Read Yambeta Ɔlɔ́ma 16 Bible Online

Ɔlɔ́ma 16 - Yambeta bible

Ɔlɔ́ma 16

¹Taa Fə́bə́, móŋŋí wəəs nyɔ́ ɔʼkɛ́ɛd nyɔ́ alɛɛ́ əgugud a nó pəə́liʼtiniʼ pá a Sənkələ́ə anyóon əə́giim, alɛ a oʼto wááŋan aá!

²Púmuúsiəd kɔŋɛʼ a niiŋ nɛ́ Sə́dúk wɔnɔ́ ná pəə́liʼtiniʼ pógódíí kɛɛlɛ pɔ́lɛ́ na pɔ́lɛ́. Pómoɛ́bɛ a nkə kiim kɛ́ kíəmuyúunən lɛ́ nyɔ́lɛ́ ayɛ́ɛ́bɛ tɛn ɛ́fɔlɛ́ ɛ́ pɔɔd, ɔmbɔ́ mɛɛ́nyɔ́amɔɛ́d nyóonɛ.

³Púisoyidini Pilisíil na Aʼkɛláas pá tɛlɛɛ́ agɛɛlɛ pigólí pɛ́ Yə́sus Kilíʼtus ogo úmmuʼ.

⁴Píífób kugu agɛɛlɛ lɛ́ pɛ́nnyɔɔyɛ. Ndɛ əgubuúsoyidəni kɛ́fɔlɛ́. Ntɛɔ́gɔ mɛnyɔ́əsíŋ əgubuúsoyidəni, pɔɔd pá a mogony mó kəə́liʼtiniʼ muim mó a nó pá pɔ́dɛɔ́gɔ Yúdɛn náa páʼkaáʼgɛ́ɛ́ oʼto na Kilíʼtus pálɛ əgubuúsoyidəni tɛn.

⁵Púisoyidini tɛn pəə́liʼtiniʼ pá pálɛɛ́ agaágonya a toádɛʼ toɔ́bɔn. Púisoyidini tɛn sɔ́g waam wo ɔʼtɛ́m Ɛʼpɛnɛ́ɛd, nyɔ́lɛ́ nyɔ́ alɛɛ́ mɔɔd o na oʼto na oʼto ogaag oʼto na Kilíʼtus a kɛsom kɛ́ nsí kɛ́ Əsíi.

⁶Púisoyidini Malɛ́a nyɔ́ ayáyɛ́ʼkɛ́nɛ́ɛ́ ntɔ́b kɛ́fɔlɛ́ əgugud a kidíídí kɛáŋan.

⁷Púisoyidini tɛn pasɛ páam póonɛ lɛ́ na Andoloníʼkus na Yúnɛas. Tiɛ́nɛ́ yoog yɛ njaan ondáŋ na pɔ́lɛ́. Pɔɔd pálɛ agoboógany kɛ́fɔlɛ́ a pigólí pɛɔ́bɔn pɛ́ pɔɔ́n pá maʼtom pɛ́ pálɛɛ́ agɛɛlɛ. Pɔ́lɛ́ aa pɛ́ɛ́yáŋ agaag oʼto na Kilíʼtus na mɛ.

⁸Púisoyidini tɛn Ampɛlɛáʼtus, sɔ́g waam wo ɔʼtɛ́m nyɔ́ pəsi na nyɔ́lɛ́ tɛlɛɛ́ úmmuʼ a Sə́dúk.

⁹Púisoyidini Ulubɛ́ɛŋ. Pəsi na nyɔ́lɛ́ tɛlɛɛ́ agɛɛlɛ pigólí pɛ́ Kilíʼtus pɛ́go pímuʼ. Púsoyidi tɛn sɔ́g waam wo ɔʼtɛ́m Staʼkíis.

¹⁰Púisoyidini tɛn Aʼpɛlɛ́ɛs nyɔ́ yiílóódi moááŋ lɛ́ nyɔ́lɛ́ aáʼkaag oʼto na Kilíʼtus. Púsoyidi tɛn pɔsɔ́g pá a noádɛʼ nó Əlistobúul.

¹¹Púisoyidini tɛn sɛ waam Ɛlodɛyɔ́ɔŋ. Púsoyidi tɛn pɔɔd pá a nó Naasíis pá páágɛ́nɛ́ɛ́ oʼto na Sə́dúk.

¹²Púisoyidini pa Tɛlɛfɛ́ɛn pɔ́lɛ́ na Tilifóos pá pálɛɛ́ əgugudin Sə́dúk. Púsoyidi tɛn móŋŋí waam nyɔ́ ɔʼkɛ́ɛd Pələsíis nyɔ́ ndɛɛ́ anyɔ́ŋɛn na ɔʼtɛ́m wáam ungim. Nyɔ́lɛ́ nyɔ́ ayáyɛ́ʼkɛ́nɛ́ɛ́ ntɔ́b kɛ́fɔlɛ́ agɛɛlɛ pigólí pɛ́ Sə́dúk.

¹³Púisoyidini tɛn Ulufúus, uʼkudin nyɔ́ Sə́dúk əyííyid. Soyídíən tɛn ŋŋí nyɔ́ əyísiə́d wɔnɔ́ mɔɔ́n wəəŋ.

¹⁴Púisoyidini tɛn Əsinkilíid, na Fɛlɛgɔ́ɔŋ, na Ɛlɛmɛ́ɛs, na Paʼtolobáas, na Əlimáas, na pəə́liʼtiniʼ piim pá pálɛɛ́ na pɔ́lɛ́.

¹⁵Púisoyidini Filolóog, na Siulí, na Nələ́ə pɔ́lɛ́ ná móŋŋí nyɔ́ ɔʼkɛ́ɛd, na Olɛ́ɛmb, na pɔɔ́n pá Táán piim pá pálɛɛ́ na pɔ́lɛ́.

¹⁶Púsoyidənəni pəŋi na pəŋi, puə́gúligən mugog a nɛ́ pɔɔ́n pá niŋŋí. Pɔɔd pá a mogony muim mó moágɛ́nɛ́ɛ́ oʼto na Kilíʼtus pə́mə́busóyídi aá!

¹⁷Pomóŋŋí, mbáboyɔ́sɔ́gɔ́lɔ́nɛ́ɛ́, pólóʼkɔd na pɔɔd pá páagɛɛlɛ lɛ́ ɛsaa yɛ́ɛn a kɛgaágadɛ kɛ́ pəə́liʼtiniʼ, páagɛɛlɛ lɛ́ pə́nim ngə́ wɔnɔ́ pɔ́lɛ́ pálɛ agosáŋɛnɛ nkə kɛ́ páyɛ́boyáʼkánánɛ. Pódɛ́da pɔɔd wɔnɔ́ póob

¹⁸lɛ́ mbod ɛ pɔɔd wɔnɔ́ yɛ́ɛy ɛdɛɔ́gɔ əgugudin Kilíʼtus, Sə́dúk wəəs. Pagaadɛ pɔ́ɔ́bɔn aa pálɛɛ́ əgugudin[83] A pisig pɛ́ tɔgɛ́ɛ́ pɛ́ pɛ́lɛɛ́ agolon a nnuʼ yɔɔbɔn, na a tɔgɛ́ɛ́ toɔ́bɔn tó kɛliɛ́g tó pálɛɛ́ na tólɛ́ aa pálɛɛ́ əgulígə pá pɔ́dɛɔ́gɔ əngis angás.

¹⁹Náa, a pəŋi, ungim aálɛŋ lɛ́ polɛ agoóbɛn Sə́dúk. Ndɛ na tɔnyɔ́g kɛ́fɔlɛ́ a kidíídí kɛáŋan, náa, ndaanyɔ́ŋɛn lɛ́ póɛn na nsiŋ ɛgɛɛlɛ kɔŋɛʼ, pudiyə́fílə́níí agɛɛlanɛ kɔbɛ́.

²⁰Kɛnɛŋ sɔɔŋ, Táán nyɔ́ aágɛɛ́ʼkɛnanan uŋóón, yɔ́ɔb Sáʼtan a ambaan yááŋan. Sə́dúk wəəs Yə́sus yɛ́ɛn na pəŋi aá!

²¹Timoʼtə́ə nyɔ́ alɛɛ́ sɔ́g waam o pigólí, na pasɛ páam póonɛ lɛ́ na Lúsius, na Yásɔn, na Sosiʼpáʼtolos pə́mə́busóyídi aá!

²²Mɛ Tɛlɛsíus nyɔ́ Póol əyísiə́d lɛ́ mmuúdilən nufuuʼ nóonɛ[84], mbə́busóyídi tɛn a niiŋ nɛ́ Sə́dúk áaá!

²³Kayúus nyɔ́ mɛ Póol ndɛɛ́ a noádɛʼ nuə́ŋ əmə́busóyídi aá! A noádɛʼ nuə́ŋ tɛn aa pəə́liʼtiniʼ póonɛ áanɛ pálɛɛ́ agaágonya. Ɛláastɛ nyɔ́ alɛɛ́ ongɛɛ́ngɛg mɔɔnɛ́ má nigúu, na móŋŋí wəəs Koáʼtus pə́mə́busóyídi aá! [

²⁵Tɛ́nyádɛan Táán! Tɛ́monyádɛan nyɔ́lɛ́ nyɔ́ alɛɛ́ na toɛn tó kobogónɛ a kəə́liʼtiniʼ wɔnɔ́ ná Tɔsɔm Tólaŋ tó ndɛɛ́ alɔɛgɛ tólɛɛ́ əgusəə. Tɔsɔm tó ndɛɛ́ alɔɛgɛ Yə́sus Kilíʼtus a tólɛ́. Nkə kɛ́ Táán ɔyɔ́ɔ́sɛ́gɛn pɔɔd əgín kɔ kalaʼ, Tɔsɔm tóod toálónɛ kɛ́lɛ́ táán.

²⁶Náa nɛ́gɔŋ yɛ́ɛnɛ, kɛáʼkolónɛ́ɛ́ a kɛmoámoáŋ a nkə kɛ́ palɔɛgɛʼ pɛbán pá Táán píídílə a pagálaʼtaʼ pɔ́ɔ́bɔn. Kɛ́lɛ əgín wɔnɔ́ ná Táán nyɔ́ alɛɛ́ a ɔlaa a pəliə́g yiísə́ə́ kɔ́gɔ́ɔg kalaʼ. Páyɛ́ɛ́lɛ lɛ́ mɔnɔŋ miim má a nsí málɛŋ tɔgɛ́ɛ́ tóod ná ungim yáag oʼto na Táán, áamoyóbɛn.

²⁷Táán nyɔ́ alɛɛ́ nyɔ́lɛ́nyɔ́əsíŋ na nsiŋ, tɛ́moyɛ́ʼkɛnaan nugəm a pɛnɛŋ piim, a niiŋ nɛ́ Yə́sus Kilíʼtus. Aamɛn[86]