Read Yambeta 1 Kɔlɛ́ɛnt 5 Bible Online

1 Kɔlɛ́ɛnt 5 - Yambeta bible

1 Kɔlɛ́ɛnt 5

¹Kɛ́lɛ ɔgɔɔ́sɔyɔ kɛnɔ kiim lɛ́ a kɛgaágadɛ kɛáŋan, nɛbambɛɛ nɛ́dɛ́gɛ́dɛn kɛgaan ombod wó ɔmbɔ́ na pandɛŋ Táán ódɛɔ́gɔ ógaáyɛ́lɛɛ́. Pálɛ əgusəə lɛ́ nyummú a ondáŋ wááŋan alɛ əgubúlimən na oʼkán ó sɛ.[14]

²Náan aa polɛɛ́ əgəə́gidən kɔmɔɛ́d a igog! Kɔmɔɛ́d lɛ́ puígóodi lɛ́ poáyáág agá ombɔg a nɛdam, póoŋɛŋ a kɛgaágadɛ kɛáŋan, nyɔ́ alɛɛ́ na ɔlaa wóow.

³A mɛ, ɔmbɔ́ ná ndɛɛ́ laálá, ndɛ na pəŋi a uŋun. Mɔɔd nyɔ́ alɛɛ́ na ɔlaa wóow, mbáʼkomoyɛ́ʼkɛn nsɔ́ɔ́ wɔnɔ́ ndɛ kɔ na pəŋi. Kɛnɛŋ kɛ́ poágɔ́nyɛ́dɛn a niiŋ nɛ́ Sə́dúk wəəs Yə́sus, toɛn tuə́ŋ tólɛ na pəŋi.

⁵Áay, poɛ́ʼkɛn mɔɔd nyóon a ɔmbɔg á Sáʼtan, yáánɛ a pumog puə́ŋ, uŋun wə́ə́ŋ wɔ́ɔy a wɔɔ́s wó Sə́dúk alɛ́ɛ́ kimbuúlinií.

⁶Kəə́gidən koáŋan kóog a igog kóʼtɛ́ɛ́lɛn ɛɛ́! Adɛ́ poálɛŋ lɛ́ mayaa əgín sɔɔŋ má toan tó kunudi umbúb áa ándɛ mə́ənudi kɛdám kɛ́ umbúb ungim ə[15]?

⁷Ə́fúŋíən anɛ́ɛ́n, púliogi kiʼtugə́ʼtúgə́ kɛ́ toan tó kunudi umbúb tóod a kɛgaágadɛ kɛáŋan ná póɛn wɔnɔ́ umbúb wó páábágɛ pádɛág tólɛ́. A fɔ́lɔ́b poándɛ náan kɔmɔɛ́d lɛ́ Kilíʼtus yiígú a kidíídí kɛáŋan. Nyɔ́lɛ́ aa alɛɛ́ mɔɔ́n o nodóm nyɔ́ pɛ́ɛ́fɔ́ny a wɔɔ́s ó Páska.

⁸Tíɛlɛán anɛ́ɛ́n wɔɔ́n wə́ə́s. Tɛdɛnyɛ́ɛ́lɛ wólɛ́ na moom mó páyáág toan tó kunudi umbúb agobágɛ wólɛ́. Toan tóod tó tólɛɛ́ a ntɛ́m yəəs yɛ́ mbɛ́, a ɔlaa wó ɔmbɛ́ wóow wó tigódíí. Tíɛlɛán wólɛ́ na moom mó pádɛágɛnɛɛ́ tólɛ́ kɔ. Tíɛlɛán wólɛ́ pəsi pəə́fúŋiə́n, pəsi a pafɔ́lɔ́b[16]

⁹A nufuuʼ nóam nó njíbudílən kalaʼ, njɛ́bodɛánɛ lɛ́ podɛnjɛ́ɛ́n ondáŋ úmmuʼ na pɔɔd pá páalaa ɔlaa ó pɛɔg.

¹⁰Adɛ́njaŋ ungim nyɔ́ alɛɛ́ agɛɛlɛ pɛɔg a nsí yɛ́ɛnɛ aa nyɔʼkɔ́ pódɛ́da, ndóo. Adɛ́njaŋ tɛn ɔmbɔ́ ungim nyɔ́ alɛɛ́ na nɔgág, oó lɛ́ pá pə́əgiíbə, ɔmbɔ́ lɛ́ pá pə́əyə́njən ambog aa ndɛɛ́ əgusəə, ndóo. Ná kɛ́agɛɛn lɛ́ púliog agá a nsí yɛ́ɛnɛ.

¹¹Nyɔ́ aándɛɛ́ lɛ́ alɛ ungəə́liʼtiniʼ ná alɛɛ́ əguyə́ən ɔlaa ó pɛɔg, nyɔ́lɛ́ na nɔgág, əə́yə́ən ambog, əə́giim ɔ́ŋɔ́ɔŋɔn pɔsɔ́g, nyɔ́lɛ́ a maloʼ tɔɔ́ɔ́ŋ, oó lɛ́ əə́giíbə, nyɔ́lɛ́ nyóon aa ndɛɛ́ əgusəə lɛ́ pudiímuudí a ondáŋ wááŋan. Puʼkóodi lɛ́ pónɛ́ɛnɛ ɔmbɔ́ konɛ́ɛnɛ ondáŋ na nyɔ́lɛ́.

¹²A pá pɔ́dɛɔ́gɔ pəə́liʼtiniʼ, kɛ́dɛ́agɛʼtɛ́ʼtɛg, adɛ́njaŋ mɛ áa ndáboóyɔmɛ. Táán áa alɛ́ɛ́ koboóyɔmɛɛ́ pɔ́lɛ́. Náa, pəŋi pugóódi lɛ́ póyɔmɛ pá pálɛɛ́ na pəŋi. Kɛ́lɛ kidiídílə́ lɛ́: «Nyɔ́ alɛɛ́ na ɔʼtɛ́m wó ɔmbɛ́, póomooŋɛŋ a kɛgaágadɛ kɛáŋan[17]»