Read Yambeta Ɔlɔ́ma 8 Bible Online

Ɔlɔ́ma 8 - Yambeta bible

Ɔlɔ́ma 8

¹Nɛ́gɔŋ yɛ́ɛnɛ anɛ́ɛ́n, pá pálɛɛ́ paladáán na Yə́sus Kilíʼtus pɔ́dɛɔ́gɔ págɛɛn kə́mmú na nsɔ́ɔ́.

²Kɛ́lɛ lɛ́, a mɔɔd nyɔ́ aándɛɛ́ ondadáán na Yə́sus Kilíʼtus, kɛcɛm kɛ́lɛ Uŋun wó Ufúlúʼtú wó wáagɛɛ́ʼkɛn mɔɔd ɔlaa. Kɛcɛm kɛ́ɛg kɛ́mɛ́njaáŋɛn[31] a kɛáŋ kɛ́ kɔbɛ́ na a kɛ́ kugu.

³Pɛcɛm pɛ́ Moyíis pɛ́dɛʼkɛ́ɛ pɛ́gaáʼkɛ kɛɛlɛ náan lɛ́ kolɛbɛd kó pumog koɛ́yɔ́gɛ pɛ́lɛ́, pɛ́dɛáʼkɛ kɛɛlɛ. Náa, Táán ayɛ́ɛ́lɛ kɛ́lɛ́, yɛɛ́dóm Mɔɔ́n wəəŋ, əə́siəd nkó a kɛŋwáŋánán kɛ́ pɔɔd, pɛɛlɛ mabɛ́. Náan aa Táán ayɛ́ʼkɛn nsɔ́ɔ́ na kɔbɛ́ kó kólɛɛ́ a pumog pó mɔɔd.

⁴Ayɛ́ɛ́lɛ náan lɛ́ ná tɛáʼkɛ kolaa wɔnɔ́ ná pɛcɛm pɛ́lɛɛ́ əgusəə. Náan adɛ́njaŋ pumog áa póadáŋananɛ ɔlaa wə́ə́s kə́mmú, Uŋun wó Ufúlúʼtú aa wáabɛdáŋananɛ.

⁵Kɛ́lɛ lɛ́, pá páagoóbɛn pumog, páalaa a isóbín ɛ́ pumog. Náa, pá páagoóbɛn Uŋun wó Ufúlúʼtú, páalaa wɔnɔ́ ná Uŋun ólɛɛ́ anyɔ́ŋɛn.

⁶Nyɔ́ amáág oʼto a isóbín ɛ́ pumog, nyóon alɛ a ngə́ ɛ kugu. Náa, nyɔ́ amáág ɔʼtɛ́m na Uŋun wó Ufúlúʼtú, nyóon alɛ a ngə́ yɛ ɔlaa na yɛ uŋóón.

⁷Pá pálɛɛ́ na ɔʼtɛ́m a pɛbán pɛ́ pumog, pálɛ pá páanɔɛyɛ Táán, pádɛágoóbɛn pɛcɛm pɛ́ Táán, pɔ́dɛɔ́gɔ págoóbɛn pɛ́lɛ́.

⁸Pá pə́əyə́ən isóbín ɛ́ pumog, póob pɔ́dɛɔ́gɔ pə́gugə́mmi Táán.

⁹Náa pəŋi, pundigi kə́mmú a toɛn tó pumog, poándɛ a toɛn tó Uŋun wó Ufúlúʼtú lɛ́ Uŋun ó Táán wándɛ na pəŋi. Nyɔ́ oʼkódií Uŋun ó Kilíʼtus, nyóon tɛn adɛágoob na nyɔ́lɛ́.

¹⁰Náa, Kilíʼtus alɛ na pəŋi. Ɔmbɔ́ puə́gú a oʼto ó mabɛ́, Uŋun ó Táán ólɛ ɔlaa wááŋan[32] a oʼto ó Kilíʼtus nyɔ́ ayɛ́ɛ́lɛ lɛ́ póɛn na kilumiʼ a udi o Táán.

¹¹Táán ayóndɛ́gɛ Yə́sus a kugu. Pəŋi pomaʼkɛɛn tɛn lɛ́ polɛ na Uŋun ó Táán, Táán nyóon nyɔ́ ayóndɛ́gɛ Kilíʼtus, alɛ́ɛ́ koboyɛ́ʼkɛn tɛn ɔlaa, pəŋi pá polɛɛ́ lɛ́ puəgu. Alɛ́ɛ́ koboyɛ́ʼkɛn wólɛ́ a toɛn tó Uŋun wə́ə́ŋ wó ólɛɛ́ na pəŋi.

¹²Kólɛ́ aa pomóŋŋí, lɛŋáan lɛ́ tigóódi uŋín wó ódɛɔ́gɔ wó a oʼto wó ɔlaa ó pumog wó tɛágɛ́nɛ́ɛ́ ɔʼtɛ́m kɛ́fɔlɛ́ a wólɛ́, ndóo. Tiʼkóodi lɛ́ tɛ́laa wɔnɔ́ ná pumog puə́s pólɛɛ́ anyɔ́ŋɛn.

¹³Pomaʼkɛɛn lɛ́ puəyə́ən nkə kɛ́ɛg kɛ́ pumog poányɔ́ŋɛn, puəwu. Náa, a toɛn tó Uŋun wó Ufúlúʼtú, puməʼkuliogi ongoo a pɛbán pɛ́ɛb, poagɛɛn na ɔlaa.

¹⁴Kɛ́lɛ lɛ́, ungim nyɔ́ Uŋun ó Táán wáadáŋananɛ, nyóon alɛ mɔɔ́n ó Táán.

¹⁵Uŋun wó Táán ayɛ́boyɛ́ʼkɛn, ódɛɔ́gɔ wó wáaboyáánɛ pɛɔ́lɛ́, ódiɛn wó wáaboyáág wɛɛ́y a ɔʼtɛ́m, ndóo. Ólɛ wó wáagɛɛlɛ lɛ́ póɛn pɔɔ́n pá Táán pá ombɛɛn. Uŋun wó wáagɛɛlɛ lɛ́ poábóa Táán poɔʼkɔ́: «Mbáa oó! Sɛ waam óo!»

¹⁶Uŋun ó Táán wólɛ́wóamɔɛ́d ómáágɛn uŋun wə́ə́s mbaasɔ́ wɔnɔ́: Tɛlɛ pɔɔ́n pá Táán.

¹⁷Wɔnɔ́ ná kɛ́lɛɛ́ anɛ́ɛ́n náan lɛ́ tɛlɛ pɔɔ́n pá Táán, tɛlɛ́ɛ́ kɛɛn anyóon na ngab a nkə kɛ́ yɛɛ́gágɛn na ndɛg yəəŋ. Tɛlɛ́ɛ́ kɔɔŋ kɛ́lɛ́ ondáŋ na Kilíʼtus lɛ́ wɔnɔ́ ná tiɛ́nɛ́ ntɔ́b ondáŋ na nyɔ́lɛ́, tɛlɛ́ɛ́ kɛɛn tɛn na ngab a nugəm nuə́ŋ[33]

¹⁸A nɛ́am, ntɔ́b yɛ́ɛnɛ yɛ́ tigódíí nɛ́gɔŋ ɛdɛɔ́gɔ yoom a ɛbá ɛ́ kɛa kɛ́ nugəm kɛ́ Táán alɛ́ɛ́ kibiílodií a mədúg má yuudi.

¹⁹Ɛɛ́ɛ, yiim yɛ́ Táán ayɛ́ɛ́lɛ, ɛ́lɛ agobóŋan, ɔʼtɛ́m pab pab pab, wɔɔ́s ogo wó Táán alɛ́ɛ́ kulodií nugəm nó pɔɔ́n pə́ə́ŋ a əngis á pɔɔd.

²⁰Piɛlɛ pɛ́ Táán pɛ́ɛb pɛ́lɛ a ɔmbɔg á toɛn tó tódɛ́agɛɛ́bɛɛ́. Adɛ́njaŋ nyɔ́lɛ́ aa yɛɛ́nyɔ́ŋɛn lɛ́ kíɛn náan, Táán áa ayɛ́boyáág náan a ɔmbɔg yə́ə́ŋ. Kɛbán kímuʼ, ngə́ ɛgomɛna pɛda iligi əgín kɔ na pɔ́lɛ́.

²¹Pálɛ́ɛ́ kɔɔy wɔɔ́s a kɛáŋ kɛ́ toɛn tó túəbuwíiyi, toɛn tó tóboyánɛ́nɛ́ɛ́ pɛɔ́lɛ́. Áay, páagɛɛn filí, pɔ́yɔɔŋ ngab a nugəm nó Táán alɛ́ɛ́ kɛɛ́ʼkɛnɛɛ́ na pɔɔ́n pə́ə́ŋ.

²²Tɛálɛŋ, əgiim əgiig na nɛ́gɔŋ kɛ́, piɛlɛ piim pɛ́lɛ agoʼkɛ́ma ntɔ́b wɔnɔ́ yɛ ɔʼkɛ́ɛd nyɔ́ alɛɛ́ a ɔsánɛ.

²³Pɛ́dɛɔ́gɔ pɛ́lɛ́píəsíŋ a póŋán yɛ́ɛy. Ɔmbɔ́ tɛn pəsi, tɛlɛ agoʼkɛ́ma a ntɛ́m yəəs a kaadɛ wɔnɔ́ pɛ́lɛ́ tɛn, tɛábóŋan lɛ́ tiəgiim agɛɛn fɔ́lɔ́b pɔɔ́n pá Táán, tɛ́yɛɛn filí. Kɔmɔɛ́d lɛ́ tɛándɛ na Uŋun wó Ufúlúʼtú wɔnɔ́ ngab ɛ na oʼto na oʼto yɛ́ a nkə kɛ́ Táán ayɛ́bɛgágɛn lɛ́ alɛ́ɛ́ kɛbɛyɛ́ʼkɛn[34]

²⁴Kɛ́lɛ lɛ́, tɛándɛ pɔɔyɔ́ɔ́n, náa kíligi yoom yɛ́ tɛámɛna pɛda a yɛ́lɛ́. Kɛnɛŋ kɛ́ waándadɛ́ʼtɛgɛɛ́ nkə kɛ́ olɛɛ́ agomɛna pɛda na kɛ́lɛ́, kíndigi kə́mmú lɛ́ olɛ agomɛna pɛda. Mɔɔd aamɛna pɛda kə́mmú a yoom yɛ́ aándadɛ́ʼtɛgɛɛ́ a? Ndóo.

²⁵Náa, komɛna pɛda a yoom yɛ́ odɛɔ́gɔ agodálaá, kólɛ kobóŋan yɛ́lɛ́ fiɛ́d na ɛságág a ɔʼtɛ́m.

²⁶Na náan kɛ́, Uŋun wó Ufúlúʼtú tɛn wáabɛyábɛgɛn ombɔg, pəsi pá tɛlɛɛ́ fiɛ́d na toɛn. Tɛdɛɔ́gɔ agolɛŋ kɔɔ́sɔ́gɔlɔn Táán wɔnɔ́ ná kíəgəə́yúunə. Áay anɛ́ɛ́n, wólɛ́wóamɔɛ́d wɔ́ɔgɔɔ́sɔ́gɔlɔn Táán a kidíídí kiə́s, wáagaányam a ombod wó mɔɔd ɔdɛɔ́gɔ ogaányamɛɛ́ na unuʼ wə́ə́ŋ.

²⁷Náa, Táán nyɔ́lɛ́nyɔ́amɔɛ́d aálɛŋ nkə kɛ́ kɛ́lɛɛ́ a ntɛ́m yəəs a kaadɛ, aálɛŋ tɛn nkə kɛ́ Uŋun ólɛɛ́ əgumuŋíən lɛ́ nyɔ́lɛ́ yɛ́ɛlɛ. Ɛɛ́ɛ, Uŋun wó Ufúlúʼtú ólɛ ɔgɔɔ́sɔ́gɔlɔn wɔnɔ́ ná Táán alɛɛ́ anyɔ́ŋɛn lɛ́ pɔ́ɔ́sɔ́gɔlɔn a kidíídí kɛ́ pá pálɛɛ́ pə́ə́ŋ.

²⁸Tɛálɛŋ kə́mmú tɛn lɛ́: Táán áa alɛɛ́ agɛɛlɛ moom muim. Alɛ agɛɛlɛ mólɛ a kɔŋɛʼ kó pá pálɛɛ́ na nnyɔ́ŋánán na nyɔ́lɛ́[35] Pɔsɔ́g póob náan, əyíbuyííyid əgín wɔnɔ́ ná yɛɛ́fɛ́ga pɛbán piə́ŋ.

²⁹Kɛ́lɛ lɛ́, pá Táán əyííyid kɔ kalaʼ, yɛɛ́yáŋ əgumin tɛn kɔ kalaʼ lɛ́ páŋwáŋanan Mɔɔ́n ná yɛ́ɛn na oʼto na oʼto a pɔɔ́n pə́ə́ŋ piim.

³⁰Pá Táán əyííyid kɔ́gɔ́ɔg kalaʼ, ayɛ́boodɔ́ŋɔn pɔ́lɛ́. Pá yɛɛ́dɔ́ŋɔn, ayɛ́ɛ́lɛ tɛn lɛ́ pɛ́ɛn na kilumiʼ. Pá ayɛ́ʼkɛn kilumiʼ, ayɛ́boyɛ́ʼkɛn tɛn nugəm.

³¹Nkə kímmú aa tísəlií áŋ? Kɛnɛŋ kɛ́ Táán alɛɛ́ a ngim yəəs ə́ə, ánɛ nyummú aa alɛɛ́ ogɛbɛɛ́nɔɛyɛ pɛdá ə́?

³²Ɔmbɔ́ əgín Mɔɔ́n wəəŋ o nyɔ́lɛ́nyɔ́amɔɛ́d, ədiʼkə́əsig lɛ́ adɛnnɛ́ ntɔ́b. Ayɛ́moófɔ́ny lɛ́ ə́gu a kidíídí kiə́s. Alɛ anɛ́ɛ́n ogolɔb lɛ́ adɛábɛyɛ́ʼkɛn yiim a oʼto ó Mɔɔ́n wəəŋ nyóon a? Ndóo.

³³Úmmuʼ na úmmuʼ nyɔ́ alɛɛ́ ugusəə lɛ́ aabɛn pá Táán əyííyid, ɔdɛɔ́gɔ. Táán áa aágɛɛ́ʼkɛn mɔɔd kilumiʼ.

³⁴Úmmuʼ na úmmuʼ tɛn nyɔ́ alɛɛ́ ogoboyɛ́ʼkɛn nsɔ́ɔ́ ɔdɛɔ́gɔ. Yə́sus Kilíʼtus yiígú, nkə kɛ́ kɛ́mááyɛn kɛ́ɛg kɛ́lɛ lɛ́ ayóndɛg a pɛlóŋ. Alɛ a ombɔg ó nɛnom ó Táán, alɛ amoyɔ́sɔ́gɔlɔn kɔ a kidíídí kiə́s.

³⁵Yoom anɛ́ɛ́n igə yímmú aa ɛ́lɛɛ́ ɛ́gɛbɛɛ́saa na nnyɔ́ŋánán yɛ́ Kilíʼtus alɛɛ́ na yɛ́lɛ́ na pəsi ə́? Ntɔ́b ɔ́? Ndóo. Wɛɛ́y á? Ɔmbɔ́ tɛn. Nkə anɛ́ɛ́n ə́? Pɛdá pɛ́ páabɛɛ́nɔɛyɛ óm? Ndóo tɛn. Njaan á? Ndóo óo. Osog óm? Ɔmbɔ́ tɛn. Pɛbán pɛ́ píəbiyə́njən əə́? Íʼi! Ooʼó, nkə anɛ́ɛ́n ə́? Kugu ə? Ɔmbɔ́ tɛn kólɛ́! Yoom na yoom ɔmbɔ́ ímuʼ ɛ́dɛɔ́gɔ ɛ́gɛbɛɛ́saa.

³⁶Kɛ́lɛ kidiídílə́ a Kálaʼtaʼ ɛ Táán lɛ́: «A kidíídí kɛáŋ, tɛlɛ wɔɔ́s kilúd udi na udi na kugu. Pálɛ agɛɛlɛ na pəsi wɔnɔ́ todóm tó pálɛɛ́ agɛɛn na tólɛ́ lɛ́ pɛ́ɛn asɛga pɛnág[36]»

³⁷Náa, a nkə kiim kɛ́ kɛ́abɛɛ́boan, tɛlɛ ombɔg a mɔɛn, a toɛn tó Kilíʼtus nyɔ́ ayɛ́bɛnyɔ́ŋɛn.

³⁸Ɛɛ́ɛ, mɛ ntɛɔ́gɔ kɔ na isuŋ lɛ́ kɛ́yɛɛn ɔmbɔ́ lɛ́ kugu, ɔmbɔ́ lɛ́ ɔlaa, ɔmbɔ́ lɛ́ məŋun má maʼtom, ɔmbɔ́ lɛ́ palaamɛʼ, ɔmbɔ́ lɛ́ nkə kɛ́ kɛ́lɛɛ́ nɛ́gɔŋ, ɔmbɔ́ lɛ́ nkə kɛ́ kɛ́lɛ́ɛ́ kɛɛnɛɛ́ na koany, ímuʼ na ímuʼ yɛ́ ɛ́lɛɛ́ ɛ́gɛbɛɛ́saa na nnyɔ́ŋánán ɛ Táán ɛ́dɛɔ́gɔ, ɔmbɔ́ pɔɔd pá pálɛɛ́ na toɛn.

³⁹Ɔmbɔ́ lɛ́ tó tólɛɛ́ a mɔɛn, ɔmbɔ́ tɛn tó tólɛɛ́ a nsí, yoom na yoom ímuʼ yɛ́ Táán ayɛ́ɛ́lɛ, yɛ́ ɛ́lɛɛ́ ɛ́gɛbɛɛ́saa na nnyɔ́ŋánán yɛ́ Táán əyíbilóódi a Sə́dúk wəəs Yə́sus Kilíʼtus ɛ́dɛɔ́gɔ.