Read Yambeta 1 Kɔlɛ́ɛnt 6 Bible Online

1 Kɔlɛ́ɛnt 6 - Yambeta bible

1 Kɔlɛ́ɛnt 6

¹Tuə́ áa pəŋi pəə́liʼtiniʼ polɛ́ɛ́ págɛɛn lɛ́ wɛ nyummú olɛ na kɛbán na móŋŋí waaŋ, odiɛn na kɛ́lɛ́ ná pəə́liʼtiniʼ pálɛɛ́, óyɛɛn agá a nó pá pɔ́dɛɔ́gɔ pəə́liʼtiniʼ agɛɛlɛ lɛ́ páboóyɔmɛ ə́?

²Podɛálɛŋ lɛ́ ndɛg ɛ Táán áa ɛlɛ́ɛ́ koyɔmɛɛ́ pɔɔd pá a nsí ə́? Kɛ́maʼkɛɛn náan lɛ́ pəŋi aa pugódíí lɛ́ póyɔmɛ pɔɔd pá a nsí, podɛɔ́gɔ anɛ́ɛ́n págoyɔmɛ muyənjə́g mó pɛbán á?

³Ɔmbɔ́ tɛn məŋun má maʼtom oʼ, pondɛŋɛn lɛ́ pəsi aa tɛlɛ́ɛ́ koyɔmɛɛ́ mólɛ́ á? Pɛnɛŋ pɛ́sɛ́g anɛ́ɛ́n na pɛbán pɛ́ a ɔlaa ó nɛ́gɔŋ əə́!

⁴Kɛnɛŋ kɛ́ polɛɛ́ anɛ́ɛ́n na məʼtíiyiʼ a mbod ɛ pɛbán wɔnɔ́ yɛ́ɛy əə, a igə aa polɛɛ́ agɛɛn na pɛ́lɛ́ a udi ó pɔɔd pá pɔ́dɛɔ́gɔ yoom a əngis á pəə́liʼtiniʼ ə́?

⁵Kɛ́lɛ na pəŋi oʼto kono. Mɔɔd wo nsiŋ ɔdɛɔ́gɔ anyóon a kɛgaágadɛ kɛáŋan nyɔ́ alɛɛ́ ugusóbini pomóŋŋí pə́ə́ŋ pábaan ná pə́ə́dííyi ə?

⁶Pomóŋŋí na pomóŋŋí pəə́liʼtiniʼ pógóódi lɛ́ pɛ́ɛn adɛ́lɛm a udi ó pɔɔd pá pɔ́dɛɔ́gɔ pəə́liʼtiniʼ lɛ́ páboóyɔmɛ a? Kíʼkóodi lɛ́ kɛáyɛ́ɛlɛ náan! Ndóo!

⁷Kɛ́lɛ sɛ́ɛb lɛ́, əgín kodɛ́lɛm kóog kó poádɛ́lɛm a udi ó pɔɔd lɛ́ páboóyɔmɛ, kiə́ʼkuloodi lɛ́ polɛ pədə́ŋə́ə́n kúfuʼ. Ɔmbɔ́ sɔ́g amágoyɛ́ɛ́lɛ kɔbɛ́, ɔmbɔ́ əmə́guyííbə́nən, tuə́ áa odɛɔ́gɔ ogonóʼtan əə́?

⁸Náa, áanɛ nɛ́gɔŋ, pəŋi agá aa polɛɛ́ agɛɛlɛ pɔsɔ́g kɔbɛ́, pəŋi aa polɛɛ́ əgubuyííbənən. Pəə́liʼtiniʼ aa polɛɛ́ agɛɛlɛ náan, pomóŋŋí pááŋan!

⁹Polɛ palɛŋáán kɔŋɛʼ kɔŋɛʼ lɛ́ pá páagɛɛlanɛ kɔbɛ́ pádɛágɛɛn na oʼkɔɔ a Nɛlaamɛʼ nɛ́ Táán. Pudiyə́lígə́ə́ áay! Pá páagɛɛlanɛ pɛɔg, pá pə́əyə́njən ambog, pá páagɛɛlanɛ pɛdaŋ, panɔ́mɛɛd pá pə́əbúlimən na pɔsɔ́g panɔ́mɛɛd, oó lɛ́ pagɛ́ɛd pá pə́əbúlimən na pɔsɔ́g pagɛ́ɛd,

¹⁰piíbən, pɔɔd pá nɔgág, moŋo poloʼ, pɔɔd pá ŋŋɔ́, pɔɔd pá pɛfaa, ungim nyóon adɛndɛ́ɛ́ kɛɛn na oʼkɔɔ a Nɛlaamɛʼ nɛ́ Táán.

¹¹Taa, náan aa piíŋ a ondáŋ wááŋan páyɛ́ɛ kalaʼ. Náa, a niiŋ nɛ́ Sə́dúk Yə́sus Kilíʼtus, na a toɛn tó Uŋun ó Táán wəəs, mabɛ́ mááŋan mándɛ masɔgɛ́náán, poáʼkodɛ́lɛm tóbó tóbó a oʼto ó Táán, pundigi kə́mmú na nsɔ́ɔ́ a udi wə́ə́ŋ.

¹²Pə́mmú a ondáŋ wááŋan pálɛ əgusəə pɔ́nɔ́: «Ndɛ filí lɛ́ nyɛ́ɛlɛ yiim.» Ɛɛ́ɛ, kɛ́lɛ náan fɔ́lɔ́b, náa, adɛ́njaŋ yiim aa ɛ́lɛɛ́ ɛŋɛʼ na pəŋi. Ɔmbɔ́ tɛn mɛ ndɛ ugusəə nyɔʼkɔ́: «Ndɛ filí lɛ́ nyɛ́ɛlɛ yiim.» Ɛɛ́ɛ, náa, ntiə́gəə́di lɛ́ yoom yɛ́ʼkɔmɔn.

¹³Polɛ əgusəə tɛn poɔʼkɔ́: «Moom mó konɛ mólɛ móonɛ lɛ́ móɛn a kaadɛ, kaadɛ tɛn kálɛ lɛ́ kámɛna moom.» Ɛɛ́ɛ, kɛ́lɛ náan fɔ́lɔ́b. Náa, Táán alɛ́ɛ́ kɛɛlɛ lɛ́ moom móom móbaan muim, múwu. Pólɛŋ lɛ́, Táán adɛʼkáagɛɛlɛ nkó yəəs lɛ́ ná tífiləni yɛ́lɛ́ a ɔlaa ó pɛɔg, ndóo. Ayɛ́ɛ́lɛ yɛ́lɛ́ a oʼto ó Sə́dúk. Sə́dúk nyɔ́lɛ́nyɔ́amɔɛ́d tɛn a oʼto wó nkó yəəs.

¹⁴Táán a toɛn tuə́ŋ, ayɛ́ɛ́lɛ lɛ́ Sə́dúk álon a kəəniʼ ongóm. Əgín tɛn a toɛn tuə́ŋ, alɛ́ɛ́ kɛbɛyóndɛgɛ tɛn pəsi.

¹⁵Adɛ́ polɛ palɛŋáán lɛ́ nkó yaaŋan ɛlɛ pɛʼkab pɛ́ nkó ɛ Kilíʼtus ə! Tuə́ anɛ́ɛ́n áa polɛɛ́ pə́gusiəd nkó yaaŋan yɛ́ ɛlɛɛ́ wɔnɔ́ kɛʼkab kɛ́ nkó ɛ Kilíʼtus, póolad na ɛ pɛdáŋanaʼ ə́? Ndóo, kɛ́dɛɔ́gɔ kɛ́ kaáyɛ́ɛlɛ náan!

¹⁶Pondɛŋɛn lɛ́ mɔɔd nyɔ́ əə́búlim na kɛdáŋanaʼ, pɔ́lɛ́ póob pábaan pándɛ anyóon úmmuʼ ə? Kɛ́lɛ kidiídílə́ a Kálaʼtaʼ lɛ́: «Na ɔnɔ́mɛɛd na ɔʼkɛ́ɛd páagɛɛn úmmuʼ súg[18]»

¹⁷Náa, nyɔ́ amáládɛ́ɛ́ na Sə́dúk, aándɛ anyóon na nyɔ́lɛ́ úmmuʼ a uŋun.

¹⁸Tɛ́dáan nɛbambɛɛ lɛ́ kɔbɛ́ kóog kólɛ kɔbɛ́ kó kúəguúfiləni wɛɛ́nyɔ́amɔɛ́d. Kɔmɔɛ́d lɛ́ mabɛ́ móʼkáanɛ mɛ́ndɛ́ŋ miim mɔ́dɛɔ́dɔ́bɔ nkó yaaŋ.

¹⁹Lɛŋáan lɛ́ nkó yaaŋan ɛlɛ uʼkóó wó Uŋun wó Ufúlúʼtú wó pugódíí, Uŋun wó Táán ayɛ́boyɛ́ʼkɛn[19] Pundigi kə́mmú a nto yaaŋan ɛ pəŋibáamɔɛ́d.

²⁰Táán ayɛ́bowɛ́ɛ́na. Yɛɛ́ʼpɛ́ɛ́ undunə́ ungíŋ. Pugóódi anɛ́ɛ́n lɛ́ púgə́midi Táán na nkó yaaŋan.