Read Yambeta Ɔlɔ́ma 9 Bible Online

Ɔlɔ́ma 9 - Yambeta bible

Ɔlɔ́ma 9

¹Táá kɛbán áa kɛ́ɛnɛ mbándabodɛ́anɛɛ́. Kɛ́lɛ kɛbán kɛ́ kɛ́lɛɛ́ fɔ́lɔ́b, ntɛɔ́gɔ əgubulígə lɛ́ ndɛ ondadáán na Kilíʼtus. A toɛn tó Uŋun wó Ufúlúʼtú, ɔʼtɛ́m waam a kaadɛ olɛ agosɔyɔ lɛ́ nkə kɛ́ ndɛɛ́ əgusəə kɛ́lɛ fɔ́lɔ́b.

²Ndɛ na ɔʼtɛ́m kogany wó ómɛ́sán oʼto. Ndɛ agoob kɔbɛ́ a ɔʼtɛ́m wáam a kaadɛ pɛnɛŋ piim.

³Ndɛ anyɔ́ŋɛn lɛ́ ná Táán əmíndumísə́ni, tuúdudúú, ndɛ nyɛɛn osaalɛ́gáán mɛɛ́nyɔ́amɔɛ́d na Kilíʼtus a kɔŋɛʼ kó pomóŋŋí páam Yúdɛn. Tɛlɛ ndɛg ɛgo mmuʼ na pɔ́lɛ́.

⁴Pálɛ pɔɔ́n pá Ɛ́sɛlayɛl. Táán ayɛ́boyɛ́ɛ́lɛ lɛ́ pɛ́ɛn pɔɔ́n pə́ə́ŋ, amáboyɛ́ʼkɛn nugəm, aálad nɛsɔ́g na pɔ́lɛ́, amáboyɛ́ʼkɛn pisiə́g piə́ŋ, amáboyɛ́ɛ́lɛ tɛn lɛ́ pámonyáadɛ a pɛɔ́sɔ́gɔ́lɔ́n, amɛ́ɛ aboógagɛn ɛ́fɔlɛ́ ɛ́ moom[37]

⁵Pálɛ pɛnannán pɛ́ pɛmbáa pá pííguə́ʼkən kɔ kalaʼ. A ndɛg yɔɔbɔn aa Kilíʼtus əyə́biə́níí a oʼtɛ́lɛm wə́ə́ŋ wó a nɛmɔɔd, nyɔ́lɛ́ nyɔ́ amáábɛ́gɛn yiim ombɔg a oʼto. Alɛ Táán, tɛ́monyádɛan a pɛnɛŋ piim. Aamɛn!

⁶Kídíoloodi anyóon lɛ́ oʼkag ó Táán ódɛ́asan, ndóo. Kɛ́lɛ lɛ́, a ndɛg yɛ Ɛ́sɛlayɛl[38], ungim ɔdɛɔ́gɔ fɔ́lɔ́b fɔ́lɔ́b wo Ɛ́sɛlayɛl.

⁷A palaa Ábɛlaam tɛn, ungim ɔdɛɔ́gɔ fɔ́lɔ́b fɔ́lɔ́b ndɛg yəəŋ. Ɛɛ́ɛ, Táán yɛɛ́dɛánɛ na Ábɛlaam ɔnɔ́: «Ɛ́sag aa alɛ́ɛ́ kosaŋɛɛ́ ndɛg yɛ́ njɛ́gogágɛn lɛ́ olɛ́ɛ́ kɔɔŋ[39]»

⁸Áay lɛ́, adɛ́njaŋ pɔɔ́n pá pə́mə́biə́níí a nɛálad nɛ́ na ɔnɔ́mɛɛd na ɔʼkɛ́ɛd[40] áa pálɛɛ́ pɔɔ́n pá Táán, ndóo. Fɔ́lɔ́b ɛ pɔɔ́n ɛlɛ pá pə́mə́biə́níí wɔnɔ́ ná Táán yɛɛ́gág.

⁹Kɛ́lɛ lɛ́, Táán yɛɛ́gágɛn Ábɛlaam ná yiísə́ə́ ɔnɔ́ na nyɔ́lɛ́: «Waag wó wə́ndəgimií, əgín a kɛnɛŋ kɛ́ɛnɛ, ndəgimbuúlini. Ndɛ́ɛ́ koboan waaŋ oʼkán Sáála na mɔɔ́n ɔnɔ́mɛɛd a ombɔg[41]»

¹⁰Adɛ́njaŋ las a yɛ́ɛy. Tɛáyɔ́ŋɛan Ɛlɛbɛ́ʼka. Pɔɔ́n pə́ə́ŋ pábaan, na sɛʼkóón wəəs Ɛ́sag aa yiíbiə́nə.

¹¹Náa, pɔɔ́n págo páyɛ́ɛ pə́dínjə́bíən, páyɛ́ɛ pádɛ́njɛ́ɛlɛ tɛn ɔmbɔ́ kɔŋɛʼ, ɔmbɔ́ kɔbɛ́. Kɔmɔɛ́d lɛ́ Táán ayɛ́ɛ əə́ʼkusəə na Ɛlɛbɛ́ʼka ɔnɔ́, mɔɔ́n wəəŋ o na oʼto na oʼto alɛ́ɛ́ kɛɛn inə́mbí ɛ́ kiyi. Kɛ́yásánɛ́ɛ́ náan lɛ́ ná nkə kɛ́ Táán əə́súŋig, kɛáyɛ́ɛlɛ. Táán alɛ əgiiyid nyɔ́ aányɔ́ŋɛn, kɛ́dɛɔ́gɔ a nkə kɛ́ mɔɔd amɛ́ɛ́lɛ, kɛ́agoob əgín na Táán nyɔ́lɛ́nyɔ́əsíŋ nyɔ́ alɛɛ́ agodɔ́ŋɔn[42]

¹³Kálaʼtaʼ ɛ Táán ɛlɛ əgusəə lɛ́, Táán ɔnɔ́: «Yáʼkɔb aa njáág ɔʼtɛ́m wáam na nyɔ́lɛ́, mbáabɛnɛn Ɛsawúu[43]»

¹⁴Kɛ́lɛ anyóon áay lɛ́ nkə ə́: Lɛ́ Táán ɔdɛɔ́gɔ anyóon sáád yi! Ndóo, adɛ́njaŋ náan!

¹⁵Kɛ́lɛ lɛ́, yiísə́ə́ ɔnɔ́ na Moyíis: «Ndəəsiəd maan na nyɔ́ mbányɔ́ŋɛn kusiəd maan. Ndadɛ́ɛ́lɛn ɔʼtɛ́m na nyɔ́ mbányɔ́ŋɛn kodɛ́ɛ́lɛn ɔʼtɛ́m[44]»

¹⁶Kɔdɛ́ɛ ɔʼtɛ́m kó Táán kódɛɔ́gɔ a oʼto wó nkə kɛ́ pɔɔd páanyɔ́ŋɛn, kódiɛn a oʼto wóonɛ lɛ́ pámáyɛ́ʼkɛ́nɛ́ɛ́ agɛɛlɛ yoom, ndóo. Kɛ́agoob əgín na Táán nyɔ́ əə́siəd maan na mɔɔd.

¹⁷Kɛ́lɛ a Kálaʼtaʼ ɛ Táán lɛ́ yɛɛ́dɛánɛ na nkúm yɛ́ Əsíibtə ɔnɔ́: «Njɛ́gobágɛ nkúm lɛ́ ná ndoodi toɛn tóam a nkə kɛ́ waágɛɛlɛ, njɛɛlɛ lɛ́ nsí ngim ɛ́lɛŋ niiŋ nɛ́am[45]»

¹⁸Tɛlɛ págodála lɛ́, Táán əəsiəd maan na nyɔ́ aányɔ́ŋɛn kusiəd maan na nyɔ́lɛ́. Áyɛɛ́ʼkɛn tɛn pɛlɔ́g na nyɔ́ aányɔ́ŋɛn lɛ́ yɛ́ɛn na pɛ́lɛ́.

¹⁹Áay, wəəgiŋíən wɔʼkɔ́ na mɛ əə: «Táán aabɛɛ́bɛn anɛ́ɛ́n lɛ́ nkə ə́? Kɛ́lɛ lɛ́, mɔɔd ɔdɛɔ́gɔ ogaádádɛg a nkə kɛ́ nyɔ́lɛ́ alɛɛ́ anyɔ́ŋɛn.»

²⁰Wɛ mɔɔd, wɛ anyóon anɛ́ɛ́n ánɛ aa agɛɛn na nkasɛ́ na nkə kɛ́ Táán alɛɛ́ anyɔ́ŋɛn əə́? Iyə́sə́n yándaayag kuŋíən yɔ́nɔ́ na mɔɔd nyɔ́ amámoyɛ́ɛ́lɛ: «A igə aa omɛ́nyɛɛlɛ náanɛ ə́[46]?»

²¹Ommaaŋan muyə́sə́n alɛ agɛɛlɛ nkə kɛ́ alɛɛ́ anyɔ́ŋɛn na nsí ɛ nɔmaʼ. Na nsí ɛ nɔmaʼ əgín ɛgo mmuʼ, alɛ ogoma yɛ́ yə́əgud a pɛbán pɛ́ nugəm, áama tɛn yɛ́ yə́əgud a pɛbán pɛ́ndɛ́ŋ piim[47]

²²Táán yɛɛ́nyɔ́ŋɛn lɛ́ óloodi ilúún yə́ə́ŋ, páalɛŋ toɛn tuə́ŋ. Kɔmɔɛ́d lɛ́ yɛɛ́nóʼtan kɛ́fɔlɛ́ pɔɔd pá yiígóodi lɛ́ yóób ilúún na pɔ́lɛ́, pɔ́ɔŋ nsɔ́ɔ́.

²³Náa, yiísiə́d maan na pɔsɔ́g pə́mmú. Yɛɛ́nyɔ́ŋɛn lɛ́ pálɛŋ kɛa kɛ́ nugəm nuə́ŋ, pɔ́lɛ́ pá əyíbusóbíni kɔ kalaʼ lɛ́ ná pɛ́ɛn na nugəm nóon.

²⁴Pəsi aa tɛlɛɛ́ pɔɔd págo póob. Adɛʼkáabɛdɔ́ŋɔn əgín a ondáŋ ó Yúdɛn, ndóo, na a ó pɛnɔɔŋɛʼ kɛ́.

²⁵Kɛ́lɛ́ kɛ́go aa Táán yiísə́ə́ a kálaʼtaʼ yɛ ɔndɔɛgɛʼ pɛbán wəəŋ, Osə́ə, ɔnɔ́: «Ndɛg yɛ́ ɛdɛʼkɛ́lɛɛ́ yaam, ndɛ́ɛ́ kodɔ́ŋɔn lɛ́: “Ndɛg yaam”. Ndɛg yɛ́ ntɛʼkɛ́ɛ agɔnyɔ́ŋɛnɛɛ́, ndɛ́ɛ́ kobodɔ́ŋɔn lɛ́: “Páam pá ɔʼtɛ́m”.

²⁶Kɛnɔ kɛ́ pɛ́dɛánɛ na pɔɔd lɛ́: “Pəŋi podɛɔ́gɔ ndɛg yaam”, pálɛ́ɛ́ kobodɔ́ŋɔn pɔ́nɔ́: “Pɔɔ́n pá Táán nyɔ́ alɛɛ́ a ɔlaa[48]”.»

²⁷Ɛsayíi nyɔ́lɛ́ a nuə́ŋ noá, ayáfɛ́mɛ́ɛ́ a kidíídí kɛ́ Ɛ́sɛlayɛl ɔnɔ́: «Ɔmbɔ́ pɔɔ́n pá Ɛ́sɛlayɛl pə́dəg wɔnɔ́ ɔsáyɛ́n wó a ɛbá ɛ́ noom, əgín ngab aa ɛlɛ́ɛ́ kɔyɛɛ́.

²⁸Kɛ́lɛ lɛ́, Sə́dúk alɛ́ɛ́ kɛɛlɛ a nsí əgín nkə kɛ́ əə́səə. Alɛ́ɛ́ kəə́bisig kɛɛlɛ kɛ́lɛ́, áaman tɛn kɛɛlɛ[49]»

²⁹Ɛsayíi əgín ogo nyóon yɛɛ́yáŋ əsəə tɛn kalaʼ ɔnɔ́: «Sə́dúk o toɛn tuim adɛʼkɛ́ɛ əgibidíin ngab ɛ pɔɔ́n, ná tɛyáán wɔnɔ́ Sodóom, ná tɛyɛ́ɛ agɛɛn a kɛŋwáŋánán kɛ́ Kɔmɔ́ɔl[50]»

³⁰Koon oʼto kólɛ anɛ́ɛ́n lɛ́ nkə ə́? Kólɛ lɛ́: Pɛnɔɔŋɛʼ pɛ́ pɛ́lɛ́ pɛ́dɛʼkɛ́ɛ əguunə kɛɛn na kilumiʼ a əngis á Táán, pɛ́yɔ́ɔ́ŋ kɛ́lɛ́ lɛ́ pɛ́yáág oʼto na nyɔ́lɛ́.

³¹Kɔmɔɛ́d lɛ́ ndɛg yɛ Ɛ́sɛlayɛl yɛ́ yɛ́lɛ́ iyúúnə kɔɔŋ kilumiʼ a əngis á Táán a nɛɛ́ngɛg nɛ́ páyɛ́ɛ agɛɛ́ngɛg pɛcɛm, pádɛʼkáagaáʼkɛ kɔɔŋ kɛ́lɛ́.

³²Pɔ́lɛ́ pádɛʼkɔ́ɔgɔɔŋ lɛ́ nkə ə́? Pádɛʼkɔ́ɔgɔɔŋ lɛ́ pɔ́lɛ́ Yúdɛn pádɛʼkɛ́ɛ agoboŋ kɛ́lɛ́ a oʼto wóonɛ lɛ́ pámáág oʼto na Táán. Páyɛ́ɛ afɛga lɛ́ pɔ́ɔgɔɔŋ kilumiʼ a oʼto wó nkə kɛ́ pálɛɛ́ agɛɛlɛ. Pííbúʼtən a nɛdáán nɛ́ mbúʼtə́n.

³³Táán alɛ əgusəə a Pagálaʼtaʼ pə́ə́ŋ ɔnɔ́: «Táá, nɛdáán nɛ́ mbúʼtə́n a nɛ́ɛn mbáág a pálɛ́ɛg ɛ Siyɔ́ɔŋ. Nɛ́lɛ nɛdáán nɛ́ pɔɔd pálɛ́ɛ́ kudə́əŋən a nɛ́lɛ́. Náa, nyɔ́ amáág oʼto na nyɔ́lɛ́, adɛndɛ́ɛ́ kəə́lə́ʼkəni[51]»