Read Yambeta Ɔlɔ́ma 5 Bible Online

Ɔlɔ́ma 5 - Yambeta bible

Ɔlɔ́ma 5

¹Náan anɛ́ɛ́n, Táán aáʼkɛɛlɛ lɛ́ tɛ́ɔŋ kilumiʼ a udi wə́ə́ŋ a oʼto wóonɛ lɛ́ tɛmáág oʼto na nyɔ́lɛ́, tɛándɛ tɛn nɛ́gɔŋ yɛ́ɛnɛ a uŋóón[23] na nyɔ́lɛ́ a oʼto wó nkə kɛ́ Sə́dúk wəəs Yə́sus Kilíʼtus ayɛ́ɛ́lɛ.

²A ngim ɛ Yə́sus, ngə́ yəəs yəə́ʼkəə́buən lɛ́ tɛmáág oʼto na nyɔ́lɛ́. Tɛándɛ págaáyɛʼtɛnɛ a ɛbá ɛ́ Táán nyɔ́ aábɛyɛ́ɛlɛ kɔŋɛʼ. Tɛlɛ əgəə́gidən a igog a oʼtɛ́lɛm wóow lɛ́ tɛlɛ agomɛna pɛda[24] lɛ́ tɛlɛ́ɛ́ kɔɔŋ ngab a nugəm nó Táán.

³Tɛdɛɔ́gɔ əgəə́gidən a igog əgín a oʼto wóow, ndóo! Tiəgəə́gidən kə́mmú agaáyɛn náan kɛnɛŋ kɛ́ tɛlɛ agonɛ ntɔ́b. Tɛálɛŋ lɛ́, a ntɔ́b yɛ́ɛy yɛ́ tɛánɛ, tɛagaaʼkan konóʼtan kó pɛbán.

⁴Kɛnɛŋ kɛ́ mɔɔd alɛɛ́ agonóʼtan pɛbán, adɛáʼtiɛngɛlɛd, ɔmbɔ́ ɔmɔ́ɔ́ŋ njəʼkə́nə́ní. Fiɛ́d tɛn koʼtiɛngɛlɛd, kóagɛɛlɛ lɛ́ mɔɔd ámɛna pɛda.

⁵Nɛmɛnaʼ pɛda nɛ́ɛn nɛ́ alɛɛ́ na nɛ́lɛ́, adɛndɛ́ɛ́ kolɔb a nɛsog nɛ́ əndím lɛ́ Táán əmə́bisúgi niúd na nnyɔ́ŋánán. A Uŋun wə́ə́ŋ wó Ufúlúʼtú wó amáboyɛ́ʼkɛn aa əmə́bilóódi nnyɔ́ŋánán yəəŋ.

⁶Kɛ́lɛ lɛ́, kɛnɛŋ kɛ́ pəsi tiíligi fiɛ́d na toɛn, Kilíʼtus əyíím a kɛnɛŋ kɛ́go kɛ́ɛg kɛ́ əyííyid, əə́gú a kidíídí kiə́s kɛ́ pəsi pɛɛlɛ mabɛ́.

⁷Kɛ́lɛ kɛgányáán lɛ́ mɔɔd yə́liʼtini kugu a kidíídí kɛ́ sɔ́g mɔɔd nyɔ́ alɛɛ́ sáád. Amaʼkɛɛlɛ, a nyɔ́ aágɛɛlanɛ kɔŋɛʼ aa mɔɔd alɛɛ́ ugugu niis, ə́yəə́liʼtini kugu a kidíídí kiə́ŋ.

⁸Náa, táláan wɔnɔ́ ná Táán nyɔ́lɛ́ əmə́bilóódi nnyɔ́ŋánán yəəŋ ə́! Pəsi əgín kɔ a kɔbɛ́ a kaadɛ sɔɔd, Kilíʼtus əmə́əgu a kidíídí kiə́s.

⁹A maŋɔ́ mə́ə́ŋ má yiísúb áa tɛyɔ́ɔ́ŋ kilumiʼ a əngis á Táán. Tuə́ áa a oʼto wə́ə́ŋ, Táán alɛɛ́ ogolɔb lɛ́ ədiə́biidi, ədiiʼkíni koob ilúún na pəsi ə́!

¹⁰Tɛyɛ́ɛ na Táán kalaʼ wɔnɔ́ yug na kɛsɛndɛŋ. A kugu kó mɔɔ́n yiígú aa əyíʼkíni kaálad na pəsi. Wɔnɔ́ ná kɛ́lɛɛ́ náan lɛ́ tɛándɛ nɛ́gɔŋ kə́mmú a uŋóón na nyɔ́lɛ́, isuŋ ɛ́dɛɔ́gɔ, alɛ́ɛ́ kɛbɛyɔ́ɔyɛ tɛn a oʼto wóonɛ lɛ́ mɔɔ́n alɛ a ɔlaa.

¹¹Kəə́gidən a igog kuə́s na nyɔ́lɛ́ kuə́súg əgín áay a kɛ́ɛg a? Ndóo! Tɛlɛ əgəə́gidən a igog a oʼto ó Táán, a ngim ɛ Sə́dúk wəəs Yə́sus Kilíʼtus nyɔ́ aáʼkɛbɛyɛ́lɛɛ́ lɛ́ tíiʼkini kaálad na nyɔ́lɛ́.

¹²Kɛbán áa kɛ́ɛnɛ kɛ́lɛɛ́ lɛ́, a oʼto wó Ádam, mɔɔd úmmuʼ súg aa kɔbɛ́ koɛ́sɔ́d a nsí. A oʼto ó kɔbɛ́ tɛn kóog aa kugu kúyíbiyíímin. Náan aa a nsí yɛ́ɛnɛ, ungim ogóódi lɛ́ ə́gu, lɛ́ ungim ayɛ́ɛ́lɛ tɛn kɔbɛ́[25]

¹³Táán yiídíin yiim agɛɛ́ʼkɛn pɛcɛm na Moyíis ná kɔbɛ́ koándɛ kɔ kalaʼ a nsí. Náa, wɔnɔ́ ná kɛcɛm kɛ́yɛ́ɛ kɛ́dɛ́njɛ́ɛ kɔ, Táán adɛʼkɛ́ɛ əgusiəd kɛnɛŋ na mabɛ́ má pɔɔd.

¹⁴Kɔmɔɛ́d lɛ́, Əgəə́bə́ə əgín kɔ a kɛnɛŋ kɛ́ Ádam, əgiim əgiig a kɛnɛŋ kɛ́ Moyíis, kugu kóyɛ́ɛ koándɛ kɔ na toɛn, koándadɛ́ab pɔɔd, ɔmbɔ́ na pá pádɛʼkáagɛɛlɛɛ́ kɔbɛ́ wɔnɔ́ Ádam nyɔ́ ayɛ́ɛ́lɛ́nɛ Táán oʼto wó ɔnnasáŋ. Ádam alɛ a kɛŋwáŋánán kɛ́ sɔ́g nyɔ́ yiígóodi kiim a mədúg má yuudi.

¹⁵Náa, kɔbɛ́ kó Ádam ayɛ́ɛ́lɛ, kódɛɔ́gɔ yoom ímuʼ na nɔŋáan nó Táán amábɛyɛ́ʼkɛn a náan iyó, ndóo, moom móom módɛɔ́gɔ móonɛ lɛ́ páfɛg. Kɛ́lɛ fɔ́lɔ́b náan lɛ́ a kɔbɛ́ kó mɔɔd úmmuʼ súg lɛ́ Ádam aa ungim yiígú. Náa, pɛnɛŋ pɛ́sɛ́g anɛ́ɛ́n na nɔŋáan nó Táán amábɛyɛ́ɛ́lɛ́nɛ, nómááyɛn náan kɛlaŋanan. Náan aa, a oʼto ó mɔɔd úmmuʼ, Yə́sus Kilíʼtus aa Táán ayɛ́ɛ́lɛ́nɛ ungim kɔŋɛʼ kó kómááyɛn náan, əmə́busúgínin mawɔʼ.

¹⁶Nkə kɛ́ nɔŋáan nó Táán nólɛɛ́ əgibiyíimin na kɛ́lɛ́ kɛ́dɛɔ́gɔ yoom ímuʼ na nkə kɛ́ kɔbɛ́ kó mɔɔd úmmuʼ kóyɛ́bɛyɛ́ɛ́lɛ. Ungim ɔyɔ́ɔ́ŋ nsɔ́ɔ́ a oʼto ó kɔbɛ́ kó mɔɔd nyóon úmmuʼ ayɛ́ɛ́lɛ. Kɔmɔɛ́d lɛ́ nkə kɛ́ nɔŋáan nó Táán núyíbiyíímin na kɛ́lɛ́, kɛ́lɛ lɛ́ ɔmbɔ́ ná pɔɔd páyɛ́ɛ́lánɛ ɛ́fɔlɛ́ ɛ́ mabɛ́, Táán ayɛ́boyɛ́ʼkɛn kilumiʼ a əngis yə́ə́ŋ.

¹⁷Kɛ́lɛ fɔ́lɔ́b náan lɛ́, a oʼto ó mɔɔd úmmuʼ súg, a oʼto ó kɔbɛ́ kó mɔɔd úmmuʼ súg ayɛ́ɛ́lɛ aa kugu kuíyə́ən ungim. Náa, nkə kɛ́ kɛ́mááyɛn kɛ́lɛ lɛ́ a oʼto ó Yə́sus Kilíʼtus nyɔ́lɛ́nyɔ́əsíŋ áa Táán əə́suginin pɔɔd mawɔʼ ilubənən, áaboyɛ́ʼkɛn tɛn kilumiʼ a əngis yə́ə́ŋ. Əgín tɛn a oʼto ó Kilíʼtus nyɔ́lɛ́nyɔ́əsíŋ áa tɛágɛɛn na ɔlaa ó pɛnɛŋ piim, tɛ́ɛlaamɛ ondáŋ na nyɔ́lɛ́.

¹⁸A komananɛ, tɛlɛ págodála anɛ́ɛ́n lɛ́, wɔnɔ́ ná a oʼto wó Ádam nyɔ́lɛ́nyɔ́əsíŋ nyɔ́ ayɛ́ɛ́lɛ kɔbɛ́ aa ungim ɔyɔ́ɔ́ŋ nsɔ́ɔ́, náan tɛn aa sáád ɛ pigólí pɛ́ mɔɔd úmmuʼ súg, Yə́sus Kilíʼtus, yagɛɛlɛ lɛ́ ungim yɔ́ɔŋ kilumiʼ a udi ó Táán, áyɛɛn na ɔlaa ó pɛnɛŋ piim.

¹⁹Wɔnɔ́ ná a kɛnɛŋ kɛ́ kalaʼ, mɔɔd úmmuʼ súg ayɛ́ɛ́lɛ́nɛ Táán oʼto wó ɔnnasáŋ, piíŋ pə́mə́ədə́əŋ a kɔbɛ́, náan tɛn yoom ímuʼ aa piíŋ pálɛ́ɛ́ kɔɔ́ŋɛ́ɛ́ kilumiʼ lɛ́ mɔɔd úmmuʼ súg amóóbɛn Táán.

²⁰Kɛcɛm kíyíím lɛ́ ná mabɛ́ mə́dəg. Náa, kɛnɔ kɛ́ mabɛ́ míídə́g kɛ́fɔlɛ́, Táán ayɛ́ɛ́lɛ kɔŋɛʼ kɔ agaáyɛn náan.

²¹Náan, əgín wɔnɔ́ ná kɔbɛ́ kuílóódi toɛn tuə́ŋ, kóagɛɛlɛ lɛ́ pɔɔd pə́gu, náan tɛn aa kɔŋɛʼ kó Táán kólɛɛ́ əguloodi toɛn tuə́ŋ, tóagɛɛlɛ lɛ́ pɔɔd pɔ́ɔŋ kilumiʼ a əngis á Táán, náan tɛagɛɛn na ɔlaa ó pɛnɛŋ piim a ngim ɛ Yə́sus Kilíʼtus, Sə́dúk wəəs.