Read Yambeta 2 Kɔlɛ́ɛnt 12 Bible Online

2 Kɔlɛ́ɛnt 12 - Yambeta bible

2 Kɔlɛ́ɛnt 12

¹Nkóódi anɛ́ɛ́n lɛ́ nyányáadɛ, ɔmbɔ́ wɔnɔ́ ná kɛ́dɛɔ́gɔ kɛŋɛʼ. Náa, ndɔɔsɔyɔ nɛ́gɔŋ nkə kɛ́ Sə́dúk əyíndoodi, əmə́yinyəə́səə nkə kɛ́ alɛɛ́.

²Mbálɛŋ mɔɔd nyummú. Mɔɔd ogo nyóon alɛ agoob na Kilíʼtus. Kɛándɛ nɛ́gɔŋ pɛag pɛówád na píniʼ wɔnɔ́ ná Táán əyímusiə́d a mɔɛn, súʼtə́ə́ a mbálámɔɛn a mɔɛmɔɛ́n. [37] (Ntɛálɛŋ nga Táán əyímusiə́d fɔ́lɔ́b a mɔɛn, oó lɛ́ kɛlɛm áa kíyímusíəd. Táán nyɔ́lɛ́nyɔ́əsíŋ áa aálɛŋ.)

³Ɛɛ́ɛ, mbálɛŋ lɛ́ Táán yiísiə́d mɔɔd ogo nyóon a mɔɛn súʼtə́ə́ a Pələdíis.[38] (Ndɛ əgusəə lɛ́ ntɛálɛŋ nga Táán əyímusiə́d fɔ́lɔ́b a mɔɛn, oó lɛ́ kɛlɛm áa kíyímusíəd. Táán nyɔ́lɛ́nyɔ́əsíŋ áa aálɛŋ.) Ayóób kɔ tɔgɛ́ɛ́ tó mɔɔd ɔdɛɔ́gɔ ogaáʼkɛɛ́ kubiʼti. Mɔɔd oʼkóodi lɛ́ ə́biʼti tólɛ́.

⁵A oʼto ó mɔɔd nyóon, ndɛ lɛ́ nyáágany. Náa, a nkə kɛ́ mɛ ndɛɛ́ agɛɛlɛ, ntɛɔ́gɔ ogaágany a kɛ́lɛ́ ná kɛ́sánɛn əgín lɛ́ a pɛbán pɛ́ píoloodi lɛ́ ndɛ ondɛbɛ́dáán.

⁶Mbɛ́ɛ anyɔ́ŋɛn kaágany, tɔgɛ́ɛ́ tóam tódɛʼkɛ́ɛ agɛɛn tɔgɛ́ɛ́ tó kiyəg kɛ́ mɔɔd lɛ́ əgín fɔ́lɔ́b yɛ́lɛ́ na yɛ́lɛ́ aa mbɛ́ɛ lɛ́ nsəə. Náa, mbásáŋɛ́nɛ kaágany lɛ́ ntɛɔ́gɔ anyɔ́ŋɛn lɛ́ mɔɔd yísiəd agaáyɛn wɔnɔ́ ná alɛɛ́ ugisiəd a nɛdálaʼ nɛ́ aádála nkə kɛ́ ndáagɛɛlɛ, ɔmbɔ́ lɛ́ agoob kó aágoob nkə kɛ́ ndə́əsəə.

⁷Kɛbán kímuʼ, nkə kɛ́ Táán ayɛ́ɛ́lɛ lɛ́ ndɛŋ kɛ́lɛ kɛŋɛʼ agaáyɛn náan. Náa, ayɛ́nyáŋɛ́nɛ́nɛ ntɔ́b yɛ́ ndɛɛ́ agaánɛ kɛ́fɔlɛ́ a nkó yaam agɛɛlɛ lɛ́ ntinjə́gídə́níí a igog. Kɛ́lɛ wɔnɔ́ uŋun ó maʼtom ó Sáʼtan aa ólɛɛ́ lɛ́ wɛ́mbáam ná ntinjə́gídə́níí a igog.

⁸Njɔ́sɔ́gɔ́lɔ́nɛ́ɛ́ Sə́dúk a kɛbán kɛ́ɛg pɛnɛŋ pɛ́dáád nyɔʼkɔ́ na nyɔ́lɛ́: «Sə́dúk! Ɛ́nyaáŋɛn a ntɔ́b yɛ́ɛnɛ yɛ́ ndɛɛ́ na yɛ́lɛ́!»

⁹Náa, nyɔ́lɛ́ əyínjuúlísíni ɔnɔ́ na mɛ: «Kɔŋɛʼ kóam kó ndɛɛ́ agoyɛ́ɛlɛnɛ kómágosɛ́ʼtan lɛ́ kɛnɛŋ kɛ́ mɔɔd aáʼkomanɛɛ́ kúfuʼ, áay aa toɛn tóam tuóndogoólodií na nyɔ́lɛ́ a kúfuʼ.» Áay, kaágany kóam kólɛ́ɛ́ kɛɛn agá a nkə kɛ́ kíoloodi lɛ́ ndɛ ondɛbɛ́dáán agɛɛlɛ lɛ́ Kilíʼtus yɛ́nyɛɛ́ʼkɛn toɛn tuə́ŋ.

¹⁰Kólɛ́ aa ndɛɛ́ agɔnyɔ́ga kɛnɛŋ kɛ́ ndɛɛ́ ondɛbɛ́dáán, kɛnɛŋ kɛ́ pálɛ agɛʼtóga, kɛnɛŋ kɛ́ pálɛ agɛnnɔmɛdanɛ əngis, kɛnɛŋ kɛ́ pálɛ agɛcɔʼkɔnɛ, kɛnɛŋ kɛ́ ndɛɛ́ na ntɔ́b. Ndɛ agɔnyɔ́ga kɛnɛŋ kɛ́ pɛbán pɛ́ɛb piim pɛ́lɛ agɛmboan náan a kidíídí kɛ́ Kilíʼtus! Kɛ́lɛ lɛ́, kɛnɛŋ kɛ́ mbáʼkolɛbɛdɛɛ́ kúfuʼ, áay aa mbándanasɛɛ́ a toɛn tó Kilíʼtus aágɛnyɛɛ́ʼkɛn.

¹¹Táá mɛ ndɔ́ɔsɔyɔ wɔnɔ́ mɔɔd nyɔ́ oʼto wáʼkolɛáŋɛ́ɛ́ taa! Pəŋi aa polɛɛ́ agɛnyɛɛlɛ lɛ́ nsɔ́yɔ náan. Pəŋi aa puígóodi lɛ́ póɛnnyáadɛ. Kɛ́lɛ lɛ́ ɔmbɔ́ ntɛɔ́gɔ yoom, págo póob pá polɛɛ́ əgusəə lɛ́ pálɛ pɔɔ́n pá maʼtom pá pagóón pádɛndaŋɛn mɛ ɔmbɔ́ əgín náanɛ sɔɔŋ.

¹²Ɛ́fɔlɛ́ ɛ́ pɛbán pɛ́ píoloodi lɛ́ ndɛ mɔɔ́n o maʼtom ɛ́yáyɛ́lɛ́ɛ́ a kɛgaágadɛ kɛáŋan. Pɛ́lɛ lɛ́: Konóʼtan a mbod ngim, na mbod tɛn ɛ mangán ngim, na piə́wúunəniʼ pɛ́ pɛbán.

¹³Nkə kímuʼ aa njɛ́ɛ́lɛ a nó pəə́liʼtiniʼ pɛ́ndɛ́ŋ kɛ́ ntɛʼkáagɛɛlɛɛ́ a pəŋi, ná kɛ́sánɛn əgín lɛ́ ntɛʼkáabonyáŋɛnɛnɛ kɛnó kɛ́am? Oo, púindisin anɛ́ɛ́n a ɔsɛd wóow yi!

¹⁴Mɛ aa nyóonɛ mbáʼkaáboŋɛnɛɛ́ kə́mmú lɛ́ nyíim a pəŋi a kó annam ádáád, [39] kɛnó kɛ́am kɛ́dɛágɛɛn əgín a oʼto wááŋan lɛ́ adɛ́njaŋ tugúm toáŋan aa ndɛɛ́ əguunə, pəŋibáamɔɛ́d áa ndɛɛ́ əgubuyúunə. Kɛ́lɛ fɔ́lɔ́b lɛ́ adɛ́njaŋ pɔɔ́n áa páagɛɛ́ngɛgɛn pasɛ pɔ́ɔ́bɔn moom, ndóo. Pasɛ aa pógódíí lɛ́ pɛ́ngɛgɛn pɔɔ́n.

¹⁵A oʼto wááŋan, ndɛ ndúmiʼ lɛ́ nyɛɛ́ʼkɛn nkə kiim kɛ́ nkódíí, na mɛɛ́nyɔ́amɔɛ́d kɛ́. Pudiə́giʼkini kɛnnyɔ́ŋɛn anyóon kə́mmú na toɛn lɛ́ wɔnɔ́ ná mɛ mbándabonyɔ́ŋɛnɛɛ́ pəŋi náan kɛ́fɔlɛ́ ə́?

¹⁶Oo yi, kíɛn kɔ náan! Adɛ́ poálɛŋ lɛ́ ntɛʼkáabonyáŋɛnɛ kɛnó kɛ́am, ngɔ́ɔ́! Náa, piíŋ pə́əsəə lɛ́ ndɛ na nsiŋ ə́y! Njɛ́boyɔ́ɔ́ŋ a iyən.

¹⁷Lɛŋáan kodɛ́ʼtɛg. Ungim nyɔ́ njíím mpodómɛn əə, nyummú alɛ kɔ nyɔ́ əyíbulígə agɛɛlɛ lɛ́ ə́buúsiədin tugúm toáŋan yíim agɛnyɛɛ́ʼkɛn əə́?

¹⁸Njɔ́sɔ́gɔ́lɔ́nɛ́ɛ́ Tíid lɛ́ yíim káag ná polɛɛ́. Njɛ́ɛ́lɛ lɛ́ píim pɔ́lɛ́ na móŋŋí wəəs nyɔ́ poálɛŋ.[40] Ná Tíid əyíím ə́ə, əyíbulígə əguunə lɛ́ áboníɛn tugúm toáŋan ə́? Ndóo! Adɛ́ pəsi na nyɔ́lɛ́ tɛɛ́dáŋána a pungə́ əgín pógo púmuʼ na a mafɛgaʼ mágo mə́muʼ ə?

¹⁹Amaʼkɛɛlɛ polɛ afɛga áay nɛ́gɔŋ lɛ́ tɛlɛ agosɔyɔ náan lɛ́ ná tɛ́ɔŋ kilumiʼ a udi wááŋan. Ndóo, pɔsɔ́sɔ́g páam pá ɔʼtɛ́m! A udi ó Táán, a unuʼ úmmuʼ na Kilíʼtus aa tɛɔ́sɔyɔ náan na pəŋi agɛɛlɛ lɛ́ pólɛŋ kogon a kəə́liʼtiniʼ.

²⁰Kɛ́lɛ lɛ́, ndɛ agodammana nyɔʼkɔ́, ná ndə́giim əgiig a pəŋi, ndaboóboan lɛ́ polɛ alaa ɔlaa wó údiə́giʼkə́mmií. Pəŋi tɛn póodála lɛ́ mɛ ntɛɔ́gɔ agosɔyɔ na pəŋi wɔnɔ́ ná kíəbugə́mmi. Ndɛ agodammana koboóboan lɛ́ polɛ masáŋ na masáŋ, yaág yɛ́ əngis na yaág yɛ́ əngis, mulúún na mulúún, kobambaaŋanɛ na kobambaaŋanɛ, pɛdog na pɛdog, ŋŋɔ́ na ŋŋɔ́, kəə́gidən a igog na inyuunyugiʼ.

²¹Ndɛ agodammana lɛ́ ná ndə́giim a pəŋi, Táán aagɛnjaáŋɛ kə́mmú kowa a əngis yááŋan ná ndɛɛla a kidíídí kɛ́ piíŋ pá páyɛ́ɛ́lɛ kɔbɛ́ páʼkasɛ ɔlaa wɔ́ɔ́bɔn əgudi ngə́ yɛ́ yəə́buúfiləni, na kɛbán kɛ́ kubúlimən na pagɛ́ɛd pá pɔ́dɛɔ́gɔ pagán pɔ́ɔ́bɔn, na ɔlaa ó nɛbambɛɛ wó pálɛɛ́ na wólɛ́.