Read Yambeta 1 Kɔlɛ́ɛnt 11 Bible Online

1 Kɔlɛ́ɛnt 11 - Yambeta bible

1 Kɔlɛ́ɛnt 11

¹Púyə́ən ongoo wáam, wɔnɔ́ ná mɛ ndɛɛ́ əguyə́ən ongoo ó Kilíʼtus.

²Ndɛ agoboógany lɛ́ polɛ agɛnjaáyɔ́ɔ́ŋanɛ a yoom yiim, na tɛn lɛ́ polɛ əguyə́ən kɔŋɛʼ kɔŋɛʼ pɛbán pɛ́ njɛ́boyáʼkánánɛ.

³Kɛbán kímuʼ, nkə kɛ́ ndányɔ́ŋɛn lɛ́ pólɛŋ aa kɛ́ɛnɛ: Kilíʼtus alɛ nkúm ɛ mɔɔd ungim. Ɔnɔ́mɛɛd, nkúm yɛ ɔʼkɛ́ɛd. Táán, nkúm ɛ Kilíʼtus.

⁴Ɔnɔ́mɛɛd amaʼkɛɛn lɛ́ alɛ ɔgɔɔ́sɔ́gɔlɔn, ɔmbɔ́ lɛ́ alɛ alɔɛgɛ Tɔsɔm a niiŋ nɛ́ Táán na ɛdam a oʼto, aásɛ́ɛ́dɛ Kilíʼtus nyɔ́ alɛɛ́ nkúm yəəŋ.

⁵Náa, ɔʼkɛ́ɛd nyɔ́ alɛɛ́ ɔgɔɔ́sɔ́gɔlɔn Táán, ɔmbɔ́ lɛ́ alɛ alɔɛgɛ Tɔsɔm a niiŋ nɛ́ Táán ədiə́gúbíí oʼto na yoom, nyóon aásɛ́ɛ́dɛ onom nyɔ́ alɛɛ́ nkúm yəəŋ. Alɛ wɔnɔ́ ɔʼkɛ́ɛd nyɔ́ amámɔ́ɔ́ oʼto.

⁶Ɔʼkɛ́ɛd annyɔ́ŋɛnɛn kəə́gub oʼto na kilə́ə́, áyaámɔ! Náa, wɔnɔ́ ná kɛ́lɛɛ́ oʼto kono na ɔʼkɛ́ɛd lɛ́ yáámɔ, oó lɛ́ yáásóma tuyə́ən, ogóódi anɛ́ɛ́n lɛ́ yə́ə́gub oʼto na yoom.

⁷Ɔnɔ́mɛɛd oʼkóodi lɛ́ yə́ə́gub oʼto na yoom kɛnɛŋ kɛ́ alɛ a pɛɔ́sɔ́gɔ́lɔ́n lɛ́ alɛ a kɛŋwáŋánán kɛ́ Táán, a kɛŋwáŋánán kɛ́ nugəm nó Táán. Náa, ɔʼkɛ́ɛd nyɔ́lɛ́ alɛ a kɛŋwáŋánán kɛ́ nugəm nó ɔnɔ́mɛɛd.

⁸Kɛ́lɛ lɛ́, adɛ́njaŋ kigú kɛ́ ɔʼkɛ́ɛd áa Táán yiísiə́d agɛɛlɛ ɔnɔ́mɛɛd, kigú kɛ́ ɔnɔ́mɛɛd áa yiísiə́d agɛɛlɛ ɔʼkɛ́ɛd.

⁹Na náan kɛ́, Táán adɛʼkáagɛɛlɛ ɔnɔ́mɛɛd a oʼto wó ɔʼkɛ́ɛd. Náa, ayɛ́ɛ́lɛ ɔʼkɛ́ɛd a oʼto wó ɔnɔ́mɛɛd.

¹⁰Kólɛ́ aa, a oʼto ó məŋun má maʼtom, ɔʼkɛ́ɛd ogódíí lɛ́ yə́ə́gub oʼto əguloodi lɛ́ alɛ agoóbɛn onom.

¹¹Náa, a pəsi pá tɛlɛɛ́ paladáán a ɔlaa na Sə́dúk, ɔʼkɛ́ɛd oʼkóodi lɛ́ yɛ́ɛn a oʼto wə́ə́ŋ, alɛ agoob na ɔnɔ́mɛɛd. Ɔnɔ́mɛɛd tɛn oʼkóodi lɛ́ yɛ́ɛn a oʼto wə́ə́ŋ, alɛ agoob na ɔʼkɛ́ɛd

¹²lɛ́ yoom ímuʼ wɔnɔ́ ná na kigú kɛ́ ɔnɔ́mɛɛd áa páyɛ́ɛ́lɛ ɔʼkɛ́ɛd, náan tɛn yoom ímuʼ aa ɔnɔ́mɛɛd əmə́biə́níí na ɔʼkɛ́ɛd. Na Táán áa ungim əmíim.

¹³Pəŋibáamɔɛ́d pósóngɛ. Kɛ́lɛ kɔŋɛʼ lɛ́ ɔʼkɛ́ɛd ádɛ́lɛm a udi ó Táán ɔgɔɔ́sɔ́gɔlɔn fiɛ́d oʼto uʼkúbə́ə́n ə́?

¹⁴Tɛmaʼkodɛ́ʼtɛg əgín wɔnɔ́ na pɛbán pɛ́lɛɛ́ agaásan, tɛdɛádála lɛ́ kɛ́lɛ oʼto kono na ɔnɔ́mɛɛd lɛ́ yə́ə́di tuyə́ən a oʼto tolanda a?

¹⁵Kɔmɔɛ́d lɛ́ a ɔʼkɛ́ɛd, kɛ́lɛ nugəm na nyɔ́lɛ́ lɛ́ yɛ́ɛn na tuyə́ən tolanda. Táán ayɛ́ʼkɛn ɔʼkɛ́ɛd tuyə́ən tolanda lɛ́ ná yə́ə́gub oʼto na tólɛ́.

¹⁶Mɔɔd amaʼkɔnyɔ́ŋɛn kɛɛn yuudi na isuŋ a kɛbán kɛ́ɛg, álɛŋ lɛ́ ɔmbɔ́ pəsi, ɔmbɔ́ tɛn pəə́liʼtiniʼ Táán, tiʼkóodi ondoŋá wúmmú wɛ́ndɛ́ŋ, náan aa ándɛ tɛ́agɛɛlanɛ.

¹⁷Ntɛɔ́gɔ ogoboógany a pɛbán pɛ́ɛnɛ pɛ́ mbɔ́ndɔsɔyɔɔ́ nɛ́gɔŋ lɛ́, mogony moáŋan mó poágɛɛlanɛ módɛ́aboɛ́bɛ lɛ́ póɛn yuudi a ngə́ ɛ Táán, mólɛ agá əgubuyúúlisi ngim.

¹⁸Kɛ́ na oʼto na oʼto, páyɛ́ʼtɛánɛ lɛ́ kɛnɛŋ kɛ́ pomágɔ́nyɛ́dɛ́ɛ́ ɔgɔɔ́sɔ́gɔlɔn Táán, polɛ paásáláán. Mbə́líʼtíníí lɛ́ fɔ́lɔ́b ɛlɛ kɔ a nkə kɛ́ɛg.

¹⁹Kɛ́lɛ kɔŋɛʼ sɛ́ɛb lɛ́ ɛsaa yɛ́ɛn kɔ a kɛgaágadɛ kɛáŋan ná pálɛŋ pa ánɛ aa pə́ə́yísíníí fɔ́lɔ́b.

²⁰Náa, kɛnɛŋ kɛ́ pomágɔ́nyɛ́dɛ́ɛ́, podɛɔ́gɔ pə́gusəə lɛ́ moom mó konɛ mó Sə́dúk áa polɛɛ́ agonɛ.

²¹Kɛ́lɛ lɛ́, əgín ná puə́ləndin agonɛ́ɛnɛ, ɛ́nɛ́ mɔɔd ɔɔbɔgɔnɔn kusiəd moom muə́ŋ mó konɛ. Kɛáság kɛɛn lɛ́ póonɛ páalɛɛ njaan, pə́mmú pɛlóŋ pɛ́ maloʼ.

²²Podɛɔ́gɔ na toádɛʼ toáŋan lɛ́ pónɛ́ɛnɛ kɔ, poáŋo poloʼ aa? Oó lɛ́ kosɛ́ɛdɛ aa polɛɛ́ agosɛ́ɛdɛ pəə́liʼtiniʼ Táán óm, súʼtə́ə́ póyɛɛ́ʼkɛn oʼto kono na pá póʼkódií yoom ə́? Poanyɔ́ŋɛn lɛ́ nsəə nyɔʼkɔ́ nkə ə́? Mpoógany a? Ndóo, ntɛɔ́gɔ ogoboógany a ombod ó kɛbán wɔnɔ́ wóow.

²³Nkə kɛ́ mɛ njáʼkan na Sə́dúk, nkə kɛ́go kɛ́ njɛ́bosánɛ́nɛ aa kɛ́ɛnɛ: A udúg wó páyɛ́moólɛ́g, Sə́dúk Yə́sus yiídə́ə́míni pɛlɛ́ɛd,

²⁴amɛ́ʼkɛn pisoyidiʼ na Táán, aábɛ́ŋa, ɔnɔ́: «Taa, nkó yaam aa yɛ́ɛy, mbáálɛ́gɛ́ɛ́ a kidíídí kɛáŋan. Púdíin poɛlanɛ náan agɛnjaáyɔ́ɔ́ŋanɛ.»

²⁵Ná pɛ́ɛ́mán konɛ́ɛnɛ, yiísiə́d kilən kɛ́ maloʼ, amɛ́ɛ́lɛ yoom ímuʼ na kɛ́lɛ́, ɔnɔ́: «Kɛ́ɛnɛ kɛ́lɛ kilən kɛ́ maŋɔ́ máam. Mɔ́lɛ́ aa málɛɛ́ kisuŋ kɛ́ kíoloodi nɛálad nɛ́ nɛwa nɛ́ Táán amáládɛ́ɛ́ na pɔɔd. Kɛnɛŋ kiim kɛ́ polɛ́ɛ́ koŋo kɛ́lɛ́, póɛlɛ agɛnjaáyɔ́ɔ́ŋanɛ.»

²⁶Kɛ́lɛ lɛ́, kɛnɛŋ kiim kɛ́ polɛɛ́ agonɛ pɛlɛ́ɛd pɛ́ɛb, poáŋo kilən kɛ́ɛg, polɛ alɔɛgɛ anyóon kugu kó Sə́dúk, agɛɛn əgiig əgín a kɛnɛŋ kɛ́ alɛ́ɛ́ kimbuúlinií.

²⁷Kólɛ́ aa nyɔ́ alɛ́ɛ́ konɛ́ɛ́ pɛlɛ́ɛd, áaŋo kilən kɛ́ Sə́dúk nyɔ́lɛ́ na ɛgom a nkó, alɛ na nsɔ́ɔ́ agonɛ nkó yəəŋ, na agoŋo maŋó mə́ə́ŋ.

²⁸Ɛ́nɛ́ mɔɔd áyaŋ agaásóngɛ nyɔ́lɛ́nyɔ́amɔɛ́d agɛɛlɛ lɛ́ ə́díin anɛ pɛlɛ́ɛd pɛ́ɛb, áaŋo kilən kɛ́ɛg

²⁹lɛ́ nyɔ́ alɛ́ɛ́ konɛ́ɛ́ pɛlɛ́ɛd pɛ́ɛb, áaŋo kilən kɛ́ɛg ədiə́líʼtíníí lɛ́ nkó ɛ Sə́dúk áa ɛlɛɛ́nɔ, əmə́suídíníí nsɔ́ɔ́ nyɔ́lɛ́nyɔ́amɔɛ́d.

³⁰Nkə kɛ́ kɛ́lɛɛ́ agɛɛlɛ lɛ́ piíŋ a ondáŋ wááŋan pə́də́əŋən mabámbany aa kɛ́ɛg, pɛ́ɛn na pɛnɛ́m, ngab ngíŋ imə́əgu.

³¹Tɛmaʼkoyaŋ agaásóngɛ pəsibáamɔɛ́d, Táán adɛábɛɛ́yɔmɛ.

³²Náa, Sə́dúk alɛ agɛbɛɛ́yɔmɛ, aábɛʼpɔ́nɛsɛ agɛɛlɛ lɛ́ tidinjíím agɛɛn na nsɔ́ɔ́ ondáŋ úmmuʼ na pɔɔd pá a nsí yɛ́ɛnɛ.

³³Kólɛ́ aa, pəŋi pomóŋŋí páam, kɛnɛŋ kɛ́ pomágɔ́nyɛ́dɛ́ɛ́ agonɛ moom mó konɛ mó Sə́dúk, póbóŋanan pəŋi na pəŋi.

³⁴Wɛ nyɔ́ njaan yaágoobany, yaŋ əgiim ónɛ́ɛnɛ a noádɛʼ noáŋ ná pudiyə́suídíníí nsɔ́ɔ́ a nkó yaaŋan a mogony moáŋan. A noá na pɛbán pímmú pɛ́ndɛ́ŋ pɛ́ puyíŋíən, ndosóbini pɛ́lɛ́ ná ndə́giim a pəŋi.