Read Yambeta Pigólí 9 Bible Online

Pigólí 9 - Yambeta bible

Pigólí 9

¹A kɛnɛŋ kɛ́go kɛ́ɛg, Sóol ayɛ́ɛ əʼtí kuyə́njən paaʼkan pá Sə́dúk agoboyóóna. Ayɛ́ɛ́n aboan Ɔnjaaganɛʼ pɛfɔny nyɔ́ oʼkóʼkóón,

²aáság kumuŋíən lɛ́ ámoyɛ́ʼkɛn tufuuʼ tóonɛ lɛ́ ná nyɔ́lɛ́ əə́giig a Tamáas, yoog ɛ pɛɔ́sɔ́gɔ́lɔ́n ngim yɛ́ aáboan pɔɔd kɔ, ɔmbɔ́ panɔ́mɛɛd, ɔmbɔ́ pagɛ́ɛd pá pálɛɛ́ əguyə́ən ngə́ ɛ Sə́dúk[41], ə́buúgumən agɛɛn na pɔ́lɛ́ a Yolósalɛm.

³Alɛ anɛ́ɛ́n kɔ a ngə́ ɛgɛɛn a, ná ayɛ́ɛ aándɛ ndúmiʼ na Tamáas, aáság kodála kisəə kíəgiim kísuu a mbálámɔɛn, kɛnɔ kɛándɛ səə́səə.

⁴Sóol a nsí kuŋ. Náa aágoob nɛŋo nɛɔ́nɔ́ na nyɔ́lɛ́: «Sóol, Sóol wɛ! Nkə aa wəə́ginjəʼkəni ə́?»

⁵Náa Sóol ɔnɔ́ əə: «Wɛ ánɛ aa olɛɛ́nɔ ə́, Sə́dúk?» Nɛŋo níyímuyúlísíni nɛɔ́nɔ́: «Mɛ áa ndɛɛ́ Yə́sus nyɔ́ olɛɛ́ əguyəʼkəni.

⁶Náa, tɛ́ɛ́mɛn, wɛ́ɛn ɔsɔd a pálɛ́ɛg. Kɔ́gɔ́ɔg, páagomoáŋɛnɛ oʼtom wááŋ.»

⁷Pɔɔd pá páyɛ́ɛ ondáŋ na nyɔ́lɛ́ pɛ́ɛ́dɛ́lɛm, pɔ́dɛɔ́ŋ unuʼ ógosɔyɛd. Páyóób nɛŋo nɛ́ɛn, náa pádɛʼkɛ́ɛ agodála mɔɔd nyɔ́ ayɛ́ɛ agosɔyɔ.

⁸Sóol aáság kodɛ́ɛmɛn. Náa, ɔmbɔ́ ná ayɛ́ɛ agaásɛna əngis, adɛʼkɛ́ɛ agodɛ́ʼtɛganan. Pə́yímugúmin agá a ombɔg agɛɛn na nyɔ́lɛ́ a Tamáas.

⁹Ayɛ́ɛ́lɛ kɔ mədúg mádáád aʼtɛ́ʼtɛ́gánan. Adɛʼkɛ́ɛ agonɛ́ɛnɛ tɛn, aŋŋó yoom.

¹⁰Ongaaʼkan o Yə́sus nyummú ayɛ́ɛ kɔ áay a Tamáas, niiŋ lɛ́ Ananɛ́as. Sə́dúk ayɛ́ɛ́n amoolónɛn, aáság komodɛ́anɛ ɔnɔ́: «Ananɛ́as oó!» Ananɛ́as aáság kɛɛ́da, ɔnɔ́: «Mɛ aa nyóonɛ o, Sə́dúk!»

¹¹Náa Sə́dúk ɔnɔ́ na nyɔ́lɛ́: «Tɛ́ɛ́mɛn, tod áay a ngə́ yɛ́ pɔ́ɔdɔ́ŋɔn lɛ́ “Ngə́ yɛ́ ɛdɛ́lɛ́mɛ́nɛ́ɛ́ Tə́lə́lə́lə́.” Ósɔd a nó Siudáa, Úŋíən mɔɔd alɛ kɔ, niiŋ lɛ́ Sóol, kibíəniʼ kɛ́ Táas. Alɛ ɔgɔɔ́sɔ́gɔlɔn Táán kɔ nɛ́gɔŋ.

¹²Wɛ Ananɛ́as waáʼkomolónɛn kɔ́gɔ́ɔg wɔnɔ́ a kɛlɛm. Wɔɔ́sɔ́d a yoog yɛ́ alɛɛ́, omámoyábɛ́gɛn ɔmbɔg a oʼto agɛɛlɛ lɛ́ yíiʼkini kodɛ́ʼtɛganan.»

¹³Náa Ananɛ́as əə́muyúúlisini ɔnɔ́ na nyɔ́lɛ́ ə: «Sə́dúk, njóób pɔɔd piíŋ pɔ́ɔsɔyɔ kɛbán kɛ́ mɔɔd nyóon. Páyɛ́ʼtɛánánɛ tɛn wɔnɔ́ ná a Yolósalɛm, alɛɛ́ əguloodi ŋwɛ́g na pá pálɛɛ́ əyə́ən ngə́ yaaŋ.

¹⁴Kóonɛ kó yimíníí áanɛ, puʼkúm pó payaaganɛʼ pɛfɔny pómámoyɛ́ʼkɛn toɛn lɛ́ ə́gumin ungim nyɔ́ alɛɛ́ ɔgɔɔ́sɔ́gɔlɔn a niiŋ nɛáŋ.»

¹⁵Náa, Sə́dúk yɛɛ́dɛánɛ na Ananɛ́as ɔnɔ́: «Tod kɔ lɛ́ mɛ áa mbə́muyííyid. Na nyɔ́lɛ́ aa ndə́əgud əguloodi na pɛnɔɔŋɛʼ, na puʼkúm poɔ́bɔn, na ndɛg yɛ Ɛ́sɛlayɛl kɛ́, ánɛ aa ndɛɛ́.

¹⁶Ndɛ́ɛ́ kumuúloodi tɛn mɛɛ́nyɔ́amɔɛ́d ntɔ́b ngim yɛ́ alɛ́ɛ́ konɛ́ɛ́ a niiŋ nɛ́am.»

¹⁷Ananɛ́as aáság kɛɛn anɛ́ɛ́n, aádam ɔ́sɔd a nó Siudáa, amáábɛ́gɛn Sóol ɔmbɔg a oʼto, ɔnɔ́ na nyɔ́lɛ́: «Móŋŋí waam Sóol! Sə́dúk Yə́sus nyɔ́ ayɛ́golónɛn a ngə́ yɛ́ oyɛ́ɛ əgiim aa amɛ́ʼtóm ná olɛɛ́. Amɛ́ʼtóm lɛ́ nyíim agoyɛ́ɛlɛ wíiʼkini kodɛ́ʼtɛganan, óyɛɛn tɛn na Uŋun wó Ufúlúʼtú síɛ́ɛ́d.»

¹⁸Əgín kɔ áay a kɛnɛŋ kɛ́go kɛ́ɛg, moom múmmú, wɔnɔ́ pɛgab pɛ́ nsú moáság kaágábɛn a əngis yə́ə́ŋ, muə́də́əŋ a nsí, əə́bə́ə́ kiiʼkini kodɛ́ʼtɛganan. Pááság komoyɛ́ʼkɛn ɔsɔgɛn.

¹⁹Páyɛ́moyɛ́ʼkɛn moom mó konɛ, aánɛ́, aáság kɔɔŋ toɛn. Sóol ayɛ́ɛ́lɛ ngab ɛ mədúg kɔ áay na paaʼkan pá a Tamáas.

²⁰Ədiʼkə́əgiʼkini koboŋ, əə́bə́ə́ kiim álɔɛgɛ Tɔsɔm a puog pó pɛɔ́sɔ́gɔ́lɔ́n. Ayɛ́ɛ əgusəə ɔnɔ́ Yə́sus alɛ Mɔɔ́n o Táán.

²¹Ungim nyɔ́ ayɛ́ɛ agoob nkə kɛ́ ayɛ́ɛ agosɔyɔ, ayɛ́ɛ agaáfɛ́ma, pə́əgəə́ŋíənə pɔ́nɔ́ əə: «Mɔɔd nyóonɛ, adɛ́njaŋ nyɔ́lɛ́ aa ayɛ́ɛ a Yolósalɛm, əə́yəʼkəni ungim nyɔ́ alɛɛ́ ɔgɔɔ́sɔ́gɔlɔn a niiŋ nɛ́ Yə́sus əə́? Adɛ́ əyíím áanɛ lɛ́ yíim ə́buúgumən ná yɛ́ɛn na pɔ́lɛ́ ná puʼkúm pó payaaganɛʼ pɛfɔny polɛɛ́ ə́?»

²²Náa, Sóol nyɔ́lɛ́ ayɛ́ɛ agá agɛɛn yuudi na kolɔɛgɛ Tɔsɔm, na pɛsány piim. Ayɛ́ɛ əguloodi moááŋ na Yúdɛn yɛ́ a Tamáas lɛ́ Yə́sus alɛ Məsíi. Pádɛʼkɛ́ɛ agolɛŋ kə́mmú nkə aa pə́muyúlisinií.

²³Mədúg miíŋ a ngim yɛ́ɛy, Yúdɛn yaáság kogod unuʼ wɔ́ɔ́bɔn úmmuʼ lɛ́ páamoyóon.

²⁴Náa, Sóol ayóób ɛdɔɔgɛ yɛ́ɛy. Pɔɔd páyɛ́ɛ kɔ lɛ́ pə́nuŋ ɔsɔ́dɛ́n á pálɛ́ɛg na udúg na wɔɔ́s, agɛɛlɛ lɛ́ pə́muúgumin, pámoyóon.

²⁵Náa, udúg wúmmú, paaʼkan pə́ə́ŋ páyɛ́moyáág a nkambɛ́, pə́mə́musúúli a ɔmbambɛɛ wó oʼkág.

²⁶Ná Sóol ayɛ́ɛ́n əgiig a Yolósalɛm, əyúúnə kəə́bulid a ondáŋ ó paaʼkan. Náa, ungim ayɛ́ɛ na wɛɛ́y lɛ́ pádɛʼkɛ́ɛ əgəə́liʼtini lɛ́ fɔ́lɔ́b fɔ́lɔ́b aándɛ ongaaʼkan.

²⁷Panábas aáság kumuúsiəd agɛɛn na nyɔ́lɛ́ a nó pɔɔ́n pá maʼtom. Ayɛ́bodɛánánɛ wɔnɔ́ ná Sóol yɛɛ́dála Sə́dúk a ngə́, na wɔnɔ́ ná Sə́dúk yɛɛ́sɔ́yɔ na nyɔ́lɛ́. Ayɛ́bodɛánánɛ tɛn wɔnɔ́ ná Sóol yɛɛ́lɔɛ́gɛ Tɔsɔm Tólaŋ na pɛsány piim, a niiŋ nɛ́ Yə́sus a Tamáas.

²⁸Əgəə́bə́ə a wɔɔ́s wóow, Sóol aáság kosɔd a ondáŋ ó pɔɔ́n pá maʼtom. Ayɛ́ɛ aábag, əə́suu a Yolósalɛm na pɔ́lɛ́ wɔnɔ́ ná aányɔ́ŋɛn, əə́giim álɔɛgɛ Tɔsɔm a niiŋ nɛ́ Sə́dúk na pɛsány piim.

²⁹Ayɛ́ɛ agosɔyɔ, aásásananɛ sɛ́ɛb tɔgɛ́ɛ́ tó tonasáŋ na pɔɔ́n pá Yúdɛn pá páyɛ́ɛ agosɔyɔ Kɛlɛ́ɛg. Náa, pɔ́lɛ́ páyɛ́ɛ əgín əguunə ngə́ lɛ́ pámoyóon.

³⁰Ná pəə́liʼtiniʼ pɛ́ɛ́lɛ́ŋ náan, pə́yímusíəd, pámɛ́ɛn na nyɔ́lɛ́ a Səsalə́ə. Kɔ́gɔ́ɔg tɛn pááság kɛɛlɛ lɛ́ yɛ́ɛn a Táas.

³¹Náan aa pəə́liʼtiniʼ pá a Siudə́ə ngim, na a Kalilə́ə, na a Səməlíi pɔ́yɔ́ɔ́ŋ kiwiiyiʼ. Kəə́liʼtiniʼ koɔ́bɔn kóyɛ́ɛ əgín agon, páadáŋananɛ ɔlaa wɔ́ɔ́bɔn a ngə́ ɛgodammana Sə́dúk. Uŋun wó Ufúlúʼtú wáaboyábɛgɛn ombɔg agɛɛlɛ lɛ́ ondáŋ wɔ́ɔ́bɔn óyam.

³²Wɔnɔ́ ná Píɛ ayɛ́ɛ əgiim ófíoŋ kɛnɔ kiim kɛ́ pəə́liʼtiniʼ páyɛ́ɛ, ayɛ́ɛ́n wɔɔ́s wúmmú a nó pɔsɔ́g pá páyɛ́ɛ a pálɛ́ɛg ɛ Lída.

³³Yɛɛ́bóan mɔɔd nyummú kɔ ungiíngiə́n a pɛʼkwág lɛ́ ayɛ́ɛ kɛgɔd. Mɔɔd nyóon ayɛ́ɛ niiŋ lɛ́ Ənə́ə. Ayɛ́ɛ aáʼkɛɛlɛ pɛag pɛ́ʼtáan na pɛ́dáád aʼtáŋána.

³⁴Náa Píɛ ɔnɔ́ na nyɔ́lɛ́: «Ənə́ə, Yə́sus Kilíʼtus amágoyóómɛ. Tɛ́ɛ́mɛn, tááŋɛ pɛʼkwág pɛáŋ!» Əgín kɔ áay kum a nsí, aáság kodɛ́ɛmɛn.

³⁵Ungim nyɔ́ a pálɛ́ɛg ɛ Lída ayɛ́moodála, na ungim tɛn nyɔ́ a kɛdɛ́gɛ́dɛ́n kɛ́ a Sálon ayɛ́moodála. Pə́yə́súʼkíí əguyə́ən ngə́ ɛ Sə́dúk Yə́sus.

³⁶Ɔʼkɛ́ɛd nyummú ayɛ́ɛ ungəə́liʼtiniʼ a pálɛ́ɛg ɛ Sioʼpə́ə. Ayɛ́ɛ niiŋ lɛ́ Tabíʼta. A tɔgɛ́ɛ́ tó kɛlɛ́ɛg lɛ́: «Tolóʼkáas.» Áay lɛ́ «Ngɛɛ́.» Ayɛ́ɛ ɔʼkɛ́ɛd nyɔ́ ayɛ́ɛ agɛɛlanɛ pɛnɛŋ piim kɔŋɛʼ, aágɛɛ́banɛ pasɔ́gasɔ́gá.

³⁷Náan aa a mədúg móom yiídə́əŋ kobany aáság kugu. Páyóónánɛ kɛlóŋ kiə́ŋ, pááság kɛɛn əgiíngigi a nɛsom nɛ́ yoog nímmú nɛ́ a mɔɛn.

³⁸Pálɛ́ɛg ɛ Lída ɛdɛʼkɛ́ɛ laálá na ɛ Sioʼpə́ə. Náan aa pəə́liʼtiniʼ pá a Sioʼpə́ə páyóób lɛ́ Píɛ alɛ áay a Lída. Pááság komodómɛn pɔɔd, nto ɛ́baan lɛ́ pɛ́ɛn amodɛ́anɛ lɛ́ yə́bisig kiim, pɔ́lɛ́ pámámoyɔ́sɔ́gɔ́lɔ́nɛ́ɛ́.

³⁹Əgín tɛn ná páyɛ́modɛánɛ náan, aáság kodɛ́ɛmɛn agɛɛn na pɔ́lɛ́. Ná páyɛ́ɛ́n əgiig kɔ, pɛ́ɛ́bág na Píɛ a nɛsom nɛ́ yoog nɛ́ a mɔɛn. Pidí pɛ́ pagɛ́ɛd piim pɛáság kiim əgəə́yii kɔ a ɛbá yə́ə́ŋ, pɛ́alɛɛ. Píyímulóódóni pilə́ə́ na palɛnkóod pá Tolóʼkáas ayɛ́ɛ agonogɛla kɛnɛŋ kɛ́ ayɛ́ɛ əligi a ɔlaa na pɔ́lɛ́.

⁴⁰Píɛ aáság kɛɛlɛ lɛ́ ungim álon a táán. Yiídúm əndu a nsí, əə́bə́ə́ kɔɔ́sɔ́gɔlɔn Táán. Ná ayɛ́ɛ ɔɔ́ʼkɔɔ́sɔ́gɔlɔn, aáság kaágasɛ ná kɛlóŋ kɛ́lɛɛ́, ɔnɔ́: «Tabíʼta! Tɛ́ɛ́mɛn!» Ɔʼkɛ́ɛd aáság kaásɛn əngis. Ná yɛɛ́dála Píɛ, aáság kodɛ́ɛmɛn, əə́ləndin na nsun.

⁴¹Píɛ aáság kumuúgumin a ombɔg, əmə́mudə́ə́míni. Yɛɛ́dɔ́ŋɔn pidí pɛ́ pagɛ́ɛd, na pəə́liʼtiniʼ pə́mmú, ɔnɔ́ na pɔ́lɛ́: «Mɛ́naan.» Əyíbulóódi Tabíʼta, aándɛ kə́lə́ŋ kə́lə́ŋ.

⁴²Kɛbán kɛ́ɛg kɛ́yáláámɛ́ɛ́ a pálɛ́ɛg ɛ Sioʼpə́ə ngim. Pɔɔd piíŋ pááság kaag oʼto na Sə́dúk Yə́sus.

⁴³Píɛ ayɛ́ɛ́lɛ kə́mmú mədúg miíŋ kɔ áay a Sioʼpə́ə a nó mɔɔd nyummú niiŋ lɛ́ Simɔ́ɔŋ, uʼkud na piob pɛ́ ponyam.