Read Yambeta Ɔlɔ́ma 13 Bible Online

Ɔlɔ́ma 13 - Yambeta bible

Ɔlɔ́ma 13

¹Mɔɔd ungim ogóódi lɛ́ yóóbɛn palaamɛʼ pá pálɛɛ́ agɛbɛɛ́laamɛ lɛ́ na Táán áa nɛlaamɛʼ niim nɛ́lɛɛ́ əgiim. Pá pálɛɛ́ a mɔʼkɔɔ má nɛlaamɛʼ nɛ́gɔŋ, nyɔ́lɛ́ aa əmə́budə́nígə́ni a mɔ́lɛ́.

²Wɛ nyɔ́ wəə́də́əmini oʼto na nɛlaamɛʼ, wɛ nyóon olɛ agɛɛlɛnɛ Táán oʼto wó ɔnnasáŋ. Wɛ nyɔ́ wəə́də́əmini oʼto na nɛlaamɛʼ, umə́suídíníí nsɔ́ɔ́ wɛɛ́nyɔ́amɔɛ́d.

³Mɔɔd nyɔ́ olɛɛ́ agɛɛlɛ kɔŋɛʼ, oʼkóodi lɛ́ ádammana palaamɛʼ. Nyɔ́ alɛɛ́ agɛɛlɛ kɔbɛ́ aa ogódíí lɛ́ áboódammana. Onnyɔ́ŋɛnɛn lɛ́ ódammana palaamɛʼ, ə́siə́díí kɔŋɛʼ, ná nɛlaamɛʼ nɛ́goógany

⁴lɛ́ pigólí pɛ́ Táán áa pálɛɛ́ a pɛ́lɛ́ lɛ́ ná pábogónɛ nkó póɛlɛ nkə kɛ́ kɛ́lɛɛ́ kɛŋɛʼ. Náa, nga omaʼkɛɛn lɛ́ olɛ agɛɛlɛ kɔbɛ́, tammána nɛlaamɛʼ lɛ́ adɛ́njaŋ a náan iyó aa pógódíí toɛn tó koboʼpɔ́nɛsɛ. Kɛnɛŋ kɛ́ palaamɛʼ pɔ́ɔʼpɔ́nɛsɛ mɔɔd, Táán áa pálɛɛ́ əgugudin. Pálɛ əguloodi wɔnɔ́ ná Táán alɛɛ́ agoob ilúún na pá páagɛɛlanɛ kɔbɛ́.

⁵Kólɛ́ aa kɛ́lɛɛ́ kɔŋɛʼ lɛ́ mɔɔd yóóbɛn nɛlaamɛʼ. Kɛ́dɛɔ́gɔ əgín a oʼto ó kodammana pɔ́nɔ́ɔs, ndóo! Kíɛn kə́mmú a oʼto wóonɛ lɛ́ waálɛŋ a ɔʼtɛ́m wááŋ a kaadɛ lɛ́ kɛ́lɛ kɔŋɛʼ lɛ́ mɔɔd yóóbɛn nɛlaamɛʼ.

⁶A oʼto wóow tɛn aa polɛɛ́ agoʼpɛ́ɛ́lɛla mag. Pá pálɛɛ́ əgubuŋíənə lɛ́ póʼpɛ́ɛ yɛ́lɛ́, Táán áa əmə́budə́nígi a pigólí pɛ́ɛb.

⁷Yɛ́ ɛ́lɛɛ́ ɛ́ mɔɔd, ɛ́moyɛ́ʼkɛ́naan yɛ́lɛ́. Kɛ́yɛɛn mag óo, pɛ́láan. Nɛwáagɛʼ oo, ɛ́ʼkɛ́naan nkə kɛ́ pə́əbuŋíən. Nyɔ́ ɔnɔ́ pómoódammana, ɛ́modámmánáan. Nyɔ́ ɔnɔ́ pómonyáadɛ, ɛ́monyádɛ́an[72]

⁸Podɛnjɛ́ɛ́n na uŋín na mɔɔd, ná kɛ́sánɛn əgín lɛ́ uŋín wó nnyɔ́ŋánán yɛ́ pugódíí lɛ́ pɔ́nyɔ́ŋanan pəŋi na pəŋi. Kɛ́lɛ lɛ́, nyɔ́ alɛɛ́ na nnyɔ́ŋánán na pɔsɔ́g, nyóon, əə́yə́ə́gi pɛcɛm piim.

⁹Kɛ́lɛ lɛ́, pɛcɛm pɛ́ɛnɛ pɛ́ pɛ́lɛɛ́ lɛ́: «Udiʼtə́əŋ a kɛdaŋ, odɛnjóón mɔɔd, udinjííbə, odɛnjáág niis a yoom ɛ́ sɔ́g.» Pɛcɛm pɛ́ɛb piim, na pímmú pɛ́ndɛ́ŋ, nidíŋ nɛɔ́bɔn aa nɛ́ɛnɛ nɛ́lɛɛ́ a nɔgɛ́ɛ́ nóonɛ númuʼ lɛ́: «Nyɔ́ŋɛn sɔ́g mɔɔd wɔnɔ́ wɛɛ́nyɔ́amɔɛ́d[73]»

¹⁰Mɔɔd nyɔ́ alɛɛ́ na nnyɔ́ŋánán adɛágɛɛlɛ sɔ́g kɔbɛ́. Kɛnɛŋ kɛ́ olɛ na nnyɔ́ŋánán na pɔsɔ́g, wəə́ʼkuyə́əgi pɛcɛm piim.

¹¹Polɛ palɛŋáán kɛnɛŋ kɛ́ɛnɛ kɛ́ tigódíí. Kɛ́lɛ kɛnɛŋ kɛ́ kondig ɛnɔ, kɛnɛŋ kɛ́ Táán kiim abɛyɔ́ɔyɛ. Kíndigi laálá kə́mmú wɔnɔ́ a kɛnɛŋ kɛ́ tɛyɛ́ɛ tɛgáagasɛ kogasɛán ɔlaa ná tɛyáág oʼto na Kilíʼtus.

¹²Udúg, koman aa kóonɛ wándamanɛɛ́, ná koany koáyɛnɛ. Tídi tɛ́máyáyɛ́dɛ́ɛ́ pɛbán pɛ́ pɛbɛ́ pɛ́ tɛyɛ́ɛ agɛɛlanɛ a mbin a kaadɛ, tísiədəən muduə́m mó kɔnɔɛyɛ pɛdá pɛ́ a kɛmoámoáŋ.

¹³Tɛ́lalaan ɔlaa ó sáád, ɔlaa ó pɔɔd pá pálɛɛ́ a kɛmoámoáŋ. Tɛdɛnjɛ́ɛ́n na konɛ́ɛnɛ kó tɔɔ́ɔ́ŋ. Tɛdɛŋŋoáŋánɛ́la maloʼ máyɛbɛyáánɛ piyəg. Tidinjíím tíbúlimən na pagɛ́ɛd, ɔmbɔ́ lɛ́ na panɔ́mɛɛd kubúlímə́ə́n. Tidinjə́ən ɔlaa ó pɛɔg. Tɛdɛnjɛ́ɛ́n na masáŋ, na yaág yɛ́ əngis.

¹⁴Póŋwáŋanan Sə́dúk wəəs Yə́sus Kilíʼtus. Pudiyə́díí lɛ́ pɛbán pɛ́ pumog pɛ́boónyɔŋ kə́mmú ná púiʼkini kɛɛlɛ nkə kɛ́ poányɔ́ŋɛn.