Read Yambeta 1 Kɔlɛ́ɛnt 13 Bible Online

1 Kɔlɛ́ɛnt 13 - Yambeta bible

1 Kɔlɛ́ɛnt 13

¹Nyɛɛn ɔmbɔ́ lɛ́ ndɛ agosɔyɔ tɔgɛ́ɛ́ tó pɔɔd na tó məŋun má maʼtom náa ntɛɔ́gɔ na nnyɔ́ŋánán, ndɛ wɔnɔ́ igóó yɛ́ ɛ́lɛɛ́ agodaŋ kodáŋáán, wɔnɔ́ unjə́ŋí wó pɔ́ɔgɔʼtɔn.

²Nyɛɛn ɔmbɔ́ lɛ́ ndɛ ɔndɔɛgɛʼ pɛbán o Táán, mɛ na kolɛŋ, ndáagoob pɛbán pɛ́ pɛ́lɛɛ́ pɛɔsɛ́gáán. Nyɛɛn ɔmbɔ́ na kəə́liʼtiniʼ kó kúəbugə nkon[47] náa ntigódií nnyɔ́ŋánán, ndɛ kifód.

³Nyɛɛn ɔmbɔ́ lɛ́ ndɛ ogaaba tugúm tuim tó nkódíí na pá pɔ́dɛɔ́gɔ na yoom, nyɛɛn ɔmbɔ́ lɛ́ ndɛ ogaádagɛdɛ a yug lɛ́ nkɔ́lɔ a kidíídí kɛ́ pɔsɔ́g náa ntigódií nnyɔ́ŋánán, nkə kɛ́ɛg kiim kɛ́dɛ́agɛnjɛɛ́bɛ.

⁴Mɔɔd nyɔ́ alɛɛ́ na nnyɔ́ŋánán, aanóʼtan, alɛ kisig kɛ́ mɔɔd, ɔdɛɔ́gɔ na yaág yɛ́ əngis, adɛágaábágɛdɛ, ədiə́gəə́gidən a igog,

⁵ɔdɛɔ́gɔ na pɛbán pɛ́ oʼto kono, ɔdɛɔ́gɔ na nɔgág, adɛágoob ilúún, adɛáyɛ́ngɛ́gɛ́ɛ́ mɔɔd a ɔʼtɛ́m,

⁶adɛányɔ́ga ná sɔ́g nyummú ɔmɔ́ɔ́ŋ kɔbɛ́, náa, alɛ na tɔnyɔ́g na nkə kɛ́ kɛ́lɛɛ́ fɔ́lɔ́b.

⁷Mɔɔd nyɔ́ alɛɛ́ na nnyɔ́ŋánán əəlisin pɔsɔ́g pɛnɛŋ piim, agaag oʼto na Táán a pɛbán piim, aamɛna pɛda pɛnɛŋ piim, aanóʼtan yiim.

⁸Nnyɔ́ŋánán ɛlɛ a pəliə́g. Kolɔɛgɛ pɛbán pɛ́ Táán kólɛ́ɛ́ koman wɔɔ́s. Kosɔyɔ a tɔgɛ́ɛ́ tó pɔɔd pándɛŋɛnɛɛ́ kólɛ́ɛ́ koman. Kolɛŋ tɛn kólɛ́ɛ́ koman wɔɔ́s.

⁹Kɛ́lɛ lɛ́, kolɛŋ kuə́s kólɛ kisug, ɔmbɔ́ tɛn kolɔɛgɛ pɛbán pɛ́ Táán kólɛ kisug.

¹⁰Náa, ná nkə kɛ́ kɛ́lɛɛ́ kɛŋɛʼ kúfuʼ kɛ́lɛ́ɛ́ kiim kɛ́báálɛ́ɛ́, kɛ́ kɛ́lɛɛ́ kisug kɛ́lɛ́ɛ́ kuwu.

¹¹Kɛnɛŋ kɛ́ njɛ́ɛ moóngaa, njɛ́ɛ agosɔyɔ wɔnɔ́ moóngaa, ndáafɛga wɔnɔ́ moóngaa, ndáagoob pɛbán wɔnɔ́ moóngaa. Náa, ná njáán mɔɔd, njáág osom a nkə kiim kɛ́ nɛóndaa kɛ́ kɛ́yɛ́ɛ na mɛ.

¹²A kó nɛ́gɔŋ, kifílí kɛ́ Táán kígə́ligi a əngis yə́ə́s púyi púyi wɔnɔ́ kílíndiʼ kɛ́ a kiʼtug kɛ́ wəə́. Náa, kɛnɛŋ kɛ́lɛ́ɛ́ kiim əgiig kɛ́ tɛlɛ́ɛ́ komodálaá əgín náanɛ moááŋ. Kó nɛ́gɔŋ, ntɛlɛŋɛn Táán kɔŋɛʼ kɔŋɛʼ. Náa, kɛnɛŋ kɛ́lɛ́ɛ́ kiim əgiig kɛ́ ndɛ́ɛ́ komoólɛŋɛɛ́ kɔŋɛʼ wɔnɔ́ ná nyɔ́lɛ́nyɔ́amɔɛ́d amɛ́ndɛŋ.

¹³Nɛ́gɔŋ anɛ́ɛ́n, moom móonɛ módáád mólɛ́ əgín kɔ. Mólɛ lɛ́: Kaag oʼto na Táán, komɛna pɛda, na nnyɔ́ŋánán. Náa, yoom yɛ́ ɛmááyɛn móom muim ɛ́lɛ nnyɔ́ŋánán.