbulísin kɔbɛ́ kóonɛ kó pámɛ́ɛ́lɛ.» Əgín ná yiísə́ə́ náan, aáság kiisimid.