Read Yambeta 1 Kɔlɛ́ɛnt 8 Bible Online

1 Kɔlɛ́ɛnt 8 - Yambeta bible

1 Kɔlɛ́ɛnt 8

¹Tɛ́sɔyɔɔn nɛ́gɔŋ kɛbán kɛ́ manám má pááfɔnya a pɛbán pɛ́ ambog[23] Wɔnɔ́ ná polɛɛ́ əgusəə, kɛ́lɛ náan lɛ́ pɛbán pɛ́ɛb pɛ́lɛ pɛlɛŋáán. Kɛ́lɛ fɔ́lɔ́b lɛ́ kolɛŋ kóagɛɛlɛ lɛ́ mɔɔd yábágɛdɛ, kɔmɔɛ́d lɛ́ nnyɔ́ŋánán yɛ́lɛ́ yagɛɛlɛ lɛ́ pəə́liʼtiniʼ pálɛŋ kogon a kəə́liʼtiniʼ.

²Mɔɔd amaʼkɛɛn kɔ nyɔ́ ɔnɔ́ nyɔ́lɛ́ aálɛŋ yoom, adɛ́ndɛŋ wɔnɔ́ ná kíəguunə lɛ́ mɔɔd álɛŋ.

³Náa, nyɔ́ aányɔ́ŋɛn Táán, nyóon, Táán amámoólɛ́ŋ.

⁴Kɛ́lɛ lɛ́ tɛlɛ págonɛ anyóon manám má pááfɔnya a pɛbán pɛ́ ambog ə́? Tɛlɛ palɛŋáán lɛ́ nɛbog nɛ́dɛɔ́gɔ yoom a nsí yɛ́ɛnɛ, Táán alɛ əgín tɛn úmmuʼ súg.

⁵Ɔmbɔ́ ná a mɔɛn na a nsí, moom múmmú mólɛɛ́ kɔ mó pɔɔd pálɛɛ́ əgusiəd wɔnɔ́ padáán. (Kɛ́lɛ fɔ́lɔ́b náan lɛ́ padáán pálɛ piíŋ, pəsə́dúg tɛn piíŋ[24])

⁶Náa, a noá na pəsi, Táán alɛ úmmuʼ súg. Alɛ Táán Sɛ nyɔ́ ayɛ́ɛ́lɛ moom muim. A oʼto wə́ə́ŋ áa tɛlɛɛ́ alaa. Sə́dúk alɛ tɛn úmmuʼ súg, Yə́sus Kilíʼtus nyɔ́ a oʼto wə́ə́ŋ áa moom muim móyáyɛ́lɛ́ɛ́, a oʼto wə́ə́ŋ tɛn aa pəsi tɛlɛɛ́ alaa.

⁷Náa, kɛbán kímuʼ, adɛ́njaŋ ungim aa aálɛŋ fɔ́lɔ́b yɛ́ɛy. Ngab ɛ pəə́liʼtiniʼ yimmú ɛyámɛ́dɛ́nɛ́ɛ́ kɛ́fɔlɛ́ a pɛbán pɛ́ ambog a ombod wóonɛ lɛ́ pálɛ agonɛ manám má pááfɔnya kɔ wɔnɔ́ málɛ agá manám má pááfɔnyan padáán pá fɔ́lɔ́b. Ntɛ́m yɔɔbɔn iligi ntom, kɛnɛŋ kɛ́ páánɛ́ manám moom kɛ́lɛ agoboyɛ́ɛlɛ a ntɛ́m yɔɔbɔn a kaadɛ wɔnɔ́ pámɛ́ɛ́lɛ yoom yɛ́ ɛ́lɛɛ́ kifuə́ a əngis á Táán.

⁸Kɔmɔɛ́d lɛ́ adɛ́njaŋ yoom ɛ́ konɛ yɛ́ mɔɔd aágaáyáág a kaadɛ aa yáamoyɛ́ɛlɛ lɛ́ yɛ́ɛn ndúmiʼ na Táán, ndóo. Tɛnníɛn moom móom oo, kɛ́dɛ́abɛyɛ́ɛlɛ lɛ́ tɛ́ʼtaŋ yoom na yoom. Ɔmbɔ́ Tɛánɛ oo, kɛ́dɛ́abɛyɛ́ɛlɛ tɛn lɛ́ tɛɔ́ŋɔnɔn na Táán[25]

⁹Náa, ɔmbɔ́ ná kɛ́lɛɛ́ lɛ́ pəŋi polɛ filí lɛ́ pónɛ yiim yɛ́ yə́əbugə́mmi, pólóʼkɔd na nkə kɛ́ polɛɛ́ agɛɛlɛ, agɛɛlɛ lɛ́ pɔsɔ́g pá pádɛ́ʼkónɛ́ɛ́ a kəə́liʼtiniʼ, pudiíbudə́ə́ŋi a kɔbɛ́.

¹⁰Kɛ́lɛ lɛ́, pəŋi pá poálɛŋ lɛ́ polɛ págonɛ moom mó pááfɔnya a pɛbán pɛ́ ambog, pɔsɔ́g pá pádɛ́ʼkónɛ́ɛ́ a kəə́liʼtiniʼ pámaʼkoboodála poánɛ, kɛ́dɛáboyɛ́ɛlɛ lɛ́ pɔ́lɛ́ tɛn pánɛ a?

¹¹Náan, sɔ́g nyóon nyɔ́ adɛ́ʼkónɛ́ɛ́ a kəə́liʼtiniʼ, əənim a oʼto ó kolɛŋ koáŋ kó wɛ wɔʼkɔ́ waálɛŋ, nyɔ́lɛ́ woómóŋŋí nyɔ́ Kilíʼtus yiígú a oʼto wə́ə́ŋ ə́?

¹²Kɛnɛŋ kɛ́ polɛɛ́ agɛɛlɛnɛ pomóŋŋí pááŋan pəə́liʼtiniʼ kɔbɛ́ náan, poágoon kəə́liʼtiniʼ koɔ́bɔn kó kúligíí kudom, Kilíʼtus nyɔ́lɛ́nyɔ́amɔɛ́d áa pomɛ́ɛ́lɛ́nɛ kɔbɛ́ náan.

¹³Kólɛ́ aa, kɛ́maʼkɛɛn lɛ́ a oʼto ó manám má mɛ ndɛɛ́ agonɛ aa móŋŋí waam əə́də́əŋ a kɔbɛ́, ntɛndɛ́ɛ́ kiiʼkini konɛ kə́mmú manám agɛɛlɛ lɛ́ ntiímudə́ə́ŋi a kɔbɛ́.