Read Yambeta Ɔlɔ́ma 15 Bible Online

Ɔlɔ́ma 15 - Yambeta bible

Ɔlɔ́ma 15

¹Pəsi pá tɛlɛɛ́ lɛ́ tɛáʼkogon a ngə́ ɛ Táán, tigóódi lɛ́ tɛ́nyáŋɛn kɛnó kɛ́ pá pálɛɛ́ palɛbɛ́dáán, pá pádɛ́njɛ́lɛɛ́ na toɛn tóod. Pəsi tidinjúúnə əgín nkə kɛ́ kíəbigə́mmi.

²Ɛ́nɛ́ mɔɔd a ondáŋ wə́ə́s ogóódi kuunə kɛɛlɛ nkə kɛ́ kiə́gə́mmi sɔ́g, a kɔŋɛʼ kuə́ŋ, agɛɛlɛ lɛ́ ungim áyam a ngə́ ɛ Táán.

³Kɛ́lɛ lɛ́, Kilíʼtus ədiʼkə́əguunə kɛɛlɛ nkə kɛ́ kíəmugə́mmi, náa, nkə kɛ́ kíyə́dílə́ə́ a Kálaʼtaʼ ɛ Táán áa kɛ́yáyɛ́lɛ́ɛ́ na nyɔ́lɛ́. Kíyə́dílə́ə́ lɛ́: «Pɛdog piim pɛ́ páyɛ́goodóga, mɛ áa páyɛ́ɛ agɛʼtóga[78]»

⁴Piim pɛ́ píyə́dílə́ə́ a Kálaʼtaʼ ɛ Táán kalaʼ, píyə́dílə́ə́ lɛ́ ná pɛ́bɛyɛ́ʼkɛn nsiŋ, pɛ́bɛɛ́nasɛ nkó, pɛ́ɛbɛyɛ́ɛlɛ lɛ́ tɛ́nóʼtan njəʼkə́nə́ní, ná tíɛn na komɛna pɛda.

⁵Ndɛ ɔgɔɔ́sɔ́gɔlɔn lɛ́, Táán nyɔ́ alɛɛ́ agɛɛlɛ lɛ́ mɔɔd yɛ́ɛn na ɔʼtɛ́m ó konóʼtan, nyɔ́lɛ́ nyɔ́ alɛɛ́ agɛɛlɛ lɛ́ nkó ɛ mɔɔd ɛ́nas, áboyɛ́ɛlɛ, póɛn na ngóbánán pəŋi na pəŋi wɔnɔ́ ná Yə́sus Kilíʼtus alɛɛ́ anyɔ́ŋɛn lɛ́ póɛn.

⁶Ná a ɔʼtɛ́m wááŋan úmmuʼ, nɛŋo nɛáŋan nímuʼ, poɛ́ʼkɛn nugəm na Táán, Sɛ o Sə́dúk wəəs Yə́sus Kilíʼtus.

⁷Náan aa ndábodɛ́anɛ na pəŋi nyɔʼkɔ́: Wɔnɔ́ ná Kilíʼtus əyíbusiə́d pəŋi kɔŋɛʼ, púsiədənən pəŋi na pəŋi tɛn kɔŋɛʼ. Pomaʼkɛɛlɛ náan, poagɛɛ́ʼkɛn nugəm na Táán.

⁸Ndabodɛ́anɛ lɛ́ Kilíʼtus əyíím lɛ́ yíim əgudin Yúdɛn. Ayɛ́ɛ́lɛ əguyə́əgi nkə kɛ́ Táán yɛɛ́gágɛn pɛmbáa pɔ́ɔ́bɔn, ná óloodi lɛ́ Táán alɛ əgusəə fɔ́lɔ́b, adɛágasɛ unuʼ a nkə kɛ́ əə́səə.

⁹A noá na pɛnɔɔŋɛʼ, əyíím tɛn lɛ́ ná pɔ́lɛ́ tɛn pɛ́ʼkɛn nugəm na Táán a oʼto wóonɛ lɛ́ alɛ na ɔʼtɛ́m ólaŋ na pɔ́lɛ́, əgín wɔnɔ́ ná kɛ́lɛɛ́ kidiídílə́ a Kálaʼtaʼ ɛ Táán lɛ́: «Kólɛ́ aa ndɛ́ɛ́ konyádɛɛ́ niiŋ nɛáŋ a kɛgaágadɛ kɛ́ mɔnɔŋ má mádɛgoólɛŋɛnɛɛ́. Ndɛ́ɛ́ kudúmə pɛlɛ́ɛ́ agooyɛ́ʼkɛn nugəm.»

¹⁰Kɛ́lɛ kidiídílə́ tɛn kɔ a kɛnɔ kímmú a Kálaʼtaʼ ɛ Táán lɛ́: «Pəŋi pɛnɔɔŋɛʼ, mɛ́naan tɛn anyɔ́ga ondáŋ na ndɛg ɛ Táán!»

¹¹A kɛnɔ tɛn kímmú, kɛ́lɛ kɔ kidiídílə́ lɛ́: «Pɛnɔɔŋɛʼ piim mɛ́naan agɛɛ́ʼkɛn nugəm na Sə́dúk! Əʼkúu əngim yɛ́ a nsí, mɛ́naan amonyáadɛ!»

¹²Ɛsayíi, ɔndɔɛgɛʼ pɛbán o Táán nyummú, yiísə́ə́ tɛn a kálaʼtaʼ yəəŋ ɔnɔ́: «Mɔɔd alɛ́ɛ́ kiim álon a kibúúm kɛ́ Yəsə́ə. Alɛ́ɛ́ kodɛ́ɛmɛn a kolaamɛ mɔnɔŋ má mɔ́dɛɔ́gɔ Yúdɛn. Pɛnɔɔŋɛʼ pɛ́lɛ́ɛ́ komɛna pɛda na nyɔ́lɛ́[79]»

¹³Táán nyɔ́ alɛɛ́ agɛɛlɛ lɛ́ mɔɔd ámɛna pɛda na nyɔ́lɛ́, áboyɛ́ɛlɛ lɛ́ póɔŋ tɔnyɔ́g kɛ́fɔlɛ́, áyɛɛlɛ lɛ́ póɛn na kiwiiyiʼ a oʼto wóonɛ lɛ́ pomáág oʼto na nyɔ́lɛ́. Ná a niɛlɛ nɛ́ɛn, poamɛna pɛda kə́mmú kɛ́fɔlɛ́ na nyɔ́lɛ́ a toɛn tó Uŋun wó Ufúlúʼtú.

¹⁴Pomóŋŋí, ndɛ mɛɛ́nyɔ́amɔɛ́d ondɛŋáán, isuŋ fiɛ́d lɛ́ poálaŋánan a kɔdɛ́ɛ ɔʼtɛ́m, poálɛŋ tɛn nkə kiim kɛ́ mɔɔd ogóódi lɛ́ álɛŋ, polɛ pə́gulə́bənən tɛn pəŋi na pəŋi.

¹⁵Náa, agɛɛlɛ lɛ́ poáyɔ́ɔ́ŋɛ pɛbán pímmú pɛ́ poálɛŋ, mbábosɔyɔn na nɛnyɛ́n a pɛnɔ pímmú a nufuuʼ nóonɛ. Mbə́budílən náan lɛ́ Táán, a kɔdɛ́ɛ ɔʼtɛ́m kuə́ŋ, amɛ́nyɛɛlɛ lɛ́

¹⁶nyɛ́ɛn uʼkudin o Yə́sus Kilíʼtus a kɛgaágadɛ kɛ́ pɛnɔɔŋɛʼ. Pigólí pɛ́ɛnɛ pɛ́ ndɛɛ́ agɛɛlɛ, pɛ́ kolɔɛgɛ Tɔsɔm Tólaŋ tó Táán, pɛ́lɛ wɔnɔ́ pigólí pɛ́ ɔnjaaganɛʼ pɛfɔny, agɛɛlɛ lɛ́ pɛnɔɔŋɛʼ pɛ́ag oʼto na Táán, pɛ́yɛɛn kɛfɔny kɛ́ kímə́mugə́mmi, kɛfɔny kɛ́ Uŋun wó Ufúlúʼtú wə́ədə́nígi tə́ngə́d a oʼto ó Táán.

¹⁷Wɔnɔ́ ná kɛ́lɛɛ́ anɛ́ɛ́n náan lɛ́ na Yə́sus Kilíʼtus na mɛ tɛándɛ úmmuʼ, ndɛ ugəə́gidən a igog a oʼto ó pigólí pɛ́ Táán pɛ́ ndɛɛ́ agɛɛlɛ.

¹⁸Yoom yɛ́ndɛ́ŋ yɛ́ ndɛɛ́ ugusəə ɛ́dɛɔ́gɔ, ná kɛ́sánɛn əgín nkə kɛ́ Kilíʼtus ayɛ́nyɛɛlɛ lɛ́ nyɛ́ɛlɛ. Kɛ́lɛ nkə kɛ́ɛnɛ lɛ́ pɛnɔɔŋɛʼ tɛn pɛóbɛn Táán. Nkə kɛ́ɛg kiim kɛ́yáyɛ́lɛ́ɛ́ a tɔgɛ́ɛ́ tó njɛ́ɛ agosɔyɔ, na a nkə kɛ́ njɛ́ɛ agɛɛlɛ.

¹⁹Ayɛ́ɛ́lɛ kɛ́lɛ́ a mangán na piə́wúunəniʼ pɛ́ pɛbán pɛ́ ayɛ́ɛ agɛɛlanɛ a toɛn tó Uŋun wó Ufúlúʼtú. Náan aa njɛ́ɛ əgiim ndɔɛgɛ Tɔsɔm Tólaŋ tó Kilíʼtus pɛnɔ piim, kəə́bə́ə́ a Yolósalɛm súʼtə́ə́ a Ililíi.

²⁰Nyɛɛ́láŋ kaáyɛ́ʼkɛn agolɔɛgɛ Tɔsɔm Tólaŋ əgín a pɛnɔ pɛ́ mɔɔd ayɛ́ɛ adɛ́njóób niiŋ nɛ́ Kilíʼtus. Ntɛʼkɛ́ɛ anyɔ́ŋɛn lɛ́ ná mbáwáág a kɛnɔ kɛ́ pɔsɔ́g páyɛ́ɛ pə́ʼkəə́bə́ə́ ongwáag.

²¹Njɛ́ɛ́lɛ wɔnɔ́ ná kíyə́dílə́ə́ a Kálaʼtaʼ. Kɛ́lɛ kɔ kidiídílə́ lɛ́: «Pá mɔɔd na mɔɔd adɛʼkáaboólɔɛgɛnɛɛ́ Tɔsɔm aa pálɛ́ɛ́ komodálaá. Pá pádɛʼkáagoóbɛ́ɛ́ mɔɔd əə́buŋ niiŋ niə́ŋ áa pálɛ́ɛ́ koóbɛ́ɛ́ Tɔsɔm tuə́ŋ[80]»

²²Nkə kɛ́ a mangɛn máam miim má míísúgən pɛnɛŋ wɔnɔ́ pɛnɛŋ, kɛ́yɛ́ɛ əginjə́bi aa kɛ́ɛg, ntiim a pəŋi[81]

²³Ɛ́fɔlɛ́ ɛ́ pɛag aa yɛ́ɛnɛ wɔnɔ́ ná ndɛɛ́ əguunə kiim aboodála. Náa nɛ́gɔŋ yɛ́ɛnɛ, wɔnɔ́ ná mbáʼkomanɛɛ́ pigólí pɛ́ nyiígóodi áanɛ a əʼkúu yɛ́ɛnɛ, mbándɛ anɛ́ɛ́n ugiim káag.

²⁴Ndɛ afɛga lɛ́, ná ndágɛɛn a Paányá, ndaadɛ́lɛm áay, nsánɛ mədúg na pəŋi, ná ɔʼtɛ́m wáam úwiiyi a kaadɛ. Ndɛ agomɛna pɛda náan. Áay tɛn aa ndə́əsiəd nkə kɛ́ puə́giʼkóomin na kɛ́lɛ́ a ongɛn wáam wó a Paányá.

²⁵Náa, a kóonɛ kó ntə́níí nɛ́gɔŋ, ndayaʼkɛɛn a Yolósalɛm, a oʼtom wó a nó ndɛg ɛ Táán yɛ́ ɛlɛɛ́ kɔ́gɔ́ɔg

²⁶lɛ́ pəə́liʼtiniʼ pá a Masɛdowáan, na pɔsɔ́g pá a Aʼkáay pɛ́ɛ́mága moom agodómɛn pɔsɔ́g pá a Yolósalɛm pá póʼkódií yoom.

²⁷Əgín pɔ́lɛ́báamɔɛ́d áa páyáyɛ́ɛ́ŋɛ́nɛ́ɛ́ komaga moom, ɔmbɔ́ ná kɛ́lɛɛ́ tɛn lɛ́ pə́yíbugóodini uŋín kɔ́gɔ́ɔg kalaʼ lɛ́ wɔnɔ́ ná Yúdɛn yɛ́ ɛyáágɛn oʼto na Táán iyíbugóómin pɔ́lɛ́ pɛnɔɔŋɛʼ lɛ́ páág tɛn oʼto na Táán, pɔ́lɛ́ tɛn pígóodi lɛ́ páboɛ́bɛ pɔ́lɛ́ Yúdɛn agoboyɛ́ʼkɛn nkə kɛ́ kɛ́abosógɛn[82]

²⁸Nkóódi lɛ́ njaŋ agɛɛn əgəə́suuli kɛnó kɛ́ɛg. Əgín mbə́ʼkəə́suuli kɛ́lɛ́, mbáʼkoboyɛ́ʼkɛn moom moɔ́bɔn, áay aa ndágɛɛn filí agɛɛn a Paányá. A niɛn nɛ́am nɛ́ a Paányá aa ndáadɛ́lɛm áay agoboodála.

²⁹Mbálɛŋ, isuŋ ɛ́dɛɔ́gɔ, ndəəgiim na ɛ́fɔlɛ́ ɛ́ kɔŋɛʼ kó Kilíʼtus aábɛyɛ́ʼkɛn.

³⁰Pomóŋŋí, mbáboyɔ́sɔ́gɔ́lɔ́nɛ́ɛ́, a niiŋ nɛ́ Sə́dúk wəəs Yə́sus Kilíʼtus na a oʼto wó nnyɔ́ŋánán yɛ Uŋun wó Ufúlúʼtú, tiə́bulidəən ná tɛ́nɔɛyɛ ondáŋ a pɛɔ́sɔ́gɔ́lɔ́n pɛ́ tɛágɛɛ́ʼkɛn na Táán a kidíídí kɛ́am.

³¹Ɔ́sɔ́gɔ́lɔ́nɛ́an a kidíídí kɛ́am lɛ́ ná pɔɔd pá a Siudə́ə pá pə́ligíí fiɛ́d kəə́liʼtiniʼ pádɛyɛ́nyɛɛlɛ kɔbɛ́ ná ndágɛɛn kɔ́gɔ́ɔg. Pómoyɔ́sɔ́gɔlɔn tɛn lɛ́ pəə́liʼtiniʼ pá a Yolósalɛm pányɔ́ga na nkə kɛ́ ndɛɛ́ əgubuyíimin na kɛ́lɛ́.

³²Áay, ndəəgiim əgiig a pəŋi ɔʼtɛ́m síɛ́ɛ́d na tɔnyɔ́g, ná Táán əmə́líʼtíníí, nyóoyig sɔɔŋ áay na pəŋi.

³³Táán nyɔ́ aágɛɛ́ʼkɛnan uŋóón, yɛ́ɛn na pəŋi piim aá! Aamɛn.