Read Yambeta 2 Kɔlɛ́ɛnt 1 Bible Online

2 Kɔlɛ́ɛnt 1 - Yambeta bible

2 Kɔlɛ́ɛnt 1

¹Nufuuʼ nóonɛ, mɛ Póol nyɔ́ ndɛɛ́ mɔɔ́n o maʼtom o Yə́sus Kilíʼtus a nɛnyɔ́ŋɛn nɛ́ Táán, na móŋŋí wəəs Timoʼtə́ə aa timə́budílən pəŋi ɛgɔny ɛ́ pəə́liʼtiniʼ yɛ́ a Kɔlɛ́ɛnt na pɔsɔ́g tɛn piim pá pálɛɛ́ agoob na Táán áay a Aʼkáay[1]

²Táán Sɛ wəəs pɔ́lɛ́ na Sə́dúk Yə́sus Kilíʼtus páboyɛ́ɛlɛ kɔŋɛʼ á! Páboyɛ́ʼkɛn tɛn kiwiiyiʼ á!

³Nnyáádɛ́ yɛ́ɛn na Táán, Sɛ o Sə́dúk wəəs Yə́sus Kilíʼtus. Alɛ Sɛ nyɔ́ alɛɛ́ na maan na pɔɔd, Táán nyɔ́ əə́wiiyəni pɔɔd ɔʼtɛ́m pɛnɛŋ piim[2]

⁴Alɛ əgibiíwiiyi ɔʼtɛ́m a ntɔ́b yəəs ngim agɛɛlɛ lɛ́ pəsi tɛn tiwiiyəni pá pálɛɛ́ na mbod yɛ ntɔ́b ngim. Tíbuúwiiyəni tɛn pɔ́lɛ́ ntɛ́m wɔnɔ́ ná nyɔ́lɛ́ alɛɛ́ əgibiíwiiyəni pəsi.

⁵Kɛ́lɛ lɛ́, wɔnɔ́ ná tɛlɛɛ́ əgusiəd ngab a ɛ́fɔlɛ́ yɛ́ ntɔ́b ɛ Kilíʼtus, yoom ímuʼ náan aa nyɔ́lɛ́ Kilíʼtus əə́biíwiiyəni ɔʼtɛ́m kɛ́fɔlɛ́ agaáyɛn náan.

⁶Nga tɛlɛ agonɛ ntɔ́b, kɛ́lɛ lɛ́ ná pəŋi póɛn na ntɛ́m a kaadɛ yəə́b, póyɔɔy. Nga pəsi tɛlɛ ntɛ́m a kaadɛ yəə́b, kɛ́lɛ lɛ́ ná pəŋi tɛn póɛn na ntɛ́m a kaadɛ yəə́b agɛɛlɛ lɛ́ pónóʼtan ntɔ́b wɔnɔ́ yɛ́ɛnɛ yɛ́ pəsi tɛlɛɛ́ agonɛ nɛ́gɔŋ.

⁷Tɛlɛ agomɛna pɛda a kidíídí kɛáŋan na toɛn lɛ́ tɛálɛŋ tɛɔʼkɔ́ wɔnɔ́ ná polɛɛ́ əgusiəd ngab náan a ntɔ́b yəəs, Táán alɛ́ɛ́ kubuúwiiyi tɛn ɔʼtɛ́m wɔnɔ́ pəsi.

⁸Pomóŋŋí, kɛ́lɛ lɛ́: Tɛlɛ anyɔ́ŋɛn lɛ́ pólɛŋ ntɔ́b ngim yɛ́ tɛɛ́nɛ́ a nigúu nɛ́ Əsíi. Ntɔ́b yɛ́ tɛɛ́nɛ́ kɔ ɛyɛ́ɛ kɛlaŋanan. Ɛyɛ́bɛnóɛn a ombod wóonɛ lɛ́ tɛɛ́fɛ́g lɛ́ kiə́s kɛ́lɛ kɛmanáán.

⁹Tiyííg a ombod wóonɛ lɛ́ tɛáság kusəə tɛɔʼkɔ́ pə́ʼkugumin lɛ́ páabɛyóon. Kɛ́yásánɛ́ɛ́ náan agɛbɛyáaʼkananɛ lɛ́ tɛdɛnjáyáágɛ́ɛ́ a oʼto lɛ́ a pəsibáamɔɛ́d tɛlɛ págɛɛlɛ yoom, tiɛ́yɛg agá oʼto na Táán nyɔ́lɛ́nyɔ́əsíŋ nyɔ́ alɛɛ́ agoóndɛgɛ pɛlóŋ.

¹⁰Nyɔ́lɛ́ aa ayɛ́bɛlónɛ a kugu wɔnɔ́ kóog náan, alɛ́ɛ́ kɛbɛlónɛ a kúmmú tɛn. Ɛɛ́ɛ, tɛlɛ agomɛna pɛda lɛ́ alɛ́ɛ́ kɛbɛlónɛ a kúmmú.

¹¹Pəŋibáamɔɛ́d tɛn, a pɛɔ́sɔ́gɔ́lɔ́n pɛáŋan pɛ́ polɛɛ́ agɛɛlanɛ a kidíídí kiə́s, polɛ abɛyábɛgɛn ombɔg. Náan aa ɛ́fɔlɛ́ ɛ́lɛ́ɛ́ kɛɛ́ʼkɛnɛɛ́ pisoyidiʼ na Táán lɛ́ amóób pɛɔ́sɔ́gɔ́lɔ́n pɛɔ́bɔn a kidíídí kiə́s, amáabɛyɛ́ɛlɛ kɔŋɛʼ.

¹²Táá nkə kɛ́ tɛlɛɛ́ pə́gəə́gidən igog a kɛ́lɛ́ aa kɛ́ɛnɛ lɛ́: Ntɛ́m yəəs a kaadɛ yəə́b yoóloodi lɛ́ tiɛ́lɛŋ kuləndin na pɔɔd, kɔŋɛʼ kɔŋɛʼ na pəŋi, tiə́ləndin tɛn a sáád. Pɛ́ɛb piim na Táán áa pɛ́lɛɛ́ əgiim, a ɔʼtɛ́m wə́ə́ŋ ólaŋ, adɛ́njaŋ a nsiŋ ɛ pɔɔd.

¹³Kɛ́lɛ lɛ́, a tufuuʼ tuə́s, nkə kɛ́ polɛɛ́ págobana kɛ́lɛ́ kɛ́go aa timə́budílən, kɛ́lɛ́ aa pomóób. Ndɛ agomɛna pɛda lɛ́ polɛ́ɛ́ kolɛŋ kiim abɛyóób əgín,

¹⁴ɔmbɔ́ ná ngab agá aa pogóóbɛ́nɛ́ɛ́ nɛ́gɔŋ. Kɛ́lɛ lɛ́, a wɔɔ́s wó Sə́dúk Yə́sus alɛ́ɛ́ kimbuúlinií, polɛ́ɛ́ kɔnyɔ́ga na pəsi wɔnɔ́ ná pəsi tɛn tɛlɛ́ɛ́ kɔnyɔ́gaá na pəŋi.

¹⁵Ntɛʼkɛ́ɛ na isuŋ kɔ ɔmbɔ́ sɔɔŋ a ombod wóonɛ lɛ́ nyɛɛ́fɛ́ga sɛ́ɛb lɛ́ a niɛn nɛ́am a Masɛdowáan ndaayaŋ asan a pəŋi ná ntíin nyɛɛn kɔ́gɔ́ɔg. Náan, a nimbuúlini nɛ́am nɛ́ a Masɛdowáan[3], nyíiʼkini kosan káag agoboodála. Kɛ́agɛɛlɛ lɛ́ póɛn na tɔnyɔ́g pɛnɛŋ pɛ́baan, púyiʼkóomin agɛɛlɛ lɛ́ nyɛ́ɛn na ongɛn wáam yuudi súʼtə́ə́ a Siudə́ə.

¹⁷Ná nyiísə́ə́ lɛ́ nkə kɛ́ ndáagɛɛlɛ kɛ́ɛg əə, nyɛɛ́sɔ́yɔ ntɛfɛga kɔŋɛʼ óm, oó lɛ́ pɛbán pɛ́ ndɛɛ́ afɛga kɛɛlɛ pɛ́lɛ a mafɛgaʼ má pɔɔd, a ombod wóonɛ lɛ́ ná ndə́əsəə nɛ́gɔŋ lɛ́ «Ɛɛ́ɛ», na koany «Ɛɛ́ɛ» ɛ́yaan agá «Ndóo» ə́?

¹⁸Taa, əgín a kɛ́ Táán nyɔ́ ɔdɛɔ́gɔ nnuʼ ɛ́baan. Nkə kɛ́ tɛyɛ́ɛ agosɔyɔ na pəŋi, tɛdɛʼkɛ́ɛ əgusəə na unuʼ lɛ́ «Ɛɛ́ɛ», a ntɛ́m yəəs a kaadɛ tɛɔʼkɔ́ «Ndóo»,

¹⁹lɛ́ Yə́sus Kilíʼtus, Mɔɔ́n o Táán nyɔ́, na Sɛ́las, na Timoʼtə́ə, na mɛɛ́nyɔ́amɔɛ́d tɛyɛ́bolɔɛ́gɛ́nɛ[4] ədiʼkə́əgiim lɛ́ yíim əsəə «Ɛɛ́ɛ» na «Ndóo.» Náa, pɛnɛŋ piim nyɔ́lɛ́ ayɛ́ɛ əgín «Ɛɛ́ɛ.»

²⁰Nkə kiim kɛ́ Táán yɛɛ́gágɛn pɔɔd, kɛ́ɛ́lón «Ɛɛ́ɛ» na nyɔ́lɛ́. Náan anɛ́ɛ́n, a niiŋ nɛ́ Yə́sus Kilíʼtus aa tiə́səə tɛɔʼkɔ́ «Aamɛn», agɛɛ́ʼkɛn nugəm na Táán.

²¹Táán nyɔ́lɛ́nyɔ́amɔɛ́d áa amábɛyɛ́ɛ́lɛ lɛ́ tiə́gumənən na toɛn na pəŋi lɛ́ tɛlɛ paladáán na Kilíʼtus. Nyɔ́lɛ́ aa əmə́biyííyid.

²²Nyɔ́lɛ́ tɛn aa amábɛyáág kɛbɛɛ kɛ́ kíoloodi lɛ́ tɛlɛ pə́ə́ŋ, amáyaág Uŋun wə́ə́ŋ wó Ufúlúʼtú a ntɛ́m yəəs lɛ́ ná tɛdɛnjɛ́ɛ́n na isuŋ lɛ́ alɛ́ɛ́ kɛbɛyɛ́ʼkɛn tugúm tó abɛyɛ́ngɛ́gɛ́nɛ́ɛ́.

²³Mbə́siəd Táán a wɛ́sɛnɛg. (Nkə kɛ́ɛnɛ kɛ́ ndə́əsəə kɛ́maʼkɛɛn pɛnyaʼ, yɛ́nyɛɛlɛ ntə́əŋ, nku.) Kɛ́lɛ lɛ́: Ntiʼkə́əgimbuúlini a Kɔlɛ́ɛnt lɛ́ ntɛʼkɛ́ɛ anyɔ́ŋɛn kiim əsəə kɛbán kɛ́ kɛ́aboyɛ́ʼkɛn ɔʼtɛ́m kogany.

²⁴Tɛdɛɔ́gɔ əguunə lɛ́ ná tɛmáboogóda ambaan agɛɛlɛ lɛ́ póag oʼto na Táán. Nkə kɛ́ tɛyɛ́ɛ əguunə kɛ́lɛ lɛ́ tígud pəsi piim ondáŋ agɛɛlɛ lɛ́ póɛn na tɔnyɔ́g lɛ́ puə́bísin kɔŋɛʼ a kəə́liʼtiniʼ.