Read Yambeta 2 Kɔlɛ́ɛnt 10 Bible Online

2 Kɔlɛ́ɛnt 10 - Yambeta bible

2 Kɔlɛ́ɛnt 10

¹Mɛɛ́nyɔ́amɔɛ́d Póol nyɔ́ pálɛɛ́ əgusəə lɛ́ kɛnɛŋ kɛ́ ndɛɛ́ a ɛbá yááŋan, ndɛ agomɔ́mmɔm. Náa, kɛnɛŋ kɛ́ ndɛɛ́ laálá, ndɛ nyɛ́n nyɛ́n nyɛ́n, ndəbuŋíən a niiŋ nɛ́ Kilíʼtus nyɔ́ alɛɛ́ yəə́b ɛ mɔɔd, nyɔ́lɛ́ na kisig kɛ́ ɔʼtɛ́m.

²Ndɛ agoboyɔ́sɔ́gɔlɔn lɛ́: Sɛ́gɔɔ podɛyɛ́nyɛɛlɛ lɛ́ mpoosásan ná ndə́giim áay. Ndɛ anyɔ́ŋɛn kosɔyɔn pɔɔd pá pálɛɛ́ agosɔyɔ lɛ́ tɛlɛ əgəə́siəd a nɛ́ pɔɔd na tuyə́ən a oʼto. Ndɛ anyɔ́ŋɛn lɛ́ ná mbábosɔ́yɔn na nɛnyɛ́n.

³Ɛɛ́ɛ, kɛ́lɛ fɔ́lɔ́b náan lɛ́ tɛlɛ pɔɔd na tuyə́ən a oʼto. Náa pɛdá pɛ́ tɛlɛɛ́ agonɔɛyɛ, tɛdɛɔ́gɔ agonɔɛyɛ pɛ́lɛ́ a nɛ́ pɔɔd pá a nsí yɛ́ɛnɛ.

⁴Muduə́m mó tɛlɛɛ́ agonɔɛyɛ na mólɛ́ a pɛdá pɛ́ɛb módɛɔ́gɔ muduə́m mó pɔɔd pá a nsí yɛ́ɛnɛ. Mólɛ muduə́m mó mólɛɛ́ na toɛn tó túəgiim na Táán. Móacagɛlɛdanɛ yiim yɛ́ yáagaádádɛg a ngə́ yəəŋ. Tɛlɛ agoyósag pusiŋ puim pó pódɛɔ́gɔ a fɔ́lɔ́b,

⁵na kəə́gidən a igog kuim kó kúəgíd pɔɔd ngə́ lɛ́ pádɛndɛ́ŋ Táán. Pusiŋ puim, tɛagaag pólɛ́ a kɛáŋ agɛɛlɛ lɛ́ puóbɛn Kilíʼtus.

⁶Pəŋi piim pomaʼkoóbɛn Kilíʼtus, pəsi tɛlɛ ndúmiʼ lɛ́ tɛ́ʼpɔ́nɛsɛ ungim nyɔ́ aásáŋɛnɛ komoyóbɛn.

⁷Lɛŋáan kodɛ́ʼtɛg moom kɔŋɛʼ! Mɔɔd amaʼkaálɛŋ fɔ́lɔ́b fɔ́lɔ́b lɛ́ nyɔ́lɛ́ alɛ agoob na Kilíʼtus, álɛŋ lɛ́ pəsi tɛn tɛlɛ agoob na Kilíʼtus wɔnɔ́ nyɔ́lɛ́!

⁸Ɔmbɔ́ mɛ nyɛɛ́laŋɛn kəə́gidən a igog a toɛn tó Sə́dúk ayɛ́bɛyɛ́ʼkɛn lɛ́ tɛ́bodáŋananɛ, ntɛágɛɛn na oʼto kono lɛ́ toɛn tóod tódɛʼkɛ́ɛ tóonɛ lɛ́ tíbuwíiyi, tóyɛ́ɛ lɛ́ ná tɛ́boyɛ́ɛlɛ pólɛŋ kogon a kəə́liʼtiniʼ.

⁹Ntɛɔ́gɔ anyɔ́ŋɛn lɛ́ pófɛg poɔʼkɔ́ tufuuʼ tóam tólɛ lɛ́ ná mpoyáág wɛɛ́y a ɔʼtɛ́m, ndóo.

¹⁰Kɛ́lɛ lɛ́, pálɛ əgusəə pɔ́nɔ́: «Póol alɛ ɔnnasáŋ a tufuuʼ tuə́ŋ, alɛ nyɛ́n nyɛ́n nyɛ́n a tólɛ́. Náa, kɛnɛŋ kɛ́ alɛɛ́ a udi wə́ə́s, alɛ agomɔ́mmɔm, mɔɔd ɔdɛɔ́sɔ́dɛ́ɛ́ tɔgɛ́ɛ́ tuə́ŋ.»

¹¹Ungim nyɔ́ alɛɛ́ əgusəə náan álɛŋ lɛ́ nkə kɛ́ tɛlɛɛ́ əgusəə a tufuuʼ tuə́s kɛnɛŋ kɛ́ tɛlɛɛ́ laálá na pəŋi, əgín náan aa tɛágɛɛlɛ tɛn kɛnɛŋ kɛ́ tɛágɛɛn a kɛgaágadɛ kɛáŋan.

¹²Kɛ́lɛ fɔ́lɔ́b lɛ́ tɛdɛáyag kaáfɛg, tidiunə tɛn ɔmbɔ́ kɛɛn yoom ímuʼ na pɔsɔ́g pə́mmú pá pálɛɛ́ əgəə́siəd pɔ́lɛ́báamɔɛ́d lɛ́ pálɛ pɛgóʼkóón. Pɔsɔ́g póob náan pálɛ piyəg. Pɔ́lɛ́báamɔɛ́d áa pálɛɛ́ kə́mmú nfɛg yɔɔbɔn. Pálɛ agodɛ́ʼtɛg ongoo wɔ́ɔ́bɔn ó kubin ó pɔ́lɛ́báamɔɛ́d agɛɛlɛ pə́yə́ən wólɛ́.

¹³Ndóo, pəsi tɛdɛágaányáadɛ agolaŋ nkə kɛ́ tɛlɛɛ́. Tɛagaányáadɛ əgín a osom ó pigólí wó Táán amábɛyɛ́ʼkɛn wɔnɔ́ ná amɛ́ɛ́lɛ lɛ́ tíim əgiig ná polɛɛ́.

¹⁴Osom ogo wó ayɛ́bɛyɛ́ʼkɛn a wóow ólɛɛ́ lɛ́ pəsi tíim əgiig káag ná polɛɛ́. Náan aa kɛ́lɛɛ́ lɛ́ pəsi aa tɛlɛɛ́ pɔɔd pá na oʼto na oʼto pá kiim əgiig na Tɔsɔm Tólaŋ tó Kilíʼtus a pəŋi, tɛnjaág ongam.

¹⁵Tɛnjaagɛn ongam lɛ́ tɛdɛáganyɛn a pigólí pɛ́ pɔsɔ́g pɛ́ndɛ́ŋ pámɛ́ɛ́lɛ, ndóo. Tɛlɛ agomɛna pɛda lɛ́ pomaʼkogon əgín kə́mmú a kəə́liʼtiniʼ, pigólí piə́s a pəŋi pɛ́agɛɛn pɛgóʼkóón agaáyɛn náan. Náa, tɛdɛáyaag osom wó Táán amábɛyɛ́ʼkɛn[27]

¹⁶A ngim yɛ́ɛy, tɛagɛɛn alɔɛgɛ Tɔsɔm Tólaŋ a pɛnɔ pímmú pɛ́ pɛ́lɛɛ́ a ngim yaaŋan. Tidiə́guunə lɛ́ tíɛn əgud a pɛnɔ pɛ́ pɔsɔ́g pɛ́ndɛ́ŋ pə́ʼkugudií, agɛɛlɛ lɛ́ tɛányáadɛ ndóo.

¹⁷Kálaʼtaʼ ɛ Táán ɛlɛ əgusəə lɛ́: «Mɔɔd amaʼkɔnyɔ́ŋɛn kəə́gidən a igog, yə́gidən a nkə kɛ́ Sə́dúk amɛ́ɛ́lɛ[28]»

¹⁸Kɛ́lɛ lɛ́, adɛ́njaŋ pá pə́əgəə́gidən a igog pɔ́lɛ́báamɔɛ́d áa pə́əgə́mmi Táán, ndóo. Pá Sə́dúk nyɔ́lɛ́nyɔ́amɔɛ́d aányáadɛ aa pə́əmugə́mmi.