Read Yambeta 2 Kɔlɛ́ɛnt 3 Bible Online

2 Kɔlɛ́ɛnt 3 - Yambeta bible

2 Kɔlɛ́ɛnt 3

¹Nkə kɛ́ɛg kɛ́ ndɛɛ́ əgusəə kióloodi anyóon lɛ́ tɛlɛ əguunə kə́mmú kəə́səə pəsibáamɔɛ́d lɛ́ tɛlɛ pɔɔd pálaŋ oóm? Oó kɛ́lɛ lɛ́ tɛlɛ əguunə lɛ́ pɔɔd aa pábɛyɛ́ʼkɛnɛɛ́ ombod ó nufuuʼ wɔnɔ́ wóow əə́? Ɔmbɔ́ lɛ́ pəŋi aa póbɛyɛ́ʼkɛnɛɛ́ nólɛ́ agɛɛlɛ lɛ́ tíɛn na nólɛ́ a nó pɔɔd pɛ́ndɛ́ŋ wɔnɔ́ ná pɔsɔ́g pə́mmú pálɛɛ́ agɛɛlanɛ ə́?

²Pəŋi aa polɛɛ́ nufuuʼ nuə́s. Nólɛ nudiídílə́ a ntɛ́m yəəs. Ungim aálɛŋ nólɛ, alɛ ogobana.

³A niə́siəd nɛáŋan, puóloodi moááŋ lɛ́ polɛ nufuuʼ nó Kilíʼtus əə́dilə, pəsi timə́yiim na nólɛ́. Nódɛɔ́gɔ nufuuʼ nó númə́dílə́ə́ na tíndiʼ, nólɛ nudiídílə́ na Uŋun ó Táán nyɔ́ alɛɛ́ a ɔlaa. Nufuuʼ nóon, adɛ́njaŋ a pɛsaa pɛ́ aʼtáán áa núyə́dílə́ə́, náa, a ntɛ́m ɛ pɔɔd[6]

⁴Tɛlɛ agosɔyɔ náan lɛ́ tɛágɛn oʼto wə́ə́s ungim na Táán a niiŋ nɛ́ Kilíʼtus.

⁵Tɛdɛɔ́gɔ pə́gusəə lɛ́ oʼtom wɔnɔ́ wóow tɛlɛ págɛɛlɛ wólɛ́ a toɛn tuə́s tó pəsibáamɔɛ́d, ndóo. Nkə kɛ́ tɛlɛɛ́ págɛɛlɛ, toɛn tólɛ əgibiyíimin na Táán.

⁶Nyɔ́lɛ́ aa amábɛyɛ́ɛ́lɛ lɛ́ tíɛn pəgudin pá páalɔɛgɛ tɔsɔm tó nɛálad nɛ́ nɛwa. Nɛálad nɛ́ɛn nɛ́dɛ́agoob na pɛcɛm pɛ́ píyə́dílə́ə́. Náa, nɛ́agoob na Uŋun wó Ufúlúʼtú. Kɛ́lɛ lɛ́, pɛcɛm pɛ́ píyə́dílə́ə́, pɛ́agɛɛn na mɔɔd a kugu. Náa, Uŋun wólɛ́ wáagɛɛ́ʼkɛnanan ɔlaa[7]

⁷Pɛcɛm píyə́dílə́ə́ a aʼtáán, nugəm nó Táán nómɛ́ɛ nónom kɔ a kɛnɛŋ kɛ́ɛg. Udi ó Moyíis óyɛ́ɛ agonom a ombod wóonɛ lɛ́ pɔɔ́n pá Ɛ́sɛlayɛl pádɛʼkɛ́ɛ págaáʼkɛ kumuúbisin əngis[8] (Kɔmɔɛ́d lɛ́ konom kógo kóog kóyɛ́ɛ konom kó kóaman.) Kɛcɛm kɛ́ kɛ́agɛɛn na mɔɔd a kugu kɛ́maʼkɛɛn na nugəm nó nólɛɛ́ a ombod wóow əə,

⁸pɛnɛŋ pɛ́sɛ́g anɛ́ɛ́n na pigólí pɛ́ Uŋun wó Ufúlúʼtú wáagɛɛlɛ ə́!

⁹Nga pigólí pɛ́ pɛcɛm pɛ́ pɛ́yɛ́ɛ əgiimin pɔɔd na nsɔ́ɔ́ pɛ́yɛ́ɛ náan agonom na nugəm əə, pɛ́ pɛ́agɛɛlɛ lɛ́ mɔɔd álon anɛ́ɛ́n sáád a əngis á Táán, tuə́ áa pɛ́lɛ́ pɛ́lɛɛ́ pɛ́golɔb pɛ́diɛn na nugəm nó nómááyɛn nóon əə́?

¹⁰Tɛlɛ pə́gusəə sɛ́ɛb tɛɔʼkɔ́ nugəm nó noɛ́nom a kɛnɛŋ kɛ́ kalaʼ nódɛʼkɛ́ɛ yoom ɛ́gofɛg na nó nɛ́gɔŋ nó nómááyɛn.

¹¹Kɛ́lɛ lɛ́, nga pɛbán pɛ́ɛb pɛ́ kalaʼ pɛ́ pɛ́dɛʼkɛ́lɛɛ́ əguʼtə́ə pɛ́yɛ́ɛ agonom náan, pɛ́ pɛwa anɛ́ɛ́n pɛ́ pɛ́lɛɛ́ a pəliə́g pɛ́lɛ́ɛ́ konom agaáyɛn.

¹²Wɔnɔ́ ná tɛlɛɛ́ agomɛna pɛda náan, kólɛ́ aa tɛágɛ́nɛ́ɛ́ ɔʼtɛ́m wə́ə́s ungim kɔ.

¹³Pəsi tɛdɛɔ́gɔ agɛɛlɛ wɔnɔ́ Moyíis nyɔ́ əyə́gúbíí udi na kilə́ə́ agɛɛlɛ lɛ́ pɔɔ́n pá Ɛ́sɛlayɛl pádɛʼtála nɛman nɛ́ nugəm nóon nó núdiʼkə́ʼtə́líí[9]

¹⁴Náa, nsiŋ yɔɔbɔn iyə́gúbíí. Əgiim əgiig na nɛ́gɔŋ kɛ́ iligi əgín nkúbə́ə́n na kɛsom kɛ́ kilə́ə́ kɛ́ɛg, páabana pagálaʼtaʼ pá Nɛsɔ́g nɛ́ Kalaʼ, pádɛób. Əgín Kilíʼtus aa alɛɛ́ uguliogi kɛsom kɛ́ kilə́ə́ kɛ́ɛg.

¹⁵Ɛɛ́ɛ, əgiim əgiig na nɛ́gɔŋ kɛ́, kɛnɛŋ kiim kɛ́ pálɛ abana a kálaʼtaʼ ɛ pɛcɛm pɛ́ Moyíis, kilə́ə́ kɛ́lɛ əgubuugúb nsiŋ, pádɛób.

¹⁶Náa, əgín kɛnɛŋ kɛ́ mɔɔd aáʼkogasɛɛ́ ɔlaa, əə́ndəyə́ən Sə́dúk áa kilə́ə́ kɛ́ɛg kíədə́əŋ.

¹⁷Áanɛ nɛ́gɔŋ, Sə́dúk alɛ lɛ́ «Uŋun.» Kɛnɔ kɛ́ Uŋun ó Sə́dúk ólɛɛ́, a kɛnɔ kɛ́ɛg nkódánán ɛ kɛcɛm ɛdɛɔ́gɔ.

¹⁸Pəsi piim, nti yəəs ɛdɛɔ́gɔ nkúbə́ə́n. Nugəm nó Sə́dúk nólɛ agonom a yɛ́lɛ́ wɔnɔ́ a wəə́. Náan, tɛmáyaáyáan agɛɛn a kɛŋwáŋánán kɛ́ Sə́dúk, tɛ́ɛsan a nugəm nó nóagɛɛnanan yuudi na konom agaáyɛn náan. Táá pigólí pɛ́ Sə́dúk alɛɛ́ agɛɛlɛ aa pɛ́ɛb. Nyɔ́lɛ́ nyɔ́ alɛɛ́ Uŋun.