Read Yambeta Ɔlɔ́ma 12 Bible Online

Ɔlɔ́ma 12 - Yambeta bible

Ɔlɔ́ma 12

¹Pomóŋŋí, wɔnɔ́ ná kɛ́lɛɛ́ anɛ́ɛ́n náan lɛ́ Táán amábɛdɛ́ɛ́lɛn ɔʼtɛ́m, ndəbuŋíən lɛ́ pómoyɛ́ʼkɛn ɔlaa wááŋan a kɛfɔny kɛ́ kíəmugə́mmi, kɛfɔny kɛ́ kɛ́lɛɛ́ tə́ngə́d a oʼto wə́ə́ŋ. Táá pɛɔ́sɔ́gɔ́lɔ́n pɛmɔɛ́d pɛ́ fɔ́lɔ́b pɛ́ pugóódi lɛ́ pómoyɛ́ʼkɛn aa pɛ́ɛb.

²Pudinjə́ən ongoo ó pɔɔd pá a nsí yɛ́ɛnɛ ɛ nɛ́gɔŋ[68] Tíən Táán ágasɛ ntɛ́m yaaŋan, áboyɛ́ʼkɛn nsiŋ yɛ́ ngwa. Náan poalɛŋ nkə kɛ́ alɛɛ́ anyɔ́ŋɛn: Áay lɛ́ pɛbán pɛ́ pɛ́lɛɛ́ pɛŋɛʼ, pɛbán pɛ́ píəmugə́mmi, na pɛ́ pɛ́lɛɛ́ fiɛ́d na kibuu.

³A oʼto ó kɔŋɛʼ kó Táán ayɛ́nyɛɛ́ʼkɛn a kɔdɛ́ɛ ɔʼtɛ́m kuə́ŋ, ndɛ ogobodɛ́anɛ na pəŋi piim lɛ́, úmmuʼ na úmmuʼ a ondáŋ wááŋan adɛnjáŋ kɛɛn na mafɛgaʼ a oʼto móonɛ lɛ́ alɛ kɛgóʼkóón kɛ́ mɔɔd agaáyɛn nkə kɛ́ alɛɛ́ a fɔ́lɔ́b, ndóo! Náa, ɛ́nɛ́ mɔɔd ogóódi lɛ́ álɛŋ nkə kɛ́ alɛɛ́ a fɔ́lɔ́b, a niɛŋ nɛ́ Táán amámoyɛ́ʼkɛn lɛ́ yáag oʼto na nyɔ́lɛ́.

⁴Tɛ́dálaan na nkó yəəs ɛ pəsibáamɔɛ́d pɔɔd. Nkó yəəs ɛlɛ kilúd kɛ́ yoom əgín náan kímuʼ, na ɛ́fɔlɛ́ ɛ́ pɛʼkab pɛ́ pɛ́dɛ́agɛɛlɛɛ́ pigólí pímuʼ pɛ́lɛ́ piim.

⁵Kɛ́lɛ tɛn náan yoom ímuʼ na pəsi pəə́liʼtiniʼ. Tɛlɛ piíŋ, náa, paladáán na Kilíʼtus, tɛlɛ kilúd kɛ́ nkó əgín náan kímuʼ. Na wɛ ogo na oʼtɛ́lɛm wááŋ, əgín tɛn wɔnɔ́ ná pɛʼkab pɛ́lɛɛ́ a nkó.

⁶Táán ayɛ́bɛyáában pigólí lɛ́ na wɛ ogo na pɛáŋ, ndɛ́ŋ na pɛ́ sɔ́g. Wɛ nyɔ́ amágoyɛ́ʼkɛn lɛ́ wɛ́ɛn ɔndɔɛgɛʼ pɛbán o Táán, lɔɛgɛ əgín a toɛn tó kəə́liʼtiniʼ kó amágoyɛ́ʼkɛn.

⁷Wɛ nyɔ́ olɛɛ́ lɛ́ wəəgudin pɔsɔ́g, íbugúdín. Wɛ nyɔ́ olɛɛ́ lɛ́ olɛ undoodoniʼ, íbulóódóni.

⁸Wɛ nyɔ́ ugódíí lɛ́ ónasɛ pɔsɔ́g nkó, ɛ́bonásɛ yɛ́lɛ́. Wɛ nyɔ́ olɛɛ́ lɛ́ wɛ́ʼkɛnan pɔsɔ́g moom, ɛ́boyɛ́ʼkɛ́nan fiɛ́d na nɔfɛg. Wɛ nyɔ́ ugóódi lɛ́ ódáŋananɛ pɔsɔ́g, ɛ́bodáŋánánɛ́ na ɔʼtɛ́m wááŋ ungim. Wɛ nyɔ́ Táán amágoyɛ́ʼkɛn ɔʼtɛ́m wó mbilígɔɔ́ʼkɔn, ɛɛlɛ wólɛ́ na tɔnyɔ́g.

⁹Póɛn na nnyɔ́ŋánán ɛ fɔ́lɔ́b, ɛdɛnjɛ́ɛ́n yɛ unuʼ na unuʼ. Póɛn na ɛbɛnɛn na yiim yɛ́ ɛ́lɛɛ́ ɛbɛ́, puə́yíis a nkə kɛ́ kɛ́lɛɛ́ kɛŋɛʼ.

¹⁰Pɔ́nyɔ́ŋanan na ɔʼtɛ́m wááŋan ungim wɔnɔ́ pɔɔ́n pá niŋŋí, póbambaaŋanɛ a nnyáádɛ́ pəŋi na pəŋi lɛ́ sɔ́g əə́guunə konyáadɛ sɔ́g agomoyááyɛn.

¹¹Áyɛ́ʼkɛ́nɛ́an əgugudin Sə́dúk, fiɛ́d na ɔlɛáŋ. Púmuúgudin na ɔʼtɛ́m wááŋan ungim.

¹²Póɛn na tɔnyɔ́g pɛnɛŋ piim lɛ́ polɛ agomɛna pɛda na nkə kɛ́ Táán ayɛ́bogágɛn. Ntɔ́b ɛmaʼkoboóboan, pónóʼtan, podɛʼtɔ́m kɛɛ́ʼkɛn pɛɔ́sɔ́gɔ́lɔ́n na Táán pɛnɛŋ piim.

¹³Nkə kɛ́ kɛásógɛn pomóŋŋí pááŋan pá a kəə́liʼtiniʼ, póboyɛ́ʼkɛn, podɛɛ́boodó. Pəən pá pɔɔd pə́məʼkiim a noádɛʼ noáŋan, lɛŋáan kubuúsiəd.

¹⁴Ɔmbɔ́ mɔɔd alɛ əguguúyəʼkəni, udisə́ə́ lɛ́ yɔ́ɔŋ kɔbɛ́, ndóo! Ɔ́sɔ́gɔ́lɔ́nɛ́ɛ́ agá Táán lɛ́ ámoyɛ́ɛlɛnɛ kɔŋɛʼ[69]

¹⁵Nyɔ́gáan na pá pálɛɛ́ a tɔnyɔ́g. Lɛɛláan na pá pálɛɛ́ a ɔndɛɛ.

¹⁶Ləndínəən a uŋóón pəŋi na pəŋi, ə́súlíən nkó a nsí, pudinjúúnə pɛbán pɛ́ pɛgóón, ə́líʼtíníən kɛɛlɛ ɔmbɔ́ muyənjə́g mó pigólí. Podɛyádɛ́ʼtɛ́gɛ́ɛ́ lɛ́ pəŋi aa polɛɛ́ na nsiŋ[70]

¹⁷Mɔɔd amaʼkoboyɛ́ɛlɛ kɔbɛ́, pudiyímuyə́gúníí. Ágɔ́nɛ́gɛ́an kɛɛlɛ nkə kɛ́ kɛ́alon kɛŋɛʼ a əngis á mɔɔd ungim.

¹⁸Ngə́ ɛmaʼkɛɛn kɔ ɛgɛɛlɛ lɛ́ póɛn a uŋóón na ungim, laaláan a uŋóón na pɔ́lɛ́ ná kɛ́lɛ lɛ́ kɛ́agoob na pəŋi.

¹⁹Pomóŋŋí páam pá ɔʼtɛ́m, mɔɔd amaʼkoboyɛ́ɛlɛ kɔbɛ́, pudinjúúnə kumuə́gun pəŋibáamɔɛ́d, ndóo. Ímudíən, Táán áa ámoʼpɔ́nɛsɛɛ́ lɛ́ náan aa kɛ́lɛɛ́ kidiídílə́ a Kálaʼtaʼ lɛ́ Sə́dúk ɔnɔ́: «Kəə́gun, na mɛ áa kólɛɛ́. Mɛ áa nkódíí lɛ́ nsáábon ɛ́nɛ́ mɔɔd pɛsáábón pɛ́ pɛásɛʼtan na pigólí piə́ŋ pɛ́ əə́gud.»

²⁰Náa, wɛ! «Mɔɔd aagoóbɛnɛn, náa njaan yaámoobany, ɛ́moyɛ́ʼkɛn moom ánɛ; Nɛŋɔ́ɛd aa nɛ́amoobany, ɛ́moyɛ́ʼkɛn məní áŋo; Omaʼkɛɛlɛ náan, yug aa olɛɛ́ agomoógonyan náan a oʼto[71]»

²¹Udiyə́díí lɛ́ kɔbɛ́ kógoónyɔŋ, wɛ áa ónyɔŋɛɛ́ kólɛ́ na kɔŋɛʼ kó waágɛɛlɛ.