Read Yambeta 1 Kɔlɛ́ɛnt 1 Bible Online

1 Kɔlɛ́ɛnt 1 - Yambeta bible

1 Kɔlɛ́ɛnt 1

¹Mɛ Póol na Sostɛ́ɛn móŋŋí wəəs áa timə́budílən nufuuʼ nóonɛ. Mɛ nyɔ́ Táán ayɛ́ʼtɔ́ŋɔn lɛ́ nyɛ́ɛn mɔɔ́n o maʼtom o Yə́sus Kilíʼtus.

²Timə́budílən pəŋi pəə́liʼtiniʼ pá a Kɔlɛ́ɛnt, pəŋi pá poágoob na Táán. Ayɛ́boodɔ́ŋɔn lɛ́ ná a Yə́sus Kilíʼtus, ə́bufúŋi ondáŋ na pɔsɔ́g piim pá pálɛɛ́ lɛ́ kɛnɔ kiim kɛ́ pálɛɛ́, pɔ́ɔdɔ́ŋɔnɔ niiŋ nɛ́ Sə́dúk Yə́sus Kilíʼtus, Sə́dúk wɔɔbɔn na Sə́dúk wəəs.

³Táán sɛ wəəs, pɔ́lɛ́ na Sə́dúk Yə́sus Kilíʼtus páboyɛ́ʼkɛn mawɔʼ, na kiwiiyiʼ á!

⁴Ndɛ əgusoyidəni Táán waam pɛnɛŋ piim a kidíídí kɛáŋan, a mawɔʼ má aboyɛ́ʼkɛ́nɛ́nɛ́ɛ́ a niiŋ nɛ́ Yə́sus Kilíʼtus.

⁵Kɛ́lɛ lɛ́, wɔnɔ́ ná polɛɛ́ paladáán na Kilíʼtus, pomɔ́ɔ́ŋɔ́nɔn a moom muim, kɔŋɛʼ kɔŋɛʼ a kolɛŋ kó polɛŋɛ́nɛ́ɛ́ kosɔyɔ tɔgɛ́ɛ́ na kɛɛlɛ a sáád.

⁶Tiɛ́dɛ́lɛ́mɛn Kilíʼtus mbaasɔ́, pumə́yəə́gumənən a yɛ́lɛ́ na toɛn.

⁷Kólɛ́ aa kɛ́lɛɛ́ lɛ́, poʼtaŋɛn yoom na yoom ɔmbɔ́ ímuʼ a kɔŋɛʼ kó Táán alɛɛ́ agɛɛ́ʼkɛnanan, pəŋi pá polɛɛ́ agobóŋan wɔɔ́s wó Sə́dúk wəəs Yə́sus Kilíʼtus alɛ́ɛ́ kiim yólodií.

⁸Alɛ́ɛ́ kobosáayɛnɛ nyɔ́lɛ́nyɔ́amɔɛ́d toɛn súʼtə́ə́ a las ɛ wɔɔ́s, agɛɛlɛ lɛ́ mɔɔd na mɔɔd adɛnjɔ́ɔ́ŋ ɛgom a nkó yaaŋan yɛ́ pálɛɛ́ págoboóbɛn a yɛ́lɛ́ a wɔɔ́s wó alɛ́ɛ́ kimbuúlinií.

⁹Táán adɛágasɛ unuʼ a nkə kɛ́ aágagɛn pɔɔd, nyɔ́lɛ́ nyɔ́ ayɛ́boodɔ́ŋɔn lɛ́ ná póɛn úmmuʼ, paladáán na Mɔɔ́n wəəŋ Yə́sus Kilíʼtus, Sə́dúk wəəs[1]

¹⁰Pomóŋŋí, a niiŋ nɛ́ Sə́dúk wəəs Yə́sus Kilíʼtus, ndəbuŋíən lɛ́ póɛn unuʼ wááŋan úmmuʼ, ɛsaa fiɛ́d, ɔʼtɛ́m wááŋan úmmuʼ, mafɛgaʼ mááŋan mə́muʼ.

¹¹Pomóŋŋí, ndɛ əgusəə náan lɛ́ pɔɔ́n pá a yoog ɛ pɔɔd ɛ Kolowə́ə aa páyɛ́ʼtɛánɛ lɛ́ polɛ na mosaa a kɛgaágadɛ kɛáŋan,

¹²poándɛ agá lɛ́, nyóonɛ ɔnɔ́ nyɔ́lɛ́ alɛ agoob na mɛ Póol, nyummú ɔnɔ́ nyɔ́lɛ́ alɛ wo Aʼpolóos, nyummú tɛn ɔnɔ́ nyɔ́lɛ́ alɛ o Sɛ́fas[2] Pə́mmú tɛn pɔ́nɔ́ pɔ́lɛ́ pálɛ pá Kilíʼtus.

¹³Kólɛ́ aa ndə́buŋíən na pəŋi nyɔʼkɔ́ əə, Kilíʼtus alɛ ogaásaala ə́? Mɛ Póol aa Páyɛ́mbaŋan a ɔmbásá a kidíídí kɛáŋan a? Ɔsɔgɛn wó puísiə́d əə, a oʼto wáam o mɛ Póol aa puísiə́d wólɛ́ ə́?

¹⁴Pisoyidiʼ na Táán lɛ́ mɛ ntɛʼkáagɛɛ́ʼkɛn ɔsɔgɛn na mɔɔd ɔmbɔ́ úmmuʼ a ondáŋ wááŋan, ná kɛ́sánɛn əgín lɛ́ pa Kilíspus pɔ́lɛ́ na Kayúus.

¹⁵Náan, úmmuʼ na úmmuʼ nyɔ́ alɛɛ́ ugusəə lɛ́ nyɔ́lɛ́ yiísiə́d ɔsɔgɛn a niiŋ nɛ́am ɔdɛɔ́gɔ.

¹⁶Ɛɛ́ɛ, mbáʼkaáyɔ́ɔ́ŋɛ, nyɛɛ́sɔ́gɛn tɛn yoog ɛ pɔɔd ɛ Stɛfanáas. Ntɛálɛn nga nyɛɛ́sɔ́gɛn pɔɔd pə́mmú pɛ́ndɛ́ŋ.

¹⁷Kilíʼtus adɛʼkáagɛʼtom lɛ́ nyíim asɔgɛna pɔɔd, ndóo. Ayɛ́ʼtóm lɛ́ nyíim alɔɛgɛ Tɔsɔm Tólaŋ. Kɛnɛŋ anɛ́ɛ́n kɛ́ mbándalɔɛgɛɛ́ tólɛ́, ntɛndɔɛ́gɛ na pɛa pɛ́ pɛlanda pɛ́ pusiŋ pó pɔɔd, agɛɛlɛ lɛ́ nkə kɛ́ ndə́əsəə kɛ́dɛmbáʼkánan toɛn tó tólɛɛ́ a ɔmbásá ó Kilíʼtus.

¹⁸Kɛ́lɛ lɛ́, kolɔɛgɛ lɛ́ Kilíʼtus yiígú a ɔmbásá kólɛ puyəgí a pá pə́ənim. Náa, a pəsi pá tɛlɛɛ́ a ngə́ ɛ kɔɔy, tɛlɛ agodála kɔ, toɛn tó Táán.

¹⁹Nkə kɛ́ kɛ́lɛɛ́ kidiídílə́ a Kálaʼtaʼ aa kɛ́ɛnɛ kɛ́lɛɛ́ lɛ́: Táán ɔnɔ́: «Ndɛ́ɛ́ kuwíiyi nsiŋ ɛ pɔɔd pá nsiŋ, ndɛ nsoolɛ kolɛŋ kó palɛŋ[3]»

²⁰Nkə anɛ́ɛ́n áa pɔɔd pá nsiŋ pə́əsəə? Ɔmbɔ́ palɛŋ pɛcɛm, ɔmbɔ́ tɛn pɔsɔyɔʼ pá a pɛnɛŋ pɛ́ɛnɛ pɛ́ tigódíí? Táán oóloodi lɛ́ nsiŋ ɛ pɔɔd pá a nsí yɛ́ɛnɛ ɛlɛ puyəgí[4]

²¹Kɛ́lɛ lɛ́, pɔɔd, na nsiŋ yɔɔbɔn ngim yɛ́ pígóodi, pádɛʼkáagaáʼkɛ kolɛŋ Táán kɛnɔ kɛ́ yiílóódi nsiŋ yəəŋ. Kólɛ́ aa Táán yiídə́nígi lɛ́ a Tɔsɔm tó tóagaálɔɛgɛ aa nyɔ́lɛ́ ɔɔ́gɔɔyɛ pá pámáág oʼto na nyɔ́lɛ́. Tɔsɔm tó tólɛɛ́ wɔnɔ́ yoom ɛ́ puyəgí.

²²Yúdɛn yɛ́lɛ́ ɛlɛ əguŋíən mangán, pɔɔ́n pá Kɛlɛ́ɛg pə́əguunə nsiŋ.

²³Kɔmɔɛ́d lɛ́ pəsi, Kilíʼtus nyɔ́ pɛ́ɛ́báŋan a ɔmbásá aa tɛlɛɛ́ alɔɛgɛ. Tɔsɔm tóod tó tólɛɛ́ lɛ́ a Yúdɛn, tólɛ oʼto kono, a pɛnɔɔŋɛʼ, tólɛ puyəgí.

²⁴Náa, a pá Táán ɔɔ́dɔ́ŋɔn, pɛ́ɛn ɔmbɔ́ Yúdɛn oo, ɔmbɔ́ pɛnɔɔŋɛʼ oo, Kilíʼtus alɛ toɛn, na nsiŋ ɛ Táán

²⁵lɛ́, nkə kɛ́ kɛ́lɛɛ́ wɔnɔ́ puyəgí pó Táán, kɛ́mááyɛn nsiŋ ɛ pɔɔd. Nkə tɛn kɛ́ kɛ́lɛɛ́ wɔnɔ́ kolɛbɛd kó Táán kɛ́mááyɛn toɛn tó pɔɔd.

²⁶Pomóŋŋí, poádála na pəŋibáamɔɛ́d pá Táán ayɛ́boodɔ́ŋɔn. A nɛdɛ́ʼtɛg nɛ́ pɔɔd, pɔɔd pá nsiŋ pɔ́dɛɔ́gɔ piíŋ a ondáŋ wááŋan. Ɔmbɔ́ tɛn pá pálɛɛ́ na toɛn, na pá pə́mə́biə́níí a puog pó pɔɔd pá tugúm, pɔ́dɛɔ́gɔ piíŋ a ondáŋ wááŋan.

²⁷Táán əyííyid agá pá pálɛɛ́ muyənjə́g a əngis á pɔsɔ́g, agɛɛlɛ lɛ́ pɔɔd pá nsiŋ pɛ́ɛn na oʼto kono. Əyííyid tɛn pá pɔ́dɛɔ́gɔ na toɛn agɛɛlɛ lɛ́ pá pálɛɛ́ na toɛn pɛ́ɛn na oʼto kono.

²⁸Nkə kɛ́ kɛ́yɛ́ɛ əgumímmiŋ a nsí, nkə kɛ́ pɔɔd páyɛ́ɛ əgumə́nyə, fiɛ́d kusiəd kɛnɛŋ na kɛ́lɛ́, nkə kɛ́ kɛ́dɛʼkɛ́lɛɛ́ kɔ, kɛ́lɛ aa Táán əyííyid agɛɛlɛ lɛ́ ásoolɛ nkə kɛ́ pɔɔd páyɛ́ɛ agodɛ́ʼtɛg lɛ́ kɛ́lɛ́ aa kɛ́lɛɛ́ yoom.

²⁹Náan, kiɛlɛ kiə́ŋ ɔmbɔ́ kímuʼ kɛ́ kɛ́lɛɛ́ kɛ́ kaábágɛdɛ a udi wə́ə́ŋ ó nyɔ́lɛ́ Táán kɛ́dɛágɛɛn kɔ.

³⁰Náa, nyɔ́lɛ́ aa ayɛ́boyɛ́ɛ́lɛ lɛ́ póɛn paladáán na Yə́sus Kilíʼtus nyɔ́ əə́biíloodi nsiŋ ɛ Táán. Amábɛyɛ́ɛ́lɛ lɛ́ tɛ́lon ɛgom fiɛ́d a əngis á Táán, amábɛyááŋɛn a mabɛ́, amáabɛyɛ́ɛlɛ lɛ́ tɛ́an pɔɔ́n pá Táán, fiɛ́d na kibuu.

³¹Piim pɛ́ɛb pɛ́lɛ agodáŋana náan wɔnɔ́ ná kɛ́lɛɛ́ kidiídílə́ lɛ́: «Mɔɔd amaʼkɔnyɔ́ŋɛn kəə́gidən a igog, yə́gidən a nkə kɛ́ Sə́dúk amɛ́ɛ́lɛ[5]»