Read Yambeta 2 Kɔlɛ́ɛnt 5 Bible Online

2 Kɔlɛ́ɛnt 5 - Yambeta bible

2 Kɔlɛ́ɛnt 5

¹Kɛ́lɛ lɛ́ tɛlɛ palɛŋáán lɛ́ ɔmbɔ́ pogó puə́s póonɛ pó tigódíí poálɛáŋ, pólɛ́ pó pólɛɛ́ wɔnɔ́ piób pɛ́ ɔmbáb pɛ́ tɛálaa a pɛ́lɛ́ a nsí yɛ́ɛnɛ, tigóódi a mɔɛn pogó pó pólɛɛ́ wɔnɔ́ toádɛʼ tó tólɛɛ́ a pəliə́g. Tódɛɔ́gɔ toádɛʼ tó mɔɔd aáwáag na ɔmbɔg. Tólɛ tó Táán aáwáag a pəliə́g nyɔ́lɛ́nyɔ́amɔɛ́d.

²Tɛlɛ agoʼkɛ́ma nɛ́gɔŋ[12] lɛ́ tɛlɛ anyɔ́ŋɛn na ɔʼtɛ́m wə́ə́s ungim lɛ́ ná tɛmásáʼtɛ́nɛ́nɛ́ɛ́ pogó puə́s pógo póob pó a mɔɛn áa póonɛ pó a nsí.

³Kɛ́lɛ lɛ́, nga tiə́níígin pogó pógo póob, məŋun mádɛndɛ́ɛ́ kɛɛn pusun iyó, áay lɛ́ fiɛ́d na nkó.

⁴Ɛɛ́ɛ, ɔmbɔ́ ɔlaa wə́ə́s wó a nsí yɛ́ɛnɛ na pogó puə́s póonɛ úʼtə́ə́ wɔnɔ́ nkə, tɛaʼkɛ́ma wɔnɔ́ pɔɔd pá pányáŋɛ́nɛ́nɛ́ɛ́ kɛa kɛ́ kɛnó. Adɛ́njaŋ lɛ́ tɛlɛ anyɔ́ŋɛn lɛ́ ná tiə́gú agɛɛlɛ lɛ́ tiə́diŋini pogó puə́s póonɛ pó a nsí, ndóo. Tɛlɛ anyɔ́ŋɛn kaásáʼtɛnɛn agá pó a mɔɛn agɛɛlɛ lɛ́ nkə kɛ́ kɛ́lɛɛ́ na ɔlaa ó pɛnɛŋ piim kɛ́mɛn nkə kɛ́ kíəgu.

⁵Táán nyɔ́lɛ́nyɔ́amɔɛ́d áa ayɛ́bɛbɔ́ŋɛn a ɔlaa wóow. Yɛɛ́yáŋ agɛbɛyɛ́ʼkɛn Uŋun wə́ə́ŋ agɛɛlɛ lɛ́ tɛdɛnjɛ́ɛ́n kɔ na isuŋ lɛ́ aabɛyɛ́ʼkɛn kɔŋɛʼ kó abɛyɛ́ngɛ́gɛ́nɛ́ɛ́.

⁶Náan anɛ́ɛ́n, tɛdɛɔ́gɔ kɔ na wɛɛ́y. Tɛálɛŋ lɛ́ ɔmbɔ́ tiʼtə́ə́ tuə́ a ɔlaa na pogó puə́s, tɛlɛ əgín laálá na kɛnɔ kɛ́ tɛlɛ́ɛ́ kolaalɛɛ́ na Sə́dúk

⁷lɛ́ ɔlaa wə́ə́s a nsí yɛ́ɛnɛ ólɛ ongɛɛ́yɛ́máán a nkə kɛ́ tɛágɛ́nɛ́ɛ́ oʼto a kɛ́lɛ́, adɛ́njaŋ a nkə kɛ́ tɛlɛɛ́ agodɛ́ʼtɛg.

⁸Tɛdɛɔ́gɔ anɛ́ɛ́n kɔ na wɛɛ́y ɔmbɔ́ sɔɔŋ. Nkə kɛ́ tɛlɛɛ́ agolaŋ kɔnyɔ́ŋɛn kɛ́lɛ lɛ́ tɛ́lon a pogó puə́s póonɛ agɛɛn ələndin a ɛbá ɛ́ Sə́dúk.

⁹Náa, nkə kɛ́ tɛlɛɛ́ anyɔ́ŋɛn agaáyɛn piim kɛ́lɛ lɛ́ tímugə́mmi kɛnɔ kiim kɛ́ tɛlɛɛ́. Kɛ́yɛɛn ɔmbɔ́ ná tɛlɛ a pogó puə́s póonɛ, ɔmbɔ́ palónáán a pólɛ́

¹⁰lɛ́ pəsi piim tɛlɛ́ɛ́ kodɛ́lɛm wɔɔ́s a pɛyɔm a udi ó Kilíʼtus. Áay, ɛ́nɛ́ mɔɔd alɛ́ɛ́ kɔɔŋ pɛsáábɔ́n pɛ́ a nkə kɛ́ yiígúd ɔmbɔ́ lɛ́ kɛ́ a kɔŋɛʼ, ɔmbɔ́ lɛ́ kɛ́ a kɔbɛ́, nyɔ́lɛ́ a nkó yɛ́ɛy[13]

¹¹Tɛálɛŋ nkə aa kɛ́lɛɛ́ kodammana Sə́dúk, kólɛ́ aa tɛlɛɛ́ əguunə lɛ́ pɔɔd pə́ə́liʼtini. Táán amábɛɛ́lɛ́ŋ əgín náanɛ moááŋ. Ndɛ agomɛna pɛda tɛn lɛ́ pəŋi pomábɛɛ́lɛ́ŋ moááŋ a ntɛ́m yaaŋan a kaadɛ.

¹²Tɛdɛágaágany kawa kawa kə́mmú a udi wááŋan. Náa tɛlɛ anyɔ́ŋɛn agá lɛ́ tɛ́boyɛ́ʼkɛn ngə́ yɛndɛ́ŋ igəə́gidən a igog a kidíídí kiə́s, póyɛɛn na nkə kɛ́ polɛɛ́ pə́guúlisini na pá pə́əgəə́gidən a igog a moyaa mó pɛbán mó na mɔɛn na mɔɛn, mó módɛɔ́gɔ əgimií a ɔʼtɛ́m.

¹³Kɛ́maʼkɛɛn lɛ́ pəsi tɛlɛ fɔ́lɔ́b piyəg, tɛlɛ piyəg a oʼto ó Táán. Tɛ́yɛɛn na nsiŋ, nsiŋ yəəs ɛlɛ a oʼto wááŋan.

¹⁴Kɛ́lɛ lɛ́, nnyɔ́ŋánán yɛ́ Kilíʼtus alɛɛ́ na yɛ́lɛ́ na pəsi aa ibigódíí, pəsi pá tɛdɛɔ́gɔ kɔ na isuŋ lɛ́ úmmuʼ súg áa yiígú a kidíídí kɛ́ ungim, áay lɛ́ mɔɔd ungim aa yiígú.

¹⁵Yiígú a kidíídí kɛ́ mɔɔd ungim agɛɛlɛ lɛ́ pá pálɛɛ́ poóm pə́diyíʼkíni kolaa a pɔ́lɛ́báamɔɛ́d. Pálaa a oʼto ó nyɔ́ yiígú əmə́yiʼkini kiim yóndɛg a kidíídí kɛɔ́bɔn.

¹⁶Áay anɛ́ɛ́n, tidiə́giʼkini kusiəd mɔɔd kə́mmú wɔnɔ́ ná pɔɔd pá a nsí yɛ́ɛnɛ pálɛɛ́ əgusiəd. Ɔmbɔ́ ná tiísiə́d Kilíʼtus kalaʼ wɔnɔ́ ná pɔɔd pá a nsí yɛ́ɛnɛ pə́yímusíəd, tɛdɛɔ́gɔ pə́gumuúsiəd kə́mmú náan nɛ́gɔŋ.

¹⁷Kɛnɛŋ kɛ́ mɔɔd aándɛɛ́ ondadáán na Kilíʼtus, nyóon aándɛ kiɛlɛ kɛ́ kɛwa. Nkə kɛ́ kiʼtug kɛ́ kɛ́yɛ́ɛ na nyɔ́lɛ́ kɛáʼkoman. Kɛ́ kɛwa aa kiə́ʼkusiədií oʼkɔɔ.

¹⁸Nkə kɛ́ɛg kiim na Táán áa kɛ́lɛɛ́ əgiim. Nyɔ́lɛ́ nyɔ́ a ngim ɛ Kilíʼtus ayɛ́bɛyɛ́ɛ́lɛ lɛ́ tíiʼkini kaálad na nyɔ́lɛ́, əmə́əbiícum oʼtom wóow ógɛɛlɛ lɛ́ pɔɔd pə́mmú páálad na nyɔ́lɛ́.

¹⁹Kɛ́lɛ lɛ́, a ngim ɛ kilíʼtus aa Táán yɛɛ́sán agɛɛlɛ lɛ́ yáálad na pɔɔd piim, fiɛ́d kodɛ́ʼtɛg mabɛ́ má páyɛ́ɛ́lánɛ. Amábɛɛdóm lɛ́ tɛ́lɔɛgɛnɛ pɔɔd tɔgɛ́ɛ́ tóod tó kaálad na pɔ́lɛ́.

²⁰Tɛándɛ nɛ́gɔŋ yɛ́ɛnɛ pɔɔd pá Kilíʼtus aádóm lɛ́ pɔ́sɔyɔ a niiŋ niə́ŋ. Kɛ́lɛ wɔnɔ́ Táán nyɔ́lɛ́nyɔ́amɔɛ́d áa aásán a nnuʼ yəəs agoboodɔ́ŋɔn. Alɛ agoboodɔ́ŋɔn a tɔgɛ́ɛ́ tóonɛ tó tɛlɛɛ́ agobodɛ́anɛ lɛ́ púiʼkini kaálad na nyɔ́lɛ́. A niiŋ nɛ́ Kilíʼtus, tɛmáboyɔ́sɔ́gɔ́lɔ́nɛ́ɛ́, iʼkíníən kaálad na Táán.

²¹Nyɔ́ adɛʼkáagɛɛlɛɛ́ kɔbɛ́, nyɔ́lɛ́ ogo agá aa Táán ayɛ́moyáág a oʼtɛ́lɛm wə́ə́s ó pəsi pɛɛlɛʼ mabɛ́ lɛ́ ná a ngim yəəŋ Táán ábɛyɛ́ɛlɛ tɛ́lon ɛgom fiɛ́d a udi wə́ə́ŋ.