Read Yambeta 1 Kɔlɛ́ɛnt 14 Bible Online

1 Kɔlɛ́ɛnt 14 - Yambeta bible

1 Kɔlɛ́ɛnt 14

¹Yoom ɛ́ na oʼto na oʼto yɛ́ púunəə́ ɛ́lɛ nnyɔ́ŋánán. Púyuunə tɛn kɛɛn na moom mó Uŋun wó Ufúlúʼtú wáagɛɛ́ʼkɛnanan. Kɔŋɛʼ kɔŋɛʼ kolɔɛgɛ pɛbán pɛ́ Táán.

²Mɔɔd nyɔ́ alɛɛ́ agosɔyɔ a əʼkíí yá pɔɔd pándɛŋɛnɛɛ́ alɛ agosɔyɔ na Táán. Ɔdɛɔ́gɔ agosɔyɔ na pɔɔd. Uŋun wó Ufúlúʼtú aa wə́əmudíʼkəni lɛ́ ɔ́sɔyɔ. Nkə kɛ́ alɛɛ́ əgusəə kɛ́lɛ yoom yɛ́ ɛ́lɛɛ́ ɛgányáán agoob kó mɔɔd.

³Náa, nyɔ́ alɛɛ́ alɔɛgɛ pɛbán pɛ́ Táán alɛ agosɔyɔ na pɔɔd. Áabogónɛ ɔʼtɛ́m, əə́buúwiiyi wólɛ́, aáboyɛ́ɛlɛ lɛ́ pə́ə́bis a kəə́liʼtiniʼ.

⁴Nyɔ́ ɔɔ́sɔyɔ əʼkíí yá pɔɔd pádɛ́agoóbɛ́ɛ́, kɛ́amoɛ́bɛ əgín nyɔ́lɛ́nyɔ́əsíŋ. Kɔmɔɛ́d lɛ́ nyɔ́ alɛɛ́ alɔɛgɛ pɛbán pɛ́ Táán, alɛ agɛɛlɛ lɛ́ pəə́liʼtiniʼ piim págon a ngə́ ɛ Táán.

⁵Ndɛ anyɔ́ŋɛn lɛ́ ná pəŋi piim poɔ́sɔyɔ a əʼkíí yá pɔɔd pándɛŋɛnɛɛ́. Náa, ndɛ agolaŋ kɔnyɔ́ŋɛn lɛ́ ná pomɛ́ɛn palɔɛgɛʼ pɛbán pá Táán. Mɔɔd nyɔ́ alɛɛ́ alɔɛgɛ pɛbán pɛ́ Táán, aagɛɛ́bɛ pɔsɔ́g agaáyɛn nyɔ́ alɛɛ́ ɔsɔyɔ a əʼkíí yá pɔɔd pándɛŋɛnɛɛ́. Əgín wɔʼkɔ́ mɔɔd aásánánɛ a tɔgɛ́ɛ́ toɛ́ndɛ́ŋ nkə kɛ́ əə́səə, agɛɛlɛ lɛ́ pəə́liʼtiniʼ piim págon a ngə́ ɛ Táán.

⁶Pomóŋŋí ndəbuŋíən náan anɛ́ɛ́n lɛ́ əə, mbəʼkiim a pəŋi, mbə́bə́ə́ koboósɔyɔn a əʼkíí yá pɔɔd pádɛ́agoóbɛ́ɛ́, ná mbáboɛ́bɛ a igə kímuʼ? Ná ntɛboɛ́bɛnɛ a yoom ɔmbɔ́ ímuʼ. Əgín wɔʼkɔ́ mbáboyásɛ́nɛn moááŋ nkə kɛ́ Táán əmíndoodi, oó lɛ́ mbáboyɛ́ɛ́lɛ lɛ́ pólɛŋ pafɔ́lɔ́b, ɔmbɔ́ lɛ́ mbábolɔɛ́gɛ́nɛ pɛbán pɛ́ Táán, oó lɛ́ mbáboyáʼkánánɛ yoom.

⁷Tísiədəən nkaʼtɛ́n na mogoágóa mó kubin wɔnɔ́ uʼkə́ŋ, ɔmbɔ́ lɛ́ igóó. Kɛnɛŋ kɛ́ mɔɔd nyɔ́ alɛɛ́ agogo, asálɛ́na ambaan, tuə́ áa mɔɔd aálɛŋ ongoo ó kubin wó alɛɛ́ agogo ə́?

⁸Mɔɔd alɛ agogo ɛdɔŋ ɛ́ kodɔ́ŋɔn kubúəm náa ɔdɛɔ́gɔ agolɛŋ kodɔ́ŋɔnɛɛ́ əə, ánɛ aa aágaáboŋɛn kɛɛn kubúəm kógo ə́?

⁹Náan aa pəŋi tɛn polɛɛ́. Posɔyɔn tɔgɛ́ɛ́ tó pɔɔd páagoob, tuə́ áa páagɛɛlɛ agoob nkə kɛ́ polɛɛ́ əgusəə. Poádó toáŋan tóod a kidun.

¹⁰Əʼkíí álɛ síɛ́ɛ́d a nsí. Nímmú nɛ́dɛɔ́gɔ kɔ nɛ́ mɔɔd adɛágoóbɛ́ɛ́.

¹¹Náa, kɛnɛŋ kɛ́ mɔɔd alɛɛ́ agosɔyɔ nigíí niə́ŋ, ntɛób, mɔɔd nyóon alɛ kɛnɔɔŋɛʼ a udi wáam, mɛ tɛn ndɛ kɛnɔɔŋɛʼ a udi wə́ə́ŋ.

¹²Yoom tɛn ímuʼ náan na pəŋi. Wɔnɔ́ ná polɛɛ́ anyɔ́ŋɛn kɛ́fɔlɛ́ kɛɛn na moom mó Uŋun ó Táán wáagɛɛ́ʼkɛnanan, pólaŋ kuunə kɛɛn na mó móagɛɛ́bɛ pəə́liʼtiniʼ lɛ́ págon a ngə́ ɛ Táán.

¹³Kólɛ́ aa, nyɔ́ alɛɛ́ agosɔyɔ a əʼkíí yá pɔɔd pándɛŋɛnɛɛ́, ogóódi lɛ́ yɔ́sɔ́gɔlɔn Táán lɛ́ ámoyɛ́ɛlɛ, nkə kɛ́ɛg kɛ́ əə́səə, ásánɛ kɛ́lɛ́ a tɔgɛ́ɛ́ tó pɔɔd páagoob.

¹⁴Kɛ́lɛ lɛ́, kɛnɛŋ kɛ́ ndɛ ɔgɔɔ́sɔ́gɔlɔn Táán a əʼkíí yá pɔɔd pándɛŋɛnɛɛ́, uŋun wáam ólɛ a pɛɔ́sɔ́gɔ́lɔ́n, náa, mɛ ntɛɔ́gɔ agolɛŋ nkə kɛ́go kɛ́ ndɛɛ́ əgusəə.

¹⁵Nyɛ́ɛlɛ anɛ́ɛ́n tuə́ áay əə́? Ndɔgɔɔ́sɔ́gɔlɔn a uŋun wáam a əʼkíí yá pɔɔd pándɛŋɛnɛɛ́, njɔɔ́sɔ́gɔlɔn tɛn a tɔgɛ́ɛ́ tó ndáagoob. Ndəədúmən Táán pɛlɛ́ɛ́ a uŋun wáam a əʼkíí yá pɔɔd pándɛŋɛnɛɛ́, ndə́ədúmə tɛn a tɔgɛ́ɛ́ tó ndáagoob.

¹⁶Kɛ́lɛ lɛ́, wɛ omaʼkɛɛ́ʼkɛn Táán pisoyidiʼ a uŋun wááŋ a tɔgɛ́ɛ́ tó mɔɔd andɛŋɛnɛɛ́, tuə́ áa pɛcángaŋ pɛ́ pɛ́lɛɛ́ kɔ áay a nɛágɔnyɛd nɛáŋan, pɛ́lɛ́ pɛ́ pɛ́dɛ́njaŋ koóbɛ́ɛ́ ombod ó tɔgɛ́ɛ́ wɔnɔ́ wóow, píəguúlisi lɛ́ «Aamɛn» pádɛób nkə kɛ́ wəə́səə a pɛɔ́sɔ́gɔ́lɔ́n pɛ́go ə́?

¹⁷Ɔmbɔ́ pɛɔ́sɔ́gɔ́lɔ́n pɛáŋ pɛ́ omɛ́ʼkɛn na Táán pɛ́dɛ́ɛ́ wɔnɔ́ nkə, pɛ́dɛ́aboɛ́bɛ lɛ́ págon a kəə́liʼtiniʼ.

¹⁸Ndɛ əgusoyidəni Táán lɛ́ mɛ mbáboóláŋ pəŋi piim a noá na kosɔyɔ əʼkíí yá pɔɔd pándɛŋɛnɛɛ́.

¹⁹Náa, kɛnɛŋ kɛ́ ndɛ a udi ó pəə́liʼtiniʼ paágɔ́nyɛ́dáán, ndɛ na tɔnyɔ́g lɛ́ nsəə pɛbán pɛ́ʼtáan pɛ́ pɔɔd páagoob agɛɛlɛ lɛ́ mpoyáʼkananɛ yoom a pɛ́lɛ́, agosan lɛ́ nsəə tɔ́ɔ́sɛn ɛ pɛbán a əʼkíí yá pɔɔd pándɛŋɛnɛɛ́.

²⁰Pomóŋŋí, agosóngɛ kó pɛbán podɛnjɛ́ɛ́n wɔnɔ́ poómbaa. Náa, a kɔbɛ́, póɛn poómbaa. Agosóngɛ kó pɛbán, póɛn pɔɔd pá páʼkogónɛ́ɛ́.

²¹Kɛ́lɛ kidiídílə́ a Kálaʼtaʼ ɛ Táán lɛ́: «Sə́dúk ɔnɔ́: A nnuʼ ó pá pɔ́ɔsɔyɔ tɔgɛ́ɛ́ tó pɔɔd pándɛŋɛnɛɛ́ aa ndɛ́ɛ́ kosɔyɔɔ́ na ndɛg yɛ́ɛy. A unuʼ ó pɛnɔɔŋɛʼ aa ndɛ́ɛ́ kosɔyɔɔ́ na pɔɔd páam. Ɔmbɔ́ náan, pádɛndɛ́ɛ́ kɛnjoob[48]»

²²Náan anɛ́ɛ́n, kosɔyɔ a əʼkíí yá pɔɔd pándɛŋɛnɛɛ́ kólɛ kɛálɛ́ʼkán a pá pɔ́dɛɔ́gɔ əgəə́liʼtinií, adɛ́njaŋ a pəə́liʼtiniʼ. Kɔmɔɛ́d lɛ́ kolɔɛgɛ pɛbán pɛ́ Táán kólɛ́ kólɛ kɛálɛ́ʼkán a pəə́liʼtiniʼ, adɛ́njaŋ a pá pɔ́dɛɔ́gɔ əgəə́liʼtinií.

²³Tísələə́n lɛ́ pəə́liʼtiniʼ piim pálɛ paágɔ́nyɛ́dáán, náa pɔ́lɛ́ piim pálɛɛ́ agosɔyɔ a əʼkíí yá pɔɔd pándɛŋɛnɛɛ́. Pɛcángaŋ na pɔɔd pá pə́diə́gəə́liʼtinií pə́məʼkiim ɔsɔd kɔ áay kɛnɔ kɛ́ polɛɛ́, pə́diə́səə lɛ́ poáʼkaán piyəg ə́?

²⁴Kɔmɔɛ́d lɛ́ pɔ́nɔ́ pɛbán pɛ́ Táán áa ungim ayɛ́ɛ alɔɛgɛ, kɛcángaŋ, oó lɛ́ mɔɔd nyɔ́ ədiə́gəə́liʼtinií əməʼkiim ɔsɔd, nkə kɛ́ alɛɛ́ agoob kɛ́agɛɛlɛ lɛ́ yáálɛŋ lɛ́ nyɔ́lɛ́ alɛ ɔngɛɛlɛʼ kɔbɛ́. Nkə kɛ́ɛg kɛ́ aágoob kɛ́amoodɔ́bɔ a ɔʼtɛ́m,

²⁵aaman kaálónɛ nkə kiim kɛ́ kɛ́yɛ́ɛ a ɔʼtɛ́m wə́ə́ŋ, əədúŋim udi a nsí, aagɛɛ́ʼkɛn nnyáádɛ́ na Táán, ɔnɔ́: «A fɔ́lɔ́b Táán alɛ a kɛgaágadɛ kɛáŋan!»

²⁶Pomóŋŋí, áay anɛ́ɛ́n nɛ́gɔŋ oóo, kɛɛlɛ tuə́? Kɛnɛŋ kɛ́ pomágɔ́nyɛ́dɛ́ɛ́ a pɛɔ́sɔ́gɔ́lɔ́n, póɛn lɛ́ úmmu a ondáŋ wááŋan ə́dúmidin Táán kɛlɛ́ɛ́, nyummú áyaʼkananɛ pɔsɔ́g yoom, nyummú áadɛ́anɛ nkə kɛ́ Táán əmə́mulóódi, nyummú ɔ́ɔsɔyɔ a əʼkíí yá pɔɔd pándɛŋɛnɛɛ́, nyummú áasánɛnɛ pɔsɔ́g nkə kɛ́ nyóon əə́səə. Pɛ́ɛb piim pígóódi lɛ́ piɛ́bɛ pəə́liʼtiniʼ agɛɛlɛ lɛ́ págon a ngə́ ɛ Táán.

²⁷Pámaʼkɛɛn kɔ pá páanyɔ́ŋɛn kosɔyɔ a əʼkíí yá pɔɔd pándɛŋɛnɛɛ́, nto ɛ́baan, oó lɛ́ ɛ́dáád ɛ́sɔyɔ, pádɛndáŋ náan. Ɛ́nɛ́ sɔ́g a kiə́ŋ kɛnɛŋ. Mɔɔd ogóódi kɛɛn kɔ nyɔ́ aásánanɛ a tɔgɛ́ɛ́ tó pɔɔd páagoob, nkə kɛ́ɛg kɛ́ pə́ə́səə.

²⁸Mɔɔd adiɛnɛn kɔ ogosánɛnɛ pɔsɔ́g nkə kɛ́ pə́əsəə, pɔ́lɔg unuʼ, pɔ́sɔyɔ na Táán kɔ a ntɛ́m yɔɔbɔn a kaadɛ.

²⁹A pɔsɔ́g pá pálɛɛ́ alɔɛgɛ pɛbán pɛ́ Táán, nto ɛ́baan, ɔmbɔ́ lɛ́ ɛ́dáád súg ísiəd tɔgɛ́ɛ́, pɔsɔ́g pə́mmú pálɛŋ koboyádámɛgɛ, píiyə agolɛŋ nga nkə kɛ́ pálɛɛ́ əgusəə kɛ́lɛ fɔ́lɔ́b.

³⁰Mɔɔd nyummú amaʼkɛɛn kɔ nyɔ́ Táán amáásɛ́nɛn yoom kɔ áay tɛn, sɔ́g nyɔ́ alɛɛ́ agosɔyɔ ə́ləndin yəə́b.

³¹Pəŋi piim polɛ págɔlɔɛgɛ pɛbán pɛ́ Táán, náa ɛ́nɛ́ mɔɔd ə́siəd tɔgɛ́ɛ́ a kiə́ŋ kɛnɛŋ agɛɛlɛ lɛ́ ungim yáaʼkan yoom kɔ, tóogónɛ tɛn ungim nkó.

³²Ɔndɔɛgɛʼ pɛbán ó Táán ogóódi lɛ́ ɔ́nyɔŋ uŋun wóow wó ólɛɛ́ na nyɔ́lɛ́

³³lɛ́ Táán ɔdɛɔ́gɔ Táán yɛ́ yəə́gəə́yúnjugəni, alɛ Táán ɛ kiwiiyiʼ. Wɔnɔ́ ná kɛ́lɛɛ́ agaáyɛ́ɛlɛ a mogony muim mó pɔɔd pá pálɛɛ́ əgəə́liʼtini Táán,

³⁴pagɛ́ɛd pógóódi kolɔg nnuʼ, pádɛsɔ́yɛd a mólɛ́. Pə́ə́suuli nkó a nsí wɔnɔ́ ná kɛ́lɛɛ́ kidiídílə́ a kálaʼtaʼ ɛ pɛcɛm.

³⁵Pámaʼkɛɛn na kɛbán kɛ́ kuŋíən, pə́ŋíən na panom pɔ́ɔ́bɔn a noádɛʼ. Kɛ́dɛɔ́gɔ kɔŋɛʼ lɛ́ ɔʼkɛ́ɛd ɔ́sɔyɔ a nɛgɔny nɛ́ pəə́liʼtiniʼ[49]

³⁶Polɛ agofɛg lɛ́ a pəŋi aa Tɔsɔm tó Táán túmíim tódɛ́ɛmɛn oóm! Oó lɛ́ poɔʼkɔ́ əgín pəŋibə́əsíŋ áa poyóób tólɛ́ ə́!

³⁷Nga mɔɔd alɛ afɛga lɛ́ nyɔ́lɛ́ alɛ ɔndɔɛgɛʼ pɛbán o Táán, ɔmbɔ́ lɛ́ Uŋun ó Táán ólɛ na nyɔ́lɛ́, ogóódi kolɛŋ lɛ́ nkə kɛ́ɛnɛ kɛ́ mbə́dilə, Sə́dúk áa əə́səə náan.

³⁸Nyɔ́ aásáŋɛnɛ kolɛŋ náan, áay lɛ́ Táán adɛmoólɛŋɛn tɛn nyɔ́lɛ́.[50]

³⁹Náan anɛ́ɛ́n pomóŋŋí, kɛ́ yuudi yuudi, púunə kɛɛn palɔɛgɛʼ pɛbán pá Táán, náa, podɛsáŋɛ́nɛ tɛn lɛ́ pɔ́sɔyɔ a əʼkíí yá pɔɔd pándɛŋɛnɛɛ́.

⁴⁰Náa kɛbán kímuʼ, nkə kɛ́ɛg kiim kígóódi kaáyɛ́ɛlɛ wɔnɔ́ ná kíəgəə́yúunə, poʼtɔ́b pɛbán.