Read Yambeta 1 Kɔlɛ́ɛnt 3 Bible Online

1 Kɔlɛ́ɛnt 3 - Yambeta bible

1 Kɔlɛ́ɛnt 3

¹Pomóŋŋí, kɛ́lɛ fɔ́lɔ́b lɛ́ ná njɛ́ɛ a pəŋi, ntɛʼkáagaáʼkɛ kosɔyɔ na pəŋi wɔnɔ́ ná kɛ́anyɔ́ŋɛn lɛ́ pɔ́sɔyɔ na pɔɔd pá pálɛɛ́ na Uŋun ó Táán. Nyɛɛ́sɔ́yɔ agá na pəŋi wɔnɔ́ na pɔɔd pá páalaa wɔnɔ́ ná pumog pólɛɛ́ anyɔ́ŋɛn lɛ́ pálaa. Nyɛɛ́sɔ́yɔ na pəŋi wɔnɔ́ na moyaa mó poómbaa a ngə́ ɛ kaag oʼto na Kilíʼtus.

²Maŋɛ́ɛŋ aa njɛ́boyɛ́ʼkɛn lɛ́ póŋɛ́ɛŋ, adɛ́njaŋ moom mó konɛ mó monasáŋ lɛ́ podɛʼkɛ́ɛ págaáʼkɛ kogáma[9] Ɔmbɔ́ tɛn nɛ́gɔŋ, podɛɔ́gɔ págaáʼkɛ mólɛ́

³lɛ́ ɔlaa wááŋan úligi wɔnɔ́ ó pɔɔd pá páalaa wɔnɔ́ ná pumog pólɛɛ́ anyɔ́ŋɛn lɛ́ pálaa. Kɛnɛŋ kɛ́ pɛbán pɛ́ɛnɛ lɛ́: Yaág yɛ́ əngis, masáŋ pəŋi na pəŋi pɛ́lɛ́ a kɛgaágadɛ kɛáŋan, podɛɔ́gɔ əguloodi anyóon lɛ́ polɛ pɔɔd pá páalaa wɔnɔ́ ná pumog pólɛɛ́ anyɔ́ŋɛn lɛ́ pálaa a? Adɛ́ polɛ alaa anyóon əgín wɔnɔ́ a nɛ́ pɔɔd pá a nsí yɛ́ɛnɛ a?

⁴Kɛnɛŋ kɛ́ a ondáŋ wááŋan, nyummú alɛ əgusəə ɔnɔ́: «Mɛ, ndagoób na Póol», sɔ́g nyummú tɛn ɔnɔ́: «Mɛ, ndagoób na Aʼpolóos[10]», podɛɔ́gɔ əgəə́siəd anyóon wɔnɔ́ mɔɔd ungim nyɔ́ a nsí ə?

⁵Kɔmɔɛ́d ə́ə, Aʼpolóos anyóon ánɛ ə? Mɛ Póol anyóon ánɛ ə́? Pəsi tɛlɛ əgín agá pəgudin pá Táán. Pəŋi poásán agá a ɔmbɔg yə́ə́s agɛɛlɛ lɛ́ póag oʼto na nyɔ́lɛ́. A pəsi póob, ɛ́nɛ́ mɔɔd amɛ́ɛ́lɛ əgín oʼtom wó Sə́dúk ayɛ́moyɛ́ʼkɛn.

⁶Mɛ, nyɛɛ́gón kogónáán, Aʼpolóos əə́súbən məní. Náa, Táán áa amɛ́ɛ́lɛ lɛ́ kiɛd kɛ́yam.

⁷Náan, nyɔ́ aágon, na nyɔ́ əə́súbən məní pɔ́dɛɔ́gɔ pɔ́lɛ́ piim yoom. Táán nyɔ́lɛ́nyɔ́əsíŋ áa alɛɛ́ yoom, nyɔ́lɛ́ nyɔ́ alɛɛ́ agɛɛlɛ lɛ́ kiɛd kɛ́yam.

⁸Mɔɔd nyɔ́ aágóna, na sɔ́g nyɔ́ əə́súbən məní, pɔ́lɛ́ piim pálɛ yoom ímuʼ. Táán alɛ́ɛ́ kɛɛ́ʼkɛn na ɛ́nɛ́ sɔ́g, pɛsáábɔ́n piə́ŋ əgín wɔnɔ́ a pigólí piə́ŋ pɛ́ amɛ́ɛ́lɛ

⁹lɛ́ tɛlɛ agɛɛlɛ pigólí pɛ́ Táán ondáŋ úmmuʼ, pəŋi polɛ pɔlɛ́m puə́ŋ, polɛ tɛn noádɛʼ nuə́ŋ.

¹⁰Wɔnɔ́ ongwáagaʼ toádɛʼ nyɔ́ aálɛŋ pigólí piə́ŋ, nyiígúd a kɔdɛ́ɛ ɔʼtɛ́m kó Táán ayɛ́ʼtɛ́ɛ́lɛn, mbə́biŋən tɔɛd tó na oʼto na oʼto. Wɛndɛ́ŋ áa əə́ndəyibənənií kowáag noádɛʼ nɛ́gɔŋ. Náa, ɛ́nɛ́ mɔɔd álóʼkɔd na ombod wó nyɔ́lɛ́ alɛɛ́ awáag.

¹¹Kɛ́lɛ lɛ́, nɔɛd nó na oʼto na oʼto nólɛ́ noándɛ nubiŋə́ə́n. Nó aa nóon nólɛɛ́ Yə́sus Kilíʼtus. Mɔɔd ɔdɛɔ́gɔ tɛn ugubiŋ númmú nóndɛ́ŋ.

¹²Ɔmbɔ́ pə́mmú pə́díin pəyibənən ongwáag wóow na Kóol oo, ɔmbɔ́ lɛ́ na kisúg kɛ́ mɔɔnɛ́ oo, oó lɛ́ na pisig pɛ́ aʼtáán yá yáadɛ́a oo. Pɔsɔ́g pə́mmú na tɔɛd, ɔmbɔ́ lɛ́ na ɔsɔ́, oó lɛ́ na mboló oo,

¹³wɔɔ́s ó pɛyɔm, pigólí pɛ́ ɛ́nɛ́ mɔɔd pɛ́lɛ́ɛ́ koóloodi moááŋ. Wɔɔ́s wóow ólɛ́ɛ́ kɛɛn wɔɔ́s wó yug yɛ́ ɛgóón ɛ́lɛ́ɛ́ kulodií tuə́ áa pigólí pɛ́ ɛ́nɛ́ mɔɔd pɛ́lɛɛ́.

¹⁴Nyɔ́ ongwáag wə́ə́ŋ ólɛ́ɛ́ kolɔbɛɛ́ yug fiɛ́d kusíŋini, nyóon aa alɛ́ɛ́ kɔɔ́ŋɛ́ɛ́ pɛsáábɔ́n.

¹⁵Nyɔ́ ongwáag wə́ə́ŋ ólɛ́ɛ́ koman kusúiŋií a yug, alɛ́ɛ́ koʼtaŋ pɛsáábɔ́n. Kɛbán kímuʼ, nyɔ́lɛ́nyɔ́amɔɛ́d alɛ́ɛ́ kɔɔy, náa kɛ́lɛ́ɛ́ kɛɛn wɔnɔ́ mɔɔd nyɔ́ aáfob kogɔ́lɔ yug.

¹⁶Adɛ́ poálɛŋ lɛ́ polɛ wɔnɔ́ yoog yɛ́ Táán álɛɛ́ kɔ a yɛ́lɛ́ a kaadɛ a! Poálɛŋ tɛn lɛ́ Uŋun wó Ufúlúʼtú ólɛ a ntɛ́m yaaŋan a kaadɛ a!

¹⁷Nyɔ́ aáyósag yoog yɛ́ Táán alɛɛ́ kɔ, Táán alɛ́ɛ́ komoyósag tɛn nyɔ́lɛ́ lɛ́, yoog yɛ́ Táán alɛɛ́ kɔ, ɛlɛ yoog yɛ́ ɛlɛɛ́ nfúŋiə́n. Pəŋi aa polɛɛ́ yoog ɛgo.

¹⁸Mɔɔd ədiyə́lígə́ə́ nyɔ́lɛ́nyɔ́amɔɛ́d. Nyɔ́ a nɛ́ pɔɔd, alɛɛ́ agofɛg lɛ́ nyɔ́lɛ́ alɛ na nsiŋ, yáyáánɛ kiyəg, agɛɛn fɔ́lɔ́b mɔɔd wo nsiŋ.

¹⁹Kɛ́lɛ lɛ́, nsiŋ yɛ́ a ombod ó pɔɔd ɛlɛ puyəgí a əngis á Táán. Náan aa kɛ́lɛɛ́ kidiídílə́ a Kálaʼtaʼ lɛ́: «Táán əədə́əŋi pɔɔd pá nsiŋ a kisindiʼ kɛɔ́bɔn kɛ́ pɔ́lɛ́báamɔɛ́d.»

²⁰Kálaʼtaʼ ɛ Táán ɛlɛ əgusəə tɛn kə́mmú lɛ́: Sə́dúk aálɛŋ mafɛgaʼ má pɔɔd pá nsiŋ pálɛanɛɛ́ na mɔ́lɛ́. Aálɛŋ lɛ́ mɔ́dɛɔ́gɔ yoom, málɛ iyó[11]

²¹Náa, mɔɔd oʼkóodi kɛɛn na mbə́gidən. Moom muim mólɛ agoob na pəŋi.

²²Kɛ́yɛɛn ɔmbɔ́ lɛ́ mɛ Póol, ɔmbɔ́ lɛ́ Aʼpolóos, oó lɛ́ Sɛ́fas[12] Kɛ́yɛɛn tɛn ɔmbɔ́ lɛ́ nsí, oó lɛ́ ɔlaa, ɔmbɔ́ kugu, oó lɛ́ nkə kɛ́ kɛ́lɛɛ́ kɔ nɛ́gɔŋ, ɔmbɔ́ lɛ́ kɛ́ kɛ́lɛ́ɛ́ kɛɛnɛɛ́ kɔ a mədúg má yuudi, nkə kɛ́ɛg kiim kɛ́agoob na pəŋi.

²³Náa, pəŋi polɛ agoob na Kilíʼtus, Kilíʼtus nyɔ́lɛ́ aágoob na Táán.