Read Yambeta 1 Kɔlɛ́ɛnt 7 Bible Online

1 Kɔlɛ́ɛnt 7 - Yambeta bible

1 Kɔlɛ́ɛnt 7

¹Tɛ́sɔyɔɔn nɛ́gɔŋ kɛbán kɛ́ puyíŋíən a nufuuʼ noáŋan. Kɛ́lɛ kɔŋɛʼ lɛ́ ɔnɔ́mɛɛd adɛʼkóan ɔʼkɛ́ɛd,

²náa, agɛɛlɛ lɛ́ ədimbúlímən na pagɛ́ɛd oó lɛ́ na panɔ́mɛɛd pá pɔ́dɛɔ́gɔ pagán pə́ə́ŋ, ɔmbɔ́ lɛ́ panom pə́ə́ŋ, kɛ́lɛ kɔŋɛʼ lɛ́ ɛ́nɛ́ ɔnɔ́mɛɛd yɛ́ɛn na oʼkán wəəŋ, ɛ́nɛ́ ɔʼkɛ́ɛd áyɛɛn na onom wəəŋ.

³Ɔnɔ́mɛɛd oʼkóodi lɛ́ ə́dúmin oʼkán ngim a mɔdɛ́gɛ́n, ɔʼkɛ́ɛd əʼtúmín tɛn onom ngim.

⁴Nkó yɛ ɔʼkɛ́ɛd ɛdɛágoob na nyɔ́lɛ́, yaagoob na onom. Yoom tɛn náan ímuʼ na ɔnɔ́mɛɛd. Nkó yəəŋ ɛdɛágoob na nyɔ́lɛ́, yaagoob na oʼkán.

⁵Nyummú adɛsáŋɛ́nɛ kaáyɛ́ʼkɛn na sɔ́g, əgín wɔʼkɔ́ pámáágánan unuʼ úmmuʼ lɛ́ páayaŋ kuúd pə́di pɛbán pɛ́ɛb a ɛbá sɔɔŋ, agɛɛlɛ lɛ́ páyɛ́ʼkɛn a pɛɔ́sɔ́gɔ́lɔ́n. Náa, a ngim yɛ́ɛy, píiʼkini kəə́bə́ə́ ɔlaa wɔ́ɔ́bɔn ó na onom na oʼkán. Pádiɛlɛnɛ náan, pádɛágaáʼkɛ kəə́gə́ʼki, ná Sáʼtan yɔ́ɔŋ ngə́ igubudə́əŋi a kɔbɛ́.

⁶Nkə kɛ́ɛnɛ kɛ́ ndɛɛ́ əgusəə kɛ́dɛɔ́gɔ lɛ́ mpoogóda ambaan lɛ́ póɛlɛ náan, ndóo. Mbə́bulóódi agá ngə́ yɛndɛ́ŋ yɛ́ ɛlɛɛ́ ŋŋɛʼ.

⁷A nɛ́am na nɛ́am, ná panɔ́mɛɛd piim pálɛ wɔnɔ́ mɛ, pagɔnagɔ́n. Náa ɛ́nɛ́ mɔɔd alɛ na nkə kɛ́ Táán amámoyɛ́ʼkɛn. Wɛ nyóonɛ olɛ náanɛ, sɔ́g nyummú tɛn alɛ kuə́ŋ náan.

⁸Táá nkə kɛ́ ndə́əsəə na pagɔnagɔ́n, na pidí pɛ́ pagɛ́ɛd áa kɛ́ɛnɛ. Kɔŋɛʼ na pɔ́lɛ́ lɛ́ pɔ́lɔb náan wɔnɔ́ mɛ.

⁹Náa, nyɔ́ ɔdɛɔ́gɔ ogaáʼkɛɛ́ kəə́gə́ʼki, kɔŋɛʼ na nyɔ́lɛ́ lɛ́ ágóan, oó lɛ́ ɔ́dɔn, agolaŋ lɛ́ ɔ́lɔb náan, ɔʼtɛ́m wə́ə́ŋ wɔ́ɔgɔ́lɔ a pagɛ́ɛd, oó lɛ́ a panɔ́mɛɛd.

¹⁰A pɔsɔ́g pá pálɛɛ́ pagoánáán, ndabodɛ́anɛ na pɔ́lɛ́ nyɔʼkɔ́: Ɔʼkɛ́ɛd adɛnjásálɛ́ɛ́ na onom. (Tɔgɛ́ɛ́ tóonɛ, adɛ́njaŋ tóam tó mɛɛ́nyɔ́amɔɛ́d áa tólɛɛ́nɔ, tólɛ tɔgɛ́ɛ́ tó Sə́dúk).

¹¹Amaʼkaásaa, oó lɛ́ adɛnjɛ́ɛ́n kodɔn koɛ́ndɛ́ŋ, oó lɛ́ yíiʼkini koósóbini na onom. Wɛ tɛn onom, odɛŋŋɛ́ŋ oʼkán waaŋ.[20]

¹²A pəŋi póʼkáanɛ pɛ́ndɛ́ŋ, ndabodɛ́anɛ nyɔʼkɔ́: Ungəə́liʼtiniʼ amaʼkɛɛn na ɔʼkɛ́ɛd nyɔ́ ɔdɛɔ́gɔ ungəə́liʼtiniʼ, náa ɔʼkɛ́ɛd nyóon əmə́líʼtíníí kolaa na nyɔ́lɛ́, adɛɛ́mooŋɛ́ŋ (Tóonɛ tɔgɛ́ɛ́ tólɛ tóam tó mɛɛ́nyɔ́amɔɛ́d, adɛ́njaŋ tó Sə́dúk).

¹³Yoom tɛn náan ímuʼ na ɔʼkɛ́ɛd nyɔ́ alɛɛ́ ungəə́liʼtiniʼ náa alɛɛ́ na onom nyɔ́ ɔdɛɔ́gɔ ungəə́liʼtiniʼ. Ɔnɔ́mɛɛd nyóon əməʼkəə́liʼtini kolaa əgín na nyɔ́lɛ́, ɔʼkɛ́ɛd adɛndóʼkánɛ kodɔn kuə́ŋ.

¹⁴Kɛ́lɛ lɛ́, ɔnɔ́mɛɛd nyɔ́ ɔdɛɔ́gɔ ungəə́liʼtiniʼ aándɛ úmmuʼ na pəə́liʼtiniʼ lɛ́ alɛ ondadáán na oʼkán nyɔ́ alɛɛ́ ungəə́liʼtiniʼ. Yoom tɛn náan ímuʼ na ɔʼkɛ́ɛd nyɔ́ ɔdɛɔ́gɔ ungəə́liʼtiniʼ. Nyɔ́lɛ́ tɛn aándɛ úmmuʼ na pəə́liʼtiniʼ lɛ́ alɛ ondadáán na onom nyɔ́ alɛɛ́ ungəə́liʼtiniʼ. Kɛ́dɛʼkɛ́ɛnɛn náan, ná pɔɔ́n pɔ́ɔ́bɔn páagɛɛn wɔnɔ́ pɔɔ́n pá pɔ́dɛɔ́gɔ pəfúŋiə́n, kɔmɔɛ́d lɛ́ a sáád pálɛ pədə́nígiə́n a oʼto ó Táán.

¹⁵Náa, kɛ́maʼkɛɛn lɛ́ sɔ́g nyɔ́ ɔdɛɔ́gɔ ungəə́liʼtiniʼ alɛ anyɔ́ŋɛn lɛ́ kodɔn kósaalɛg na nyɔ́ alɛɛ́ ungəə́liʼtiniʼ, kɛbán fiɛ́d, tíən kósaalɛg. A kɛnɛŋ kɛ́ɛg, sɔ́g nyɔ́ alɛɛ́ ungəə́liʼtiniʼ, yɛɛn onom oo, yɛɛn oʼkán óo, aándɛ filí lɛ́ Táán ayɛ́bɛɛdɔ́ŋɔn lɛ́ ná tɛ́laa a wiiy.

¹⁶Kɛbán kímuʼ, ndəbuŋíən nyɔʼkɔ́ əə: Wɛ ɔʼkɛ́ɛd nyɔ́ olɛɛ́ ungəə́liʼtiniʼ, waálɛŋ lɛ́ olɛ ogɔɔyɛ onom waaŋ á? Wɛ tɛn ɔnɔ́mɛɛd nyɔ́ olɛɛ́ ungəə́liʼtiniʼ, waálɛŋ lɛ́ olɛ ogɔɔyɛ oʼkán waaŋ á?

¹⁷A ngim yɛ́ɛy, ndabodɛ́anɛ lɛ́, ɛ́nɛ́ mɔɔd ogóódi lɛ́ álaa əgín wɔnɔ́ ná Sə́dúk ayɛ́moyɛ́ʼkɛn lɛ́ álaa. Yɛ́ɛn əgín wɔnɔ́ ná ayɛ́ɛ ná Táán ayɛ́modɔ́ŋɔn. Táá nkə kɛ́ ndɛɛ́ agodɛ́ananɛ na pəə́liʼtiniʼ piim a kɛ́ɛg.

¹⁸Wɛ nyɔ́ oyɛ́ɛ onganyɛán kɛnɛŋ kɛ́ Táán ayɛ́godɔ́ŋɔn, lɔb náan, udinjúnjúgə́ni kɛanyánɛ kɛáŋ[21] Wɛ tɛn nyɔ́ odɛʼkɛ́lɛɛ́ onganyɛán, lɔb náan, udinjúúnə kaáyáanyɛ.

¹⁹Wɛɛn onganyɛán óo, odiɛnɛn onganyɛán óo, piim pɛ́ɛb pɛ́lɛ iyó a əngis á Táán. Nkə kɛ́ kɛ́lɛɛ́ kɔ kímuʼ kɛ́lɛ lɛ́, wóóbɛn pɛcɛm pɛ́ Táán.

²⁰Ɛ́nɛ́ mɔɔd ɔ́lɔb wɔnɔ́ ná ayɛ́ɛ kɛnɛŋ kɛ́ Táán ayɛ́modɔ́ŋɔn.

²¹Wɛ nyɔ́ oyɛ́ɛ kɛɔ́lɛ́ kɛnɛŋ kɛ́ Táán ayɛ́godɔ́ŋɔn, wiiyi ɔʼtɛ́m a kaadɛ, náa ngə́ ɛgolon a oʼtɛ́lɛm ó kɛɔ́lɛ́ wóow wó olɛɛ́ a wólɛ́ ɛmaʼkɛɛn kɔ, udiʼtí lɛ́ ɛ́san

²²lɛ́ kɛɔ́lɛ́ kɛ́ Sə́dúk aáʼkodɔ́ŋɔnɛɛ́ kíndigi kə́mmú kɛɔ́lɛ́ lɛ́ kɛándagoob na Sə́dúk. Yoom tɛn náan ímuʼ na mɔɔd o noádɛʼ nyɔ́ Kilíʼtus ɔɔ́dɔ́ŋɔn. Nyɔ́lɛ́ tɛn aándɛ kɛɔ́lɛ́ kɛ́ Kilíʼtus.

²³Táán yɛɛ́ʼpɛ́ɛ́ undunə́ ungíŋ agɛɛlɛ lɛ́ áboówɛɛna. Podɛnjáán anɛ́ɛ́n pɛɔ́lɛ́ pɛ́ pɔɔd.

²⁴Pomóŋŋí, ɛ́nɛ́ mɔɔd ogóódi kɛɛn a udi ó Táán əgín wɔnɔ́ ná ayɛ́ɛ kɛnɛŋ kɛ́ ayɛ́modɔ́ŋɔn.

²⁵A kɛbán kɛ́ puyíŋíən a noá na pá pɔ́dɛɔ́gɔ pagoánáán, nkə kɛ́ mbə́ndəsəlií, adɛ́njaŋ Sə́dúk áa amɛ́ʼtɛánɛ lɛ́ nsəə, ndóo. Mafɛgaʼ máam má mɛɛ́nyɔ́amɔɛ́d áa málɛɛ́nɔ, mɛ nyɔ́ a kɔdɛ́ɛ ɔʼtɛ́m kuə́ŋ, Sə́dúk ayɛ́nyɛɛlɛ lɛ́ nyɛ́ɛn mɔɔd nyɔ́ páagoob tɔgɛ́ɛ́ tuə́ŋ.

²⁶Mɛ ndaafɛg lɛ́, na njəʼkə́nə́ní ngim yɛ́ ɛlɛɛ́ kɔ a mədúg móonɛ, kɛ́lɛ kɔŋɛʼ lɛ́ mɔɔd ɔ́lɔb náan wɔnɔ́ ná alɛɛ́.

²⁷Wɛ nyɔ́ olɛɛ́ na ɔʼkɛ́ɛd, odɛsáá kodɔn koáŋan. Wɛ nyɔ́ odɛɔ́gɔ oʼkoánáán, udinjúúnə kogóan.

²⁸Náa, omaʼkogóan, odiɛlɛnɛ kɔbɛ́. Ɔmbɔ́ ombódóm wo ɔʼkɛ́ɛd tɛn amaʼkodɔn, adiɛlɛnɛ kɔbɛ́. Kɛbán kímuʼ, pá pálɛɛ́ pagoánáán, oó lɛ́ a pɛdɔ́ʼtɔn, pálɛ́ɛ́ kɛɛn na nsɔ́sɔ́gánɛ́ kɛ́fɔlɛ́. Yɛ́lɛ́ ɛgo aa ntɛányɔ́ŋɛnɛɛ́ lɛ́ ná pomɔ́ɔ́ŋ.

²⁹Pomóŋŋí, táá nkə kɛ́ ndɛɛ́ anyɔ́ŋɛn kobodɛ́anɛ aa kɛ́ɛnɛ: Mədúg mə́ndigi miíŋ. Əgəə́bə́ə nɛ́gɔŋ, pá pógódíí pagɛ́ɛd, pálaa wɔnɔ́ pɔɔd pá póʼkódií pagɛ́ɛd.

³⁰Pá pálɛɛ́ tɛn a ɔndɛɛ, pɛ́ɛn wɔnɔ́ pɔ́dɛɔ́gɔ agolɛɛ. Pá pálɛɛ́ agɔnyɔ́ga, páyɛɛn wɔnɔ́ pɔɔd pá pɔ́dɛɔ́gɔ agɔnyɔ́gaá. Pá pálɛɛ́ awɛɛna moom, pɛ́ɛn wɔnɔ́ moom móom mó páawɛɛna módɛɔ́gɔ moɔ́bɔn.

³¹Pá pálɛɛ́ agonɛ nsí yɛ́ɛnɛ, pɛ́ɛn wɔnɔ́ pɔɔd pá pɔ́dɛɔ́gɔ kɔ na kɛnɛŋ na nsí lɛ́, nkə kɛ́ɛnɛ kiim kɛ́ tɛlɛɛ́ agodɛ́ʼtɛg nɛ́gɔŋ, kɛ́lɛ́ɛ́ koman.

³²Ntɛányɔ́ŋɛn lɛ́ ná pomɛ́ɛn na mafɛgaʼ mə́mmú mɛ́ndɛ́ŋ má máaboyɛ́ʼkɛn ɛságág. Mɔɔd nyɔ́ ɔdɛɔ́gɔ oʼkoánáán, oʼto wə́ə́ŋ ungim ólɛ a pɛbán pɛ́ Sə́dúk. Əguunə kɛɛlɛ tuə́ áa ə́gə́mmií Sə́dúk.

³³Náa, nyɔ́ alɛɛ́ oʼkoánáán, oʼto wə́ə́ŋ ungim ólɛ a pɛbán pɛ́ a nsí. Əguunə wɔnɔ́ ná ə́gə́mmií oʼkán.

³⁴A pɛbán pɛ́ɛb pɛ́baan áa aágaag oʼto wə́ə́ŋ. Yoom tɛn náan ímuʼ na ɔʼkɛ́ɛd nyɔ́ adɛ́njaŋ kodɔ́nɛ́ɛ́, oó lɛ́ na ombódóm nyɔ́ əligíí ntúú. Póob náan, oʼto wɔ́ɔ́bɔn ólɛ a pɛbán pɛ́ Sə́dúk. Páanyɔ́ŋɛn lɛ́ ná pámáyɛ́ʼkɛ́nɛ́ɛ́ na nyɔ́lɛ́ ungim lɛ́ na nkó yɔɔbɔn kɛ́, na uŋun wɔ́ɔ́bɔn kɛ́. Kɔmɔɛ́d lɛ́ ɔʼkɛ́ɛd nyɔ́ alɛɛ́ oʼtɔ́nɔ́ɔ́n, oʼto wə́ə́ŋ ólɛ a pɛbán pɛ́ a nsí, əguunə tuə́ áa ə́gə́mmií onom.

³⁵Ndɛ agosɔyɔ náan a kɔŋɛʼ koáŋan, adɛ́njaŋ agoboogóda ambaan lɛ́ pónyáŋɛn kɛnó. Ndɛ anyɔ́ŋɛn lɛ́ ná pomɛ́ɛ́lɛ nkə kɛ́ kɛ́lɛɛ́ kɛŋɛʼ lɛ́ póɛlɛ, póyɛɛn paáládáán fɔ́lɔ́b fɔ́lɔ́b na Sə́dúk nyɔ́lɛ́nyɔ́əsíŋ.

³⁶Tɛ́dálaan nɛ́gɔŋ nkə kɛ́ kɛ́adɛ́ʼtɛg pá páʼkogagananɛɛ́ lɛ́ pɔ́ɔdɔ́nɔnɔn. Onyommón ó mɔɔd amaʼkodála lɛ́ nyɔ́lɛ́ alɛ ogɛɛlɛ nkə kɛ́ kɛ́dɛɔ́gɔ kɛŋɛʼ na kɛɔŋɔn kiə́ŋ lɛ́ adɛágaáʼkɛ kəə́nuŋ[22], amaʼkodála lɛ́ kɔŋɛʼ pɔ́lɛ́ páálad, yɛ́ɛlɛ wɔnɔ́ nɛnyɔ́ŋɛn niə́ŋ, adiɛlɛnɛ kɔbɛ́, ámogóan.

³⁷Náa, kɛ́maʼkɛɛn lɛ́ kɛ́dɛɔ́gɔ a nkódánán yɛ ambaan, əməʼkugumin a ɔʼtɛ́m wə́ə́ŋ lɛ́ adɛágóan ɔʼkɛ́ɛd, náa aádála lɛ́ nyɔ́lɛ́ alɛ ugəə́nuŋ, kɛ́lɛ kɔŋɛʼ kó kómááyɛn.

³⁸Kɛ́lɛ lɛ́, nyɔ́ ɔnɔ́ əəsiəd kɛɔŋɔn kiə́ŋ agaag a yoog, amɛ́ɛ́lɛ kɔŋɛʼ. Sɔ́g tɛn nyɔ́ aásáŋɛ́nɛ kogóan, amɛ́ɛ́lɛ kɔŋɛʼ kó kómááyɛn.

³⁹Ɔʼkɛ́ɛd o kodɔn alɛ oʼkóógódá na onom kɛnɛŋ kiim kɛ́ onom əligíí a ɔlaa. Ɔdɛɔ́gɔ ogɛɛn na wɛndɛ́ŋ. Náa, onom əməʼkugu, aándɛ filí lɛ́ ɔ́dɔn na mɔɔd wɛndɛ́ŋ nyɔ́ aányɔ́ŋɛn. Kɛ́lɛ agá lɛ́, mɔɔd nyóon ogóódi kɛɛn mɔɔd nyɔ́ yaágɛ́nɛ́ɛ́ oʼto na Sə́dúk.

⁴⁰Na náan kɛ́, amaʼkolɔb ɔʼtɔ́n, kɛ́lɛ kɔŋɛʼ agaáyɛn náan. Nɛfɛgaʼ nɛ́am aa nɛ́ɛn nɛ́lɛɛ́ náan, ndaafɛg lɛ́ mɛ ndɛ tɛn na Uŋun ó Táán.