Read Yambeta Ɔlɔ́ma 7 Bible Online

Ɔlɔ́ma 7 - Yambeta bible

Ɔlɔ́ma 7

¹Pomóŋŋí, nkə kɛ́ɛnɛ kɛ́ mbándabodɛ́anɛɛ́, mbálɛŋ lɛ́ pəŋi poálɛŋ kɛ́lɛ́ kɔŋɛʼ lɛ́ polɛ pɔɔd pá páálɛŋ pɛcɛm. Kɛ́lɛ lɛ́: Kɛcɛm kíəgumin əgín mɔɔd nyɔ́ alɛɛ́ a ɔlaa. Adɛ́ poálɛŋ náan a, ngɔ́ɔ́?

²Kɛ́lɛ yoom ímuʼ náan na nkə kɛ́ kɛ́lɛɛ́ a yoog ɛ kodɔn. Kɛcɛm kɛ́ yoog ɛ kodɔn kɛ́gódan ɔʼkɛ́ɛd o kodɔn lɛ́ ɔdɛɔ́gɔ ogomanɛ kodɔn kɛnɛŋ kiim kɛ́ onom əligíí ongóm. Náa, kɛnɛŋ kɛ́ əə́ʼkugúú, ɔʼkɛ́ɛd nyóon aándɛ filí.

³Kɛnɛŋ kɛ́ onom wəəŋ əgə́ligíí ongóm, amaʼkɛɛn ɔsɔd kodɔn na mɔɔd wɛndɛ́ŋ, pə́əsəə lɛ́ alɛ a kɛdaŋ anyóon. Náa, kɛnɛŋ kɛ́ onom əə́ʼkugu, aándɛ filí, aándɛ ogodɔn na mɔɔd wɛndɛ́ŋ, ɔdɛɔ́gɔ tɛn kə́mmú na kɛdaŋ.

⁴Kɛ́lɛ tɛn náan yoom ímuʼ na pəŋi pomóŋŋí páam. Páyɛ́boyóón a kugu kó Kilíʼtus yiígú a ɔmbásá a kidíídí kɛáŋan a noá na kɔbɛ́, poáság kosaalɛg na kólɛ́ a kúfuʼ, pomáládɛ́ɛ́ na nyɔ́lɛ́. Poándagoob nɛ́gɔŋ na mɔɔd wɛndɛ́ŋ. Mɔɔd ogo alɛ nyɔ́ ayóndɛg a kugu. Náan tɛlɛ pə́gugudin Táán wɔnɔ́ ná kíəmugə́mmi.

⁵Kɛ́lɛ náan fɔ́lɔ́b lɛ́, ná tɛyɛ́ɛ kalaʼ, tɛálaa a toɛn tó pumog, ɔʼtɛ́m wə́ə́s ongɛɛ́yɛ́máán a pɛcɛm, wə́əbidíʼkəni əgín lɛ́ tíɛlanɛ kɔbɛ́. A komananɛ, kugu aa ɔlaa wóow úyíbiyíímin na kólɛ́.

⁶Náa nɛ́gɔŋ yɛ́ɛnɛ, tɛáʼkosaalɛg na pɛcɛm lɛ́ tiígú a nkə kɛ́ kɛ́yɛ́bɛyáágɛn a kɛáŋ. Áay, tɛándɛ póonɛ lɛ́ tígudin Táán a ngə́ yɛ́ ngwa, ngə́ yɛ Uŋun wó Ufúlúʼtú. Tidiə́giʼkini kugudin Táán kə́mmú a ngə́ ɛ kalaʼ, ngə́ ɛ koóbɛn pɛcɛm.

⁷Koon oʼto kólɛ anɛ́ɛ́n lɛ́ nkə ə́? Pɛcɛm pɛ́lɛ anyóon kɔbɛ́ á? Ndóo! Náa, pɛ́lɛ́ aa pámɛ́ɛ́lɛ lɛ́ ndɛŋ kɔbɛ́. Kɛ́lɛ lɛ́, fiɛ́d kɛcɛm kɛ́ kíəsəə lɛ́: Odɛnjáág niis a yoom ɛ́ sɔ́g, ntɛʼkɛ́ɛ alɛŋ lɛ́ kaag niis a yoom ɛ́ sɔ́g kólɛ kɔbɛ́[28]

⁸Kɛcɛm kɛ́lɛ́ kííbúən agá ngə́, kɔbɛ́ koáság kuyə́ən. Kóagɛnyɛɛlɛ lɛ́ nyɛ́ɛn na mbod mbod ɛ mafɛgaʼ má mabɛ́. Kɛnɔ tɛn kɛ́ kɛcɛm kɛ́dɛɔ́gɔ́ɔ́, kɔbɛ́ kólɛ kosoláán.

⁹A kɛnɛŋ kɛ́ kalaʼ, wɔnɔ́ ná kɛcɛm kɛ́dɛʼkɛ́lɛɛ́ kɔ, njɛ́ɛ alaa. Náa, ná kɛcɛm kíyíím kɛ́lon, kɔbɛ́ kólɛ́ koáság kondig,

¹⁰mɛ mbə́əgu[29], kíyínjiimin agá mɛ na kugu.

¹¹Ɛɛ́ɛ, kɔbɛ́ kóyɔ́ɔ́ŋ ngə́ a ngim ɛ kɛcɛm, kúmífúúli[30], kómɛ́njoón.

¹²Áay náan, kɛcɛm kɛ́lɛ yoom yɛ́ yáagoob na Táán, pɛcɛm piim pɛ́agoob na nyɔ́lɛ́, pɛ́lɛ sáád, pɛ́lɛ pɛŋɛʼ.

¹³Náa, tuə́ anɛ́ɛ́n aa yoom yɛ́ ɛ́lɛɛ́ ɛŋɛʼ ɛ́lɛɛ́ ígiiʼkini koon mɔɔd əə́? Ndóo! Yoom yɛ́ ɛ́lɛɛ́ ɛŋɛʼ ɛ́dɛɔ́gɔ ɛ́goon mɔɔd. Náa, kɔbɛ́ kó kólɛɛ́ lɛ́ kóagoon mɔɔd aa koɛ́sán a ngim ɛ yoom yɛ́ ɛ́lɛɛ́ ɛŋɛʼ, agɛɛlɛ lɛ́ kugu kúbiyíimin. Náan kɛcɛm kɛ́agɛɛlɛ lɛ́ kɔbɛ́ koáŋ kólon táán, kíiloodi tɛn wɔnɔ́ ná kɔbɛ́ kúdiŋíníí nsun na kɔyɛb.

¹⁴Ɛɛ́ɛ, tɛálɛŋ lɛ́ Uŋun ó Táán aa úmə́biyíímin na pɛcɛm. Náa, mɛ ndɛ ondɛbɛ́dáán a pumog, ndɛ nyɔ́ alɛɛ́ ondɛgáán, kɛɔ́lɛ́ kɛ́ kɔbɛ́.

¹⁵A fɔ́lɔ́b, nkə kɛ́ ndɛɛ́ agɛɛlɛ, ntɛɔ́gɔ agoob kɛ́lɛ́. Ndɛ lɛ́, nkə kɛ́ ndɛɛ́ anyɔ́ŋɛn kɛɛlɛ, ntɛɔ́gɔ agɛɛlɛ kɛ́lɛ́. Nkə kɛ́ ntɛɔ́gɔ agɔnyɔ́ŋɛnɛɛ́ kɛɛlɛ, kɛ́lɛ́ kɛ́go agá aa ndɛɛ́ agɛɛlɛ.

¹⁶Kɛnɛŋ kɛ́ ndɛɛ́ anɛ́ɛ́n agɛɛlɛ nkə kɛ́ ntɛɔ́gɔ agɔnyɔ́ŋɛnɛɛ́, áay lɛ́ ndɛ unuʼ úmmuʼ na kɛcɛm, mbə́líʼtíníí anyóon lɛ́ kɛ́lɛ kɛŋɛʼ.

¹⁷Áay anɛ́ɛ́n, kɛ́lɛ lɛ́, adɛ́njaŋ mɛɛ́nyɔ́amɔɛ́d áa ndɛɛ́ agaáyɛ́ɛ́ŋɛn kɛɛlɛ náan, ndóo! Kɔbɛ́ kó kólɛɛ́ na mɛ áa kólɛɛ́ na pigólí pɛ́ɛb.

¹⁸Ɛɛ́ɛ, mbálɛŋ mɛ, kɔŋɛʼ kó ndɛɛ́ lɛ́ nyɛ́ɛlɛ, ntɛɔ́gɔ ogɛɛlɛ kólɛ́ a mɛɛ́nyɔ́amɔɛ́d. Áay nyɔʼkɔ́: Mɛ, mɔɔd ondɛbɛ́dáán náanɛ wɔnɔ́ ná ndɛɛ́, ntɛɔ́gɔ ogɛɛlɛ kɔŋɛʼ. A ɔʼtɛ́m wáam, ndɛ na mafɛgaʼ móonɛ lɛ́ ná mbɛ́ɛ́lɛ kɔŋɛʼ, náa ntɛɔ́gɔ agaáʼkɛ kɛɛlɛ kólɛ́.

¹⁹Kɛ́lɛ lɛ́, kɔŋɛʼ kó ndɛɛ́ anyɔ́ŋɛn kɛɛlɛ, ntɛɔ́gɔ agɛɛlɛ kólɛ́. Náa, kɔbɛ́ kó ntɛɔ́gɔ agɔnyɔ́ŋɛnɛɛ́ kɛɛlɛ, kólɛ́ agá aa ndɛɛ́ agɛɛlɛ.

²⁰Nga ndɛ agɛɛlɛ nɛ́gɔŋ nkə kɛ́ ntɛɔ́gɔ agɔnyɔ́ŋɛnɛɛ́, ntɛɔ́gɔ agaáyɛ́ɛ́ŋɛn. Kɔbɛ́ kó kólɛɛ́ na mɛ áa kólɛɛ́ na pigólí pɛ́ɛb.

²¹Mbádála anyóon lɛ́, kɛnɛŋ kɛ́ ndɛɛ́ anyɔ́ŋɛn lɛ́ nyɛ́ɛlɛ kɔŋɛʼ, kɔbɛ́ agá aa kólɛɛ́ ndúmiʼ na mɛ lɛ́ nyɛ́ɛlɛ.

²²A ɔʼtɛ́m wáam a kaadɛ, ndɛ na tɔnyɔ́g lɛ́ nyɛ́ɛlɛ nkə kɛ́ pɛcɛm pɛ́ Táán pɛ́lɛɛ́ əgusəə.

²³Náa, a nɛáyóób nɛ́ a pɛʼkab pɛ́ nkó yaam, pɛcɛm pímmú pɛ́lɛ kɔ pɛ́ pɛ́anɔɛyɛ nkə kɛ́ ɔʼtɛ́m wáam wáanyɔ́ŋɛn. Pɛcɛm pɛ́ɛb pɛ́lɛ́ pɛ́agɛnyaánɛ mɛ, kɛɔ́lɛ́ kɛ́ pɛcɛm pɛ́ kɔbɛ́ kó kólɛɛ́ na mɛ, a pɛʼkab pɛ́am.

²⁴Maan na mɛ! Ánɛ aa aándagɛnjaáŋɛnɛɛ́ a ɔmbɔg yɛ́ nkó yɛ́ɛnɛ yɛ́ yəə́gisúid a kugu ə́?

²⁵Tiɛ́ʼkɛnaan pisoyidiʼ na Táán, tɛ́sánɛan pɛ́lɛ́ a ngim ɛ Yə́sus Kilíʼtus, Sə́dúk wəəs! Mɛ aa nyóonɛ mbándɛɛ́ lɛ́, a ɔʼtɛ́m wáam a kaadɛ mbə́líʼtíníí kugudin pɛcɛm pɛ́ Táán. Náa, a pumog póam pó pólɛɛ́ polɛbɛ́dáán, ndɛ əgugudin pɛcɛm pɛ́ kɔbɛ́.