Read Yambeta 2 Kɔlɛ́ɛnt 4 Bible Online

2 Kɔlɛ́ɛnt 4 - Yambeta bible

2 Kɔlɛ́ɛnt 4

¹Táán áa ayɛ́bɛyɛ́ʼkɛn pigólí pɛ́ɛnɛ a kɔdɛ́ɛ ɔʼtɛ́m kuə́ŋ. Kólɛ́ aa tɛdɛʼkásɛmbɛlɛdɛɛ́ ombɔg a pɛ́lɛ́.

²Tɛɛ́sáŋɛ́nɛ kɛɛlɛ nkə kiim kɛ́ kɛ́lɛɛ́ a pɛɔsɛ́g, kiim kɛ́ kɛ́agɛɛ́ʼkɛn mɔɔd oʼto kono. Tidiə́lígə mɔɔd, tɛʼkasánɛ Tɔsɔm tó Táán. Ndóo, əgín fɔ́lɔ́b áa tɛlɛɛ́ agɛɛlɛ lɛ́ pɔɔd pálɛŋ moááŋ, ná a udi ó Táán, ɛ́nɛ́ mɔɔd álɛŋ a ɔʼtɛ́m wə́ə́ŋ a kaadɛ lɛ́ tɛlɛ pɔɔd pá sáád.

³Náa, kɛ́maʼkɛɛn lɛ́ Tɔsɔm Tólaŋ tó tɛlɛɛ́ alɔɛgɛ tólɛ wɔnɔ́ tólɛ tugúbə́ə́n, tólɛ náan əgín a pá pálɛɛ́ lɛ́ pə́ənim.

⁴Pɔsɔ́g póob náan pə́diə́gəə́liʼtini a oʼto wóonɛ lɛ́ Sáʼtan, táán yɛ́ a nsí yɛ́ɛnɛ yaágoɛ́n məŋun mɔ́ɔ́bɔn mbin. Amáboyɛ́ɛ́lɛ lɛ́ pádɛʼtála kisəə kɛ́ Tɔsɔm Tólaŋ. Kɛ́lɛ́ kɛ́ kióloodi nugəm nó Kilíʼtus nyɔ́ alɛɛ́ nyɔ́lɛ́nyɔ́amɔɛ́d a kifílí kɛ́ Táán.

⁵Kɛ́lɛ lɛ́, a nkə kɛ́ tɛlɛɛ́ alɔɛgɛ, adɛ́njaŋ pəsibáamɔɛ́d áa tɛlɛɛ́ agaálɔɛgɛ, ndóo. Sə́dúk Yə́sus Kilíʼtus aa tɛlɛɛ́ alɔɛgɛ. A kiə́s kɛ́ pəsibáamɔɛ́d, tɛlɛ lɛ́ tɛlɛ pəgudin pááŋan a oʼto ó Yə́sus

⁶lɛ́ Táán nyɔ́ yiísə́ə́ ɔnɔ́: «Kisəə kɛ́nom a mbin a kaadɛ[10]!» Nyɔ́lɛ́ tɛn aa ayɛ́ɛ́lɛ lɛ́ kisəə kiə́ŋ kɛ́nom a ntɛ́m yəəs agɛɛlɛ lɛ́ kɛ́moáŋɛ nsiŋ yəəs tɛ́lɛŋ nugəm nuə́ŋ nó nóanom a udi ó Kilíʼtus.

⁷Náa, pəsi pá tɛnyáŋɛ́nɛ́nɛ́ɛ́ tugúm tóod tɛlɛ wɔnɔ́ paʼtáasaʼ pá pɛ́ɛ́ma na nsí ɛ nɔmaʼ, agɛɛlɛ lɛ́ pɔɔd pádála lɛ́ kɛa kɛ́ kɛdám kɛ́ toɛn kɛ́ɛg, Táán áa alɛɛ́ na tólɛ́, adɛ́njaŋ pəsi.

⁸Tɛlɛ agonɛ ntɔ́b mbod ngim. Náa, ɛdɛbɛɛ́nyɔŋɛn. Ɛságág ɛ́lɛ na pəsi a ɔʼtɛ́m síɛ́ɛ́d. Náa, tɛdɛɔ́gɔ əgusúbíí ɔmbɔg.

⁹Pálɛ agɛbɛɛ́coʼkonɛ. Náa, Táán adɛbɛdóɛn. Pə́əbidə́əŋi a nsí. Náa, pə́dibiyíbə́nən.

¹⁰Wɔnɔ́ Yə́sus, kugu kólɛ əgibiínugin a niúd pɛnɛŋ piim agɛɛlɛ lɛ́ ɔlaa wə́ə́ŋ tɛn wóloodi na pəsi a nkó yəəs.

¹¹Kɛ́lɛ lɛ́, pəsi tɛlɛ poóm. Náa kugu kólɛ əgibiínugin a niúd pɛnɛŋ piim a oʼto ó Yə́sus, agɛɛlɛ lɛ́ ɔlaa wə́ə́ŋ wóloodi tɛn a nkó yəəs ɛ pɛlóŋ pɛ́ pɔɔd.

¹²Náan, kugu kólɛ ndúmiʼ na pəsi agɛɛlɛ lɛ́ pəŋi póɛn na ɔlaa.

¹³Kɔmɔɛ́d lɛ́, əgín wɔnɔ́ ná kɛ́lɛɛ́ kidiídílə́ lɛ́: «Njáág oʼto na Táán, kólɛ́ aa nyɛɛ́sɔ́yɔ[11]» Pəsi tɛn, a kəə́liʼtiniʼ kógo kóog kúmuʼ kó tigódíí, tɛmáág oʼto na Táán, kólɛ́ aa tɛlɛɛ́ agosɔyɔ.

¹⁴Kɛ́lɛ lɛ́, pəsi tɛálɛŋ lɛ́ Táán nyɔ́ ayóndɛ́gɛ Sə́dúk Yə́sus alɛ́ɛ́ kɛbɛyóndɛgɛ tɛn pəsi ondáŋ na Yə́sus nyóon, áyɛɛlɛ tɛn lɛ́ tɛ́lon a udi wə́ə́ŋ padɛ́lɛ́máán a ɛbá ɛ́ Yə́sus, ondáŋ na pəŋi.

¹⁵Ntɔ́b ngim yɛ́ tɛlɛɛ́ agonɛ, tɛlɛ anɛ yɛ́lɛ́ a kɔŋɛʼ koáŋan, lɛ́ ná Táán yɛ́ɛlɛnɛ ɛ́fɔlɛ́ ɛ́ pɔɔd kɔŋɛʼ. Náan pɔɔd páagɛɛn piíŋ pá páagɛɛ́ʼkɛn pisoyidiʼ na Táán, páyɛmonyáadɛ.

¹⁶Kólɛ́ aa tɛdɛɔ́gɔ əgusulií ɔmbɔg. Ɔmbɔ́ nkó yəəs yɛ́ɛnɛ ɛ pumog ɛlɛ agoyɛb sɔɔ́sɔɔŋ sɔɔ́sɔɔŋ, uŋun wə́ə́s ólɛ ongwa ɛ́nɛ́ wɔɔ́s.

¹⁷Ntɔ́b yɛ́ tɛlɛɛ́ agonɛ nɛ́gɔŋ, tɛmaʼkofɛg na kɛa kɛ́ nugəm kɛ́ a pəliə́g kɛ́ kɛ́lɛɛ́ agɛbɛɛboŋ, tɛadála lɛ́ ɛlɛ iyó

¹⁸lɛ́ nkə kɛ́ tɛlɛɛ́ agodam əngis a kɛ́lɛ́ kɛ́dɛɔ́gɔ nkə kɛ́ mɔɔd aádɛ́ʼtɛg, náa, kɛ́lɛ nkə kɛ́ mɔɔd adɛádálaá. Moom mó pálɛɛ́ agodɛ́ʼtɛg mólɛ moom mó móasan. Náa, mó pɔ́dɛɔ́gɔ agodálaá mólɛ́ mó mólɛɛ́ a pəliə́g.