Read Yambeta 2 Kɔlɛ́ɛnt 2 Bible Online

2 Kɔlɛ́ɛnt 2 - Yambeta bible

2 Kɔlɛ́ɛnt 2

¹Taa, a oʼto wóow aa nyiísə́ə́ lɛ́ ntiə́gimbuúlini a pəŋi agɛɛlɛ lɛ́ ntiyíʼkíni koboyɛ́bɛ ɔʼtɛ́m.

²Kɛ́lɛ lɛ́, mɛ mbaʼkoboyɛ́ɛlɛ pəŋi lɛ́ ɔʼtɛ́m wááŋan ógany, nyɔ́ aágɛnyɛɛ́ʼkɛn mɛ tɔnyɔ́g adɛágɛɛn kɔ. Mɔɔd nyɔ́ mɛ mbɛ́ɛ́lɛ lɛ́ ɔʼtɛ́m wə́ə́ŋ ógany, nyóon alɛ ogɛnyɛɛlɛ lɛ́ mɛ nyɛ́ɛn na tɔnyɔ́g á? Ndóo.

³Oʼto ó kɛbán wó njíbudílən a wólɛ́ a wóow náan wɔnɔ́ ná nyiídílə[5] Ntɛʼkɛ́ɛ anyɔ́ŋɛn lɛ́ mbəʼkiim a pəŋi, pɔɔd pá pígóodi lɛ́ pɛ́nyɛɛ́ʼkɛn tɔnyɔ́g, pɛ́nyɛɛlɛ agá lɛ́ ɔʼtɛ́m wáam ógany. Mbálɛŋ, ntɛɔ́gɔ kɔ na isuŋ lɛ́ kɛnɛŋ kɛ́ mɛ ndɛɛ́ na tɔnyɔ́g, pəŋi piim tɛn polɛ na tɔnyɔ́g.

⁴Kɛnɛŋ kɛ́ njɛ́ɛ əgubuúdilən nufuuʼ nóon, ɔʼtɛ́m wáam óyɛ́ɛ ɔmbɛ́, wáano, pɛlɛɛ píəgisuu. Kɛ́dɛʼkɛ́ɛ lɛ́ ná mpoogányɛ ɔʼtɛ́m, ndóo. Kɛ́yɛ́ɛ agɛɛlɛ lɛ́ pólɛŋ wɔnɔ́ ná nnyɔ́ŋánán yɛ́ ndɛɛ́ na yɛ́lɛ́ na pəŋi ɛlɛɛ́ kɛlaŋanan.

⁵Kɛ́maʼkɛɛn lɛ́ nyummú a ondáŋ wááŋan ayɛ́ɛ́lɛ nkə kɛ́ kɛ́agɛɛ́ʼkɛn pɔɔd ɔʼtɛ́m kogany, adɛ́njaŋ mɛ áa ayɛ́nyɛɛlɛ lɛ́ ɔʼtɛ́m wáam ógany, pəŋi piim aa ayɛ́ɛ́lɛ náan lɛ́ ɔʼtɛ́m wááŋan ógany. Ndóo, tísələə́n lɛ́ ngab yimmú agá a ondáŋ wááŋan. Tɛdɛnjáágɛ məgúd a əndub.

⁶A ombod ó pɔɔd wɔnɔ́ wóow, kiə́dúú náan wɔnɔ́ ná piíŋ a ondáŋ wááŋan páyɛ́mosásan.

⁷Kólɛ́ aa nɛ́gɔŋ yɛ́ɛnɛ, pugódíí lɛ́ púmuúlisin, púumuúwiiyi ɔʼtɛ́m agɛɛlɛ lɛ́ ɔʼtɛ́m kogany wə́ə́ŋ wóow kɛ́fɔlɛ́ ódɛɛ́moyɛ́ɛ́lɛ lɛ́ ásɛmbɛlɛdɛ ɔmbɔg.

⁸Náan aa ndɛɛ́ əgubuŋíən lɛ́ púmuúloodi lɛ́ polɛ na nnyɔ́ŋánán na nyɔ́lɛ́.

⁹Kɛ́lɛ lɛ́, oʼto ó kɛbán ɔmmɔɛ́d wó njíbudílən a wólɛ́ aa wóonɛ ólɛɛ́ lɛ́: Ndɛ anyɔ́ŋɛn kodála ɔʼtɛ́m wááŋan nga polɛ págɛnjoóbɛn a pɛbán piim.

¹⁰Nyɔ́ pəŋi puə́lisin kɔbɛ́ kó amɛ́ɛ́lɛ, mɛ tɛn mbə́mulísin kólɛ́. Mɛ mbəʼkumuúlisin, (náan wɔnɔ́ ná mbə́ʼkumuyúlisinií) kɛ́lɛ a oʼto wááŋan, a udi ó Kilíʼtus.

¹¹Tɛyɛ́ɛ́lɛ náan lɛ́ ná Sáʼtan adɛnjɔ́ɔ́ŋ ngə́ na pəsi. Tɛálɛŋ mafɛgaʼ mə́ə́ŋ wɔnɔ́ ná málɛɛ́.

¹²Náan aa njɛ́ɛ́n əgiig a Tolówa lɛ́ ndɔɛgɛ Tɔsɔm Tólaŋ tó Kilíʼtus. Ɔmbɔ́ ná nyɛɛ́dála lɛ́ Sə́dúk əmímbuənin ngə́ lɛ́ nyɛ́ɛlɛ pigólí,

¹³ɔʼtɛ́m wáam ódɛʼkɛ́ɛ yəə́b lɛ́ ntɛʼkáaboan móŋŋí waam Tíid kɔ. Kólɛ́ aa nyɛɛ́ság kaábɛg pəə́liʼtiniʼ pá a Tolówa, mbádɛ́ɛ́mɛn agɛɛn a Masɛdowáan.

¹⁴Tiɛ́ʼkɛnaan pisoyidiʼ na Táán lɛ́ alɛ əgibisúidə pɛnɛŋ piim agɛɛlɛ lɛ́ tísiəd ngab a nɛlon nɛ́ Kilíʼtus yɛɛ́lón ombɔg a mɔɛn. Nyɔ́lɛ́ nyɔ́ amɛ́ɛ́lɛ lɛ́ pəsi tíɛlɛ, pálɛŋ Kilíʼtus kɛnɔ kiim wɔnɔ́ lamɛ́ndaʼ yɛ́ kiluu kiə́ŋ kɛ́lɛɛ́ agaálam kɛnɔ kiim.

¹⁵A noá na Táán, kɛ́lɛ lɛ́ pəsi aa tɛlɛɛ́ wɔnɔ́ kiluu kɛ́ Kilíʼtus kɛ́laŋ a pá pálɛ́ɛ́ kɔɔyɛɛ́ na a pá pálɛ́ɛ́ kunímíí.

¹⁶A pá pálɛ́ɛ́ kunímíí, kɛ́lɛ kiluu kɛ́ kɛbɛ́ kɛ́ kíənug kugu, kíəgiim na kugu. A pá pálɛ́ɛ́ kɔɔyɛɛ́, kɛ́lɛ kiluu kɛ́ ɔlaa, kiluu kɛ́ kíəgiimin mɔɔd na ɔlaa. Ánɛ anɛ́ɛ́n áa alɛɛ́ ogɛɛlɛ pigólí wɔnɔ́ pɛ́ɛb əə́?

¹⁷Kɛ́lɛ lɛ́, pəsi tɛdɛɔ́gɔ wɔnɔ́ ɛ́fɔlɛ́ yímmú yɛ́ ɛ́lɛɛ́ agɛɛlɛ undunə́ na Tɔsɔm tó Táán. Pəsi, tɛlɛ agosɔyɔ nkə kɛ́ kɛ́adɛ́ʼtɛg Táán lɛ́ nyɔ́lɛ́ aa ayɛ́bɛɛdóm. Tɛlɛ agosɔyɔ kɛ́lɛ́ a sáád, a udi wə́ə́ŋ, paladáán na Kilíʼtus.