Read Yambeta 1 Kɔlɛ́ɛnt 2 Bible Online

1 Kɔlɛ́ɛnt 2 - Yambeta bible

1 Kɔlɛ́ɛnt 2

¹Pomóŋŋí, ná njíím a pəŋi əgiim aboyásɛnɛn mafɛgaʼ má Táán má máyɛ́ɛ mɔɔsɛ́gáán, ntɛʼkɔ́ɔsɔyɔ na pəŋi a tɔgɛ́ɛ́ tó pasaá, ɔmbɔ́ tɛn na tɔgɛ́ɛ́ tó pusiŋ pó polanda,

²lɛ́ nyiíguminin a ɔʼtɛ́m wáam lɛ́, ná ndɛ́ɛ́ kiimií kɛnɔ kɛ́ polɛɛ́, ntɛndɛ́ɛ́ kusəə kɛbán na kɛbán kɛ́ndɛ́ŋ ná kɛ́sánɛn əgín lɛ́ kɛ́ kɛ́adɛ́ʼtɛg Yə́sus Kilíʼtus wɔnɔ́ ná yiígú a ɔmbásá.

³Kólɛ́ aa njólódíí náan wɔnɔ́ ná poyɛ́ʼtála, toɛn fiɛ́d na mɛ, wɛɛ́y na wɛɛ́y, ndɔ́ɔlɛɔndɛɔn[6]

⁴A tɔgɛ́ɛ́ tó njɛ́ɛ agosɔyɔ na pəŋi, na a Tɔsɔm tó njɛ́ɛ agoboólɔɛgɛnɛ, ntɛʼkɛ́ɛ na tɔgɛ́ɛ́ tó muyən, tɔgɛ́ɛ́ tó kɛɛlɛ lɛ́ púdə́əŋ a ngə́ yɛ́ ndáanyɔ́ŋɛn, ndóo. Náa, a tɔgɛ́ɛ́ tóam, toɛn tó tólɛɛ́ na Uŋun ó Táán áa tóyɛ́ɛ əgugud a ntɛ́m yaaŋan.

⁵Náan kɛ́dɛágɛɛn lɛ́ nsiŋ ɛ pɔɔd aa ɛmáboyɛ́ɛ́lɛ lɛ́ póag oʼto na Yə́sus, náa kíɛn agá a toɛn tó Táán.

⁶Kɔmɔɛ́d lɛ́ nsiŋ áa ndɛɛ́ agaaʼkananɛ na pəʼkilíʼtɛn pá páʼkogónɛ́ɛ́ a kəə́liʼtiniʼ. Nsiŋ yɛ́ɛy ɛdɛɔ́gɔ yɛ́ pɔɔd pá a nsí yɛ́ɛnɛ pálɛanɛɛ́ na yɛ́lɛ́, ɛdiɛn tɛn ɔmbɔ́ yɛ́ palaamɛʼ pá a nsí yɛ́ɛnɛ tɛn pálɛanɛɛ́ na yɛ́lɛ́, pɔ́lɛ́ pá pálɛ́ɛ́ kuwúú.

⁷Ndóo, ndɛ alɔɛgɛ nsiŋ ɛ Táán, nsiŋ yɛ́ ɛlɛɛ́ ndímə́ə́n, yɛ́ ɔyɔ́sɛ́gɛn pɔɔd kalaʼ pándɛŋ. Nsiŋ yɛ́ yiígúmin kɔ kalaʼ ná ayɛ́ɛ adɛ́njɛ́ɛlɛ ɔmbɔ́ nsí yɛ́ɛnɛ, ɔnɔ́ pəsi tiəsiəd ngab a nugəm nuə́ŋ.

⁸Ɔndaamɛʼ ɔmbɔ́ úmmuʼ nyɔ́ a nsí adɛ́ʼkóolɛŋɛn nsiŋ yɛ́ɛy. Pɔ́nɔ́ pɛ́ɛ́lɛŋɛn yɛ́lɛ́, pádɛʼkɛ́ɛ abaŋan Sə́dúk wəəs o nugəm a ɔmbásá.

⁹Náa, əgín wɔnɔ́ ná kɛ́lɛɛ́ kidiídílə́ a Kálaʼtaʼ ɛ Táán lɛ́: «Nkə kɛ́ mɔɔd adɛ́njaŋ kodálaá na əngis yə́ə́ŋ, kɛ́ adɛ́njaŋ koóbɛ́ɛ́ na ntóɛŋ yəəŋ. Nkə kɛ́ adɛ́njaŋ kofɛgɛɛ́ ɔmbɔ́ kofɛg, kɛ́lɛ́ aa Táán yiísóbíni a pá pálɛɛ́ amoonyɔ́ŋɛn[7]»

¹⁰Kɛ́lɛ lɛ́, pəsi aa Táán ayɛ́bɛyɛ́ɛ́lɛ lɛ́ Uŋun wó Ufúlúʼtú óbɛyásɛnɛn pɛbán pɛ́ɛb lɛ́ wólɛ́ wáálɛŋ nkə kiim kɛ́ Táán alɛɛ́ afɛga, na yisí yɛ́ ɛlɛɛ́ kɔ na nyɔ́lɛ́ a ɔʼtɛ́m.

¹¹A noá na pɔɔd, ánɛ úmmuʼ aa alɛɛ́ ogolɛŋ nkə kɛ́ kɛ́lɛɛ́ a ɔʼtɛ́m ó sɔ́g. Əgín uŋun wó ólɛɛ́ na mɔɔd aa wáálɛŋ wólɛ́wóəsíŋ nkə kɛ́ mɔɔd nyóon alɛɛ́ afɛga a ɔʼtɛ́m wə́ə́ŋ a kaadɛ. Yoom tɛn ímuʼ náan na Táán. Əgín Uŋun ó Táán áa wáálɛŋ mafɛgaʼ má Táán.

¹²Adɛ́njaŋ uŋun wó a nsí yɛ́ɛnɛ aa tɛyɔ́ɔ́ŋ, ndóo. Uŋun wó wə́əgiim a nó Táán áa tɛyɔ́ɔ́ŋ, agɛɛlɛ lɛ́ tɛ́lɛŋ kɔŋɛʼ kó amábɛyɛ́ɛ́lɛ́nɛ.

¹³Tɛdɛɔ́gɔ anɛ́ɛ́n agosɔyɔ kɛ́lɛ́ a tɔgɛ́ɛ́ tó nsiŋ ɛ pɔɔd yaábɛyáaʼkananɛ. Náa, tɛlɛ agosɔyɔ a nsiŋ yɛ́ Uŋun ó Táán waábɛyáaʼkananɛ. Náan, tɛlɛ agaásɛna pɛbán pɛ́ Uŋun ó Táán na tɔgɛ́ɛ́ tó Uŋun wóow wáabɛyáag a unuʼ lɛ́ tísəə.

¹⁴Mɔɔd nyɔ́ alɛɛ́ ungəə́bísə́ə́n əgín lɛ́ nsiŋ ɛ mɔɔd, ɔdɛɔ́gɔ ugəə́liʼtini nkə kɛ́ kíəgiim na Uŋun ó Táán. Kɛ́lɛ na nyɔ́lɛ́ puyəgí pó pɛbán, ɔdɛɔ́gɔ ogoob pɛ́lɛ́, lɛ́ a noá na Uŋun aa pálɛɛ́ agolɛŋ nkə aa pɛ́lɛɛ́.

¹⁵Mɔɔd nyɔ́ alɛɛ́ na Uŋun ó Táán, nyɔ́lɛ́ aa alɛ́ɛ́ koyɔmɛɛ́ yoom yiim. Náa, úmmuʼ nyɔ́ alɛ́ɛ́ komoóyɔmɛɛ́ nyɔ́lɛ́ ɔdɛɔ́gɔ.

¹⁶Kɛ́lɛ náan kidiídílə́ lɛ́: «Ánɛ aa aálɛŋ mafɛgaʼ má Sə́dúk ə́? Ánɛ aa alɛɛ́ ogomoyɛ́ʼkɛn ndə́b ə́[8]?» Náa pəsi, tɛlɛ na mafɛgaʼ má Kilíʼtus.