Read Yambeta Ɔlɔ́ma 11 Bible Online

Ɔlɔ́ma 11 - Yambeta bible

Ɔlɔ́ma 11

¹Ndəəŋíən anɛ́ɛ́n lɛ́ əə: Táán aádó ndɛg yəəŋ anyóon əə́? Ndóo óo! Adɛbodóɛn lɛ́ mɛɛ́nyɔ́amɔɛ́d nyóonɛ, ndɛ mɔɔ́n wo Ɛ́sɛlayɛl, ugəə́bíən a yoog ɛ pɔɔd yɛ Ábɛlaam, a kibúúm kɛ́ Pɛnsɛamɛ́ɛŋ[59]

²Táán aʼtóɛn ndɛg yəəŋ yɛ́ əyííyid əgín kɔ kalaʼ[60] Adɛ́ poálɛŋ kɔŋɛʼ nkə kɛ́ Kálaʼtaʼ ɛ Táán ɛlɛɛ́ əgusəə a kɛnɔ kɛ́ Ɛlɛ́as ayɛ́ɛ ɔgɔɔ́gɔ́dɔ pɔɔ́ŋ pá Ɛ́sɛlayɛl a udi ó Táán á?

³Táá nkə kɛ́ yiísə́ə́ áa kɛ́ɛnɛ, ɔnɔ́: «Sə́dúk, páyóóna palɔɛgɛʼ pɛbán pááŋ, pə́ə́bugə pibóŋ pɛ́ páyɛ́ɛ agooyɛ́ʼkɛnan pɛfɔny a pɛ́lɛ́, əgín mɛnyɔ́əsíŋ áa mbáʼkolɔbɛɛ́, pálɛ əguunə tɛn lɛ́ pɛ́njoon.»

⁴Náa, Táán əyímuyúlísíni ɔnɔ́ nkə: Əyímuyúlísíni ɔnɔ́ na nyɔ́lɛ́: «Njáyɛ́ngɛ́gɛ́nɛ́ɛ́ tɔ́ɔ́sɛn ɛ pɔɔd ɛ́ʼtáan na ɛ́baan a pɔsɔ́g pá pə́diʼkə́dúminií Paál[61] əndu a udi.»

⁵Kɛ́lɛ náan tɛn yoom ímuʼ nɛ́gɔŋ. Ngab ɛ pɔɔd sɔɔŋ aa iligíí yɛ́ Táán əyííyid a kɔdɛ́ɛ ɔʼtɛ́m kuə́ŋ.

⁶Táán ədibuyíiyidin a oʼto wó nkə kɛ́ pámɛ́ɛ́lɛ, Ndóo. Kɛ́lɛ a kɔdɛ́ɛ ɔʼtɛ́m kuə́ŋ lɛ́ náan fiɛ́d kódɛʼkɛ́ɛ agɛɛn fɔ́lɔ́b fɔ́lɔ́b kɔdɛ́ɛ ɔʼtɛ́m.

⁷Kɛ́lɛ tuə́ anyóon əə́? Nkə kɛ́ pɔɔ́n pá Ɛ́sɛlayɛl páyɛ́ɛ əguunə, pádɛʼkɔ́ɔgɔɔŋ. Náa, pá Táán əyííyid, pɔ́lɛ́ pɔ́yɔ́ɔ́ŋ kɛ́lɛ́. Pɔsɔ́g póob káag pɔ́yɔ́lɔ́gɔ́ɔ́ mbáŋ.

⁸Kɛ́lɛ lɛ́, Kálaʼtaʼ ɛ Táán ɛlɛ əgusəə yɔ́nɔ́: «Táán ayɛ́ɛ́lɛ lɛ́ nsiŋ yɔɔbɔn ínim ɛnɔ, amáány lɛ́ əngis yɔ́ɔ́bɔn ádɛʼtɛ́ʼtɛ́gánan, ntóɛŋ ɛdɛnjóóbánan súʼtə́ə́ nɛ́gɔŋ.»

⁹Nkúm Tə́fid yiísə́ə́ tɛn lɛ́: «Pɛsɛɛn pɛɔ́bɔn pɛ́ moom mó konɛ píɛn a pɔ́lɛ́ wɔnɔ́ nibúnjə́ nɛ́ nɛdɔ́lɛ́gáán, wɔnɔ́ niɛ́ tɛn! Pɔ́ɔŋ pɔ́nɔ́ɔs yɔɔbɔn,

¹⁰pə́də́əŋ woog, pádɛʼtɛ́ʼtɛ́gánan kə́mmú a udi kilúd. Ɛ́boyɛ́ɛ́lɛ lɛ́ pɛ́ɛn pɛnɛŋ piim kɛbon kibúnə́ə́n a pigólí[62]»

¹¹Ndəəŋíən anɛ́ɛ́n nyɔʼkɔ́ əə: Ná pɔɔ́n pá Yúdɛn píídə́əŋ əə, píídə́əŋ a kúfuʼ, kó fiɛ́d kiiʼkini kodɛ́ɛmɛn əə́? Ndóo óo! Náa, a oʼto wóonɛ lɛ́ pɔ́lɛ́ páyɛ́ɛ́lɛ oʼto wó ɔnnasáŋ áa mɔnɔŋ mɛ́ndɛ́ŋ mɔ́yɔ́ɔ́y, agɛɛlɛ lɛ́ nifúb nɛ́bany ndɛg yɛ Ɛ́sɛlayɛl.

¹²Kɛ́maʼkɛɛn anɛ́ɛ́n lɛ́ oʼto wɔ́ɔ́bɔn wó ɔnnasáŋ úyíímín nsí na pɛa pɛ́ pɛbán pɛ́laŋ, kudə́əŋ koɔ́bɔn kómáyɛɛlɛ pɛnɔɔŋɛʼ kɔŋɛʼ kɛ́fɔlɛ́, ná pə́əgiim əsiəd anɛ́ɛ́n ngab kúfuʼ a nkə kɛ́ kɛ́aboyɔ́ɔyɛ óoʼ? Kɔŋɛʼ kódɛágɛɛn kɔ agaáyɛn náan a!

¹³Pəŋi pɛnɔɔŋɛʼ, na pəŋi aa mbɔ́ndɔsɔyɔɔ́ nɛ́gɔŋ. Ndɛ mɔɔ́n o maʼtom nyɔ́ Sə́dúk əyíʼtə́nígi lɛ́ mpoólɔɛgɛnɛ, pəŋi pá pɔ́dɛɔ́gɔ Yúdɛn, Tɔsɔm tó Táán. Ndɛ əgəə́gə́midi na pigólí pɛ́ɛb pɛ́ ndɛɛ́ agɛɛlɛ a kɛgaágadɛ kɛáŋan.

¹⁴Ndɛ agɛɛlɛ pigólí pɛ́ɛb, mɛ ondɛŋáán lɛ́ ndaabayɛd nifúb nɛ́ pɔɔ́npásɛ páam Yúdɛn na pəŋi. Náan, ngab yimmú a ondáŋ wɔ́ɔ́bɔn yɔgɔɔy.

¹⁵Kɛ́lɛ lɛ́, ná Táán yiídúmín Yúdɛn ngim, əyə́suídíníí mɔnɔŋ má a nsí, amáládɛ́ɛ́ na mɔ́lɛ́. Ná Yúdɛn yəə́giiʼkini kimbuúlini a ngə́ əə, kɛ́lɛ́ɛ́ kɛɛn anɛ́ɛ́n tuə́ ə́? Adɛ́ kɛ́lɛ́ɛ́ kɛɛn əgín wɔnɔ́ kɛnɛŋ kɛ́ mɔɔd əə́gú, náa əmíʼkíni kimbuúlini a ɔlaa á!

¹⁶Ngab ɛ moom mó konɛ ɛ na oʼto na oʼto ɛmaʼkɛɛn lɛ́ ɛlɛ agoob na Táán, adɛ́ áay lɛ́ muim móagoob tɛn na nyɔ́lɛ́ á? Ngaŋ ɛ kiɛd tɛn ɛmaʼkɛɛn lɛ́ ɛlɛ agoob na Táán, adɛ́ ɔmbɔ́ ntab tɛn yaagoob na nyɔ́lɛ́ á[63]!

¹⁷Ndɛg yɛ Ɛ́sɛlayɛl ɛlɛ wɔnɔ́ kiɛd kɛ́ pɛ́ɛ́gón kɔŋɛʼ, náa pɛ́ɛ́sóma ntab yimmú. Kɔmɔɛ́d lɛ́ wɛ, ɔʼtab ó kiɛd kɛ́ kidun wó páásóm agomad a kiʼkuny kɛ́ ɔʼtab ó kiɛd kɛ́laŋ, waándɛ nyóonɛ lɛ́ wɛ́ɛn tɛn nɛ́gɔŋ na ngab a manyáa málaŋ má ngaŋ yaábágɛ agomɛ́nɛ ntab.

¹⁸Kólɛ́ aa wɛ uʼkódií lɛ́ ósɛ́ɛdɛ ntab yɛ́ pɛ́ɛ́sóm. Uʼkóodi lɛ́ wányáadɛ lɛ́ wɛ odɛɔ́gɔ ngaŋ. Lɛŋ lɛ́ ngaŋ áa yaányáŋɛn ntab, adɛ́njaŋ ntab aa yaányáŋɛn ngaŋ!

¹⁹Waagɛʼtɛ́anɛ wɔʼkɔ́ əə: «Náa, adɛ́ Táán yɛɛ́sóma ntab yɛ́ɛy lɛ́ ná pɛ́mmád mɛ kɔ a oʼkɔɔ wɔ́ɔ́bɔn ə́?»

²⁰Ɛɛ́ɛ! Kɛ́lɛ fɔ́lɔ́b náan lɛ́, páyɛ́boosóma pɔ́lɛ́ lɛ́ pádɛʼkáagaag oʼto na Táán. Náa wɛ, a oʼto wóonɛ lɛ́ omáág oʼto na nyɔ́lɛ́ aa olɛɛ́ ondadáán a nidíŋ. Odɛnjábágɛ́dɛ́ɛ́ anɛ́ɛ́n óo, ólóʼkɔd na wɛ ó,

²¹lɛ́ agálɛ Yúdɛn yɛ́ ɛlɛɛ́ lɛ́ yɛ́lɛ́ aa ɛlɛɛ́ ntab ɛ kiɛd mmɔɛ́d ɛ fɔ́lɔ́b, Táán aasóma yɛ́lɛ́, wɛ anɛ́ɛ́n nyɔ́ olɛɛ́ lɛ́ páyɛ́goomád kogomádáán óoʼ, alɛɛ́ kuguúsig adɛgoyɛ́ɛ́lɛ náan a? Iyó, alɛ́ɛ́ kogoyɛ́ɛlɛ tɛn əgín náan yoom ímuʼ ná odɛágɛn oʼto na nyɔ́lɛ́.

²²Pódála wɔnɔ́ ná Táán oóloodi ɔʼtɛ́m wə́ə́ŋ ólaŋ, na wɔnɔ́ aányɛ́n tɛn. Alɛ agonyɛ́nɛn pá pə́ʼkudə́ŋií a ngə́ yɛ́ mbɛ́. Náa, wɛ nyɔ́ omɛ́ɛn yuudi na kaag oʼto na ɔʼtɛ́m wə́ə́ŋ ólaŋ, aagodɛ́ɛ́lɛn ɔʼtɛ́m. Náan fiɛ́d, aagoosom tɛn wɛ wɔnɔ́ ntab yɛ́ɛy.

²³A kɛ́ kɛ́lɛɛ́ kɛ́ pɔɔ́n pá Yúdɛn, pə́məʼkəə́suʼki, pə́yiʼkini kaag oʼto na Táán, əəbuyúlisi a oʼkɔɔ wó páyɛ́ɛ a wólɛ́ lɛ́ nyɔ́lɛ́ alɛ na toɛn tó kɛɛlɛ lɛ́ píiʼkini kaámad na nidíŋ.

²⁴Wɛ, olɛ ɔʼtab wó olifiyə́ə yɛ́ yɛɛ́yám a kidun. Táán ayɛ́gosóm, amáagoomad agá a ɛlaŋ. Kɛáŋ kɛ́dɛɔ́gɔ wɔnɔ́ ná kɛ́yásáŋɛ́ɛ́ lɛ́ kiɛd kíɛn. Náa, Yúdɛn yɛ́lɛ́ ɛlɛ ntab ɛ fɔ́lɔ́b, ɛdɛágany komad a nidíŋ nɛ́ kiɛd kɛ́ páyɛ́ɛ a kɛ́lɛ́.

²⁵Pomóŋŋí, táá nkə kɛ́ kɛ́yɛ́ɛ a ɔʼtɛ́m ó Táán a kaadɛ aa kɛ́ɛnɛ. Ndɛ anyɔ́ŋɛn lɛ́ pólɛŋ kɛ́lɛ́, ná podɛfɛ́ga lɛ́ polɛ na nsiŋ. Kɛ́lɛ lɛ́, ngab ɛ pɔɔ́n pá Ɛ́sɛlayɛl yimmú yɛɛ́sáŋɛ́nɛ kaag oʼto na Táán. Ntɛ́m yɔɔbɔn ɛlɛ́ɛ́ kɛɛn əgín náan nnasáŋ, súʼtə́ə́ əgín ná aláa ungim nyɔ́ Táán əyííyid a pɛnɔɔŋɛʼ aáʼkaag oʼto na nyɔ́lɛ́.

²⁶Áay a kɛnɛŋ kɛ́ɛg anɛ́ɛ́n áa Táán alɛ́ɛ́ kɔɔyɛɛ́ pɔɔ́n pá Ɛ́sɛlayɛl piim wɔnɔ́ ná kɛ́lɛɛ́ kidiídílə́ a Kálaʼtaʼ. Kɛ́lɛ kɔ kidiídílə́ a Kálaʼtaʼ ɛ Táán lɛ́: «Ongaáŋɛn alɛ́ɛ́ kiim álon a Siyɔ́ɔŋ. Alɛ́ɛ́ kɛɛlɛ lɛ́ ndɛg ɛ Yáʼkɔb ídum ngim na oʼto wɔ́ɔ́bɔn wó ɔnnasáŋ.

²⁷«Táán yiísə́ə́ kɔ lɛ́: Taa: Náan aa nɛálad nɛ́ ndɛ́ɛ́ kɛɛlɛɛ́ na pɔ́lɛ́ nɛ́lɛ́ɛ́ kɛɛnɛɛ́, ná aláa mbə́ʼkubuúlisin mabɛ́ mɔ́ɔ́bɔn[64]»

²⁸Pɛ́ɛ́sáŋɛ́nɛ Tɔsɔm Tólaŋ, náan aa páyáán pabɛnɛn Táán. Kɛ́yɛ́ɛ a kɔŋɛʼ koáŋan. Náa, tɛmaʼkodɛ́ʼtɛg a noá na kiiyid, pɔ́lɛ́ a Táán əyíbuyííyid lɛ́ pɛ́ɛn ndɛg yəəŋ. Ɔʼtɛ́m wə́ə́ŋ ólɛ na pɔ́lɛ́ a oʼto ó pɛmbáa pɔ́ɔ́bɔn.

²⁹Kɛ́lɛ lɛ́, kɛnɛŋ kɛ́ Táán amɛ́ɛ́lɛ́nɛ mɔɔd kɔŋɛʼ, amámoyɛ́ɛ́lɛ́nɛ a kúfuʼ. Ədiə́giiʼkini komogábɛn kólɛ́. Kɛnɛŋ kɛ́ ɔɔ́dɔ́ŋɔn mɔɔd, amámodɔ́ŋɔn a kúfuʼ. Ədiə́gəə́lə́ʼkəni kə́mmú.

³⁰Kalaʼ, poyɛ́ɛ́lɛ́nɛ Táán oʼto wó ɔnnasáŋ, náa amáboodá pəŋi nɛ́gɔŋ maan lɛ́ Yúdɛn ɛyɛ́moyɛ́ɛ́lɛ́nɛ oʼto wó ɔnnasáŋ.

³¹Lɛŋáan anɛ́ɛ́n lɛ́, kɛ́lɛ tɛn náan yoom ímuʼ na pɔ́lɛ́. Pɔ́lɛ́ nɛ́gɔŋ[65] tɛn, pámɛ́ɛ́lɛ́nɛ Táán oʼto wó ɔnnasáŋ. Əəsiəd tɛn maan na pɔ́lɛ́ wɔnɔ́ ná yiísiə́d na pəŋi.

³²Táán ayɛ́ɛ́lɛ náan lɛ́ ungim ámoyɛ́ɛlɛnɛ oʼto wó ɔnnasáŋ, agɛɛlɛ lɛ́ nyɔ́lɛ́ óloodi lɛ́ alɛ na ɔʼtɛ́m ó maan na ungim.

³³Ɛɛ́ɛ, Táán alɛ na tugúm kɛlaŋanan, nsiŋ yəəŋ kɛlaŋanan, mafɛgaʼ mə́ə́ŋ məlímə́ə́n! Mɔɔd ɔdɛɔ́gɔ ogoob pungə́ puə́ŋ, andɛŋ tɛn nkə kɛ́ əsúŋígíníí[66]

³⁴Kɛ́lɛ náan kidiídílə́ a Kálaʼtaʼ yəəŋ lɛ́: «Úmmuʼ nyɔ́ aálɛŋ mafɛgaʼ má Sə́dúk ɔdɛɔ́gɔ. Nyɔ́ alɛɛ́ ugumuuləb tɛn ɔdɛɔ́gɔ.

³⁵Úmmuʼ, nyɔ́ alɛɛ́ ugusəə lɛ́ nyɔ́lɛ́ yɛɛ́yáŋ amoyɛ́ʼkɛn yoom agɛɛlɛ lɛ́ ə́muyúúlisini, ɔdɛɔ́gɔ[67]»

³⁶Ɛɛ́ɛ, yoom yiim, na nyɔ́lɛ́ aa ɛ́lɛɛ́ əgiim. Nyɔ́lɛ́ aa ayɛ́ɛ́lɛ muim, móagoob tɛn na nyɔ́lɛ́. Tɛ́moyɛ́ʼkɛnaan nugəm pɛnɛŋ piim! Aamɛn!