Read Yambeta 2 Kɔlɛ́ɛnt 6 Bible Online

2 Kɔlɛ́ɛnt 6 - Yambeta bible

2 Kɔlɛ́ɛnt 6

¹Náan anɛ́ɛ́n, wɔnɔ́ ná pəsi tɛlɛɛ́ əgugud ondáŋ na Táán, tɛaboyɔ́sɔ́gɔlɔn: Pudisúúni kɔŋɛʼ kó ayɛ́boyɛ́ɛ́lɛ.

²Kɛ́lɛ lɛ́, Táán ɔnɔ́: «Ná kɛnɛŋ kɛ́ koboyɛ́ɛlɛ kɔŋɛʼ kɛ́yɛ́ɛ kɛándɛ kɔ, njóób pɛɔ́sɔ́gɔ́lɔ́n pɛáŋan. A wɔɔ́s wáam ógɔɔyɛ pɔɔd, njíím aboyɔ́ɔyɛ.» Taa, kɛnɛŋ kɛ́ kəə́liʼtini kɔŋɛʼ kó Táán áa kɛ́ɛnɛ. Wɔɔ́s ó kɔɔy aa wóonɛ naánɛ́[14]

³Tɛdɛɔ́gɔ anyɔ́ŋɛn lɛ́ ná pɔɔd pɔ́mɔ́ɔ́ŋ ɔsɛd na pəsi a pigólí pɛ́ tɛlɛɛ́ agɛɛlɛ. Kólɛ́ aa tɛdɛányɔ́ŋɛnɛɛ́ lɛ́ ná tiə́də́ə́ŋi mɔɔd nyɔ́ aándɛɛ́ a ngə́.

⁴Ndóo, a nkə kiim kɛ́ tɛlɛɛ́ agɛɛlɛ, tɛlɛ əguloodi lɛ́ tɛlɛ pəgudin Táán pá fɔ́lɔ́b. Tɛlɛ əguloodi náan agonóʼtan kó tɛlɛɛ́ agonóʼtan njəʼkə́nə́ní kɛ́fɔlɛ́, na ntɔ́b, na ɔʼtɛ́m kogany,

⁵na mbáámanan, na puog pó njaan pó tɛlɛɛ́ agonɛ[15], na a kɛnɛŋ kɛ́ pálɛɛ́ abaya pɔɔd lɛ́ pábɛɛ́nɔɛyɛ, na ɛdɔm yɛ́ tɛlɛɛ́ agodɔmɛla a pigólí, na pasááló pá pálɛɛ́ əgibibúnigəni, na njaan yɛ́ tɛlɛɛ́ əgubúlimən.

⁶Tɛlɛ oloodi lɛ́ tɛlɛ pəgudin Táán a niə́siəd niə́s nɛ́ fiɛ́d na kibuu, na agolɛŋ kó tɛálɛŋ nkə aa kɛ́lɛɛ́ fɔ́lɔ́b, na a nɛnóʼtan nɛ́ tɛlɛɛ́ agonóʼtan pɛbán, na a ɔʼtɛ́m ɔ́laŋ wó tigódíí, na a Uŋun wó Ufúlúʼtú wó ólɛɛ́ əgugud na pəsi, na a nnyɔ́ŋánán ɛ fɔ́lɔ́b yɛ́ ɛlɛɛ́ na pəsi,

⁷na a fɔ́lɔ́b yɛ́ tɛlɛɛ́ alɔɛgɛ, na a toɛn tó Táán tó tólɛɛ́ na pəsi. Tɛlɛ oloodi tɛn lɛ́ tɛlɛ pəgudin Táán a sáád yəəs a əngis á Táán. Sáád yɛ́ɛy aa ɛlɛɛ́ iduə́m yɛ́ tɛlɛɛ́ agonɔɛyɛ na yɛ́lɛ́, tɛágaánɔna na yɛ́lɛ́.

⁸Tɛlɛ tɛn lɛ́ páabɛnyáadɛ, páabɛsɛ́ɛdɛ; Páabɛɛdóga, páabɛɛ́gany; Pálɛ agɛbɛdɛ́ʼtɛg wɔnɔ́ pɔɔd pá pɛnyaʼ kɔmɔɛ́d lɛ́ tɛlɛ əgusəə fɔ́lɔ́b.

⁹Páabɛdɛ́ʼtɛg wɔnɔ́ pɔɔd pá pádɛ́alɛŋɛɛ́, kɔmɔɛ́d lɛ́ pámábɛɛ́lɛ́ŋ kɔŋɛʼ kɔŋɛʼ. Páabɛdɛ́ʼtɛg wɔnɔ́ pɔɔd pá pə́ndəgúú, kɔmɔɛ́d lɛ́ tiligi poóm. Pə́əbiíyəʼkəni, náa pádɛbɛyóón.

¹⁰Pálɛ agɛbɛyɛ́ʼkɛn ɔʼtɛ́m kogany, náa pəsi tɛlɛ pɛnɛŋ piim na tɔnyɔ́g. Pəsi tɛlɛ na osog, náa tɛlɛ agɛɛlɛ lɛ́ piíŋ pɛ́ɛn na tugúm. Tɛlɛ wɔnɔ́ pɔɔd pá póʼkódií yoom na yoom, kɔmɔɛ́d lɛ́ a fɔ́lɔ́b, yiim yáagoob na pəsi.

¹¹Pəŋi pɔsɔ́sɔ́g pə́ə́s pá polɛɛ́ a Kɔlɛ́ɛnt, tiyíbubuə́nin ntɛ́m yəəs, tɛɔ́sɔyɔ na pəŋi moááŋ.

¹²Tiyíbulóódi lɛ́ tɛlɛ na nnyɔ́ŋánán na pəŋi. Náa, pəŋi pudiʼkə́əbiíloodi pəsi lɛ́ polɛ agɛbɛnyɔ́ŋɛn.

¹³Ndɛ agosɔyɔ na pəŋi wɔnɔ́ na sɛ a mɔɔ́n ándɛ ɔ́ɔsɔyɔ na mɔɔ́n wəəŋ: Ɛlɛ́an tɛn wɔnɔ́ pəsi, púbiíbuənin ntɛ́m yaaŋan a fuʼ!

¹⁴Podɛyáládɛ́ɛ́ na pɔɔd pá pə́diə́gəə́liʼtinií. Tuə́ áa yoom yɛ́ ɛ́lɛɛ́ sáád ɛ́lɛɛ́ ɛ́gaálad na yɛ́ ɛ́lɛɛ́ ɛbɛ́ ə́? Tuə́ áa kɛmoámoáŋ kɛ́lɛɛ́ kɛ́ kaálad na mbin ə́?

¹⁵Ngóbánán igə aa ɛlɛɛ́ ɛgɛɛn kɔ lɛ́ na Kilíʼtus na Sáʼtan əə́?[16] Yoom igə aa ungəə́liʼtiniʼ na nyɔ́ ɔdɛɔ́gɔ ungəə́liʼtiniʼ pálɛɛ́ págodáŋananɛ ondáŋ a yɛ́lɛ́ ə́?

¹⁶Ngóbánán igə aa ɛlɛɛ́ ɛgɛɛn kɔ lɛ́ na uʼkóó ó Táán na puog pó ambog ə́? Kɛ́lɛ lɛ́, pəsi tɛlɛ uʼkóó ó Táán nyɔ́ alɛɛ́ a ɔlaa[17] Əgín wɔnɔ́ ná nyɔ́lɛ́nyɔ́amɔɛ́d yiísə́ə́ ɔnɔ́: «Ndɛ́ɛ́ kuləndin a kɛgaágadɛ kɛɔ́bɔn, ndɛ ntáŋana ondáŋ na pɔ́lɛ́. Ndɛ́ɛ́ kɛɛn Táán yɔɔbɔn, pɔ́lɛ́ pálɛ́ɛ́ kɛɛn ndɛg yaam.»

¹⁷Kólɛ́ aa Sə́dúk alɛɛ́ əgusəə ɔnɔ́: «Liógoon a ondáŋ ó pɔɔd póob, poáyáág a ɛbá. Podɛʼtɔ́bɔ yoom na yoom yɛ́ ɛ́lɛɛ́ kifuə́, ndɛ́ɛ́ kubuúsiəd kɔŋɛʼ.»

¹⁸Sə́dúk o toɛn tuim alɛ əgusəə tɛn ɔnɔ́: «Ndɛ́ɛ́ kɛɛn sɛ waaŋan. Pəŋi polɛ́ɛ́ kɛɛn pɔɔ́n páam pá pagɛ́ɛd na pá panɔ́mɛɛd[18]»