Read Yambeta Ɔlɔ́ma 10 Bible Online

Ɔlɔ́ma 10 - Yambeta bible

Ɔlɔ́ma 10

¹Pomóŋŋí, nkə kɛ́ ndɛɛ́ anyɔ́ŋɛn na ɔʼtɛ́m wáam ungim kɛ́lɛ lɛ́ pɔɔ́n pá Yúdɛn pɔ́ɔy. Nkə kɛ́ ndɛɛ́ əguŋíən na Táán a pɛɔ́sɔ́gɔ́lɔ́n pɛ́am a kɛ́ɛg.

²Ɛɛ́ɛ, kɛ́lɛ fɔ́lɔ́b lɛ́ ndɛ ogodɛ́lɛmɛn pɔɔ́n pá Yúdɛn mbaasɔ́ lɛ́ pááyɛ́ʼkɛ́nɛ́n na toɛn a oʼto ó Táán, náa nɛáyɛ́ʼkɛn nɛɔ́bɔn nɛ́dɛɔ́gɔ nɛ́ pɔɔd pá páálɛŋ.

³Pádɛálɛŋ tuə́ áa Táán alɛɛ́ agɛɛ́ʼkɛn pɔɔd kilumiʼ, pə́yúúnə kudə́nigi wɔ́ɔ́bɔn ombod ó kɔɔŋ kilumiʼ. Náan, pə́yíín ngə́ yɛ́ Táán aágɛɛ́ʼkɛn pɔɔd kilumiʼ a yɛ́lɛ́.

⁴Kɛ́lɛ lɛ́, koon oʼto kó pɛcɛm a kóog kólɛɛ́ Kilíʼtus. Nɛ́gɔŋ yɛ́ɛnɛ, Táán alɛ agɛɛ́ʼkɛn kilumiʼ na pá pámáág oʼto na Yə́sus Kilíʼtus.

⁵Kɛnɛŋ kɛ́ Moyíis alɛ agosɔyɔ kɛbán kɛ́ kilumiʼ kɛ́ kíəgiim a noá na pɛcɛm, alɛ əgusəə ɔnɔ́: «Nyɔ́ amɛ́ngɛg pɛcɛm piim, nyóon agɛɛn na ɔlaa a oʼto ó pɛcɛm[52]»

⁶Náa, nkə kɛ́ alɛɛ́ əgusəə a kɛbán kɛ́ kilumiʼ kɛ́ kíəgiim a noá na kaag oʼto aa kɛ́ɛnɛ kɛ́lɛɛ́ lɛ́: Udisə́ə́ a ɔʼtɛ́m wááŋ a kaadɛ wɔʼkɔ́ əə: «Ánɛ aa aábág a mɔɛn ə?» (Áay lɛ́ ná yíim əsuuli Kilíʼtus əə́).

⁷Udisə́ə́ tɛn ɔmbɔ́ lɛ́: «Ánɛ aa əə́suu kɔ́gɔ́ɔg a niɛ́ miɛ́ɛ́ŋ a nsí ə́?» (Áay lɛ́ ná yíim ábágɛ Kilíʼtus a pɛlóŋ ə́)

⁸Táá nkə kɛ́ Pagálaʼtaʼ pá Táán pálɛɛ́ əgusəə a kɛbán kɛ́ kilumiʼ aa kɛ́ɛnɛ, pɔ́nɔ́: «Nɔgɛ́ɛ́ nólɛ a ɛbá yááŋ, nólɛ a unuʼ wááŋ, nólɛ a ɔʼtɛ́m wááŋ a kaadɛ[53]» Nɔgɛ́ɛ́ nóon nólɛ mbə́n ɛ kəə́liʼtiniʼ kó tɛlɛɛ́ alɔɛgɛ.

⁹Nga olɛ əgusəə na unuʼ wááŋ a udi ó pɔɔd lɛ́ Yə́sus alɛ Sə́dúk, umə́yəə́liʼtini a ɔʼtɛ́m wááŋ a kaadɛ lɛ́ Táán ayɛ́moyóndɛ́gɛ a pɛlóŋ, áay lɛ́ olɛ́ɛ́ kɔɔy.

¹⁰Kɛ́lɛ lɛ́, mɔɔd amaʼkɛɛn lɛ́ əmə́líʼtíníí a ɔʼtɛ́m wə́ə́ŋ a kaadɛ, Táán aamoyɛ́ʼkɛn kilumiʼ. Ə́əsəə na unuʼ wə́ə́ŋ a udi ó pɔɔd lɛ́ nyɔ́lɛ́ amáág oʼto na Táán, aamoyɔ́ɔyɛ.

¹¹Kálaʼtaʼ ɛ Táán ɛlɛ əgusəə náan lɛ́: «Nyɔ́ amáág oʼto na nyɔ́lɛ́, adɛndɛ́ɛ́ kəə́lə́ʼkəni[54]»

¹²Áay ɛsaa ɛ́dɛɔ́gɔ kɔ lɛ́ Yúdɛn aa yɛ́ɛnɛ, pɛnɔɔŋɛʼ a pɛ́ɛb káag. Ungim ogóódi Sə́dúk əgín ɛgo mmuʼ. Yagɛɛ́ʼkɛn pɛbán piə́ŋ pɛ́laŋ na ungim nyɔ́ aámodɔ́ŋɔn.

¹³Kɛ́lɛ náan kidiídílə́ a Kálaʼtaʼ ɛ Táán lɛ́: «Nyɔ́ alɛ́ɛ́ kodɔ́ŋɔnɛɛ́ Sə́dúk, nyóon alɛ́ɛ́ kɔɔy[55]»

¹⁴Náa, tuə́ áa alɛɛ́ ogomodɔ́ŋɔn ná adɛágɛn oʼto na nyɔ́lɛ́ ə́? Tuə́ áa alɛɛ́ ogaag oʼto na nyɔ́lɛ́ fiɛ́d koob pɔ́ɔsɔyɔ niiŋ niə́ŋ ə́? Tuə́ áa alɛ́ɛ́ ogoob pɔ́ɔsɔyɔ niiŋ niə́ŋ, mɔɔd ogomoólɔɛgɛ fiɛ́d ə́?

¹⁵Tuə́ áa pálɛɛ́ págomoólɔɛgɛ ná mɔɔd ogodom lɛ́ yíim alɔɛgɛ ɔdɛɔ́gɔ ə́? Kɛ́lɛ náan kidiídílə́ a Kálaʼtaʼ ɛ Táán lɛ́: «Nkid yɛ ambaan á mɔɔd nyɔ́ alɛɛ́ əgiim alɔɛgɛ mbə́n ɛlaŋ kɔdɛ́ɛ[56]!»

¹⁶Náa, ungim adɛʼkáagoóbɛn Tɔsɔm Tólaŋ. Ɛsayíi, ɔndɔɛgɛʼ pɛbán ó Táán nyummú yiísə́ə́ náan lɛ́: «Sə́dúk, ánɛ aa əyə́líʼtíníí tɔsɔm tó tɛɛ́lɔɛ́gɛ ə́[57]?»

¹⁷Kɛnɛŋ kɛ́ mɔɔd amóób tɔsɔm tó pámámolɔɛ́gɛ́nɛ, áay aa aágaag oʼto na Táán. Nkə kɛ́ páalɔɛgɛ aa kɛ́ɛnɛ kɛ́lɛɛ́ tɔgɛ́ɛ́ tó Kilíʼtus.

¹⁸Náa ndə́ŋíən anɛ́ɛ́n nyɔʼkɔ́ əə: Yúdɛn ɛdɛʼkáagoob tɔsɔm tóod əə́? Ndóo, páyóób tólɛ́! Kálaʼtaʼ ɛ Táán ɛlɛ əgusəə lɛ́: «Nsí ngim ɛdɛʼkáagoob nɛŋo nɛ́ palɔɛgɛʼ ə́? Ɛyóób óo! Tɔgɛ́ɛ́ toɔ́bɔn tóyɛ́ɛ́n əgiig súʼtə́ə́ a nisug nɛ́ nsí.»

¹⁹Mbáság kiiʼkini kuŋíən kə́mmú nyɔʼkɔ́ əə: Pɔɔ́n pá Ɛ́sɛlayɛl pádɛʼkáagoob ə́? Táá nkə kɛ́ Táán yiísə́ə́ a unuʼ ó Moyíis aa kɛ́ɛnɛ, ɔnɔ́: «Ndɛ́ɛ́ kɛɛlɛ lɛ́ pá pɔ́dɛɔ́gɔ fɔ́lɔ́b fɔ́lɔ́b ndɛg yaam, póbobányɛn nifúb. Ndɛ́ɛ́ kɛɛlɛ lɛ́ puób ilúún na nigúu nɛ́ níʼkódií nsiŋ.»

²⁰Ɛsayíi nyɔ́lɛ́ yɛɛ́bód əə́səə lɛ́ Táán ɔnɔ́: «Pá pádɛʼkɛ́ɛ əginjuunə aa páyɛ́njɔɔ́ŋ, Njólódíí na pá pádɛʼkɛ́ɛ əgiŋíənií yoom na yoom»

²¹Náa, a kɛbán kɛ́ ndɛg yɛ Ɛ́sɛlayɛl, yiísə́ə́ lɛ́, Táán ɔnɔ́: «Wɔɔ́s kilúd, ndɛg yɛ́ɛy yɛ́ ayɛ́nyɛɛlɛ́nɛ oʼto wó ɔnnasáŋ, yɛ́lɛ́ yɛ́ yiídə́ə́míni oʼto na mɛ, njɛ́bodámɛn ombɔg[58]»