Read Yambeta Ɔlɔ́ma 6 Bible Online

Ɔlɔ́ma 6 - Yambeta bible

Ɔlɔ́ma 6

¹Áay anɛ́ɛ́n ə́ə, kɛ́lɛ anyóon lɛ́ nkə ə́? Kɛ́lɛ lɛ́ tíɛnanan əgín na kɛɛlanɛ kɔbɛ́ anyóon oóm, agɛɛlɛ lɛ́ Táán ə́biísuginin kɔŋɛʼ kuə́ŋ ilubənən əə́?

²Ndóo, adɛ́njaŋ náan aa kɛ́lɛɛ́! A noá na kɔbɛ́, pəsi tiígú, tiíliógi ongoo. Tɛdɛɔ́gɔ lɛ́ tíiʼkini anɛ́ɛ́n kolaa a kólɛ a kaadɛ.

³Pondɛŋɛn lɛ́ pəsi piim, ná tiísiə́d ɔsɔgɛn, tiísiə́d wólɛ́ agɛɛlɛ lɛ́ tíɛn paladáán na Yə́sus Kilíʼtus, tíigu tɛn ondáŋ na nyɔ́lɛ́ á?

⁴Kɛ́lɛ anyóon lɛ́, a ɔsɔgɛn wóow, tiígú ondáŋ na nyɔ́lɛ́, pə́mə́əbiíni ondáŋ na nyɔ́lɛ́ agɛɛlɛ lɛ́, a toɛn tó nugəm nó Táán Sɛ tó tóyóndɛ́gɛ Kilíʼtus, pəsi tɛn tíim agɛɛn na ɔlaa wó ongwa.

⁵Ɛɛ́ɛ, nga[26] tɛyáladɛn fɔ́lɔ́b na Kilíʼtus ná tiígú ondáŋ na nyɔ́lɛ́, náan tɛn yoom ímuʼ aa tɛlɛ́ɛ́ kɛɛnɛɛ́ paladáán na nyɔ́lɛ́ ná tɛlɛ́ɛ́ koóndɛg wɔnɔ́ nyɔ́lɛ́.

⁶Tɛóbaan kɔŋɛʼ nkə kɛ́ɛnɛ: Nkə kɛ́ tɛyɛ́ɛ kalaʼ, kɛ́yábáŋánɛ́ɛ́ a ɔmbásá na Kilíʼtus agɛɛlɛ lɛ́ kɔbɛ́ kó kóyɛ́ɛ koáʼkɛbɛsɔ́dɔnɔn, kúwu, tɛdɛnjɛ́ɛ́n kə́mmú pɛɔ́lɛ́ pɛ́ kɔbɛ́.

⁷Ɛɛ́ɛ, mɔɔd nyɔ́ əə́ʼkugúú, aándɛ na kilumiʼ, əndigi kə́mmú a kɛáŋ kɛ́ kɔbɛ́.

⁸Náa, nga tiígú na Kilíʼtus, isuŋ ɛ́dɛɔ́gɔ, timə́líʼtíníí lɛ́ tɛlɛ́ɛ́ kɛɛn a ɔlaa na nyɔ́lɛ́.

⁹Tɛlɛ palɛŋáán tɛn lɛ́ Kilíʼtus ayóndɛg a pɛlóŋ, adɛndɛ́ɛ́ kiiʼkini kugu tɛn kə́mmú. Kugu tɛn kódɛɔ́gɔ kə́mmú na toɛn na nyɔ́lɛ́.

¹⁰A kugu kó Kilíʼtus yiígú, yɛɛ́sáálɛg na kɔbɛ́ kə́muʼ a kúfuʼ. Alɛ nɛ́gɔŋ yɛ́ɛnɛ a ɔlaa. Alɛ alaa nɛ́gɔŋ a oʼto ó Táán.

¹¹Yoom ímuʼ tɛn náan na pəŋi. Álɛ́ŋɛ́an lɛ́ puígú, poásaalɛg na kɔbɛ́ a kúfuʼ, náa, poándalaa nɛ́gɔŋ a oʼto ó Táán lɛ́ polɛ paladáán na Yə́sus Kilíʼtus.

¹²Kólɛ́ aa kɔbɛ́ kúʼkódií lɛ́ kúiʼkini kɔɔŋ toɛn na pəŋi, puʼkóodi lɛ́ púiʼkini koóbɛn nkə kɛ́ pumog poáŋan polɛɛ́ anyɔ́ŋɛn lɛ́ póɛlɛ. Nkó yaaŋan yɛ́ɛnɛ yɛ́ ɛlɛɛ́ lɛ́ na koany puəgu.

¹³Podɛnjáʼkɛ́nɛ kə́mmú na nkó yaaŋan lɛ́ póɛlanɛ kɔbɛ́ na yɛ́lɛ́. Ɛdɛnjɛ́ɛ́n iduə́m ɛ́gɛɛlɛ kɔbɛ́ na yɛ́lɛ́. Áyɛ́ʼkɛ́nɛ́an agá agɛɛlɛ nkə kɛ́ kiə́gə́mmi Táán, púmuúgudin wɔnɔ́ pɔɔd pá píígú, pə́mə́yiʼkini kɛɛn a ɔlaa. Nkó yaaŋan yɛ́ɛn yoom ɛ́gɛɛlɛ nkə kɛ́ kɛ́lɛɛ́ sáád.

¹⁴Kɛ́lɛ lɛ́, pundigi kə́mmú a toɛn tó pɛcɛm, ndóo. Poándɛ a toɛn tó mawɔʼ má Táán má málɛɛ́ na pəŋi. Kɔbɛ́ kúdiyíʼkíni koboóʼkɔmɔn.

¹⁵Áay anɛ́ɛ́n nɛ́gɔŋ əə, tɛlɛ pə́gusəə anyóon lɛ́ wɔnɔ́ ná tindigií a toɛn tó pɛcɛm, tɛándɛɛ́ a tó mawɔʼ má Táán ə́ə, tɛlɛ lɛ́ tíɛlanɛ anɛ́ɛ́n mabɛ́ agɛɛlɛ lɛ́ Táán ə́biísuginin mawɔʼ mə́ə́ŋ ə́? Ndóo óo! Adɛ́njaŋ náan aa kɛ́lɛɛ́.

¹⁶Pondɛŋɛn lɛ́ kɛnɛŋ kɛ́ puə́səə lɛ́ poagaáyáánɛ pɛɔ́lɛ́ lɛ́ púgudin mɔɔd, poándɛ pɛɔ́lɛ́ pɛ́ mɔɔd nyɔ́ poágoóbɛn a? Kɛ́lɛ anɛ́ɛ́n lɛ́, oó polɛ pɛɔ́lɛ́ pɛ́ kɔbɛ́ kó kóagɛɛn na pəŋi a kugu[27], oó polɛ pəgudin pá Táán nyɔ́ aáboyɛ́ʼkɛn kilumiʼ a udi wə́ə́ŋ a oʼto wóonɛ lɛ́ pomámoyóbɛn.

¹⁷Tiɛ́ʼkɛnaan pisoyidiʼ na Táán! Pəŋi pá poyɛ́ɛ kalaʼ pɛɔ́lɛ́ pɛ́ kɔbɛ́, nɛ́gɔŋ yɛ́ɛnɛ poándagoóbɛn Táán, puə́ʼkəə́liʼtini na ɔʼtɛ́m wááŋan ungim pɛbán pɛ́ páyáʼkánánɛ na ungim, poágoóbɛn pɛ́lɛ́.

¹⁸Táán ayɛ́boyááŋɛn a kɛáŋ kɛ́ mabɛ́, poándɛ pɔɔd pá pə́ndəgudinií pasáád.

¹⁹Ndɛ agosɔyɔ na pəŋi náan a nɛ́ pɔɔd a mɔɛn lɛ́ kɛ́lɛ kɛnasáŋ kɛ́fɔlɛ́ na pəŋi lɛ́ puób kɛbán lɛ́ pumog poáŋan pólɛ polɛbɛ́dáán. Poyɛ́ɛ kalaʼ wɔnɔ́ pɛɔ́lɛ́. Poyáyɛ́ʼkɛnɛn na nkó yaaŋan kilúd agɛɛlɛ pɛbán pɛ́ fúlúus, na mbod mbod ɛ pɛbán pɛ́ pɛbɛ́. A komananɛ, pɛbán pɛ́ɛb pɛ́máboyɛ́ɛ́lɛ lɛ́ póɛlɛnɛ Táán oʼto wó ɔnnasáŋ. Yoom tɛn ímuʼ náan nɛ́gɔŋ yɛ́ɛnɛ. Póɛn wɔnɔ́ pɛɔ́lɛ́, poáyɛ́ʼkɛn na nkó yaaŋan ngim, púgudin pasáád. A komananɛ, poalaa ɔlaa wó wə́əgə́mmi Táán.

²⁰Kɛnɛŋ kɛ́ poyɛ́ɛ pugə́ligi pɛɔ́lɛ́ pɛ́ kɔbɛ́, podɛʼkɛ́ɛ kɔ na kɛnɛŋ na nkə kɛ́ kɛ́lɛɛ́ sáád.

²¹A ɔlaa wóow wó poɛ́láá náan əə, nkə aa poɛ́nɛ́ kɔ wɔnɔ́ ngim ɛ nion ə́? Oʼto kono aa ólɛɛ́ agá nɛ́gɔŋ na pəŋi lɛ́ a komananɛ, pɛ́lɛ pɛbán pɛ́ pɛ́agoon mɔɔd.

²²Náa nɛ́gɔŋ yɛ́ɛnɛ, pundigi a kɛáŋ kɛ́ kɔbɛ́, puə́ndəgudin Táán. Komananɛ kó pigólí pɛ́ɛb kólɛ lɛ́, ə́əbufúŋi, póyɛɛn na ɔlaa a ɛbá ɛ́ Táán a pɛnɛŋ piim.

²³A fɔ́lɔ́b kɛ́lɛ lɛ́, ngim ɛ nion yɛ́ mɔɔd aánɛ a oʼto ó mabɛ́ mə́ə́ŋ ɛlɛ kugu. Kɔmɔɛ́d lɛ́ na Táán, nkə kɛ́ aábɛyɛ́ʼkɛn a náan iyó, kɛ́lɛ ɔlaa ó pɛnɛŋ piim, ondáŋ na Yə́sus Kilíʼtus, Sə́dúk wəəs.