Read Yambeta Ɔlɔ́ma 14 Bible Online

Ɔlɔ́ma 14 - Yambeta bible

Ɔlɔ́ma 14

¹Lɛŋáan kusiəd a kɛgaágadɛ kɛáŋan, pɔsɔ́g pá pádɛ́ʼkónɛ́ɛ́ a ngə́ ɛ Táán. Podɛɛ́boóbɛ́n a nkə kɛ́ pɔ́lɛ́ pálɛɛ́ afɛga[74]

²Tísiədəən nkaʼtɛ́n na mɔɔd nyɔ́ alɛɛ́ afɛga lɛ́ nyɔ́lɛ́ alɛ ogonɛ yiim, ədiə́gílíí yoom na yoom. Kɔmɔɛ́d lɛ́ nyummú nyɔ́ adɛ́ʼkónɛ́ɛ́ a ngə́ ɛ Táán, alɛ agonɛ əgín pɛnyaá, alɛ na piə́giliʼ.

³Kólɛ́ aa ndábodɛ́anɛ na pəŋi nyɔʼkɔ́: Nyɔ́ oʼkódií manám má alɛɛ́ əgəə́gili, adɛsɛ́ɛ́dɛ nyɔ́ alɛɛ́ əgəə́gili manám mə́mmú. Wɛ tɛn nyɔ́ wəə́gəə́gili manám mə́mmú, odɛmbɛ́n nyɔ́ alɛɛ́ agonɛ yiim lɛ́ Táán alɛ na tɔnyɔ́g tɛn na nyɔ́lɛ́.

⁴Wɛ áa nyóon ánɛ aa waábɛn uʼkudin o sɔ́g lɛ́ alɛ agɛɛlɛ kɔbɛ́ ə́? Nkə kɛ́ nyɔ́lɛ́ alɛɛ́ agɛɛlɛ kɛ́mágodɛ́ʼtɛg wɛ a igə kímuʼ ə́? Yɛɛlɛ kɔŋɛʼ oo, yɛɛlɛ kɔbɛ́ oo, kɛ́adɛ́ʼtɛg Sə́dúk wəəŋ. Ədiə́də́əŋ tɛn lɛ́ Sə́dúk alɛ na toɛn tó kɛɛlɛ lɛ́ ədiʼtə́əŋ.

⁵Wɛ nyummú waafɛg lɛ́ mɔɔ́s mə́mmú málɛ kɔ má mámááyɛn mə́mmú[75] Nyummú tɛn ɔnɔ́ ndóo, miim málɛ yoom ímuʼ. Nkə kɛ́ kɛ́lɛɛ́ kɔ kɛ́lɛ lɛ́ ɛ́nɛ́ mɔɔd ogóódi lɛ́ yáálɛŋ lɛ́ nkə kɛ́ɛg kɛ́ alɛɛ́ agɛɛlɛ náan aa kɛ́lɛɛ́ lɛ́ yɛ́ɛlɛ, adiɛn kɔ na isuŋ.

⁶Wɛ nyɔ́ wɔʼkɔ́ mɔɔ́s mɔ́dɛɔ́gɔ yoom ímuʼ, mə́mmú málɛ kɔ má mámááyɛn mə́mmú, wɛ nyóon olɛ agɛɛlɛ náan agonyáadɛ Sə́dúk. Yoom tɛn ímuʼ náan na nyɔ́ ɔdɛɔ́gɔ əgəə́gilií yoom na yoom. Alɛ agɛɛlɛ náan agonyáadɛ Sə́dúk, alɛ agɛɛ́ʼkɛn pisoyidiʼ na Táán a nkə kɛ́ alɛɛ́ agonɛ. Nyɔ́ ɔdɛɔ́gɔ agonɛ tɛn yiim, ɔdɛɔ́gɔ agonɛ agonyáadɛ Sə́dúk. Alɛ agɛɛ́ʼkɛn tɛn pisoyidiʼ na Táán.

⁷Kɛ́lɛ lɛ́, úmmuʼ na úmmuʼ a ondáŋ wə́ə́s nyɔ́ alɛɛ́ alaa a nyɔ́lɛ́nyɔ́amɔɛ́d ɔdɛɔ́gɔ. Nyɔ́ alɛɛ́ ogugu tɛn a nyɔ́lɛ́nyɔ́amɔɛ́d ɔdɛɔ́gɔ.

⁸Nga tɛlɛ alaa, tɛlɛ alaa lɛ́ ná tɛ́nyáadɛ Sə́dúk. Nga tiə́gú, tiə́gú tɛn lɛ́ ná tɛ́moyɛ́ʼkɛn nugəm. Kɛ́lɛ lɛ́, tiɛn ɔmbɔ́ a ɔlaa óo, tiɛn pɛlóŋ óo, tɛagoob əgín na Sə́dúk.

⁹Ɛɛ́ɛ, Kilíʼtus yiígú, əmə́yiʼkini kimbuúlini a ɔlaa lɛ́ ná nyɔ́lɛ́ aa yɛ́ɛnɛɛ́ Sə́dúk ɛ pá pálɛɛ́ a ɔlaa, na pá pə́ʼkugúú.

¹⁰Náa a wɛ anɛ́ɛ́n ə́ə, wɛ anyóon ánɛ agɛɛ́ʼkɛn nsɔ́ɔ́ na móŋŋí waaŋ ə́? Wɛ aa nyóon ánɛ aa waámosɛ́ɛdɛ ə́? Pəsi piim tɛlɛ́ɛ́ kodɛ́lɛm a pɛyɔm a udi ó Táán

¹¹lɛ́ kɛ́lɛ kidiídílə́ a Kálaʼtaʼ náan lɛ́ Táán ɔnɔ́: «Mɛ, Sə́dúk nyɔ́ ndɛɛ́ fɔ́lɔ́b a ɔlaa, mbə́səə nyɔʼkɔ́: Ungim alɛ́ɛ́ kiʼtúmin əndu a udi. Ungim alɛ́ɛ́ kɛnyɛɛ́ʼkɛn nugəm na mɛ Táán[76]»

¹²Kɛ́lɛ anyóon lɛ́, ɛ́nɛ́ mɔɔd alɛ́ɛ́ kodɛ́lɛm a udi ó Táán agomoáloaŋanan ɔlaa wə́ə́ŋ ó nyɔ́lɛ́nyɔ́amɔɛ́d.

¹³Tídíən anɛ́ɛ́n kɔɔ́yɔmɔnɔn pəsi na pəsi. Ə́yísíən agá agɛɛlɛ lɛ́ podɛnjɛ́ɛ́lɛ yoom na yoom yɛ́ yáagɛɛlɛ lɛ́ móŋŋí waaŋan ə́diəligən, ɔmbɔ́ lɛ́ ə́də́əŋ a kɔbɛ́.

¹⁴A ngim ɛ Sə́dúk Yə́sus, mɛ mbálɛŋ, isuŋ fiɛ́d lɛ́ ímuʼ na ímuʼ yɛ́ ɛ́lɛɛ́ kifuə́, ɛ́dɛɔ́gɔ[77] Náa, nyummú nyɔ́ aáfɛga lɛ́ moom múmmú mólɛ kɔ mó mólɛɛ́ kifuə́, mólɛ fɔ́lɔ́b kifuə́ a nyɔ́lɛ́.

¹⁵Omaʼkɛɛlɛ lɛ́ móŋŋí waaŋ yóób ɔʼtɛ́m kogany a oʼto ó moom mó wɛ olɛɛ́ agonɛ, odɛɔ́gɔ agɛɛlɛ wɔnɔ́ ná nnyɔ́ŋánán ɛlɛɛ́ anyɔ́ŋɛn lɛ́ pɛ́ɛlɛ. Udiʼtə́ə́ŋi móŋŋí waaŋ a kɔbɛ́ a oʼto ó moom mó konɛ, nyɔ́lɛ́ nyɔ́ Kilíʼtus yiígú a oʼto wə́ə́ŋ.

¹⁶Nkə kɛ́ olɛɛ́ agofɛg lɛ́ kɛ́lɛ kɛŋɛʼ na wɛ, kɛ́dɛyɛ́ʼkɛn pɔsɔ́g pɛ́ndɛ́ŋ ngə́ yɛ́ɛnɛ lɛ́ pə́busúnə.

¹⁷Kɛ́lɛ lɛ́, Nɛlaamɛʼ nɛ́ Táán nɛ́dɛɔ́gɔ kɛbán kɛ́ kəə́gili moom mó konɛ, ɔmbɔ́ lɛ́ maloʼ. Nɛ́lɛ kɛbán kɛ́ ɔlaa ó sáád, a uŋóón na a tɔnyɔ́g. Moom móom muim mólɛ moom mó Uŋun wó Ufúlúʼtú wáabɛyɛ́ʼkɛn.

¹⁸Nyɔ́ əə́gudin Kilíʼtus a ombod wóow, əəgə́mmi Táán. Pɔɔd páamoógany tɛn.

¹⁹Tíunəən anɛ́ɛ́n kɛɛlɛ nkə kɛ́ kɛ́agaag uŋóón a kɛgaágadɛ kɛ́ pɔɔd. Tíɛlɛán nkə kɛ́ kɛ́agɛɛlɛ lɛ́ ungim áyam a ngə́ ɛ Táán.

²⁰Odɛnjósag pigólí pɛ́ Táán a oʼto ó moom mó konɛ. Ɛɛ́ɛ, kɛ́lɛ náan fɔ́lɔ́b lɛ́ yoom yɛ́ páanɛ ɔmbɔ́ ímuʼ ɛ́dɛɔ́gɔ kifuə́. Náa, kɛ́ʼtɛ́ɛ́lɛn lɛ́ wɛ ónɛ yoom yɛ́ waálɛŋ lɛ́ yáagɛɛlɛ lɛ́ sɔ́g ə́də́əŋ a kɔbɛ́.

²¹Nkə kɛ́ kɛ́lɛɛ́ kɛŋɛʼ kɛ́lɛ lɛ́: Odɛnnɛ́ ɔnám, odɛŋŋó maloʼ. Yoom agá yiim yɛ́ yáagɛɛlɛ lɛ́ woómóŋŋí ə́də́əŋ a kɔbɛ́, odɛnnɛ́ yɛ́lɛ́.

²²Nkə kɛ́ a kəə́liʼtiniʼ kó olɛɛ́ na kólɛ́, kɛ́ waáfɛga a kɛbán kɛ́go kɛ́ɛg, kíɛn kɔ a ɔʼtɛ́m wááŋ a kaadɛ, a pəŋi pábaan lɛ́ na wɛ, na Táán yaaŋ. Kɔŋɛʼ igə na mɔɔd nyɔ́ ədiə́gəə́lə́ʼkənií nkə kɛ́ amɛ́ɛ́lɛ!

²³Wɛ nyɔ́ olɛɛ́ agonɛ yoom, ɔʼtɛ́m wááŋ wáagoóyɔmɛ a kaadɛ, wɛ nyóon waándɛ na nsɔ́ɔ́ a udi ó Táán, lɛ́ odɛɔ́gɔ agodáŋana a ngə́ yɛ waágɛ́nɛ́ɛ́ oʼto. Nkə kiim kɛ́ mɔɔd aágɛɛlɛ na wɛɛ́y a ɔʼtɛ́m, kɛ́diɛn a ngə́ yɛ́ yaágɛ́nɛ́ɛ́ oʼto, kíndigi kɛŋɛʼ, kɛándɛ kɔbɛ́.