Read Yambeta 1 Kɔlɛ́ɛnt 15 Bible Online

1 Kɔlɛ́ɛnt 15 - Yambeta bible

1 Kɔlɛ́ɛnt 15

¹Pomóŋŋí, ndɛ agoboyáyɔ́ɔ́ŋɛnɛ Tɔsɔm Tólaŋ tó njɛ́bolɔɛ́gɛ́nɛ, Tɔsɔm tó poyáág oʼto a tólɛ́, pomáyaágon a tólɛ́.

²A tólɛ aa Táán alɛ́ɛ́ kosánɛ́ɛ́ agɛɛlɛ lɛ́ áboyɔ́ɔyɛ ná puə́gumin tólɛ́ əgín wɔnɔ́ ná njɛ́bolɔɛ́gɛ́nɛ. Náan fiɛ́d, kəə́liʼtiniʼ koáŋan kuə́suu məní.

³Táá yoom ɛ́ na oʼto na oʼto yɛ́ njɛ́boyáʼkánánɛ aa yɛ́ɛnɛ. Yɛ́lɛ́ ɛgo tɛn aa páyɛ́nyaʼkánánɛ mɛ. Yɛ́ aa yɛ́ɛnɛ lɛ́: Əgín wɔnɔ́ ná kíyə́dílə́ə́, Kilíʼtus yiígú a oʼto ó mabɛ́ mə́ə́s.

⁴Pə́yímuúní, a mɔɔ́s mádáád, əyíím yóndɛg, əgín wɔnɔ́ ná kíyə́dílə́ə́.

⁵Yɛɛ́lónɛn Sɛ́fas, [51] amáyɛɛn alónɛn tɛn pɔɔ́n pá maʼtom pá pówád na pábaan[52]

⁶A ngim yɛ́ɛy, yɛɛ́lónɛn tɛn paaʼkan pə́ə́ŋ, kosan ɔ́ndɛd ɛ́ʼtáan. Ayɛ́bolónɛn pɔ́lɛ́ piim a kɛnɛŋ kímuʼ. Ngab ɛ paaʼkan ngíŋ a pɔ́lɛ́ iligi a ɔlaa, pɔsɔ́g pə́mmú pə́ʼkuguə́ʼkən.

⁷A ngim yɛ́ɛy tɛn, yɛɛ́lónɛn Sɛ́ag, amáalónɛn pɔɔ́n pá maʼtom piim.

⁸A ngim ɛ pɔɔd póob piim, ayɛ́ndónɛn tɛn mɛ. Mɛ nyɔ́ ndɛɛ́ wɔnɔ́ mɔɔ́n nyɔ́ uʼtom nyɔ́ adɛ́ʼkáagónɛ́ɛ́.

⁹Kɛ́lɛ lɛ́, a pɔɔ́n pá maʼtom piim, mɛ áa ndɛɛ́ isúgəniʼ ngim. (Əgusəə kó fɔ́lɔ́b, ntɛɔ́gɔ sɛ́ɛb nyóonɛ lɛ́ pɛ́ɛʼtɔ́ŋɔn lɛ́ mɔɔ́n o maʼtom, ) lɛ́ nyɛɛ́nɔɛ́yɛ pəə́liʼtiniʼ a kúfuʼ[53]

¹⁰Náa, Táán əyíndoodi kɔdɛ́ɛ ɔʼtɛ́m kuə́ŋ agɛɛlɛ lɛ́ nyɛ́ɛn nkə kɛ́ ndɛɛ́. Kɔdɛ́ɛ ɔʼtɛ́m kuə́ŋ kóog na mɛ kúsuulin məní, mbə́gud agaáyɛn pɔɔ́n pá maʼtom piim. Ndóo, a fɔ́lɔ́b, adɛ́njaŋ mɛ áa mbɛ́ɛ́lɛ pigólí pɛ́ɛb náan, mawɔʼ má Táán má málɛɛ́ na mɛ áa málɛɛ́ na pigólí pɛ́ɛb náan.

¹¹Agosom kosómáán, kɛ́yɛɛn ɔmbɔ́ lɛ́ mɛ óo, ɔmbɔ́ lɛ́ pɔɔ́n pá maʼtom pɛ́ndɛ́ŋ óo, táá nkə kɛ́ tɛlɛɛ́ alɔɛgɛ aa kɛ́ɛg, kɛ́lɛ́ kɛ́go kɛ́ poyáág oʼto a kɛ́lɛ́.

¹²Tɛlɛ alɔɛgɛ lɛ́ Kilíʼtus ayóndɛg a pɛlóŋ. Tuə́ anɛ́ɛ́n áa ngab yimmú a ondáŋ wááŋan ɛlɛɛ́ əgiiʼkini kusəə lɛ́ pɛlóŋ pɛ́dɛ́agoóndɛg əə́?

¹³Kɛ́maʼkɛɛn fɔ́lɔ́b lɛ́ pɛlóŋ pɛ́dɛ́agoóndɛg, áay lɛ́ Kilíʼtus tɛn adɛʼkáagoóndɛg.

¹⁴Nga kɛ́lɛ lɛ́ Kilíʼtus adɛʼkáagoóndɛg, nkə kɛ́ tɛlɛɛ́ alɔɛgɛ kɛ́lɛ anyóon iyó. Pəŋi poágɛn oʼto tɛn anyóon na Táán a náan iyó.

¹⁵Kɛ́maʼkɛɛn fɔ́lɔ́b lɛ́ pɛlóŋ pɛ́dɛ́agoóndɛg, tɛádɛ́lɛ́mɛn anyóon Táán mbaasɔ́ ɛ pɛnyaʼ lɛ́ tɛlɛ əgusəə tɛɔʼkɔ́ ayóndɛ́gɛ Kilíʼtus, kɔmɔɛ́d lɛ́ adɛʼkáamoyóndɛgɛ.

¹⁶Nga pɛlóŋ pɛ́dɛ́agoóndɛg, áay lɛ́ Kilíʼtus tɛn adɛʼkáagoóndɛg.

¹⁷Nga fɔ́lɔ́b lɛ́ Kilíʼtus adɛʼkáagoóndɛg, pomáág oʼto anyóon a náan iyó, mabɛ́ mááŋan mə́ligi na pəŋi.

¹⁸Kɛ́maʼkɛɛn náan anɛ́ɛ́n, pá píígú oʼto wɔ́ɔ́bɔn na Kilíʼtus, póob pálɛ pənímə́ə́n.

¹⁹Sɔ́ɔ́lɛʼ kɛ́fɔlɛ́ na pəsi agaáyɛn ungim, nga tɛyɛ́ɛ agomɛna pɛda na Kilíʼtus əgín a oʼto wó ɔlaa wó a nsí yɛ́ɛnɛ.

²⁰Náa a fɔ́lɔ́b Kilíʼtus ayóndɛg a pɛlóŋ agɛɛlɛ lɛ́ nyɔ́lɛ́ aa yɛ́ɛnɛɛ́ na oʼto na oʼto ugiim yóndɛg a pɛlóŋ, əguloodi lɛ́ pɛlóŋ pɛ́lɛ́ɛ́ koóndɛgan.

²¹Kɛ́lɛ lɛ́, a oʼto ó mɔɔd úmmuʼ aa kugu kuídə́əŋ a nsí. Náan aa koóndɛg tɛn kó pɛlóŋ kólɛ́ɛ́ kɛɛnɛɛ́ a oʼto ó mɔɔd úmmuʼ.

²²Wɔnɔ́ ná kɛ́lɛɛ́ lɛ́ a oʼto wóonɛ lɛ́ pɔɔd pálɛ paladáán na Ádam aa pálɛɛ́ əgugu, náan aa pálɛ́ɛ́ kiiʼkini kɛɛnɛɛ́ a ɔlaa tɛn a oʼto wóonɛ lɛ́ pálɛ paladáán na Kilíʼtus[54]

²³Náa, kɛbán kímuʼ. Ɛ́nɛ́ mɔɔd alɛ́ɛ́ kɛɛn a niə́ŋ niɛŋ. Kilíʼtus aa alɛ́ɛ́ kusúidií ondáŋ o pá pámóndɛg, ná a ngim yəəŋ ungim nyɔ́ alɛɛ́ agoob na nyɔ́lɛ́ ə́díin yiim ə́muyə́ən.

²⁴A ngim yɛ́ɛy anɛ́ɛ́n áa nɛman nɛ́ nsí nɛ́lɛ́ɛ́ kɛɛnɛɛ́ kɔ. Kilíʼtus alɛ́ɛ́ kuwíiyi toɛn tuim tó tólɛɛ́ a nsí, na puʼkúm poɔ́bɔn puim kɛ́, na mbod ɛ toɛn ngim, ná a ngim yɛ́ɛy nyɔ́lɛ́ yɛ́ɛn əsuuli nɛlaamɛʼ niə́ŋ a ombɔg ó Táán Sɛ

²⁵lɛ́ nyɔ́lɛ́ aa ogódíí lɛ́ álaamɛ súʼtə́ə́ agɛɛn əgiig a wɔɔ́s wó Táán alɛ́ɛ́ kɛɛlɛɛ́ lɛ́ ungim yíim onyoŋim a udi wə́ə́ŋ[55]

²⁶Las ɛ yoom yɛ́ alɛ́ɛ́ kuwíyií, yoom yɛ́ alɛɛ́ agobɛnɛn, ɛ́lɛ kugu.

²⁷Kɛ́lɛ fɔ́lɔ́b lɛ́ náan aa kɛ́lɛɛ́ kidiídílə́ a Kálaʼtaʼ lɛ́: «Táán yiísúúli yiim a ambaan yə́ə́ŋ[56]» Náa, kɛ́lɛ lɛ́ a nkə kɛ́ɛg kɛ́ əə́səə lɛ́: «Yiim ɛ́lɛ́ɛ́ kudúŋim a udi wə́ə́ŋ», Táán nyɔ́ yiísúúli yiim a ambaan á Kilíʼtus ɔdɛɔ́gɔ nyɔ́lɛ́nyɔ́amɔɛ́d kɔ a ondáŋ wóow.

²⁸Áay anɛ́ɛ́n, ná aláa nyɔ́lɛ́ Mɔɔ́n o Táán aándalaamɛ yiim, alɛ́ɛ́ kɛɛn əgəə́suuli nyɔ́lɛ́nyɔ́amɔɛ́d lɛ́ Sɛ nyɔ́ ayɛ́moyɛ́ʼkɛn yiim ámoólaamɛ anɛ́ɛ́n. Yiim ɛ́lɛ́ɛ́ koob na Táán. Nyɔ́lɛ́ aa alɛ́ɛ́ kolamɛɛ́ yiim.

²⁹Kɛ́dɛʼkɛ́ɛ agɛɛn náan əə, ná pá pálɛɛ́ agaásɔgɛn a oʼto ó pá píígú, páamɛna pɛda a igə kímuʼ ə́? Nga kɛ́lɛ fɔ́lɔ́b lɛ́ pɛlóŋ pɛ́dɛndɛ́ɛ́ koóndɛg əə́, pá pálɛɛ́ agaásɔgɛn a oʼto ó pá píígú əə, pálɛ agaásɔgɛn lɛ́ nkə ə́?

³⁰Pəsibáamɔɛ́d tɛn o, a igə aa kugu kúəbiínugin pɛnɛŋ piim a niúd ə́?

³¹Pomóŋŋí, mɔɔ́s miim ndɛ ofob kugu. Kɛ́lɛ náan fɔ́lɔ́b, əgín tɛn wɔnɔ́ ná kɛ́lɛɛ́ fɔ́lɔ́b tɛn lɛ́ ndɛ əgəə́gidən a igog a kidíídí kɛáŋan wɔnɔ́ ná polɛɛ́ paladáán na Yə́sus Kilíʼtus, Sə́dúk wəəs.

³²Nga pɛdá pɛ́ nyɛɛ́nɔɛ́yɛ na ponyam pó kidun a Ɛfɛ́ɛs, nyɛɛ́nɔɛ́yɛ pɛ́lɛ́ na mafɛgaʼ má pɔɔd, kɛ́agɛnyɛɛ́bɛ a igə? Nga kɛ́lɛ fɔ́lɔ́b lɛ́ pɛlóŋ pɛ́dɛ́agoóndɛg, Tíɛlɛán anɛ́ɛ́n wɔnɔ́ ná pálɛɛ́ əgusəə lɛ́: «Tɛ́nɛ́an, tɛ́ŋo lɛ́ na koany tiəgu[57]»

³³Pudiyə́lígə́ə́ pəŋibáamɔɛ́d: «Mɔɔd amaʼkɛɛn ɔŋŋɛʼ náa alɛɛ́ a ondáŋ ó pɛbɛ́ pɛ́ pɔɔd, mɔɔd nyóon aalɛ́aŋ.»

³⁴Ímbuúlíníən a oʼtɛ́lɛm ólaŋ wɔnɔ́ ná kíəgəə́yúunə, podɛnjɛ́ɛ́lɛ kɔbɛ́ kə́mmú. Ndɛ əgusəə náan agoboyɛ́ʼkɛn oʼto kono lɛ́ ngab yimmú a ondáŋ wááŋan yɛndɛŋɛn Táán.

³⁵Náa, mɔɔd alɛ ugəə́ŋíən ɔnɔ́ əə: «Tuə́ áa pɛlóŋ pɛ́lɛ́ɛ́ koóndɛgɛɛ́ ə́? Na nkó ɛyaán áa pálɛ́ɛ́ koóndɛgɛɛ́ na yɛ́lɛ́ ə́?»

³⁶Nyɔ́ əə́gəə́ŋíən náan alɛ kiyəg! Masám má mɔɔd əə́misə mógóódi lɛ́ mə́gu agɛɛlɛ lɛ́ málog.

³⁷Nkə kɛ́ olɛɛ́ agogon, kɛ́lɛ iyənjə́g yɛ́ nsám, ɔmbɔ́ lɛ́ niis nɛ́ ongafón. Nkə kɛ́ waágón kɛ́dɛɔ́gɔ yoom ímuʼ na nkə kɛ́ kíəgiim kɛ́log.

³⁸A ngim yɛ́ɛy, Táán agɛɛlɛ lɛ́ nkə kɛ́ waágón kíɛn na nkó yɛ́ aányɔ́ŋɛn. Ɛ́nɛ́ nsám yaalog wə́ə́ŋ ombod ó kiɛd.

³⁹Moom muim mó mólɛɛ́ a ɔlaa módɛɔ́gɔ na nkó mmuʼ. Nkó ɛ pɔɔd ɛlɛ ndɛ́ŋ, ɛ ponyam ndɛ́ŋ, ɛ pɛsag ndɛ́ŋ, ɛ pusú ndɛ́ŋ.

⁴⁰Pogó pó moom mó mólɛɛ́ a mɔɛn pólɛ kɔ, pó moom mó mólɛɛ́ a nsí pólɛ tɛn kɔ. Kɔdɛ́ɛ kó moom mó mólɛɛ́ a mɔɛn kólɛ ndɛ́ŋ na mó mólɛɛ́ a nsí.

⁴¹Wɔɔ́s ólɛ na kuə́ŋ kɔdɛ́ɛ ndɛ́ŋ, kó wəə́ ndɛ́ŋ, kó muə́dədəʼ ndɛ́ŋ. Ɔmbɔ́ a muə́dədəʼ mólɛ ndɛ́ŋ ndɛŋ ndɛ́ŋ. Yímmú ɛ́lɛ ndɛ́ŋ na sɔ́g a kɔdɛ́ɛ.

⁴²Náan aa kɛ́lɛ́ɛ́ kɛɛnɛɛ́ kɛnɛŋ kɛ́ pɛlóŋ pɛ́lɛ́ɛ́ koóndɛgɛɛ́. Nkó yɛ́ɛnɛ yɛ́ pɔ́ɔdɔ́ɔg a kəəniʼ, yɔɔbɔnɔ. Yɛ́ yəə́ʼkiim yóndɛgɛɛ́, idiə́giʼkini kobɔnɔ kə́mmú.

⁴³Nkó yɛ́ pə́ə́ni ɛdɛɔ́gɔ na nugəm, ɛdiɛn na toɛn. Yɛ́ ɛmóndɛg yaándɛ na nugəm, yaándɛ tɛn na toɛn.

⁴⁴Nkó yɛ́ pə́ə́ni ɛlɛ kɛdɔb, yɛ́ ɛmóndɛg ɛlɛ uŋun. Nkó yɛ́ ɛlɛɛ́ kɛdɔb ɛmaʼkɛɛn kɔ, áay lɛ́ yɛ́ ɛlɛɛ́ uŋun ɛlɛ tɛn kɔ.

⁴⁵Kɛ́lɛ fɔ́lɔ́b lɛ́ Kálaʼtaʼ ɛ Táán ɛlɛ əgusəə lɛ́: «Ádam, mɔɔd o na oʼto na oʼto ayáán mɔɔd nyɔ́ alɛɛ́ a ɔlaa[58]» Náa Ádam nyɔ́ a ngim alɛ uŋun wó wáagɛɛ́ʼkɛnanan ɔlaa.

⁴⁶Adɛ́njaŋ nkó yɛ́ ɛlɛɛ́ uŋun aa yɛɛ́yáŋ, ndóo ɛ kɛdɔb aa yɛɛ́yáŋ, yɛ uŋun imə́əyə́ən.

⁴⁷Na kɛdɔb kɛ́ nsí aa Táán ayɛ́ɛ́lɛ mɔɔd o na oʼto na oʼto, Ádam. Náa, Ádam wo annam ábaan, nyɔ́lɛ́ alɛ əgiim a mɔɛn.

⁴⁸Wɔnɔ́ ná pɔɔd pá a nsí pálɛɛ́ yoom ímuʼ na nyɔ́ páyɛ́ɛ́lɛ na kɛdɔb kɛ́ nsí, náan yoom ímuʼ aa pá pálɛɛ́ pá a mɔɛn pálɛɛ́ tɛn a kɛŋwáŋánán kɛ́ nyɔ́ əyíím a mɔɛn.

⁴⁹Əgín tɛn wɔnɔ́ ná tɛlɛɛ́ a kɛŋwáŋánán kɛ́ mɔɔd nyɔ́ páyɛ́ɛ́lɛ na kɛdɔb, náan tɛn aa tɛlɛ́ɛ́ kɛɛnɛɛ́ a kɛŋwáŋánán kɛ́ nyɔ́ alɛɛ́ əgiim a mɔɛn.

⁵⁰Pomóŋŋí, táá nkə kɛ́ ndɛɛ́ anyɔ́ŋɛn kobodɛ́anɛ aa kɛ́ɛnɛ kɛ́lɛɛ́ lɛ́: Nkə kɛ́ kɛ́yáyɛ́lɛ́ɛ́ a pumog na a maŋɔ́, kɛ́dɛɔ́gɔ kɛ́gɛɛn na ngab a Nɛlaamɛʼ nɛ́ Táán. Nkə kɛ́ kɛ́ɔbɔnɔ tɛn kɛ́dɛɔ́gɔ kígusiəd ngab a ɔlaa ó pɛnɛŋ piim.

⁵¹Taa, ndanyɔ́ŋɛn kobomoáŋɛnɛ nkə kɛ́ kɛ́lɛɛ́ kɛɔsɛ́gáán. Pəsi piim tɛdɛndɛ́ɛ́ kugu, náa, pəsi piim tɛlɛ́ɛ́ kocɛ́ndɛ.

⁵²Kɛ́lɛ́ɛ́ kaáyɛ́ɛlɛ a ɛyaa ɛ́ kɛnɛŋ əgín náanɛ sɔɔŋ, ná isə́ə́ íguyibənən ɛ́lɛ́ɛ́ kodáŋɛ́ɛ́ lɛ́ əgín ná isə́ə́ ɛ́lɛ́ɛ́ kodáŋɛ́ɛ́, pɛlóŋ pɛ́lɛ́ɛ́ koóndɛgan agɛɛn a ɔlaa ó pɛnɛŋ piim. Pəsi pá tɛlɛ́ɛ́ kɛɛnɛɛ́ a ɔlaa tɛ́ság kocɛ́ndɛ tɛn.

⁵³Kɛ́lɛ lɛ́, nkə kɛ́ kɛ́ɔbɔnɔ kɛ́lɛ́ɛ́ kocɛ́ndɛ agaán nkə kɛ́ kɛ́dɛ́ɔbɔnɔɔ́. Kɛ́ kíəgu, kɛ́ɛcɛ́ndɛ agaán kɛ́ kɛ́dɛndɛ́ɛ́ kugúú.

⁵⁴Ná nkə kɛ́ kɛ́ɔbɔnɔ kɛ́lɛ́ɛ́ kocɛ́ndɛɛ́ agaán kɛ́ kɛ́dɛ́ɔbɔnɔɔ́, kɛ́ kíəgu kɛ́ɛcɛ́ndɛ agaán kɛ́ kídiə́gúú, áay lɛ́ nkə kɛ́ kíyə́dílə́ə́ a Kálaʼtaʼ kɛ́máás. Kíyə́dílə́ə́ kɔ lɛ́: Kugu kólɛ komanáán, kólɛ konyɔŋɔ́ɔ́n a kúfuʼ!

⁵⁵Kugu, kɛnyɔŋ kɛáŋ kɛ́lɛ ə́lə́ə́ ə? Kugu, maay mááŋ má waágoónanan málɛ ə́lə́ə́ ə́[59]?

⁵⁶A kɔbɛ́ aa kugu kúəsiəd maay má kólɛɛ́ agoónanan. Kɔbɛ́ kólɛ́ kúəsiəd maay a pɛcɛm.

⁵⁷Tiɛ́ʼkɛnaan pisoyidiʼ na Táán, nyɔ́lɛ́ nyɔ́ a ngim ɛ Sə́dúk wəəs Yə́sus Kilíʼtus, amábɛyɛ́ɛ́lɛ lɛ́ tɛ́nyɔŋ kugu.

⁵⁸Náan anɛ́ɛ́n, pomóŋŋí páam pá ɔʼtɛ́m! Puə́gumənən na toɛn, pólɛŋ kubis ambaan. Poágɔ́nɛgɛ pɛnɛŋ piim agɛɛlɛ pigólí pɛ́ Sə́dúk lɛ́ poálɛŋ poɔʼkɔ́ ntɔ́b yɛ́ polɛɛ́ agaáyɛ́ʼkɛn a mándad na nyɔ́lɛ́ idiə́suu məní.