Read Yambeta Pigólí 8 Bible Online

Pigólí 8 - Yambeta bible

Pigólí 8

¹Sóol nyɔ́lɛ́ ayɛ́ɛ a ondáŋ ó pɔɔd pá pɛ́ɛ́nyɔ́ga lɛ́ póon Ɛ́ʼtiɛn náan. A wɔɔ́s ogo wóow aa njəʼkə́nə́ní yɛ́ nkóʼkóón iyə́bə́ə́líí na ungim nyɔ́ a ɛgɔny ɛ́ pəə́liʼtiniʼ yɛ́ a Yolósalɛm. Piim pɛ́ɛ́fálɛ́mɛn agɛɛnan a əʼkúu yɛ́ a Siudə́ə, na yɛ́ a Səməlíi. Pɔɔ́n pá maʼtom aa pɔ́lɛ́ pɛ́ɛ́lɔ́b a Yolósalɛm.

²Pɔɔd pá pə́yə́yíísin a kəə́liʼtiniʼ pááság kusiəd kɛlóŋ kɛ́ Ɛ́ʼtiɛn pámɛ́ɛn əni. Páyɛ́molɛ́ɛ́ kɛ́fɔlɛ́.

³Náa a kuə́ŋ, Sóol ayɛ́ɛ əguunə kuwíiyi pəə́liʼtiniʼ. Ayɛ́ɛ əgiim ɔ́sɔ́dɔn a toádɛʼ tuim, əə́gumən lɛ́ na panɔ́mɛɛd na pagɛ́ɛd, aágɛɛn aboyáágan a yoog yɛ njaan.

⁴Pəə́liʼtiniʼ pá pɛ́ɛ́fálɛ́mɛn, páyɛ́ɛ agodáŋana pɛnɔ piim, pə́əgiim pálɔɛgɛ Tɔsɔm Tólaŋ.

⁵Náan aa Filíib ayɛ́ɛ́n a pálɛ́ɛg yimmú yɛ́ a Səməlíi. Kɔ́gɔ́ɔg aáság kɔlɔɛgɛnɛ pɔɔd nkə kɛ́ kɛ́adɛ́ʼtɛg Məsíi.

⁶Pɔɔd piíŋ páyɛ́ɛ agodam ntóɛŋ a tɔgɛ́ɛ́ tuə́ŋ wɔnɔ́ ná ayɛ́ɛ agosɔyɔ, páadála tɛn mangán má ayɛ́ɛ agɛɛlɛ.

⁷Kɛ́lɛ lɛ́, ayɛ́ɛ agɛɛlɛ məŋun má mabɛ́ máalónan a pɔɔd piíŋ. Ayɛ́ɛ mándaalon, máagaányam. Ayɛ́ɛ agɛɛlanɛ tɛn pɛgɔd piíŋ na pɔɔd pá pɛnɛ́m tɛn piíŋ páadáŋana kə́mmú kɔŋɛʼ.

⁸Náan aa pɔɔd pá a pálɛ́ɛg yɛ́ɛy páyɛ́ɛ agɔnyɔ́ga kɛ́fɔlɛ́.

⁹Mɔɔd nyummú ayɛ́ɛ kɔ a pálɛ́ɛg yɛ́ɛy. Ayɛ́ɛ niiŋ lɛ́ Simɔ́ɔŋ. Ayɛ́ɛ mɔɔd o pɛnon. Pɔɔd pá a Səməlíi páyɛ́ɛ pəə́wúunəni kɛ́fɔlɛ́ na pɛnon piə́ŋ. Náan aa ayɛ́ɛ agaáganyɛla ɔnɔ́ nyɔ́lɛ́ alɛ mɔɔd!

¹⁰Kəə́siəd a poómbaa agɛɛn əgiig a pasaá, ungim ayɛ́ɛ agomonyáadɛ, pɔ́ɔsɔyɔ pɔ́nɔ́: «Mɔɔd nyóonɛ alɛ toɛn tɔmɔɛ́d tó Táán. Toɛn tó pɔ́ɔdɔ́ŋɔn lɛ́ “Toɛn tó togóʼkóón”.»

¹¹Ungim ayɛ́ɛ agomoyóob náan lɛ́ kɔ́gɔ́ɔg kalaʼ aa ayɛ́ɛ agɛɛlanɛ pɛnon piə́ŋ pɛ́ɛb, pɔɔd pə́əgəə́wúunəni.

¹²Náa, ná Filíib əyíím alɔɛgɛ Tɔsɔm Tólaŋ tó a Nɛlaamɛʼ nɛ́ Táán, amáabodɛ́anɛ kɛbán kɛ́ Yə́sus Kilíʼtus, páyáág oʼto na Yə́sus Kilíʼtus. Na panɔ́mɛɛd kɛ́, na pagɛ́ɛd kɛ́, pááság kusiəd ɔsɔgɛn.

¹³Simɔ́ɔŋ tɛn nyɔ́lɛ́nyɔ́amɔɛ́d ayáán ungəə́liʼtiniʼ, əə́siəd ɔsɔgɛn. Ayɛ́ɛ ədiiʼkíni kudi Filíib a nsun. Nyɔ́lɛ́ agá ayɛ́ɛ əgəə́wúunəni na toɛn a mangán na piə́wúunəniʼ pɛ́ pɛbán pɛ́ Filíib ayɛ́ɛ agɛɛlanɛ, aádɛ́ʼtɛg.

¹⁴Ná pɔɔ́n pá maʼtom pá páyɛ́ɛ a Yolósalɛm páyóób náan lɛ́ pɔɔd pá a Səməlíi pə́yə́líʼtíníí Tɔsɔm tó Táán, pídə́ə́míni Píɛ na Sɛ́aŋ, pámáboodóm lɛ́ pɛ́ɛn aboan Filíib kɔ́gɔ́ɔg.

¹⁵Ná páyɛ́ɛ́n əgiig kɔ, pɔ́yɔ́sɔ́gɔ́lɔ́nɛ́ɛ́ Táán agɛɛlɛ lɛ́ Uŋun wó Ufúlúʼtú wɛ́ɛn na pɔɔ́n pá Səməlíi pá pə́yə́líʼtíníí.

¹⁶Kɛ́lɛ lɛ́, Uŋun óyɛ́ɛ ódɛ́njɛ́ɛ ɔmbɔ́ na úmmuʼ a ondáŋ wɔ́ɔ́bɔn. Əgín ɔsɔgɛn wólɛ́ na wólɛ́ aa páyɛ́ɛ pə́ʼkusiəd a niiŋ nɛ́ Sə́dúk Yə́sus.

¹⁷Ná pɛ́ɛ́mán kɔɔ́sɔ́gɔlɔn, pa Píɛ pɔ́lɛ́ ná Sɛ́aŋ pááság koboyábɛgan ɔmbɔg a oʼto, Uŋun wó Ufúlúʼtú wááság kubuyíimin.

¹⁸Ná Simɔ́ɔŋ yɛɛ́dála náan lɛ́ Uŋun wó Ufúlúʼtú úyíbuyíímin pəə́liʼtiniʼ ná pɔɔ́n pá maʼtom páyɛ́boyáábɛ́gan ɔmbɔg, ayɛ́ɛ́n aboan pa Píɛ pɔ́lɛ́ ná Sɛ́aŋ lɛ́ áboyɛ́ʼkɛn mɔɔnɛ́.

¹⁹Yiísə́ə́ ɔnɔ́ na pɔ́lɛ́: «Póɛnyɛɛ́ʼkɛn tɛn mɛ toɛn tóod tó pugódíí agɛɛlɛ lɛ́ nyɔ́ mɛ tɛn ndáagaábɛgɛn ombɔg a oʼto, yɔ́ɔŋ Uŋun wó Ufúlúʼtú.»

²⁰Náa, Píɛ əyímuyúlísíni ɔnɔ́ na nyɔ́lɛ́: «Táán yɛ́ɛlɛ lɛ́ na wɛ na mɔɔnɛ́ mááŋ, púlíoŋ. Olɛ agofɛg lɛ́ nkə kɛ́ Táán aágɛɛ́ʼkɛn na mɔɔd, wɛ olɛ ogowɛɛn kɛ́lɛ́ na mɔɔnɛ́.

²¹A nkə kɛ́ɛnɛ kɛ́ kɛ́lɛɛ́ agaásan, odɛɔ́gɔ kɔ na ngab, odiɛn kɔ na oʼkɔɔ lɛ́ ɔʼtɛ́m wááŋ ódɛɔ́gɔ sáád a udi ó Táán.

²²Ə́súʼkíí mafɛgaʼ má mabɛ́ móom má málɛɛ́ na wɛ, wɔ́sɔ́gɔlɔn Sə́dúk agɛɛlɛ lɛ́ amaʼkɔnyɔ́ga, ə́guúlisin mafɛgaʼ móom má olɛɛ́ na mɔ́lɛ́ a oʼto.

²³Ɛɛ́ɛ mbádála lɛ́ ɔʼtɛ́m wááŋ ólɛ agogany, kɔbɛ́ aa kúgugúmíníníí a kɛáŋ.»

²⁴Áay aa Simɔ́ɔŋ əyúlísíni na pa Píɛ pɔ́lɛ́ na Sɛ́aŋ ɔnɔ́: «Sɛ́gɔɔ ɔɔ́n, poɔ́sɔ́gɔlɔn Sə́dúk pəŋibáamɔɛ́d a kidíídí kɛ́am, agɛɛlɛ lɛ́ nkə kɛ́ɛg kɛ́ puə́səə kɛ́dɛyɛ́nyɛɛlɛ.»

²⁵A ngim yɛ́ɛy ná pa Píɛ pɔ́lɛ́ páyɛ́ɛ páʼkoman kɛɛ́ʼkɛn mbaasɔ́ a nkə kɛ́ kɛ́adɛ́ʼtɛg Táán, páálɔɛgɛ tɛn Tɔsɔm tó Sə́dúk, pə́yúúlíni a Yolósalɛm. Páyɛ́ɛ agɛɛn pə́əgiim pálɔɛgɛ Tɔsɔm Tólaŋ ngə́ ngim, a əʼkúu á Səməlíi əngíŋ.

²⁶Uŋun ó maʼtom ó Sə́dúk wɛ́dɛánɛ na Filíib wɔnɔ́: «Filíib, tod áay kususúú, úyə́ən ngə́ yɛ́ imíim ɛ́dɛ́ɛmɛn a Yolósalɛm əgusuu a Káása. Pɔɔd pɔ́dɛɔ́gɔ agosánan a ngə́ yɛ́ɛy kɛ́fɔlɛ́.»

²⁷Filíib aáság koság kaáyáág a ngə́. Alɛ kɔ agɛɛn a, aáság kodála mɔɔd nyummú, kɛgóʼkóón kɛ́ a Əʼtioʼpíi. Mɔɔd ogo nyóon, Kandáas[38], nkúm yɛ́ ɔʼkɛ́ɛd yɛ́ a Əʼtioʼpíi aa iyímudə́nígi lɛ́ ádáŋananɛ tugúm tuə́ŋ tuim. Mɔɔd nyóon ayɛ́ɛ əguúlini a nigúu niə́ŋ. Əyíím a Yolósalɛm əgiim anyáadɛ Táán a pɛɔ́sɔ́gɔ́lɔ́n. Ayɛ́ɛ a kɛʼkálɛ́ɛd kiə́ŋ a mɔɛn, aábana kálaʼtaʼ yɛ́ Ɛsayíi, ɔndɔɛgɛʼ pɛbán o Táán yiídílə.

²⁹Uŋun wó Ufúlúʼtú wááság kodɛ́anɛ na Filíib wɔnɔ́: «Tod, úgóʼki kɛʼkálɛ́ɛd kɛ́ɛg.»

³⁰Filíib aáság kɛɛn əmugóʼki na ɔʼtɛ́d. Ayóób lɛ́ mɔɔd alɛ abana a kálaʼtaʼ yɛ́ Ɛsayíi, ɔndɔɛgɛʼ pɛbán o Táán yiídílə. Əyímuŋíən ɔnɔ́ əə: «Olɛ agoob nkə kɛ́ɛg kɛ́ olɛɛ́ agobana ə́?»

³¹Mɔɔd əyímuyúlísíni ɔnɔ́ na nyɔ́lɛ́: «Tuə́ áa ndɛɛ́ ogoob ná mɔɔd adɛnjaásɛnɛn əə́?» Aáság kodɛ́anɛ na Filíib lɛ́ ábág a kɛʼkálɛ́ɛd, ələndin a ɛbá yə́ə́ŋ.

³²Táá nkə kɛ́go kɛ́ ayɛ́ɛ abana a Kálaʼtaʼ ɛ Táán áa kɛ́ɛnɛ: «Alɛ wɔnɔ́ kiŋŋí kɛ́ nodóm kɛ́ pándagɛɛn asɛgɛdɛɛ́ kɛnág, wɔnɔ́ mɔɔ́n o nodóm nyɔ́ pálɛɛ́ agomo adɛág nɛŋo. Adɛʼkáabɛ́nɛn unuʼ ɔmbɔ́ lɛ́ “pɛbɛɛ.”

³³Páyɛ́moyɛ́ʼkɛn oʼto kono, pádɛmoyɛ́ʼkɛn kilumiʼ kiə́ŋ. Mɔɔd na mɔɔd adɛndɛ́ɛ́ kusəə kɛbán kɛ́ pɔɔ́n pə́ə́ŋ lɛ́ pɛ́ɛ́sóm ɔlaa wə́ə́ŋ a nsí yɛ́ɛnɛ[39]»

³⁴Náa kɛgóʼkóón kɛ́ɛg kíəŋíən na Filíib kɛɔ́nɔ́ ə: «Sɛ́gɔɔ ɛ́ʼtɛánɛ́. Kɛbán kɛ́ ánɛ aa ɔndɔɛgɛʼ pɛbán o Táán alɛɛ́ əgusəə náan əə́? Kiə́ŋ kɛ́ nyɔ́lɛ́nyɔ́amɔɛ́d óm, kɛ́ mɔɔd wɛndɛ́ŋ ə́?»

³⁵Náan aa a nkə kɛ́ɛg kɛ́ mɔɔd nyóon yɛɛ́bána, Filíib aáság kəə́bə́ə́ komoólɔɛgɛnɛ Tɔsɔm Tólaŋ tó túəsəə ɔlaa ó Yə́sus.

³⁶Pálɛ agɛɛn anɛ́ɛ́n yuudi na ongɛn wɔ́ɔ́bɔn ɔ, pááság kɛɛn alon a kɛnɔ kímmú kɛ́ məní máyɛ́ɛ kɔ. Náa mɔɔd ɔnɔ́ na Filíib: «Táá məní aa móonɛ. Nkə aa kɛ́asáŋɛnɛ lɛ́ ntisiə́d ɔsɔgɛn?» [

³⁸Mɔɔd aáság kusəə lɛ́ pə́də́nigi kɛʼkálɛ́ɛd, pə́ə́suu a məní lɛ́ na nyɔ́lɛ́, na Filíib. Filíib aáság komoyɛ́ʼkɛn ɔsɔgɛn.

³⁹Ná pə́yíím pálón a məní, Uŋun ó Sə́dúk wááság kusiəd Filíib, mɔɔd nyóon adɛmoodála kə́mmú. Náa, ayɛ́ɛ́n na ongɛn wə́ə́ŋ yuudi, tɔnyɔ́g na nyɔ́lɛ́ a ɔʼtɛ́m síɛ́ɛ́d.

⁴⁰Filíib nyɔ́lɛ́ yiídíin yaálɛ́mbɛd aándɛ a Asóʼtos. Yɛɛ́dɛ́ɛ́mɛn kɔ əə́giim álɔɛgɛ Tɔsɔm Tólaŋ a pálɛ́ɛg ngim yɛ́ ayɛ́ɛ agosan a yɛ́lɛ́, amɛ́ɛn alon a Səsalə́ə.