Read Yambeta Ɔlɔ́ma 4 Bible Online

Ɔlɔ́ma 4 - Yambeta bible

Ɔlɔ́ma 4

¹Tɛ́dálaan nkə kɛ́ kɛ́yásánɛ́ɛ́ na Ábɛlaam, sɛʼkóón wəəs a nsí yɛ́ɛnɛ áŋ! A nyɔ́lɛ́nyɔ́amɔɛ́d ə́ə, a mɔɔd na tuyə́ən a oʼto, nkə aa ɔyɔ́ɔ́ŋ ə́?

²Kɛ́yɛ́ɛnɛn lɛ́ a oʼto wó nkə kɛ́ Ábɛlaam ayɛ́ɛ́lɛ aa Táán ayɛ́moyɛ́ʼkɛn kilumiʼ, ná Ábɛlaam ayɛ́ɛ ugəə́gidən a igog. Náa, a udi ó Táán, ngə́ yɛ́ɛnɛ lɛ́ yányáadɛ ɛdɛɔ́gɔ.

³Kɛ́lɛ lɛ́, Kálaʼtaʼ ɛ Táán ɛlɛ əgusəə lɛ́: «Ábɛlaam ayáág oʼto na Táán, kólɛ́ aa Táán ayɛ́moyɛ́ʼkɛn kilumiʼ[15]»

⁴Kɛnɛŋ kɛ́ mɔɔd amɛ́ɛ́lɛ pigólí náa pámámoyɛ́ʼkɛn pɛsáábɔ́n a pigólí piə́ŋ, nkə kɛ́ɛg kɛ́ ɔmɔ́ɔ́ŋ, pádɛmodáasɛnɛ kɛ́lɛ́, ɔmɔ́ɔ́ŋ nkə kɛ́ yiígóodi lɛ́ yɔ́ɔŋ.

⁵Tísələə́n agá lɛ́ mɔɔd amaʼkolɔb adiɛlɛ yoom, áyaág agá oʼto na Táán nyɔ́ aágɛɛ́ʼkɛnanan kilumiʼ, aamoyɛ́ʼkɛn kɛ́lɛ́ lɛ́ amáág oʼto na nyɔ́lɛ́.

⁶Yoom ímuʼ náan aa Tə́fid alɛɛ́ agonyáadɛ kɔŋɛʼ kó mɔɔd nyɔ́ Táán yɛɛ́ʼkɛ́nɛ́nɛ́ɛ́ kilumiʼ, fiɛ́d a oʼto wóonɛ lɛ́ amɛ́ɛ́lɛ yoom na yoom.

⁷Alɛ əgusəə ɔnɔ́: «Kɔŋɛʼ igə náan na pá yiílísin masɛd mɔ́ɔ́bɔn, əmə́əbuúlisin tɛn mabɛ́ mɔ́ɔ́bɔn.

⁸Kɔŋɛʼ na pá Sə́dúk ədiə́siədií kɛnɛŋ na mabɛ́ mɔ́ɔ́bɔn[16]»

⁹Kɔŋɛʼ kóog kó Tə́fid yiísə́ə́, kólɛ əgín kó pá pálɛɛ́ paanyɛán óm, oó kólɛ tɛn kó pá pɔ́dɛɔ́gɔ paanyɛán ə́? Nkə kɛ́ tɛlɛɛ́ əgusəə kɛ́lɛ lɛ́: «Ábɛlaam ayáág oʼto ná Táán, kólɛ́ aa Táán ayɛ́moyɛ́ʼkɛn kilumiʼ.»

¹⁰Náa, ná Táán ayɛ́moyɛ́ʼkɛn kilumiʼ əə, Ábɛlaam ayɛ́ɛ aándɛ onganyɛán óm, ayɛ́ɛ adɛ́njáanyɛ ə́? Ndóo, ayɛ́moyɛ́ʼkɛn kɛ́lɛ́ ná adɛ́njáanyɛ.

¹¹Ábɛlaam yiídíin yaanyɛ a ngim. Waany óyɛ́ɛ kɛálɛ́ʼkán[17] əguloodi lɛ́ Táán ayɛ́moyɛ́ʼkɛn kilumiʼ a oʼto wóonɛ lɛ́ ayáág oʼto na nyɔ́lɛ́. Náan aa Ábɛlaam ayáán sɛ o mɔɔd ungim nyɔ́ amáág oʼto na Táán ɔmbɔ́ ɔdɛɔ́gɔ onganyɛán agɛɛlɛ lɛ́ Táán áboyɛ́ʼkɛn tɛn pɔ́lɛ́ kilumiʼ.

¹²Alɛ tɛn sɛ o pá pálɛɛ́ paanyɛán, áay lɛ́ pá pɔ́dɛɔ́gɔ agɔnyɔ́gaá əgín a oʼto wóonɛ lɛ́ pálɛ paanyɛán. Pálɛ əguyə́ən ongoo ó sɛ wəəs Ábɛlaam, nyɔ́lɛ́ nyɔ́ ayáág oʼto na Táán ná adɛ́njáanyɛ.

¹³Kɛ́lɛ lɛ́, adɛ́njaŋ a oʼto wóonɛ lɛ́ Ábɛlaam yiínúŋ pɛcɛm aa Táán ayɛ́mogágɛn, na nyɔ́lɛ́ na ndandaloŋ yəəŋ kɛ́ lɛ́ aaboyɛ́ʼkɛn nsí yɛ́ɛnɛ[18], ndóo. Ayɛ́mogágɛn yɛ́lɛ́ a oʼto wóonɛ lɛ́ ayáág oʼto na nyɔ́lɛ́, amáamoyɛ́ʼkɛn kilumiʼ.

¹⁴Nkə kɛ́ Táán yɛɛ́gágɛn pɔɔd kɛ́yɛ́ɛnɛn əgín a oʼto ó pá páagɛɛ́ngɛg pɛcɛm, ná tɛlɛ pə́gusəə lɛ́ mɔɔd agaágan oʼto na Táán əgín a iyó. Oʼkag ó Táán ódɛʼkɛ́ɛ agɛɛn tɛn yoom.

¹⁵Kɛ́lɛ lɛ́, kɛnɛŋ kɛ́ mɔɔd əə́də́əŋ kɛcɛm, Táán agoob ilúún na nyɔ́lɛ́. Kɔmɔɛ́d lɛ́ kɛnɔ kɛ́ kɛcɛm kɛ́dɛɔ́gɔ, kudə́əŋ kɛcɛm tɛn kódɛɔ́gɔ.

¹⁶Náan, oʼkag wó Táán yɛɛ́gágɛn pɔɔd ólɛ a oʼto ó pá pámáág oʼto na nyɔ́lɛ́, agɛɛlɛ lɛ́ kíɛn nɔŋáan nuə́ŋ nó amáboyɛ́ɛ́lɛ́nɛ a náan iyó. Áay náan, wáagɛɛn a ungim nyɔ́ alɛɛ́ wo ndɛg yɛ Ábɛlaam. Kɛ́dɛágɛɛn əgín a oʼto ó pá páagoóbɛn pɛcɛm, kɛ́agɛɛn tɛn a oʼto wó ungim nyɔ́ amáág oʼto na nyɔ́lɛ́ wɔnɔ́ ná Ábɛlaam, sɛ wəəs o pəsi piim ayáág.

¹⁷Ɛɛ́ɛ, kɛ́lɛ náan kidiídílə́ a Kálaʼtaʼ ɛ Táán lɛ́, Táán ɔnɔ́ na Ábɛlaam: «Njɛ́goyɛ́ɛ́lɛ lɛ́ wɛ́ɛn sɛ yɛ ɛ́fɔlɛ́ ɛ́ mɔnɔŋ[19]» Ábɛlaam alɛ sɛ wəəs a udi ó Táán lɛ́ ayáág oʼto na nyɔ́lɛ́ lɛ́ alɛ́ɛ́ koóndɛgɛ pɛlóŋ. Nyɔ́lɛ́ tɛn ogo aa ayɛ́ɛ́lɛ a nɔgɛ́ɛ́ nó a unuʼ wə́ə́ŋ lɛ́ nkə kɛ́ kɛ́dɛʼkɛ́lɛɛ́ kɔ, kíɛn kɔ.

¹⁸Ábɛlaam ayáág oʼto na Táán, aámɛna pɛda lɛ́ alɛ́ɛ́ kɔɔŋ nkə kɛ́ ayɛ́mogágɛn, ɔmbɔ́ ná pɔɔd pɛ́ndɛ́ŋ páyɛ́ɛ afɛga lɛ́ ngə́ yindigi kə́mmú. Nyɔ́lɛ́ ayáyáágɛn əgín kɛ́lɛ́ a oʼto. Kólɛ́ aa Táán tɛn yiíyə́ə́gi oʼkag wə́ə́ŋ, kɛ́máyaáyɛ́ɛlɛ tɛn əgín wɔnɔ́ ná ayɛ́mogágɛn, ɔnɔ́: «Ndɛg yaaŋ ɛlɛ́ɛ́ kudəg a kúfuʼ[20]» Náan aa Ábɛlaam ayáán sɛ yɛ ɛ́fɔlɛ́ ɛ́ mɔnɔŋ.

¹⁹A kɛnɛŋ kɛ́go kɛ́ Táán yɛɛ́gágɛn Ábɛlaam náan lɛ́ alɛ́ɛ́ kosaŋanan, ndɛg yəəŋ yíidəg a kúfuʼ, ayɛ́ɛ aándɛ osaá ó mɔɔd, yoom wɔnɔ́ əʼtin á pɛag áʼtáan. Ɔmbɔ́ ná nyɔ́lɛ́nyɔ́amɔɛ́d yɛɛ́lɛŋɛn lɛ́ nyɔ́lɛ́ aáʼkoman, oʼkán Sáála tɛn kisúsún, Ábɛlaam ayáág oʼto əgín na Táán lɛ́ alɛ́ɛ́ komoyɛ́ʼkɛn nkə kɛ́ ayɛ́mogágɛn, adɛʼkáaʼtiɛngɛlɛd[21]

²⁰Ɔmbɔ́ wɔɔ́s, adɛʼkáagaag isuŋ a nkə kɛ́ Táán ayɛ́mogágɛn, ayáágɛn əgín oʼto lɛ́ nyɔ́lɛ́ alɛ́ɛ́ kɔɔŋ kɛ́lɛ́. Nɛag nɛ́ ayáág oʼto náan na Táán, nɛ́yɛ́moogónɛ agá kə́mmú agaáyɛn náan, aágɛɛ́ʼkɛn nugəm na Táán.

²¹Nkə kɛ́ ayáyáágɛn a oʼto kɔŋɛʼ kɔŋɛʼ, isuŋ fiɛ́d kɛ́lɛ lɛ́: Nkə kɛ́ Táán aágagɛn pɔɔd, alɛ na toɛn tó kɛɛlɛ kɛ́lɛ́.

²²Kólɛ́ aa, Táán ayɛ́ʼkɛn Ábɛlaam kilumiʼ.

²³Nkə kɛ́ɛg kɛ́ kíyə́dílə́ə́ a Kálaʼtaʼ ɛ Táán lɛ́ «Táán ayɛ́ʼkɛn Ábɛlaam kilumiʼ lɛ́ ayáág oʼto na nyɔ́lɛ́», kídiʼkə́əgəə́dilə a oʼto wə́ə́ŋ ó nyɔ́lɛ́nyɔ́əsíŋ,

²⁴ndóo, kɛ́lɛ tɛn a oʼto wə́ə́s. Aabɛyɛ́ʼkɛn pəsi tɛn kilumiʼ, pəsi pá tɛágɛ́nɛ́ɛ́ oʼto na Táán nyɔ́ ayóndɛ́gɛ Sə́dúk wəəs Yə́sus.

²⁵Táán ayɛ́moyɛ́ʼkɛn a kɛfɔny lɛ́ pámoyóon a oʼto ó mabɛ́ mə́ə́s[22] Náa əyíʼkíni kiim ámoyóndɛgɛ lɛ́ ná tíɛn na kilumiʼ a əngis yə́ə́ŋ.