Read Yambeta 1 Kɔlɛ́ɛnt 9 Bible Online

1 Kɔlɛ́ɛnt 9 - Yambeta bible

1 Kɔlɛ́ɛnt 9

¹Mɛ óoʼ, ntɛɔ́gɔ filí ə́? Ntɛɔ́gɔ mɔɔ́n o maʼtom a? Ntɛʼkáadála Sə́dúk wəəs Yə́sus na əngis ə[26]? Pigólí pɛ́ ndɛɛ́ əgugudin Sə́dúk, adɛ́ pɛ́lɛ́ pɛ́go aa pɛ́ɛnɛ pɛ́lɛɛ́ pəŋi wɔnɔ́ ná polɛɛ́ náan a ngə́ yəəŋ ə́?

²Ɔmbɔ́ pɔɔd pɛ́ndɛ́ŋ pásáŋɛnɛ lɛ́ ntɛɔ́gɔ mɔɔ́n o maʼtom, a pəŋi, isuŋ ɛ́dɛɔ́gɔ, ndɛ mɔɔ́n o maʼtom. Nkə kɛ́ kióloodi lɛ́ ndɛ mɔɔ́n o maʼtom kɛ́lɛ pəŋi, lɛ́ polɛ paladáán na Sə́dúk.

³Táá nkə kɛ́ ndɛɛ́ əguúlisini, agaánɔna na pá páagɛsɔ́mɛna aa kɛ́ɛnɛ. Nyɔʼkɔ́:

⁴Mɛ ntigóodi filí yɛ́ɛnɛ lɛ́ nyɔ́ɔŋ tɛn yoom ɛ́ konɛ na ɛ́ koŋo a pigólí pɛ́ ndɛɛ́ agɛɛlɛ a?

⁵Ntɛɔ́gɔ tɛn filí lɛ́ nkóan ɔʼkɛ́ɛd nyɔ́ alɛɛ́ ungəə́liʼtiniʼ, ndə́giim nfíoŋ na nyɔ́lɛ́ a mangɛn máam wɔnɔ́ pɔsɔ́g pɔɔ́n pá maʼtom, pomóŋŋí pá Sə́dúk ə́? Ɔmbɔ́ lɛ́ wɔnɔ́ Sɛ́fas[27] a?

⁶Əgín pəsibə́əsíŋ lɛ́ na Panábas na mɛ áa kɛ́lɛɛ́ lɛ́ tɛásɔɛ́lɛdɛd kɛɔsɛn agɛɛlɛ lɛ́ tɛ́nɛ yoom a?

⁷Ə́lə́ə́ áa poáʼkoóbɛ́ɛ́ lɛ́ sɔ́njaa ɛmɛ́ɛn agɛɛlɛ pigólí, ɛmáyaáʼpɛ́ɛ́ yɛ́lɛ́yɛ́amɔɛ́d? Ɔmbɔ́ tɛn lɛ́ mɔɔd aádɛ́g pɔlɛ́m puə́ŋ áság kolɔb annɛ́ nkə kɛ́ kɛ́lɛɛ́ agolon kɔ a pɔlɛ́m póob? Oó lɛ́ mɔɔd nyɔ́ alɛɛ́ ənuŋ mudúg ɔ́ɔlɔb lɛ́ adɛáŋo mílíig má mudúg mó alɛɛ́ ənuŋ?

⁸Nkə kɛ́ɛnɛ kɛ́ mbə́siəd nkaʼtɛ́n a kɛ́lɛ́, kɛ́dɛɔ́gɔ əgín kɛbán kɛ́ pɔɔd píídə́nígi lɛ́ náan aa kíɛnɛɛ́, ndóo. Ɔmbɔ́ tɛn pɛcɛm pɛ́ Moyíis pɛ́lɛ əgusəə yoom ímuʼ náan.

⁹Kɛ́lɛ kidiídílə́ náan a Kálaʼtaʼ lɛ́: «Kɛ́ʼtɛ́ɛ́lɛn lɛ́ káwoʼ yɛ́ ɛlɛɛ́ əgugín ngəŋ, pámoogod unuʼ əgumusiə́gi lɛ́ ɛdɛnnɛ́[28]» Kióloodi anyóon lɛ́ paʼkáwoʼ aa Táán alɛ agaáságɛma náan a?

¹⁰Ndóo, a oʼto wə́ə́s áa yiísə́ə́ náan. A fɔ́lɔ́b, a oʼto wə́ə́s áa kɛbán kɛ́ɛg kíyə́dílə́ə́. Kɛ́lɛ lɛ́, nyɔ́ əə́bun kɛbon a pigólí, na nyɔ́ alɛɛ́ əgugín ngəŋ, pɔ́lɛ́ piim pógóódi komɛna pɛda lɛ́ pɔ́ɔgɔɔŋ yɔɔbɔn ngab.

¹¹Tiímísə masám má Uŋun a ntɛ́m yaaŋan. Timəʼkubug ngab a tugúm tó pugódíí ná tɛmɛ́ɛ́lɛ kɔbɛ́ á[29]?

¹²Pɔsɔ́g pɛ́ndɛ́ŋ pámaʼkɛɛn na filí yɛ́ɛnɛ lɛ́ pə́siəd a pəŋi nkə kɛ́ páagaámɛ́nɛ na kɛ́lɛ́, pɛnɛŋ pɛ́sɛ́g anɛ́ɛ́n na pəsi ə́? Náa, pəsi tɛdɛʼkáagɛɛlɛ náan. Tiɛ́nóʼtan agá nkə kiim agɛɛlɛ lɛ́ tɛdɛnyɛ́ɛ́lɛ yoom na yoom yɛ́ ɛ́lɛɛ́ ɛ́gaádádɛg a ngə́ ɛ Tɔsɔm Tólaŋ tó túəsəə ɔlaa ó Kilíʼtus.

¹³Adɛ́ poálɛŋ lɛ́ pá pálɛɛ́ əgugud a Tɛ́mpɛl, na moom mó pɔɔd pálɛɛ́ əgiimən na mólɛ́ kɔ aa pálɛɛ́ alaa a! Payaaganɛʼ pɛfɔny tɛn, pógóódi ngab a pɛfɔny pɛ́ɛb pɛ́ páagɛɛlanɛ a kibóŋ kɛ́ pɛfɔny á[30]?

¹⁴Yoom tɛn ímuʼ náan aa Sə́dúk yiísə́ə́ lɛ́ pá pálɛɛ́ alɔɛgɛ Tɔsɔm Tólaŋ pógóódi lɛ́ pálaa tɛn a tólɛ́[31]

¹⁵Náa mɛ ntiɛlɛnɛ yoom na yoom wɔnɔ́ yɛ́ɛy ɔmbɔ́ ímuʼ. Ntidilən tɛn nufuuʼ nóonɛ lɛ́ ná póɛnyɛɛ́ʼkɛn yoom na yoom, ndóo. Kɔŋɛʼ lɛ́ nku agá! Mɔɔd ogɛʼkábɛn oʼtɛ́lɛm wóow wó ndɛɛ́ ogaányáadɛ a wólɛ́, ɔdɛɔ́gɔ!

¹⁶Mɛ ntɛɔ́gɔ agaányáadɛ lɛ́ ndɛ alɔɛgɛ Tɔsɔm Tólaŋ. Kɛ́lɛ oʼtom wó páyɛ́nyáŋɛ́nɛ. Kɔbɛ́ tɛn na mɛ ná ntɛlɔɛgɛnɛ tólɛ́.

¹⁷Pɔ́nɔ́ nyaásoŋɛn pigólí pɛ́ɛb mɛɛ́nyɔ́amɔɛ́d ná nkóódi lɛ́ nyɛ́ɛn na pɛsáábɔ́n kɔ. Náa, wɔnɔ́ ná kɛ́lɛɛ́ lɛ́ kɛnyáŋɛnɛ aa páyɛ́nyáŋɛ́nɛ oʼtom wóow, ndɛ oʼkódágódá lɛ́ nyɛ́ɛlɛ wólɛ́.

¹⁸Pɛsáábɔ́n pɛ́am anɛ́ɛ́n ə́ə, pɛ́lɛ lɛ́ nkə ə́? Pɛ́lɛ tɔnyɔ́g tóonɛ lɛ́ ndɛ alɔɛgɛ Tɔsɔm Tólaŋ a náan iyó, ntiunə kɛɛn na nkə kɛ́ ɔndɔɛgɛʼ Tɔsɔm Tólaŋ ogóódi lɛ́ yɔ́ɔŋ.

¹⁹Ndɛ filí, ntɛɔ́gɔ kɛɔ́lɛ́ kɛ́ mɔɔd, náa njáyáánɛ́ɛ́ kɛɔ́lɛ́ kɛ́ mɔɔd ungim agɛɛlɛ lɛ́ nsúid ɛ́fɔlɛ́ ɛ́ pɔɔd ná Kilíʼtus alɛɛ́.

²⁰Kɛnɛŋ kɛ́ ndɛ na pɔɔ́n pá Yúdɛn, ndɛ agɛɛlɛ wɔnɔ́ pɔ́lɛ́ agɛɛlɛ lɛ́ mpuyə́súidin. Ɔmbɔ́ ná mɛ ntɛɔ́gɔ oʼkódágódá na pɛcɛm pɛ́ Moyíis, ndɛ alaa wɔnɔ́ ndɛ agá oʼkódágódá na pɛ́lɛ́, agɛɛlɛ lɛ́ nyə́súidin pá pálɛɛ́ pagódágódá na pɛ́lɛ́.

²¹Yoom tɛn ímuʼ náan na pɛnɔɔŋɛʼ pɛ́ pɛ́ndɛŋɛnɛɛ́ pɛcɛm pɛ́ Moyíis. Ndaalaa na pɔ́lɛ́ tɛn wɔnɔ́ mɔɔd nyɔ́ andɛŋɛnɛɛ́ pɛcɛm, agɛɛlɛ lɛ́ mpuyə́súidin. Kídíoloodi anyóon lɛ́ ntigóodi kɛnɛŋ na pɛcɛm pɛ́ Táán, ndóo. Kɛ́lɛ lɛ́ ndɛ agoóbɛn kɛcɛm kɛ́ Kilíʼtus.

²²Ndɛ alaa na pá pálɛɛ́ podom a kəə́liʼtiniʼ wɔnɔ́ mɛɛ́nyɔ́amɔɛ́d tɛn ndɛ uʼtom, agɛɛlɛ lɛ́ mpuyə́súidin. Mbááyánɛ́ɛ́ ombod ungim a kidíídí kɛ́ mɔɔd ungim lɛ́ ná nyɔ́ɔyɛ ngab yimmú, isuŋ fiɛ́d.

²³Ndɛ agɛɛlɛ nkə kɛ́ɛg kiim a oʼto ó Tɔsɔm Tólaŋ lɛ́ ná nyɔ́ɔŋ kɔŋɛʼ kó kólɛɛ́ kɔ.

²⁴Adɛ́ poálɛŋ lɛ́ kɛnɛŋ kɛ́ pɔɔd pálɛ agaáfɛg ɔʼtɛ́d a kɛdom kɛ́ wɔɔ́n, ungim alɛ agaágɔ́nɛgɛ ɔʼtɛ́d, náa, əgín úmmuʼ súg nyɔ́ aálon oʼto aa əə́siəd nodám á! Tɛ́dáan anɛ́ɛ́n agɛɛlɛ lɛ́ púsiəd nólɛ́.

²⁵Pɔɔd piim pá páagɛɛlanɛ pɛbán wɔnɔ́ pɛ́ɛb pɛ́gaáfɛg ɔʼtɛ́d, ɔmbɔ́ lɛ́ kaáfɛg kiʼtuuliʼ, pálɛ əgəə́yəʼkəni pumog na toɛn. Pálɛ agɛɛlɛ nkə kɛ́ɛg kiim lɛ́ ná pɔɔ́ŋ nodám nó núdiə́ʼtə́líí. Pəsi tɛlɛ agaágɔ́nɛgɛ agɛɛlɛ lɛ́ tɛ́ɔŋ nodám nó a pɛnɛŋ piim.

²⁶Kólɛ́ aa mɛ ndɛɛ́ adɛ́da əngis aʼtámáán a nkə kɛ́ kɛ́lɛɛ́ yuudi. Ndɛ agonɔɛyɛ kiʼtuuliʼ ntɛdoɛ́dán pɛʼkam na mɔɛn na mɔɛn,

²⁷náa, ndɛ agaáyɛ́ʼkɛn ntɔ́b a nkó na toɛn agɛɛlɛ lɛ́ yɛ́njoóbɛn ná Táán adɛyɛ́nyaág mɛ a ɛbá ná mbáʼkolɔɛgɛnɛ pɔsɔ́g Tɔsɔm Tólaŋ.