Read Yambeta Ɔlɔ́ma 3 Bible Online

Ɔlɔ́ma 3 - Yambeta bible

Ɔlɔ́ma 3

¹Áay anɛ́ɛ́n ə́ə, kəə́bíən mɔɔ́n ó Yúdɛn kómááyɛn kəə́bíən mɔɔ́n o mɔnɔŋ a igə áŋ? Waany tɛn əə, mɔɔd aagaáyáanyɛ lɛ́ ná ómoyɛ́ʼkɛn nkə ə́?

²Ɛɛ́ɛ, moom móom mólɛ mɔŋɛʼ a pungə́ puíŋ! Kɛ́ na oʼto na oʼto kɛ́lɛ lɛ́ na Yúdɛn aa Táán yɛɛ́yáŋ agɛɛ́ʼkɛn tɔgɛ́ɛ́ tuə́ŋ.

³Nga pɔɔ́n pá Yúdɛn pə́mmú pə́diʼkə́yə́ən nkə kɛ́ Táán yiísə́ə́, nyɔ́lɛ́ ɔdɛɔ́gɔ ogolɔb lɛ́ adɛágɛɛlɛ nkə kɛ́ yɛɛ́gág na unuʼ wə́ə́ŋ a oʼto wóonɛ lɛ́ pɔ́lɛ́ pə́diʼkə́əgəə́liʼtini.

⁴Ndóo! Táán nyɔ́lɛ́ ɔdɛɔ́gɔ náan. Tɛ́lɛŋaan agá lɛ́: Ungim alɛ na pɛnyaʼ, Táán nyɔ́lɛ́ alɛ əgusəə fɔ́lɔ́b. Kɛ́lɛ kidiídílə́ náan a Kálaʼtaʼ ɛ Táán lɛ́: «A tɔgɛ́ɛ́ toáŋ áa pógódíí kolɛŋ lɛ́ wɛ Táán olɛ sáád. Mɔɔd ogoyɔm na wɛ, ɔ́yɔɔŋ kilumiʼ ɔdɛɔ́gɔ[10]»

⁵Nga kɛ́lɛ lɛ́ a mabɛ́ má tɛágɛɛlanɛ aa sáád ɛ Táán ɛlɛɛ́ ogoóloodi, áay tɛɔʼkɔ́ nkə? Tɛɔʼkɔ́ Táán alɛ agɛɛlɛ anyóon kɔbɛ́ wɔnɔ́ ná alɛɛ́ agɛbɛʼpɔ́nɛsɛ lɛ́ tɛmɛ́ɛ́lɛ mabɛ́ yi! (Tóod tó ndɛɛ́ agosɔyɔ nɛ́gɔŋ, tólɛ tó mɔɔd əgín lɛ́ mɔɔd na tuyə́ən a oʼto.)

⁶Ndóo, adɛ́njaŋ náan aa kɛ́lɛɛ́. Kɛ́lɛ lɛ́ Táán adɛʼkɛ́ɛ agɛɛn sáád, ná ɔdɛɔ́gɔ ogoyɔmɛ pɔɔd.

⁷Náa, kɛ́maʼkɛɛn anɛ́ɛ́n lɛ́ pɛnyaʼ pɛ́am aa pɛ́agɛɛlɛ lɛ́ pɔɔd pálɛŋ fɔ́lɔ́b lɛ́ Táán alɛ əgusəə fɔ́lɔ́b, pálɛ pámonyáadɛ a oʼto wóow, a igə anɛ́ɛ́n aa pálɛɛ́ págɛmbɛn kə́mmú lɛ́ ndɛ agɛɛlɛ kɔbɛ́ ə́?

⁸Tɛlɛ anɛ́ɛ́n pə́gusəə anyóon tɛɔʼkɔ́: «Pɛ́ʼtaʼ anɛ́ɛ́n kɛɛlɛ kɔbɛ́ ná kɔŋɛʼ kúbiyíimin.» Pɔɔd pə́mmú pálɛ agosɔyɔ náan, pə́əsəə lɛ́ pəsi aa tɛlɛɛ́ na tɔgɛ́ɛ́ tóod. Pálɛ agoyósag agá niiŋ niə́s. Lɛŋáan lɛ́ Táán alɛ́ɛ́ kɛɛ́ʼkɛn na ombod wóow, ntɔ́b yɛ́ yaásɛʼtan na pigólí pɛɔ́bɔn.

⁹Áay anɛ́ɛ́n óoʼ, pəsi Yúdɛn tɛálaŋ pɔsɔ́g ɔ́? Ndóo, ɔmbɔ́ sɔɔŋ! A tɔgɛ́ɛ́ tó mbɔ́sɔyɔ, mbóloodi moááŋ lɛ́ pəsi piim, na Yúdɛn kɛ́ na pɛnɔɔŋɛʼ kɛ́, tɛlɛ pɛɔ́lɛ́ pɛ́ kɔbɛ́.

¹⁰Kɛ́lɛ kidiídílə́ a Kálaʼtaʼ ɛ Táán lɛ́: «Mɔɔd nyɔ́ alɛɛ́ sáád a nsí yɛ́ɛnɛ, ɔdɛɔ́gɔ. Ɔmbɔ́ əgín úmmuʼ.

¹¹Úmmuʼ tɛn nyɔ́ alɛɛ́ na nsiŋ ɔdɛɔ́gɔ. Nyɔ́ alɛɛ́ əguunə ngə́ ɛ Táán, ɔdɛɔ́gɔ.

¹²Ungim əə́ʼkudi ngə́ ɛlaŋ, piim pálɛ pənímə́ə́n. Mɔɔd ɔmbɔ́ úmmuʼ ɔdɛɔ́gɔ kɔ nyɔ́ alɛɛ́ agɛɛlɛ kɔŋɛʼ. Ɔmbɔ́ əgín úmmuʼ.

¹³Nnuʼ yɔɔbɔn ɛlɛ wɔnɔ́ kəəniʼ ká kálɛɛ́ kaás lɛ́ pifiífílə́ pɛ́ tɔgɛ́ɛ́ pɛ́ píəgiim pɛ́lon kɔ, pɛ́lɛ əgunug wɔnɔ́ kiluu kɛ́ kíəgiim kɛ́lon a kəəniʼ. Əgín pɛnyaʼ na pɛnyaʼ aa pɛ́lɛɛ́ agolon a tɔmɛm toɔ́bɔn. Tɔgɛ́ɛ́ tó tólɛɛ́ agolon a pɛbɛb pɛɔ́bɔn tólɛ ɛlɔg, wɔnɔ́ yɛ́ uʼkud.

¹⁴Nnuʼ yɔɔbɔn ɛlɛ əgín lɛ́ pə́lumisəni pɔsɔ́g, pə́budúmə pinuʼ.

¹⁵Pálɛ ndúmiʼ agɛɛn na ɔʼtɛ́d lɛ́ pɛ́ɛn agoon mɔɔd.

¹⁶Kɛnɔ kiim kɛ́ páasan, pə́ədi pə́mə́dí əgín mandɛɛ na mandɛɛ.

¹⁷Pɔ́dɛɔ́gɔ agolɛŋ tuə́ áa pə́ləndinií na pɔsɔ́g a uŋóón.

¹⁸Pɔ́dɛɔ́gɔ na kodammana Táán ɔmbɔ́ sɔsɔ́ɔ́ŋ[11]!»

¹⁹Tɛlɛ kɔmɔɛ́d palɛŋáán lɛ́ nkə kiim kɛ́ pɛcɛm pɛ́lɛɛ́ əgusəə, kɛ́lɛ́ a oʼto ó pá pógódíí lɛ́ póóbɛn pɛ́lɛ́. Náan pádɛágɛɛn na unuʼ ógosɔyɛd, kɛ́yoóbanan lɛ́ ungim a nsí yɛ́ɛnɛ alɛ na nsɔ́ɔ́ a əngis á Táán.

²⁰Kólɛ́ aa kɛ́lɛɛ́ lɛ́, ɔmbɔ́ mɔɔd adɛndɛ́ɛ́ kɛɛn na kilumiʼ a əngis á Táán[12] lɛ́ amɛ́ɛ́lɛ nkə kɛ́ pɛcɛm pɛ́lɛɛ́ əgusəə. Pɛcɛm pɛ́lɛ agá lɛ́ ná píloodi moááŋ na pɔɔd lɛ́ pálɛ agɛɛlɛ kɔbɛ́.

²¹Táán əə́ʼkibiíloodi nɛ́gɔŋ yɛ́ɛnɛ moááŋ a ngə́ ɛyaán áa aábɛyɛ́ʼkɛn kilumiʼ a əngis yə́ə́ŋ, fiɛ́d a oʼto wóonɛ lɛ́ tɛmɛ́ngɛg pɛcɛm. Pɛcɛm pɛ́ Moyíis pɛ́lɛ́bɛ́amɔɛ́d na palɔɛgɛʼ pɛbán pá Táán pálɛ əgusəə lɛ́ kɛ́lɛ náan.

²²Táán agɛɛ́ʼkɛn kilumiʼ a oʼto wóonɛ lɛ́ pámáág oʼto na Yə́sus Kilíʼtus. Agɛɛ́ʼkɛn kɛ́lɛ a ungim nyɔ́ amáág oʼto na Yə́sus lɛ́ na nyɔ́lɛ́, ɛsaa yɛ́ɛnɛ lɛ́ Yúdɛn aa yɛ́ɛnɛ, kɛnɔɔŋɛʼ aa kɛ́ɛg, ɛ́dɛɔ́gɔ.

²³Ungim ayɛ́ɛ́lɛ kɔbɛ́, náan tɛn aa ungim yɛɛ́ʼtáŋ nugəm nó Táán.

²⁴Náa, Táán a ɔʼtɛ́m wə́ə́ŋ ólaŋ, ayɛ́boyɛ́ɛ́lɛ lɛ́ pɛ́ɛn na kilumiʼ a əngis yə́ə́ŋ. Amáboyɛ́ʼkɛn kɛ́lɛ́ a náan iyó, a ngim ɛ Yə́sus Kilíʼtus nyɔ́ ayɛ́boyááŋɛn a mabɛ́.

²⁵Nyɔ́lɛ́ aa Táán əyímudə́nígi lɛ́ pámoyóon a kɛfɔny, ə́gu a kidíídí kiə́s, maŋɔ́ mə́ə́ŋ mábɛɛ́sɔgɛn mabɛ́. A kugu kuə́ŋ kó yiígú, Táán yiílísin[13] pá pámáág oʼto na nyɔ́lɛ́. Yiílóódi a niɛlɛ nɛ́ɛn lɛ́ nyɔ́lɛ́ alɛ əgín sáád. Ɔmbɔ́ tɛn a kɛnɛŋ kɛ́ yɛɛ́nóʼtan pɔɔd kalaʼ, ayɛ́ɛ əgín tɛn sáád ná adɛʼkáaboʼpɔ́nɛsɛɛ́ a mabɛ́ má páyɛ́ɛ́lɛ.

²⁶Náan aa ayɛ́ɛ́lɛ na pɔɔd kalaʼ lɛ́ alɛ agonóʼtan. Alɛ əguloodi tɛn nɛ́gɔŋ lɛ́ alɛ sáád. Alɛ agɛɛlɛ pɛnɛŋ piim nkə kɛ́ kɛ́lɛɛ́ sáád. Náan aa, alɛɛ́ anyɔ́ŋɛn tɛn kɛɛlɛ lɛ́ ungim nyɔ́ yaágɛ́nɛ́ɛ́ oʼto na Yə́sus, yɛ́ɛn sáád.

²⁷Áay oó, tɛlɛ kə́mmú na uʼkus wó tɛlɛɛ́ págaányáadɛ a wólɛ́ á? Ndóo óo! A igə ə́? Lɛ́ tɛlɛ págaányáadɛ lɛ́ tɛmɛ́ɛ́lɛ yoom. Ndóo, mɔɔd ɔdɛɔ́gɔɔŋ kilumiʼ a oʼto wóonɛ lɛ́ amɛ́ngɛg pɛcɛm. Kɛ́lɛ a oʼto wóonɛ lɛ́ amáág oʼto na Yə́sus Kilíʼtus.

²⁸Ɛɛ́ɛ, táá nkə kɛ́ tɛálɛŋ aa kɛ́ɛg kɛ́lɛɛ́ lɛ́: Mɔɔd ɔdɛɔ́gɔɔŋ kilumiʼ a əngis á Táán a oʼto wóonɛ lɛ́ amɛ́ngɛg pɛcɛm, ndóo! Ɔɔgɔɔŋ kɛ́lɛ a oʼto wóonɛ lɛ́ amáág oʼto na Yə́sus Kilíʼtus.

²⁹Kɛ́lɛ anyóon lɛ́ Táán alɛ Táán ɛ Yúdɛn yɛ́lɛ́yɛ́əsíŋ óm, alɛ tɛn Táán ɛ mɔnɔŋ mɛ́ndɛ́ŋ ə́? Ndóo, Táán alɛ tɛn Táán ɛ pɛnɔɔŋɛʼ

³⁰lɛ́ Táán ɛlɛ mmuʼ súg[14] Nyɔ́lɛ́ aa aágɛɛ́ʼkɛn pɔɔ́n pá Yúdɛn kilumiʼ lɛ́ pámáág oʼto na Yə́sus. Əgín tɛn nyɔ́lɛ́ aa aágɛɛ́ʼkɛn kɛ́lɛ́ na pɛnɔɔŋɛʼ lɛ́ pɔ́lɛ́ tɛn pámáág oʼto na Yə́sus.

³¹Kɛ́lɛ anyóon lɛ́ tɛmaʼkaag oʼto na Táán, pɛcɛm pídiə́giʼkini kɛɛn kə́mmú yoom ə́? Ndóo! Tɛagɛɛ́ʼkɛn agá kə́mmú pɛcɛm toɛn agaáyɛn náan.