Read Yambeta 1 Kɔlɛ́ɛnt 10 Bible Online

1 Kɔlɛ́ɛnt 10 - Yambeta bible

1 Kɔlɛ́ɛnt 10

¹Pomóŋŋí, ntɛɔ́gɔ anyɔ́ŋɛn lɛ́ pólɔb náan pondɛŋ nkə kɛ́ kɛ́yásánɛ́ɛ́ na pɛmbáa pə́ə́s a kɛnɛŋ kɛ́ Moyíis. A nɛlon nɛɔ́bɔn nɛ́ pɛ́ɛ́lón a Əsíibtə, kɛbɛd kíyíbuyə́súʼkinin, pááyaag noom nó nubógógó pɔ́lɛ́ piim[32]

²Kɛ́yɛ́ɛ wɔnɔ́ pɔ́lɛ́ piim píísiə́d ɔsɔgɛn a kɛbɛd na a noom agɛɛlɛ lɛ́ pɛ́ɛn paladáán na Moyíis.

³Pɔ́lɛ́ piim pɛ́ɛ́nɛ́ moom mó konɛ mó uŋun mógo múmuʼ mó Táán ayɛ́boyɛ́ʼkɛn,

⁴pááŋó tɛn yoom ɛgo ímuʼ. Kɛ́lɛ lɛ́, pɛ́ɛ́ŋó məní má Táán ayɛ́ɛ́lɛ lɛ́ málon a nɛdáán nɛ́ nɛ́yɛ́ɛ əgiim níbuyə́ən. Nɛdáán nɛ́go aa nɛ́ɛn nɛ́yɛ́ɛ Kilíʼtus.

⁵Náa, ngab ngíŋ a ondáŋ wɔ́ɔ́bɔn idiʼkə́əgə́mmi Táán. A oʼto wóow aa pííguə́ʼkən a nigúu nɛ́ nifələ́ə́n[33]

⁶Pɛbán pɛ́ɛb pɛ́yásánɛ́ɛ́ náan əgibiíloodi lɛ́ pəsi tiʼkóodi lɛ́ tɛ́ag ɔʼtɛ́m a pɛbán pɛ́ pɛbɛ́ wɔnɔ́ ná pɔ́lɛ́ páyáág[34]

⁷Pudinjə́njə́n ambog wɔnɔ́ ná ngab yimmú a ondáŋ wɔ́ɔ́bɔn yiíyə́ən. Kálaʼtaʼ ɛ Táán ɛlɛ əgusəə lɛ́: «Pɔɔd píílə́ndin a nsí agonɛ na agoŋo. A ngim yɛ́ɛy, pááság kodɛ́ɛmɛn əgubin[35]»

⁸Tɛdɛnyɛ́ɛ́lɛ nɛbambɛɛ tɛn wɔnɔ́ ná ngab yimmú a ondáŋ wɔ́ɔ́bɔn ɛyɛ́ɛ́lɛ, Táán aáság kuwíiyi tɔ́ɔ́sɛn ɛ pɔɔd niʼtin na ɛ́dáád a wɔɔ́s úmmuʼ súg[36]

⁹Tɛdɛyásɔ́sɛ́nɛ́ɛ́ Kilíʼtus agɛɛn yuudi na kɛɛlɛ kɔbɛ́ wɔnɔ́ ná ngab yimmú a ondáŋ wɔ́ɔ́bɔn ɛyɛ́ɛ́lɛ, Táán amáabodómɛn nkud yɛ́ mbɛ́ yɛ́ ɛyɛ́bonóma, pə́guə́ʼkən[37]

¹⁰Podɛyɔ́gɔ́dɔ́ɔ́ tɛn wɔnɔ́ ná ngab yimmú a ondáŋ wɔ́ɔ́bɔn ɛyɔ́gɔ́dɔ́ɔ́, Táán aádóm uŋun wə́ə́ŋ ó maʼtom wó wáagoóna pɔɔd, ómáboyóóna[38]

¹¹Nkə kɛ́ɛg kiim kɛ́ kɛ́ɛ́bóan pɛmbáa pə́ə́s, kɛ́yɛ́bobóan əgibiíloodi lɛ́ pəsi tiʼkóodi lɛ́ tíɛlɛ wɔnɔ́ pɔ́lɛ́. Píyə́dílə́ə́ agɛbayááganan mbaŋ, pəsi pá tɛlɛɛ́ alaa a kɛnɛŋ kɛ́ɛnɛ kɛ́ nɛ́gɔŋ kɛ́ kɛ́lɛɛ́ kɛnɛŋ kɛ́ a nɛman.

¹²Wɛ anɛ́ɛ́n nyɔ́ waáfɛga lɛ́ olɛ kidə́níʼtən, ólóʼkɔd agɛɛlɛ lɛ́ udiʼtə́əŋ.

¹³Pɛásɔ́sɛ́n pɛ́ pugódíí pɛ́lɛ pɛásɔ́sɛ́n pɛ́ mɔɔd ungim ogódíí lɛ́ yɔ́ɔŋ. Táán adɛágasɛ unuʼ a nkə kɛ́ əə́səə, ɔdɛɔ́gɔ ugəə́liʼtini lɛ́ póɔŋ pɛásɔ́sɛ́n pɛ́ pɛ́mábosán. Náa, kɛnɛŋ kiim kɛ́ polɛ́ɛ́ kɛɛnɛɛ́ na pɛásɔ́sɛ́n, alɛ́ɛ́ kubuúloodi ngə́ ɛgolon, áaboyɛ́ʼkɛn toɛn tó konóʼtan pɛ́lɛ́.

¹⁴Kólɛ́ aa, pəŋi pomóŋŋí páam pá ɔʼtɛ́m, pugódíí lɛ́ pódɛ́da pɛbán pɛ́ ambog.

¹⁵Ndɛ agosɔyɔ na pəŋi wɔnɔ́ ná ándɛ pɔ́ɔsɔyɔ na pɔɔd pá pálɛɛ́ na nsiŋ. Táláan pəŋibáamɔɛ́d agolɛŋ nga nkə kɛ́ ndɛɛ́ əgusəə kɛ́lɛ fɔ́lɔ́b.

¹⁶Tɛlɛ agɛɛ́ʼkɛn pisoyidiʼ na Táán a kilən kɛ́ɛnɛ kɛ́ tɛlɛɛ́ agosásananɛ. Kɛnɛŋ kɛ́ tɛlɛ agosásananɛ kɛ́lɛ́ náan, mándad aa yɛ́ɛy tɛlɛɛ́ agosɔd náan na Kilíʼtus a maŋɔ́ mə́ə́ŋ. Pɛlɛ́ɛd tɛn pɛ́ɛnɛ pɛ́ tɛlɛɛ́ agobɛ́ŋanan, nkó yəəŋ áa ɛlɛɛ́nɔ. Kɛnɛŋ kɛ́ tɛlɛ agonɛ pɛ́lɛ́, mándad aa tɛɔ́sɔ́d náan na nyɔ́lɛ́[39]

¹⁷Wɔnɔ́ ná pɛlɛ́ɛd pɛ́lɛɛ́ pímuʼ súg, pəsi piim tɛn pá tɛlɛɛ́ agonɛ pɛ́lɛ́ tɛlɛ anyóon kilúd kɛ́ nkó ɛ mɔɔd əgín náan tɛn kímuʼ.

¹⁸Táláan na pɔɔ́n pá Ɛ́sɛlayɛl əə́! Pɔ́lɛ́ pá pálɛɛ́ agonɛ ponyam pó pɛfɔny, pálɛ a mándad na Táán nyɔ́ pááfɔnyan ponyam póob a kibóŋ kɛ́ pɛfɔny[40]

¹⁹Ndɛ əgusəə anyóon lɛ́ manám má pááfɔnya a pɛbán pɛ́ ambog, na ambog yɛ́lɛ́yɛ́amɔɛ́d álɛ anyóon yoom ə́?

²⁰Ndóo, adɛ́njaŋ náan! Náa, ndɛ əgusəə lɛ́ pɛfɔny pɛ́ɛb pɛ́ pandɛŋ Táán pálɛɛ́ agɛɛlanɛ, adɛ́njaŋ na Táán áa pálɛɛ́ agɛɛ́ʼkɛnan pɛ́lɛ́, na məŋun má mabɛ́ aa pálɛɛ́ agɛɛ́ʼkɛnan[41] Ntɛɔ́gɔ anyɔ́ŋɛn lɛ́ póɛn a mándad na məŋun má mabɛ́.

²¹Podɛɔ́gɔ págɛɛn lɛ́, poáŋo a kilən kɛ́ Sə́dúk, puə́giʼkini koŋo tɛn a kɛ́ məŋun má mabɛ́, ndóo. Podɛɔ́gɔ tɛn págɛɛn lɛ́ poánɛ́ɛnɛ a tɛ́bɛlɛʼ ɛ Sə́dúk, poánɛ tɛn a ɛ məŋun má mabɛ́

²²Tɛmaʼkɛɛlɛ náan, tɛabányɛ Sə́dúk nifúb[42] Poafɛg lɛ́ tɛlɛ na toɛn agomoyááyɛn nyɔ́lɛ́ á?

²³Pəŋi pə́mmú polɛ əgusəə poɔʼkɔ́: «Ndɛ lɛ́ nyɛ́ɛlɛ yiim yɛ́ ndányɔ́ŋɛn[43]!» Kɛ́lɛ fɔ́lɔ́b náan. Náa, adɛ́njaŋ yiim aa ɛ́lɛɛ́ ɛŋɛʼ. Polɛ əgusəə poɔʼkɔ́: «Ndɛ lɛ́ nyɛ́ɛlɛ yiim yɛ́ ndányɔ́ŋɛn!» Kɛ́lɛ fɔ́lɔ́b náan. Náa, adɛ́njaŋ yiim aa yáagɛɛ́bɛ lɛ́ págon a kəə́liʼtiniʼ.

²⁴Mɔɔd ədinjúúnə əgín kɔŋɛʼ kuə́ŋ kó nyɔ́lɛ́nyɔ́əsíŋ, álɛŋ lɛ́ pɔsɔ́g pálɛ kɔ.

²⁵Nɛ́an manám miim má páalɛg a nion. Nɛ́an mɔ́lɛ́ ntɛ́m yaaŋan a kaadɛ yəə́b. Pudiŋiə́nə agɛɛlɛ lɛ́ pólɛŋ ə́lə́ə́ áa málɛɛ́ əgiim. Agolɛŋ nga málɛ manám má pɛfɔny, oó lɛ́ ndóo

²⁶lɛ́ náan aa kɛ́lɛɛ́ kidiídílə́ lɛ́: «Nsí yɛ́ɛnɛ, na moom muim mó mólɛɛ́ kɔ, móagoob na Sə́dúk[44]»

²⁷Mɔɔd nyɔ́ ɔdɛɔ́gɔ ungəə́liʼtiniʼ amaʼkoboodɔ́ŋɔn agonɛ́ɛnɛ a noádɛʼ nuə́ŋ, náa pomɛ́ɛn, nɛ́an nkə kiim kɛ́ páaboyɛ́ʼkɛn kɔ. Podɛyáságɛ́máá poɔʼkɔ́ ə́lə́ə́ áa moom móom mólɛɛ́ əgiim əə́.

²⁸Náa, pámaʼkobodɛ́anɛ pɔ́nɔ́: «Manám móom málɛ manám má pááfɔnya a pɛbán pɛ́ ambog», podɛnnɛ́ a oʼto ó nyɔ́ amábodɛánɛ náan ná ntɛ́m yɛ́ɛn a kaadɛ yəə́b.

²⁹Ntɛɔ́gɔ əgusəə lɛ́ ntɛ́m yaaŋan, náa ɔʼtɛ́m wə́ə́ŋ ó nyɔ́lɛ́ nyɔ́ amábodɛánɛ. Wɛ nyummú wəsəə wɔʼkɔ́ əə: «A igə aa nkə kɛ́ sɔ́g wɛndɛ́ŋ aáfɛg a ɔʼtɛ́m wə́ə́ŋ kíəgiim agɛnyɛɛlɛ mɛ lɛ́ ntɛnjɛ́ɛ́lɛ nkə kɛ́ ndɛɛ́ ogɛɛlɛ ə́!

³⁰Mbaʼkonɛ yoom, njɛɛ́ʼkɛn pisoyidiʼ na Táán a yɛ́lɛ́, tuə́ áa pálɛɛ́ págɛmbɛn a yoom yɛ́ɛy əə́!»

³¹Kólɛ́ aa, ɔmbɔ́ yoom aa polɛɛ́ agonɛ oo, ɔmbɔ́ yɛ́ polɛɛ́ agoŋo oo, ɔmbɔ́ yiim yɛ́ polɛɛ́ agɛɛlɛ oo, ɛlɛ́an yiim agɛɛ́ʼkɛn nugəm na Táán.

³²Niɛlɛ nɛáŋan nɛ́dɛnyɛ́ɛ́lɛ lɛ́ mɔɔd ə́də́əŋ a kɔbɛ́, yɛɛn ɔmbɔ́ mɔɔ́n ó Yúdɛn, ɔmbɔ́ kɛnɔɔŋɛʼ, ɔmbɔ́ pá pə́ʼkəə́liʼtinií Kilíʼtus.

³³Póɛlɛ wɔnɔ́ mɛ. Ndɛ agaágɔ́nɛgɛ lɛ́ nkə́mmi ungim a pɛbán piim. Ntɛɔ́gɔ əguunə kɔŋɛʼ kóam kó mɛnyɔ́əsíŋ, ndóo. Ndɛ əguunə kɔŋɛʼ kó ɛ́fɔlɛ́ ɛ́ pɔɔd, agɛɛlɛ lɛ́ pɔ́ɔy.