Read Yambeta 1 Kɔlɛ́ɛnt 12 Bible Online

1 Kɔlɛ́ɛnt 12 - Yambeta bible

1 Kɔlɛ́ɛnt 12

¹Pomóŋŋí, tɛ́sánaan nɛ́gɔŋ a nkə kɛ́ Uŋun wó Ufúlúʼtú wáagɛɛ́ʼkɛnanan. Ndanyɔ́ŋɛn lɛ́ pólɛŋ fɔ́lɔ́b yɛ́ ɛlɛɛ́ kɔ a pɛbán pɛ́ɛb.

²Poálɛŋ lɛ́ ná poyɛ́ɛ puligi kalaʼ a ngə́ ɛ pandɛŋ Táán, podiɛn na toɛn tó kosáŋɛnɛ, puyə́díin lɛ́ pɔɔd pɛ́ndɛ́ŋ pə́buúdulə a pɛbán pɛ́ ambog, a moom mó módɛ́ɔsɔyɔɔ́.

³Kólɛ́ aa ndɛɛ́ anyɔ́ŋɛn lɛ́ pólɛŋ poɔʼkɔ́: Uŋun ó Táán áa wáamoyɛ́ɛlɛ lɛ́ ə́səə ɔnɔ́: «Tuúdudúú na Yə́sus!» Mɔɔd tɛn ɔdɛɔ́gɔ ugusəə ɔnɔ́: «Yə́sus alɛ Sə́dúk!» Uŋun wó Ufúlúʼtú ódɛmoyɛ́ʼkɛnɛn toɛn lɛ́ ə́səə náan.

⁴Ɛɛ́ɛ! Kɛ́lɛ náan fɔ́lɔ́b lɛ́ nkə kɛ́ Uŋun wó Ufúlúʼtú wáagɛɛ́ʼkɛnanan kɛ́lɛ a mbod a mbod. Náa, əgín Uŋun ogo úmmuʼ aa ólɛɛ́ na nɔŋáan nóon.

⁵Maʼtom málɛ a mbod a mbod. Náa əgín Sə́dúk ɛgo mmuʼ aa tɛlɛɛ́ əgugudin.

⁶Pungə́ tɛn pó kɛɛlɛ pólɛ a mbod a mbod. Náa əgín Táán ɛgo mmuʼ aa yaágɛɛ́ʼkɛn ungim pungə́ pó kɛɛlɛ nkə kɛ́ɛg kiim.

⁷Táán alɛ əguloodi a ɛ́nɛ́ mɔɔd wɔnɔ́ ná Uŋun wó Ufúlúʼtú ólɛɛ́ əgugud a kɔŋɛʼ kó mɔɔd ungim.

⁸Na wɛ nyummú, Uŋun wáagoyɛ́ʼkɛn lɛ́ ɔ́sɔyɔ a nsiŋ. Na sɔ́g nyummú, wáamoyɛ́ʼkɛn nsiŋ ɛgolɛŋ tɔgɛ́ɛ́.

⁹Əgín Uŋun ogo wóow úmmuʼ wáagɛɛ́ʼkɛn na nyummú lɛ́ yáag oʼto na Táán, na sɔ́g nyummú óomoyɛ́ʼkɛn toɛn tó koómanɛ mabámbany.

¹⁰Na nyummú, Uŋun əgín wóow úmmuʼ wáamoyɛ́ʼkɛn toɛn tó kɛɛlɛ mangán, na nyummú tɛn óomoyɛ́ʼkɛn lɛ́ álɔɛgɛ pɛbán pɛ́ Táán, na sɔ́g nyummú tɛn wáamoyɛ́ʼkɛn toɛn tóonɛ lɛ́ álɛŋ nkə kɛ́ kɛ́lɛɛ́ kɛ́ məŋun má mabɛ́, na kɛ́ kɛ́lɛɛ́ kɛ́ Uŋun ó fɔ́lɔ́b. Na sɔ́g nyummú, wáamoyɛ́ʼkɛn lɛ́ ɔ́sɔyɔ əʼkíí yá pɔɔd pándɛŋɛnɛɛ́, na nyummú, óomoyɛ́ʼkɛn lɛ́ ásánɛ a tɔgɛ́ɛ́ toɛ́ndɛ́ŋ, nkə kɛ́ pə́ə́səə a əʼkíí yɛ́ɛy.

¹¹Nkə kɛ́ɛg kiim, əgín Uŋun ogo wóow úmmuʼ aa ólɛɛ́ na kɛ́lɛ́. Wáagɛɛ́ʼkɛn na ɛ́nɛ́ mɔɔd nkə kɛ́ kɛ́lɛɛ́ ndɛ́ŋ na pɔsɔ́g. Ólɛ agɛɛlɛ əgín a nɛnyɔ́ŋɛn niə́ŋ.

¹²Tísiədəən nkaʼtɛ́n na nkó yəəs. Ɛlɛ kilúd kɛ́ yoom əgín náanɛ kímuʼ, na pɛʼkab piíŋ. Náa ɔmbɔ́ ná pɛʼkab pɛ́ɛb pɛ́lɛɛ́ náan piíŋ, piim pɛáládan agɛɛlɛ kilúd kɛ́ yoom əgín kímuʼ, nkó. [45]Náan tɛn aa kɛ́lɛɛ́ yoom ímuʼ na Kilíʼtus.

¹³Tɛlɛ lɛ́, pə́mmú Yúdɛn, pə́mmú pɛnɔɔŋɛʼ. Pɔsɔ́g pə́mmú pɛɔ́lɛ́, pə́mmú a nto yɔɔbɔn. Pəsi piim tiísiə́d ɔsɔgɛn a toɛn tó Uŋun wó Ufúlúʼtú əgín ogo úmmuʼ agɛɛlɛ lɛ́ tíɛn tɛn pəsi piim kɛfɔg kímuʼ. Əgín tɛn kɛmbóg kɛ́ Uŋun wó Ufúlúʼtú kɛ́ɛg kímuʼ aa tiɛ́ŋó wɔnɔ́ məní.

¹⁴Nkó ɛdɛɔ́gɔ kɛʼkab kímuʼ súg, ɛlɛ pɛʼkab piíŋ.

¹⁵Ongoo úməʼkusəə wɔnɔ́: «Wɔnɔ́ ná mɛ ntɛɔ́gɔ ombɔg, ntɛɔ́gɔ agoob anyóon na nkó», kɛáság kɛɛn lɛ́ úndigi anyóon kɛʼkab kɛ́ nkó á? Iyó!

¹⁶Oʼtóɛŋ oóo, wólɛ́ úməʼkusəə wɔnɔ́: «Wɔnɔ́ ná mɛ ntɛɔ́gɔ niis, ntɛɔ́gɔ agoob anyóon na nkó», kɛáság kɛɛn lɛ́ úndigi anyóon kɛʼkab kɛ́ nkó á? Iyó tɛn o!

¹⁷Nkó ɛyɛ́ɛnɛn niis nɛ́lɛ́ na nɛ́lɛ́ ná yaagoob tɔgɛ́ɛ́ tuə́? Ɛyɛ́ɛnɛn əgín oʼtóɛŋ wólɛ́ na wólɛ́ ná yaagoob kiluu tuə́?

¹⁸A fɔ́lɔ́b, Táán ayáágan pɛʼkab a nkó ɛ mɔɔd əgín wɔnɔ́ ná yɛɛ́nyɔ́ŋɛn.

¹⁹Nkó ngim ɛyɛ́ɛnɛn əgín kɛʼkab kímuʼ súg ná pɔ́dɛɔ́dɔ́ŋɔn lɛ́ nkó.

²⁰Pɛʼkab pɛ́lɛ piíŋ, náa nkó ɛlɛ mmuʼ súg.

²¹Niis nɛ́dɛɔ́gɔ nígusəə na ombɔg nɛɔ́nɔ́: «Ntigóodi kɛnɛŋ kɛáŋ!» Oʼto tɛn wóʼtɛánɛ na ambaan wɔnɔ́: «Ntigóodi kɛnɛŋ kɛáŋ!»

²²Kɛ́dɛɔ́gɔ kɛ́gɛɛn náan lɛ́, pɛʼkab pɛ́ nkó yəəs pɛ́ pɛ́lɛɛ́ agodɛ́ʼtɛganan pɛlɛbɛ́dáán, pɛ́lɛɛ́ pɛ́go aa pɛ́lɛɛ́ na pigólí agaáyɛn náan.

²³Pɛ́ tɛdɛɔ́gɔ əgusiədií wɔnɔ́ yoom, pɛ́lɛ́ aa tɛlɛɛ́ agolaŋ konyáadɛ. Pɛ́ pɛ́dɛɔ́gɔ na niiŋ, pɛ́lɛ́ aa tɛlɛɛ́ əgəə́gəʼkəəŋəni.

²⁴Pɛʼkab pɛ́ nkó pɛ́ ungim alɛɛ́ agodɛ́ʼtɛg, pídiə́guunə lɛ́ tiə́gəʼkəəŋəni. Náan aa Táán ayɛ́ɛ́lɛ nkó yəəs. Ɔnɔ́ pɛʼkab pɛ́ pɛ́dɛɔ́gɔ na niiŋ píɛn na nnyáádɛ́ agaáyɛn náan,

²⁵ná ɛsaa ɛ́dɛnjɛ́ɛ́n kɔ na pɛʼkab pɛ́ nkó. Ɛ́nɛ́ kɛʼkab kísiəd kɛnɛŋ na pɔsɔ́g.

²⁶Kɛnɛŋ kɛ́ kɛʼkab kɛ́ nkó kímuʼ kɛ́lɛ agoob kogany, pɛʼkab piim pɛ́agoob tɛn kogany na kɛ́lɛ́. Kɛnɛŋ kɛ́ pálɛ agonyáadɛ kímuʼ, piim pɛ́lɛ a tɔnyɔ́g na kɛ́lɛ́.

²⁷Náa kɛ́lɛɛ́ lɛ́, pəŋi piim polɛ nkó ɛ Kilíʼtus. Na ogo, kɛʼkab kɛ́ nkó yɛ́ɛy.

²⁸Náan aa a ɛgɔny ɛ́ pəə́liʼtiniʼ, Táán yiídə́nígə́ni lɛ́: Na oʼto na oʼto, alɛ pɔɔ́n pá maʼtom, a annam ábaan, palɔɛgɛʼ pɛbán pá Táán, annam ádáád, paaʼkananɛʼ pɔsɔ́g pɛbán pɛ́ Táán[46] Kuyə́əni kólɛ pɛɛlanɛʼ mangán. A ngim yɔɔbɔn alɛ poómanɛʼ mabámbany, pɛɛ́banɛʼ pɔsɔ́g pə́əyə́ən, poloodi pɔsɔ́g ngə́ pə́əyə́ən, pɔsɔyɔʼ əʼkíí yá pɔɔd pándɛŋɛnɛɛ́ pə́əbuyə́ən tɛn.

²⁹Adɛ́njaŋ ungim aa alɛɛ́ mɔɔ́n o maʼtom, ɔmbɔ́ lɛ́ ɔndɔɛgɛʼ pɛbán o Táán, oó lɛ́ ongaaʼkananɛʼ pɔsɔ́g, ndóo. Ungim ɔdɛɔ́gɔ tɛn ɔngɛɛlɛʼ mangán.

³⁰Ungim ɔdɛɔ́gɔ ongoómanɛʼ mabámbany, ɔmbɔ́ lɛ́ osɔyɔʼ əʼkíí yá pɔɔd pándɛŋɛnɛɛ́, oó lɛ́ ɔsánɛʼ nkə kɛ́ Uŋun wə́ə́səə a əʼkíí yɛ́ɛy.

³¹Náan anɛ́ɛ́n, Uunə́ən lɛ́ Uŋun wó Ufúlúʼtú óboyɛ́ʼkɛn nkə kɛ́ kɛ́lɛɛ́ kɛŋɛʼ agaáyɛn piim. Ndəbuúloodi nɛ́gɔŋ ngə́ yɛ́ ɛmááyɛn pɛbán pɛ́ɛb piim.