Read Yambeta 2 Kɔlɛ́ɛnt 13 Bible Online

2 Kɔlɛ́ɛnt 13 - Yambeta bible

2 Kɔlɛ́ɛnt 13

¹Táá pɛnɛŋ pɛ́dáád áa pɛ́ɛnɛ wɔnɔ́ ná mbə́ndəgimií a pəŋi. Kɛ́lɛ kidiídílə́ a Kálaʼtaʼ ɛ Táán lɛ́: «Kɛbán kiim, agɛɛlɛ lɛ́ púsóbini kɛ́lɛ́, poɛ́ʼkɛn nsɔ́ɔ́ na mɔɔd, kíəguunə lɛ́ nto ɛ́baan, oó lɛ́ ɛ́dáád ɛ́dɛ́lɛm mbaasɔ́ lɛ́ kɛ́lɛ fɔ́lɔ́b, páádála[41]»

²Nkə kɛ́ nyɛɛ́dɛánɛ na pá páyɛ́ɛ́lɛ kɔbɛ́ kalaʼ, na pɔsɔ́g tɛn pə́mmú na njɛ́ɛ áay a pəŋi a ongɛn wáam wó annam ábaan, ndəgiiʼkini kobodɛ́anɛ kɛ́lɛ́ nɛ́gɔŋ ɔmbɔ́ ná ntɛɔ́gɔ na pəŋi. Kɛ́lɛ lɛ́: A kə́mmú kó ndɛ́ɛ́ kiiʼkini kiimií a pəŋi, ntɛndɛ́ɛ́ kusig mɔɔd na mɔɔd.

³Polɛ anyɔ́ŋɛn kolɛŋ nga tɔgɛ́ɛ́ tóod tó ndɛɛ́ agosɔyɔ tólɛ tɔgɛ́ɛ́ tó túəgiim na Kilíʼtus, ngɔ́ɔ́? Táá nkə kɛ́ kíəbuúloodi náan aa kɛ́ɛnɛ kɛ́lɛɛ́ lɛ́: Kilíʼtus ɔdɛɔ́gɔ mɔɔd nyɔ́ alɛɛ́ ondɛbɛ́dáán na pəŋi. Náa, a kɛgaágadɛ kɛáŋan aa alɛɛ́ əguloodi toɛn tuə́ŋ.

⁴Ɛɛ́ɛ, kɛ́lɛ fɔ́lɔ́b lɛ́ ná páyɛ́mobáŋan a ɔmbásá, ayɛ́ɛ ondɛbɛ́dáán. Náa a toɛn tó Táán, alɛ ongóm. Pəsi tɛn, paladáán na nyɔ́lɛ́, tɛlɛ palɛbɛ́dáán. Náa, a kidíídí kɛáŋan, tɛlɛ́ɛ́ kolaa na nyɔ́lɛ́ a toɛn tó Táán.

⁵Ásóngɛ́an pəŋibáamɔɛ́d, púunə kolɛŋ nga fɔ́lɔ́b fɔ́lɔ́b poágɛn oʼto wááŋan na Táán. Poálɛŋ lɛ́ Yə́sus Kilíʼtus alɛ na pəŋi, ngɔ́ɔ́? Əgín wɔʼkɔ́ podɛɔ́gɔ pə́guloodi lɛ́ poágɛn oʼto wááŋan na Táán.

⁶Náa a mɛ, ndɛ agomɛna pɛda lɛ́ puəgəə́liʼtini lɛ́ pəsi tiílóódi lɛ́ tɛágɛn oʼto na nyɔ́lɛ́.

⁷Tɛlɛ ɔgɔɔ́sɔ́gɔlɔn Táán lɛ́ podɛnjɛ́ɛ́lɛ kɔbɛ́. Adɛ́njaŋ lɛ́ tɛlɛ anyɔ́ŋɛn kuloodi lɛ́ tiɛ́lɛŋ kugud a pəŋi, ndóo. Nkə kiim kɛ́ tɛlɛɛ́ anyɔ́ŋɛn kɛ́lɛ lɛ́: Ɔmbɔ́ pádála lɛ́ pəsi tindoodini lɛ́ tɛlɛ pɔɔ́n pá maʼtom pá fɔ́lɔ́b, pəŋi póɛlɛ kɔŋɛʼ

⁸lɛ́ tɛdɛɔ́gɔ págaádádɛg agɛɛlɛ lɛ́ fɔ́lɔ́b ɛ Táán ɛdɛndón. Tigóódi əgín agá toɛn tóonɛ lɛ́ tíɛlɛ nkə kɛ́ kɛ́lɛɛ́ fɔ́lɔ́b.

⁹Pəsi tɛmaʼkɛɛn lɛ́ tɛlɛ palɛbɛ́dáán, pəŋi panasáán, tɛlɛ na tɔnyɔ́g. Pɛɔ́sɔ́gɔ́lɔ́n piə́s pɛ́lɛ anɛ́ɛ́n lɛ́ pəŋi póɛn fiɛ́d na kibuu.

¹⁰Kólɛ́ aa, ɔmbɔ́ ná tigə́ligíí laálá na pəŋi, mbə́budílən nufuuʼ nóonɛ lɛ́ ndɛ anyɔ́ŋɛn lɛ́ ná ndə́giim, mpoóboan lɛ́ puə́ʼkəə́suʼki, ntɛɛ́bosásan lɛ́ Sə́dúk adɛnyɛɛ́ʼkɛnɛn toɛn tóonɛ lɛ́ mpoyósag. Ndóo, tólɛ lɛ́ mpoyɛ́ɛlɛ pógon a kəə́liʼtiniʼ.

¹¹Nɛ́gɔŋ yɛ́ɛnɛ, pomóŋŋí, áoó áan áaá! Nyɔ́gáan, púunə kolaa ɔlaa wó ólɛɛ́ ɔŋŋɛʼ, kinig fiɛ́d. Poánasanɛ nkó pəŋi na pəŋi, póɛn unuʼ úmmuʼ, pólaa a uŋóón. Pomaʼkɛɛlɛ náan, Táán nyɔ́ alɛɛ́ na nnyɔ́ŋánán na pɔɔd, nyɔ́lɛ́ nyɔ́ aágɛɛ́ʼkɛnanan kiwiiyiʼ, aagɛɛn na pəŋi aá!

¹²Púsoyidənəni pəŋi na pəŋi lɛ́ sɔ́g əə́gəə́gúlig sɔ́g a igog a nɛ́ niŋŋí aá! Pomóŋŋí pááŋan, pəə́liʼtiniʼ pá pálɛɛ́ káanɛ pɔ́nɔ́ mpuúsoyidi á!

¹³Sə́dúk Yə́sus Kilíʼtus áboyɛ́ɛlɛ pəŋi piim kɔŋɛʼ á! Táán yɛ́ɛn na nnyɔ́ŋánán na pəŋi aá! Uŋun wó Ufúlúʼtú óoboyɛ́ɛlɛ tɛn lɛ́ póɛn paladáán áaá!