Read Yambeta 1 Kɔlɛ́ɛnt 16 Bible Online

1 Kɔlɛ́ɛnt 16 - Yambeta bible

1 Kɔlɛ́ɛnt 16

¹Tɛ́sɔyɔɔn nɛ́gɔŋ kɛbán kɛ́ mɔɔnɛ́ má páágómmánɛ a kidíídí kɛ́ pəə́liʼtiniʼ pá a Yolósalɛm[60] Nyɛɛ́dɛánɛ na pɔsɔ́g pá a mogony mó pəə́liʼtiniʼ pá Kalasíi wɔnɔ́ ná pɛ́ɛlɛɛ́. Pəŋi tɛn póɛlɛ náan yoom ímuʼ.

²A wɔɔ́s ó na oʼto ó sɔ́ndɛʼ ngim, ɛ́nɛ́ mɔɔd óliogi mɔɔnɛ́, wɔnɔ́ ná ombɔg wə́ə́ŋ úmíig, yáag a ɛbá kɔ a noádɛʼ nuə́ŋ. Náan, podɛáboŋ lɛ́ njaŋ əgiim ná póɛlɛ anɛ́ɛ́n mag.

³Ná ndə́giim əgiig, nság kodom a Yolósalɛm, pɔɔd pá puə́giiyid lɛ́ pɛ́ɛn agɛɛ́ʼkɛn nkə kɛ́ poámaga. Pándagɛɛn, ndaboyɛ́ʼkɛn nufuuʼ agɛɛn na nólɛ́.

⁴Kɛ́maʼkɛɛn kɔŋɛʼ lɛ́ mɛɛ́nyɔ́amɔɛ́d nyɛ́ɛn kɔ, tɛagɛnanan ondáŋ na pɔ́lɛ́.

⁵Agɛɛlɛ lɛ́ nyíim a pəŋi, ndaayaŋ kɛɛn a Masɛdowáan lɛ́ yɛ́ɛy yɛ́ a pálɛ́ɛg yɛ́ɛy aa ndáasan[61]

⁶Ndaasánɛ mayaa má mədúg na pəŋi. Amaʼkɛɛlɛ sɛ́ɛb, umbuməʼ wóonɛ ungim wáagɛsánɛn káag na pəŋi agɛɛlɛ lɛ́ póɛnyɛɛ́bɛ agɛɛn na ongɛn wáam yuudi.

⁷A kóonɛ, ntɛányɔ́ŋɛn lɛ́ ná mbádam mpoodála kobodáláán nság kosan, ndóo. Sə́dúk əməʼkəə́liʼtini, ndɛ agomɛna pɛda lɛ́ ndaasánɛ mədúg sɔɔŋ na pəŋi.

⁸Náa, kɛbán kímuʼ ndəələndin áanɛ a Ɛfɛ́ɛs súʼtə́ə́ a wɔɔ́n ó Pantɛʼkóod[62]

⁹lɛ́, mbɔ́ɔ́ŋ áanɛ ngə́ ɛlaŋ ɛ kɛɛlɛnɛ Táán pigólí pɛ́ pɛ́alon na kɛsom kɛ́ kɛgóón, ɔmbɔ́ ná panɔɛyɛʼ Sə́dúk pálɛɛ́ kɔ áanɛ piíŋ[63]

¹⁰Timoʼtə́ə əməʼkiim alon káag[64], púmuúsiəd kɔŋɛʼ, adɛnjɛ́ɛ́n na wɛɛ́y əguləndin a kɛgaágadɛ kɛáŋan lɛ́ alɛ əgugudin Sə́dúk pigólí pɛ́go pímuʼ wɔnɔ́ mɛ.

¹¹Mɔɔd na mɔɔd adɛɛ́mosɛ́ɛ́dɛ. Pómoɛ́bɛ agá agɛɛlɛ lɛ́ yíim agɛmboan, ɔʼtɛ́m wə́ə́ŋ a kaadɛ wiiy lɛ́, na mɛ na pəə́liʼtiniʼ, tɛlɛ agomooboŋ.

¹²A noá na móŋŋí wəəs Aʼpolóos, njɛ́modɛánɛ, mbɔ́sɔyɔ na nyɔ́lɛ́ lɛ́ yíim na pəə́liʼtiniʼ pə́mmú a pəŋi, aásáŋɛ́nɛ əgín tɛɔ́d, ɔnɔ́ nyɔ́lɛ́ adɛ́njɛ́ɛ əgiim nɛ́gɔŋ. Náa, alɛ́ɛ́ kiim əgín ná ɔɔ́gɔɔŋ kɛnɛŋ.

¹³Pudinním ɛnɔ, puə́bis a ngə́ ɛ kəə́liʼtiniʼ, pónóm ɔʼtɛ́m, pónas.

¹⁴Póɛlɛ yiim na ɔʼtɛ́m wó nnyɔ́ŋánán.

¹⁵Pomóŋŋí, táá kímmú aa kɛ́ɛnɛ ndábodɛ́anɛ: Poálɛŋ Stɛfanáas na yoog yəəŋ ɛ pɔɔd[65] Poálɛŋ lɛ́ a Aʼkáay pɔ́lɛ́ aa pálɛɛ́ pɔɔd pá na oʼto na oʼto agaán pəʼkilíʼtɛn, pámáyaáyɛ́ʼkɛn tɛn na toɛn əgugudin ndɛg yɛ́ yaágoob na Táán.

¹⁶Puóbɛn anɛ́ɛ́n mbod ɛ pɔɔd wɔnɔ́ yɛ́ɛy náan, na pá pálɛɛ́ əgusiəd ngab a pigólí pɛɔ́bɔn na a ntɔ́b yɔɔbɔn.

¹⁷Ndɛ na tɔnyɔ́g kɛ́fɔlɛ́ wɔnɔ́ ná pa Stɛfanáas, na Fɔʼtunáʼtus, na Aʼkayíʼkus pə́yíím agɛʼtála. Kɛ́yɛ́ɛ wɔnɔ́ pəŋi aa mbáboodála.

¹⁸Pə́yíngwiiyi ɔʼtɛ́m wɔnɔ́ ná pə́yíbuwííyi tɛn pəŋi. Mbod ɛ pɔɔd wɔnɔ́ yɛ́ɛy náan, púbuúloodi lɛ́ polɛ na tɔnyɔ́g na pɔ́lɛ́.

¹⁹Pɔɔd pá a mogony mó pəə́liʼtiniʼ pá a Əsíi pə́mə́busóyídi aá! Pa Aʼkɛláas na Pilíska[66], na pəə́liʼtiniʼ pá pálɛɛ́ agaágɔnyɛla a noádɛʼ noɔ́bɔn pámábodómɛn pisoyidiʼ kɛ́fɔlɛ́ a niiŋ nɛ́ Sə́dúk áaá!

²⁰Pəə́liʼtiniʼ piim pá pálɛɛ́ áanɛ nɛ́gɔŋ na mɛ pə́mə́busóyídi aá! Púsoyidənəni pəŋi na pəŋi, sɔ́g yə́gúlig sɔ́g a igog a nɛ́ niŋŋí aá!

²¹Mɛ Póol mbə́busóyídi aá! Na ombɔg wáam ó mɛɛ́nyɔ́amɔɛ́d áa mbə́dilə pisoyidiʼ pɛ́ɛnɛ.

²²Tuúdudúú na nyɔ́ ɔdɛɔ́gɔ agɔnyɔ́ŋɛnɛɛ́ Sə́dúk! Malaná ta.[67]

²³Sə́dúk Yə́sus áboyɛ́ɛlɛnɛ kɔŋɛʼ á!

²⁴Ndɛ agobonyɔ́ŋɛn pəŋi piim a oʼto wóonɛ lɛ́ tɛlɛ paladáán na Yə́sus Kilíʼtus.