Read Yambeta Ɔlɔ́ma 2 Bible Online

Ɔlɔ́ma 2 - Yambeta bible

Ɔlɔ́ma 2

¹Wɛ nyɔ́ waásɛ́lɛn pɔsɔ́g lɛ́ páagɛɛlanɛ kɔbɛ́, lɛŋ lɛ́ wɛɛn ɔmbɔ́ ánɛ, odɛágɛɛn na unuʼ ógoyɔm lɛ́ nkə kɛ́go kímuʼ kɛ́ olɛɛ́ agobosɛ́lɛn a kɛ́lɛ́, wɛɛ́nyɔ́amɔɛ́d tɛn olɛ agɛɛlɛ. Áay náan, olɛ agaáyɛ́ʼkɛn nsɔ́ɔ́ wɛɛ́nyɔ́amɔɛ́d.

²Ɛɛ́ɛ, tɛálɛŋ lɛ́ mbaasɔ́ ɛ Táán, a pá páagɛɛlanɛ náan, ɛlɛ sáád.

³Wɛ nyɔ́ olɛɛ́ agosɛ́lɛn pá páagɛɛlanɛ pɛbán pɛ́ pɛbɛ́ pɛ́ɛb, waafɛg lɛ́ olɛ́ɛ́ kɔɔŋ unuʼ ó pɛyɔm a udi ó Táán, wɛɛ́nyɔ́amɔɛ́d waágɛɛlɛ yoom ɛgo ímuʼ wɔnɔ́ pɔ́lɛ́ a? Ndóo.

⁴A nɛáŋ, waásɛ́ɛ́dɛ kɛlaŋanan kɛ́ kɔdɛ́ɛ ɔʼtɛ́m kó Táán á! Waásɛ́ɛ́dɛ wɔnɔ́ ná əgudííníí kugudiə́n, alɛɛ́ agonóʼtan pɛbán pɛáŋ pɛ́ pɛbɛ́ á! Odɛálɛŋ lɛ́, alɛ agɛɛlɛ náan lɛ́ ná ógasɛ ɔlaa wááŋ á?

⁵A oʼto wááŋ wó ɔnnasáŋ wóow wó olɛɛ́ agɛɛlɛ, ɔnnyɔ́ŋɛn lɛ́ ná waágasɛ́ ɔlaa wááŋ, yug aa waágaágɔnyan náan wɛɛ́nyɔ́amɔɛ́d. Wɔɔ́s wó Táán alɛ́ɛ́ kusəlií lɛ́ naánɛ́ nyɔ́lɛ́ amóób ilúún, odɛndɛ́ɛ́ kɔɔŋ unuʼ ógoyɔm a udi wə́ə́ŋ. Wɔɔ́s wóow, alɛ́ɛ́ kuloodi lɛ́ nyɔ́lɛ́ alɛ agoyɔmɛ pɔɔd a sáád.

⁶Alɛ́ɛ́ kɔsáábɔn ɛ́nɛ́ mɔɔd əgín wɔnɔ́ a pigólí piə́ŋ pɛ́ əə́gud lɛ́[5],

⁷pá pálɛ́ɛ́ kaáyɛ́ʼkɛnɛɛ́ pɛnɛŋ piim agɛɛlɛ kɔŋɛʼ lɛ́ ná pɛ́ɛn na nugəm, na nnyáádɛ́, na ɔlaa wó ódɛndɛ́ɛ́ komanɛɛ́, póob aa Táán alɛ́ɛ́ kɛɛ́ʼkɛnɛɛ́ ɔlaa a ɛbá yə́ə́ŋ a pɛnɛŋ piim.

⁸Kɔmɔɛ́d lɛ́ a pá pídə́ə́míni oʼto, pámɛ́ɛ́lɛ oʼto wó ɔnnasáŋ, pə́njə́ən ngə́ ɛ fɔ́lɔ́b, pə́mə́əyə́ən agá ɛ pɛbán pɛ́ pɛbɛ́, pɔsɔ́g póob aa Táán alɛ́ɛ́ kulodií lɛ́ nyɔ́lɛ́ amóób ilúún, ɔdɛɔ́gɔ na tɔnyɔ́g na pɔ́lɛ́.

⁹Ungim nyɔ́ alɛɛ́ agɛɛlanɛ kɔbɛ́, alɛ́ɛ́ konɛ ntɔ́b yɛ́ ɛmámosán oʼto, ngililiʼ ɛlɛ́ɛ́ kumuúgumin. Kɛ́lɛ́ɛ́ kəə́bə́ə́ na pɔɔ́n pá Yúdɛn kɛ́ság kudíin kíɛn na pɛnɔɔŋɛʼ.

¹⁰Náa, a ungim nyɔ́ aágɛɛlɛ kɔŋɛʼ, Táán alɛ́ɛ́ komoyɛ́ʼkɛn nugəm, na nnyáádɛ́, na kiwiiyiʼ. Na pɔɔ́n pá Yúdɛn aa alɛ́ɛ́ koyaŋ agɛɛ́ʼkɛnɛɛ́, áság kudíin əyə́əni na pɛnɔɔŋɛʼ.

¹¹Kɛ́lɛ lɛ́, Táán ədiə́guúlini a ngim ɛ mɔɔd[6]

¹²Ungim nyɔ́ aágɛɛlanɛ kɔbɛ́ fiɛ́d ondɛŋáán pɛcɛm, alɛ́ɛ́ kugu ɔmbɔ́ ná adɛʼkóolɛŋɛɛ́ pɛ́lɛ́. A pá pálɛɛ́ palɛŋáán pɛcɛm, náa páagɛɛlanɛ kɔbɛ́, pɛcɛm pɛ́ɛb aa pálɛ́ɛ́ koboóyɔmɛɛ́.

¹³Kɛ́lɛ lɛ́, adɛ́njaŋ pá páagoob koóbáán pɛcɛm aa Táán alɛ́ɛ́ koboyɛ́ʼkɛnɛɛ́ kilumiʼ, ndóo. Pá pálɛ́ɛ́ kɛɛlɛɛ́ nkə kɛ́ pɛcɛm pɛ́lɛɛ́ əgusəə aa pálɛ́ɛ́ kɛɛnɛɛ́ na kilumiʼ a əngis yə́ə́ŋ.

¹⁴Kɛnɛŋ kɛ́ pandɛŋ Táán, pɔ́lɛ́ pá pándɛŋɛnɛɛ́ pɛcɛm pɛ́ Táán, ntɛ́m yɔɔbɔn yaáboyɛ́ɛlɛ lɛ́ pɛ́ɛlɛ nkə kɛ́ kɛ́lɛɛ́ a ngə́ ɛ pɛcɛm, póóloodi lɛ́ pálɛ na pɛcɛm a ntɛ́m yɔɔbɔn.

¹⁵Əgín a niɛlɛ nɛɔ́bɔn tɛn nɛ́ɛn, póóloodi lɛ́ yoom yɛ́ pɛcɛm pɛ́lɛɛ́ əgusəə lɛ́ pɛ́ɛlɛ, ɛ́lɛ idiídílə́ a ntɛ́m yɔɔbɔn. Páálɛŋ náan a nto yɔɔbɔn, nɛŋo nɛ́ nɛ́lɛɛ́ agosɔyɔ tɛn a ntɛ́m yɔɔbɔn a kaadɛ nɛ́lɛ wɛ́sɛnɛg lɛ́ a pɛnɛŋ pímmú, ntɛ́m yɔɔbɔn ɛlɛ agoboóyɔmɛ yɔ́nɔ́: Kɔbɛ́ aa kóonɛ omɛ́ɛlɛ, kɔŋɛʼ aa kóog.

¹⁶Pɛbán pɛ́ɛnɛ pɛ́ ndɛɛ́ əgusəə pɛ́lɛ́ɛ́ kolon táán moááŋ a wɔɔ́s ó pɛyɔm, wɔɔ́s wó Táán alɛ́ɛ́ kɛɛ́ʼkɛnɛɛ́ Yə́sus Kilíʼtus toɛn lɛ́ ɔ́yɔmɛ pɔɔd a pɛbán piim pɛ́ páyɛ́ɛ agɛɛlanɛ a pɛɔsɛ́g. Táá Tɔsɔm Tólaŋ tó ndɛɛ́ alɔɛgɛ aa tóod.

¹⁷Pəŋi anɛ́ɛ́n pá páaboodɔ́ŋɔn lɛ́ pɔɔ́n pá Yúdɛn, pəŋi pá poɛ́yɛ́gɛ́nɛ́ɛ́ oʼto a pɛcɛm, puə́gəə́gidən a igog a oʼto ó Táán;

¹⁸pəŋi pá poɔʼkɔ́ poálɛŋ nkə kɛ́ Táán alɛɛ́ anyɔ́ŋɛn, poɔʼkɔ́ pɛcɛm aa pɛ́máboyáʼkánánɛ kiiyid nkə kɛ́ kɛ́lɛɛ́ kɛŋɛʼ,

¹⁹pəŋi pá poɔʼkɔ́ polɛ əgusúidə pá pálɛɛ́ na woog, poɔʼkɔ́ pəŋi polɛ kisəə kɛ́ pá pálɛɛ́ a mbin.

²⁰Poɔʼkɔ́ tɛn polɛ paaʼkananɛʼ pá pándɛŋɛnɛɛ́ yoom, polɛ pɛlág pɛ́ pá pə́ligíí poómbaa lɛ́ poɔʼkɔ́ pɛcɛm aa pɛálɛŋ kubuúloodi lɛ́ pólɛŋ pɛbán na pafɔ́lɔ́b.

²¹Pəŋi anɛ́ɛ́n pá poɔʼkɔ́ polɛ poloodoniʼ ə, tuə́ áa podɛɔ́gɔ agaaʼkanɛɛ́ pəŋibáamɔɛ́d ə́! Pəŋi pá poágaaʼkananɛ pɔɔd lɛ́ pə́dinjííbə, tuə́ áa pəŋi puə́giíbə ə́!

²²Poɔʼkɔ́ na pɔ́lɛ́ pádɛnjɛ́ɛ́lɛ pɛdaŋ, pəŋi poágɛɛlɛ ə́! Pəŋi pá podɛányɔ́ŋɛnɛɛ́ ambog, tuə́ áa puə́giíbə anɛ́ɛ́n moom mó pááfɔnya a pɛfɔg pɛ́ ambog ə́![7]

²³Pəŋi pá puə́gəə́gidən a igog poɔʼkɔ́ poálɛŋ pɛcɛm, tuə́ áa pudiə́yə́nií anɛ́ɛ́n pɛcɛm pɛ́ɛb əə́! Polɛ agosoolanɛ niiŋ nɛ́ Táán a niɛlɛ nɛáŋan nɛ́ɛn.

²⁴Kɛ́lɛ kidiídílə́ náan a Kálaʼtaʼ ɛ Táán lɛ́: «Pɛbán pɛ́ pɛbɛ́ pɛ́ poágɛɛlanɛ aa pɛ́lɛɛ́ agɛɛlɛ lɛ́ pandɛŋ Táán pɔ́sɔyɔ niiŋ niə́ŋ kɔbɛ́[8]»

²⁵Ɛɛ́ɛ! Kɛ́lɛ lɛ́, kɛnɛŋ kɛ́ mɔɔd alɛɛ́ agɛɛlɛ nkə kɛ́ kɛcɛm kɛ́lɛɛ́ əgusəə, waany wə́ə́ŋ ólɛ a ngə́. Náa, kɛnɛŋ kɛ́ mɔɔd adɛágɛɛ́ngɛgɛɛ́ pɛcɛm, waany wə́ə́ŋ ólɛ iyó, alɛ wɔnɔ́ mɔɔd nyɔ́ ɔdɛɔ́gɔ onganyɛán.

²⁶Mɔɔd nyɔ́ ɔdɛɔ́gɔ onganyɛán, nyɔ́lɛ́ amaʼkɛɛ́ngɛg pɛcɛm pɛ́ Táán óoʼ, Táán ədiə́muúsiəd wɔnɔ́ mɔɔd nyɔ́ alɛɛ́ onganyɛán a!

²⁷Lɛŋ lɛ́ mɔɔd nyɔ́ ɔdɛɔ́gɔ onganyɛán, náa alɛɛ́ agɛɛ́ngɛg pɛcɛm, nyɔ́lɛ́ aa alɛ́ɛ́ kogoóyɔmɛɛ́ wɛ nyɔ́ olɛɛ́ onganyɛán. Wɛ nyɔ́ pɛcɛm pɛ́ Táán pɛ́lɛɛ́ pidiídílə́ a ɔmbɔg yááŋ odiɛ́ngɛg pɛ́lɛ́.

²⁸Mɔɔ́n ó Yúdɛn o fɔ́lɔ́b ɔdɛɔ́gɔ nyɔ́ əə́gəə́səə na unuʼ na unuʼ, ndóo. Waany ó fɔ́lɔ́b odɛɔ́gɔ lɛ́ wáásóm kiony, ndóo, ólɛ madáŋánánɛ́.

²⁹Mɔɔ́n ó Yúdɛn o fɔ́lɔ́b alɛ nyɔ́ alɛɛ́ fɔ́lɔ́b Yúdɛn a ɔʼtɛ́m wə́ə́ŋ a kaadɛ. Waany ó fɔ́lɔ́b ólɛ wó ólɛɛ́ a ɔʼtɛ́m a kaadɛ, wó wáagɛɛlɛ lɛ́ ógasɛ ɔʼtɛ́m wááŋ a toɛn tó Uŋun wó Ufúlúʼtú, waany wó ódɛɔ́gɔ a nkódánán ɛ kɛcɛm a mɔɛn[9] Fɔ́lɔ́b fɔ́lɔ́b mɔɔ́n o Yúdɛn nyɔ́ aándɛɛ́ náan ədiə́guunə lɛ́ pɔɔd aa pámonyádɛɛ́, ndóo, nnyáádɛ́ yəəŋ, na Táán áa ímuyíminií.