Read Yambeta 1 Kɔlɛ́ɛnt 4 Bible Online

1 Kɔlɛ́ɛnt 4 - Yambeta bible

1 Kɔlɛ́ɛnt 4

¹Pugóódi lɛ́ póbɛdɛ́ʼtɛg anɛ́ɛ́n əgín wɔnɔ́ pəgudin pá Kilíʼtus, wɔnɔ́ pɔɔd pá oʼtom wɔ́ɔ́bɔn ólɛɛ́ lɛ́ pádáŋananɛ pafɔ́lɔ́b pá Táán pá pálɛɛ́ pɔɔsɛ́gáán.

²Nkə kɛ́ pálɛɛ́ əguŋíən na mɔɔd nyɔ́ pámɛ́ʼkɛn oʼtom, kɛ́lɛ lɛ́ yɛ́ɛlɛ wólɛ́ wɔnɔ́ ná kíəgəə́yúunə.

³A mɛ, kɛ́yɛɛn ɔmbɔ́ lɛ́ pəŋi aa poágɛnjɔmɛ, oó lɛ́ pɔɔd pɛ́ndɛ́ŋ áa páagɛnjɔmɛ, kɛ́dɛágɛʼkɔmɛd ɔsab. Ntɛɔ́gɔɔ́yɔmɛ tɛn mɛɛ́nyɔ́amɔɛ́d.

⁴Kɛ́lɛ fɔ́lɔ́b lɛ́ ɔʼtɛ́m wáam ólɛ a kaadɛ yəə́b, náa kɛ́dɛɔ́gɔ anyóon lɛ́ ndɛ sálábádábádá, fiɛ́d na ɛgom a pɛbán piim. Sə́dúk áa aágɛnjɔmɛ.

⁵Kólɛ́ aa kɛ́lɛɛ́ lɛ́, podɛnjáŋ ɔyɔmɛ mɔɔd, kɛnɛŋ kídiig. Póŋáan lɛ́ Sə́dúk yíim. Nkə kɛ́ kɛ́yɛ́ɛ kɛɔsɛ́gáán a mbin, alɛ́ɛ́ kolónɛ a kɛmoámoáŋ, áamoáŋɛ tɛn mafɛgaʼ má pɔɔd pálɛɛ́ na mɔ́lɛ́ a ɔʼtɛ́m. Táán alɛ́ɛ́ kɛɛ́ʼkɛn na ɛ́nɛ́ mɔɔd nnyáádɛ́ yɛ́ ɛlɛɛ́ lɛ́ yəəŋ.

⁶Pomóŋŋí, nkə kɛ́ɛnɛ kiim kɛ́ mbáʼkobodɛ́ananɛɛ́ nɛ́gɔŋ, mbə́siəd nkaʼtɛ́n a nkó yaam ɛ mɛɛ́nyɔ́amɔɛ́d na a nkó yɛ Aʼpolóos lɛ́ ná a oʼtɛ́lɛm wə́ə́s wóow, pəŋi póaʼkan lɛ́ kɛ́lɛ kɔŋɛʼ lɛ́ mɔɔd ə́súg a nkə kɛ́ kɛ́lɛɛ́ kidiídílə́ a Kálaʼtaʼ. Náan, nyummú nyɔ́ əə́gəə́gidən a igog a ondáŋ wááŋan lɛ́ nyóonɛ aa alɛɛ́ mbə́gidən yəəŋ, aánɔɛyɛ nyummú, adɛágɛɛn kɔ.

⁷A igə kímuʼ aa wɛ waáfɛga lɛ́ omááyɛn pɔsɔ́g? Nkə kímuʼ aa ugódíí kɛ́, adɛ́njaŋ Táán áa amágoyɛ́ʼkɛn? Nkə anɛ́ɛ́n áa waágaábágɛdɛ na nkə kɛ́ pámágoyɛ́ʼkɛn, káag wɔnɔ́ adɛ́njaŋ kooyɛ́ʼkɛn aa pámágoyɛ́ʼkɛn ə́?

⁸Poɔʼkɔ́ poándɛ anyóon na nkə kiim kɛ́ polɛɛ́ anyɔ́ŋɛn yi! Poɔʼkɔ́ poándɛ anyóon pəgúmígúmiʼ a ngə́ ɛ kəə́liʼtiniʼ yi! Poándɛ aa nyóon puʼkúm, pəsi tɛmbág yi! Puʼtíin anɛ́ɛ́n póbag puʼkúm pógo fɔ́lɔ́b agɛɛlɛ lɛ́ tɛ́laamɛ ondáŋ ə́!

⁹A nɛdálaʼ nɛ́am kɛ́lɛ lɛ́, Táán amábɛyáág pəsi pɔɔ́n pá maʼtom a nsun yɛ ondáŋ. Tɛlɛ wɔnɔ́ pɔɔd pá pógódíí lɛ́ póóna a pɛdom. Ungim əbisin əngis na pəsi. Ungim lɛ́ na məŋun má maʼtom kɛ́, na pɔɔd piim kɛ́.

¹⁰A oʼto ó Kilíʼtus, pálɛ əgibiísiəd pəsi wɔnɔ́ piyəg, pəŋi poɔʼkɔ́ polɛ na nsiŋ lɛ́ polɛ paladáán na nyɔ́lɛ́. Pɔ́nɔ́ pəsi tɛlɛ palɛbɛ́dáán, pəŋi poɔʼkɔ́ polɛ na toɛn. Páabɛsɛ́ɛdanɛ pəsi, páabonyáadɛ pəŋi.

¹¹Ɔmbɔ́ nɛ́gɔŋ əgín wɔnɔ́ ná tɛlɛɛ́, tɛlɛ njaan, nɛŋɔ́ɛd nɛ́abɛɛbany, kilə́ə́ tɛdiɛn na kɛ́lɛ́. Pɔɔd pálɛ agɛbɛɛ́coʼkonɛ, tiə́giim tíyóŋ kuyóŋóón.

¹²Tɛlɛ agaásɔɛ́lɛdɛd kɛɔsɛn agɛɛlɛ lɛ́ tɛ́ɔŋ yoom ɛ́ konɛ[13] Kɛnɛŋ kɛ́ pálɛ agɛbɛɛdóga, pəsi tɛɔgɔɔ́sɔ́gɔlɔn agá Táán lɛ́ áboyɛ́ɛlɛnɛ kɔŋɛʼ. Kɛnɛŋ kɛ́ pálɛ agɛbɛɛ́coʼkonɛ, tɛlɛ agonóʼtan.

¹³Ɔmbɔ́ kɛnɛŋ kɛ́ pálɛɛ́ agɛbɛɛ́wag, tɛlɛ əgubuyúlisini na ɔʼtɛ́m wó ungwiyə́ə́n. Ɔmbɔ́ nɛ́gɔŋ, pálɛ əgibiísiəd əgín wɔnɔ́ kiliʼkii, ungim alɛ agɛbɛdɛ́ʼtɛg wɔnɔ́ tubi tó pobon.

¹⁴Nufuuʼ nóonɛ, ɔmbɔ́ ná mbə́budílən náan, adɛ́njaŋ lɛ́ ndaanyɔ́ŋɛn koboyɛ́ʼkɛn oʼto kono, ndóo. Mbə́budílən nólɛ́ lɛ́ mpuuləb wɔnɔ́ pɔɔ́n pá ɔʼtɛ́m wáam ungim ólɛɛ́ na pɔ́lɛ́.

¹⁵Kɛ́lɛ lɛ́, ɔmbɔ́ poɛn na tɔ́ɔ́sɛn ɛ pɔɔd yówád yɛ́ ɛlɛɛ́ agoboyáʼkananɛ ngə́ yɛ́ a ɔlaa na Kilíʼtus, puʼkóodi pasɛ piíŋ. Polɛ pɔɔ́n páam a ngə́ ɛ Yə́sus Kilíʼtus, a Tɔsɔm Tólaŋ tó njíbuyíímin na tólɛ́.

¹⁶Kólɛ́ aa ndábodɛ́anɛ na pəŋi nyɔʼkɔ́: «Púsiəd ongoo wáam!»

¹⁷A oʼto wóow aa mbíim mpodómɛn mɛ mɔɔ́n wo ɔʼtɛ́m Timoʼtə́ə. Alɛ agodáŋana sáád a ngə́ ɛ Sə́dúk. Aaboyáyɔ́ɔ́ŋɛnɛ ɔlaa wáam wɔnɔ́ ná ndɛɛ́ agodáŋananɛ a ngə́ ɛ Yə́sus Kilíʼtus. Əgín tɛn wólɛ́ ogo aa ndɛɛ́ agaaʼkananɛ pɔɔd pɛnɔ piim, na a mogony mó pəə́liʼtiniʼ muim.

¹⁸Ngab yimmú a ondáŋ wááŋan ɛyɛ́ɛ əgəə́gidən a igog lɛ́ páyɛ́ɛ afɛga lɛ́ ntɛndɛ́ɛ́ kiim kə́mmú a pəŋi.

¹⁹Náa, Sə́dúk əməʼkəə́liʼtini, ndəgəə́bisig kiim. Áay aa ndáalɛŋ nga pɔɔd póob pá pə́əgəə́gidən a igog pɔ́dɛɔ́gɔ agosɔyɔ əgín na unuʼ na unuʼ, pálɛ agɛɛlɛ tɛn pɛbán.

²⁰Kɛ́lɛ lɛ́, Nɛlaamɛʼ nɛ́ Táán nɛ́dɛɔ́gɔ a tɔgɛ́ɛ́ tó na unuʼ na unuʼ, nɛ́lɛ a nkə kɛ́ olɛɛ́ agɛɛlɛ.

²¹Əgiim kó ndə́əgiim a pəŋi, poanyɔ́ŋɛn lɛ́ nyíim tuə́? Na usuə́ a ombɔg óm, na ɔʼtɛ́m wó nnyɔ́ŋánán, ɔʼtɛ́m wó ungwiyə́ə́n ə́?